Hechos 20:1-38
20 Índo̱ nijxoo xkujndu, Pablo nindxaʼwún maguwáʼ xa̱bi̱i̱ Jesús. Nda̱wa̱á dí nixnúún tsiaki̱i̱ ga̱jma̱a̱ niʼtángawún ikhú ni̱jkha̱ náa Macedonia.
2 Índo̱ ni̱jkha̱ ranújngoo náa mbaaʼ rúʼko̱, ni̱jkha̱ raxnúún tsiaki̱i̱ xa̱bi̱i̱ Jesús bi̱ kúwá ikhí, ni̱jkha̱nú asndu náa Grecia.
3 Nixtáa ajtsú igu̱nʼ ikhí, mú índo̱ inu matsimuu barco mu maʼga náa Siria, judíos+ niri̱ya̱ʼ awan rí muxiyáa, ikha jngóo ikhaa niraʼwíí mata̱nga̱a̱ xígií náa Macedonia.
4 Bi̱ nagún gajmiún Pablo ni̱ndxu̱ún Sópater a̱ʼdióo Pirro bi̱ na̱ʼkha̱ náa Berea, Aristarco+ ga̱jma̱a̱ Segundo bi̱ naguwáʼ náa Tesalónica, Gayo ga̱jma̱a̱ Timoteo+ bi̱ naguwáʼ náa Derbe, ga̱jma̱a̱ Tíquico+ ma̱ngaa Trófimo+ bi̱ naguwáʼ náa mbayuuʼ Asia.
5 Ikhiin nigún ginuu ga̱jma̱a̱ niguáʼtuxu náa Troas.
6 Nda̱wa̱á dí nirígá Ndxo̱o̱ Pan dí Ragíʼdoo Levadura,*+ náa Filipos nitsimuxu barco, índo̱ niʼni witsu mbiʼi nixkami̱i̱xu náa Troas. Ikhí niguanúxu mbá juwan mbiʼi.
7 Timbá mbiʼi rí ndiyáa xmáná, índo̱ nigimbáanʼxu mu muphíʼtsu numuu rí Pablo maʼga̱a̱ i̱mba̱ néjtsuu, ikhaa mbaʼa rí nigíʼdu̱u̱ niʼthún bi̱ kúwá ikhí. Rí niʼthún ndijyúuʼ asndu tikhu mbruʼun,
8 náa guʼwá rijma̱a̱ náa nigimbáanʼxu nakhamuu mbaʼa aguʼ.
9 Náa ventana gíʼ mbáa dxámá bi̱ mbiʼyuu Eutico bi̱ nimbumuu niʼgu índo̱ Pablo xtáa raʼthí. Numuu dí niʼgu ikhaa jngóo nixpátriguíi asndu náa guʼwá dí ajtsú piso ga̱jma̱a̱ nikháñuu má índo̱ nixujxi̱i̱.
10 Mú Pablo nigajtaa niginduti̱ga̱* náa kri̱ga̱a̱ ga̱jma̱a̱ ndiyáraʼaa.+ Ga̱jma̱a̱ niʼthí: “Xámíñála. Ikhaa tákháñuu”.+
11 Nda̱wa̱á nitsima̱a̱, nixpiʼta pan ga̱jma̱a̱ nigíʼdu̱u̱ ni̱ʼkhu̱. Niʼthí má xúʼko̱ asndu índo̱ nijtsi ga̱jma̱a̱ ikhú má ni̱jkha̱a̱.
12 Ga̱jma̱a̱ ndaʼya dxámá nigúun kuya̱a̱ ikhú ra̱ʼkhá tháán niʼni̱i̱ a̱jkiu̱ún.
13 Ikháanʼ nitsimuxu náa barco ni̱jkuáxu náa Asón, náa mbu̱ya̱a̱xu Pablo. Ikhaa niʼthúxu mu̱ni̱ rígi̱ numuu rí ikhaa nindoo maʼga ga̱jma̱a̱ rajkhúu asndu ikhí.
14 Índo̱ nixkamaxu náa Asón, nitsimuxu náa barco ga̱jma̱a̱ ni̱jkuáxu náa Mitilene.
15 I̱mba̱ néjtsuu nigájnuxu ikhí ga̱jma̱a̱ niguáju̱nxu náa ridoo xuajin Quíos. I̱mba̱ néjtsuu rí imbo̱o̱ mbiʼi niguájunxu mbá xngaa náa Samos, ga̱jma̱a̱ imbo̱o̱ mbiʼi nda̱wa̱á niguáʼnuxu náa Mileto.
16 Pablo niraʼwíí dí xáwi̱ji̱ náa Éfeso+ mu xágajyúuʼ náa mbayuuʼ Asia. Nicho̱o̱ numuu rí nindoo maʼga̱nú náa Jerusalén,+ mu ma̱ndoo maxtáa náa Ndxa̱a̱ Pentecostés.
17 Mú índo̱ Pablo xtáa náa Mileto nikuʼma ajngáa náa Éfeso mu mandxaʼwúún maguwáʼ bi̱ kuya̱ edxu̱u̱* náa nagimbíi̱n* ikhí.
18 Índo̱ nixkamamijnáá, niʼthún: “Ikháanʼ ndu̱ya̱a̱ májánʼ xú káʼnii ni̱ni̱ índo̱ nixtáá náa ikháanʼla asndu timbá mbiʼi dí ni̱ʼkhánú náa mbayuuʼ Asia.+
19 Ni̱ni̱ guabaminaʼ índo̱ ninindxu̱ʼ ñumbáá ndrígóo Tátá,+ ga̱jma̱a̱ nimbi̱ya̱ʼ, ma̱ngaa nimínuuʼ wéñuuʼ índo̱ xa̱bu̱ judíos nindúún muxiñún.
20 Maski ajndu xúʼko̱ táni a̱jma̱ a̱jkiu̱nʼ mu ma̱tala mbá rí mambáyala, ma̱ngaa nisngála náa inún mbaʼin xa̱bu̱+ ga̱jma̱a̱ náa mámbá guʼwá.+
21 Dí ni̱ni̱, ni̱thu̱u̱n mbá ajngáa kájxi̱ xa̱bu̱ judíos ga̱jma̱a̱ griegos rí ndayóoʼ dí matanga̱a̱ a̱jkiu̱ún náa dí raʼkhí nini̱+ ga̱jma̱a̱ rí matangi̱i̱n náa Dios ga̱jma̱a̱ rí muguáʼdáá fe náa Tátá Jesús.+
22 Mú xúgi̱ Dios najmuu espíritu santo* ndrígóo mu maxkajxu̱u̱n maʼgá Jerusalén, maski ajndu tséyóo dí gágíʼnuʼ ikhí,
23 náa mámbá xuajin rí na̱jkhá, Dios najmuu espíritu santo ndrígóo mu maʼthúnʼ dí muxudu̱u̱nʼ guʼwá e̱jua̱nʼ ga̱jma̱a̱ dí mamínuuʼ.+
24 Mú tsixmiéjunʼ ga̱jma̱a̱ numuu vida ndrígóʼ, i̱ndó nandoʼ manimbánuu rí kaʼyoʼ ma̱ni̱+ ga̱jma̱a̱ ñajunʼ dí nigruígú náa Tátá Jesús, ñajunʼ rígi̱ nindxu̱u̱ dí mataráʼa ajngáa rí májánʼ ga̱jma̱a̱ numuu rí májáanʼ a̱jkiu̱u̱n Dios.
25 Mú xúgi̱ nda̱yo̱o̱ rí nimbáa dí ikháanʼ, bi̱ ni̱thu̱u̱n ga̱jma̱a̱ numuu Xa̱bu̱ Ñajunʼ ndrígóo Dios* ní xátanga̱a̱ mbaʼyoʼ.
26 Ikha jngóo nandxa̱ʼwa̱laʼ mu mbu̱ya̱a̱ rí xúgi̱ ikhúún ragúʼdoo aʼkhúnʼ ga̱jma̱a̱ numuu eʼdiún xúgíinʼ xa̱bu̱,+
27 numuu rí táni a̱jma̱ a̱jkiu̱nʼ mu ma̱tala xúgíʼ rí nandoo Dios mbu̱ya̱a̱la.+
28 Guñeumíjna̱ má ikháanʼla+ ga̱jma̱a̱ guñewu̱u̱n mugu̱, numuu rí espíritu santo nigruigáanʼ ikháanʼla mu muñewu̱u̱n*+ ga̱jma̱a̱ muxnu̱u̱n ikha mugiu̱u̱* Dios,+ ikhaa mínaaʼ niʼtsiwíin ga̱jma̱a̱ eʼdiuu A̱ʼdióo.+
29 Nda̱yo̱o̱ rí índo̱ gáʼgáaʼ matu̱ʼu̱u̱n náa ikháanʼla lobos* bi̱ najmangu̱u̱nʼ+ bi̱ xágáwíinʼ a̱jkiu̱ún kuñún mugu̱,
30 ga̱jma̱a̱ náa majña̱la ikháanʼ magajnún xa̱bu̱ bi̱ muthi ajngáa dí ragájkhun mu muninduwiinʼ xa̱bi̱i̱ Jesús, ga̱jma̱a̱ magún kidxu̱únʼ ikhiin.+
31 Ikha jngóo gakuwáanʼ xawii ga̱jma̱a̱ garmáʼáan a̱jkia̱la rí mbá ajtsú tsiguʼ,+ mbiʼíí mbruʼun ga̱jma̱a̱ asndu xtambi̱ya̱ʼ tániʼñúuʼ raxnala consejo mámbáa dí ikháanʼla.
32 Rí xúgi̱ naniʼñúuʼ rí Dios mañe̱wa̱nla ga̱jma̱a̱ ajngáa náa naʼthí dí ikhaa nindxu̱u̱ májánʼ wéñuuʼ a̱jkiu̱u̱n, ga̱jma̱a̱ mambáyala, ajngáa rúʼko̱ gámbáʼtoo kamba̱a̱ mu makhánala rí Dios nikudaminaʼ maxnún bi̱ niwaxtaʼwíin.+
33 Nditháan tánigu̱ʼ plata ni oro ni má xtíñuu nimbáa.+
34 Ikháanʼ ndu̱ya̱a̱ dí ikhúún má niñejunʼ mu makánuʼ dí ndayóʼ,+ ga̱jma̱a̱ mu maxnu̱u̱n rí nda̱ñúunʼ bi̱ jngruigoʼ gajmíʼ.
35 Náa xúgíʼ rígi̱ nisngajmála rí gíʼmaa muñajunʼ gakhi̱i̱+ mu mumbáñún bi̱ guabiinʼ, ga̱jma̱a̱ gíʼmaa marmáʼáan a̱jkia̱la ajngáa rígi̱ rí niʼthí Tátá Jesús: ‹Rígá itháan gagi dí maraxna̱+ ki xóo dí makánaa’›”.
36 Índo̱ guámbóo niʼthí rígi̱ nismbáti̱go̱o̱ gajmíi̱n xúgíinʼ ga̱jma̱a̱ niʼtájkháan.
37 Ikhú xúgíinʼ nimbi̱ya̱ʼ ga̱jma̱a̱ ndiyaraʼaa Pablo* ga̱jma̱a̱ nixnáá beso,
38 numuu rí kúwá ngíná ga̱jma̱a̱ numuu dí niʼthún dí ní xátangi̱i̱n mbuyáá.+ Nda̱wa̱á nigún gúniña̱a̱nʼ asndu náa barco.
