Hechos 2:1-47
2 Mbiʼi dí rígá Ndxa̱a̱ Pentecostés,*+ mbóó kúwíin xúgíinʼ.
2 Nda̱a̱ tsu̱ma̱ niwán mekhuíí xóo índo̱ naxnúu mbá giñánʼ gakhi̱i̱, niwán náa guʼwá rí tri̱ʼi̱i̱n.+
3 Ikhú ndiyáá xóo riʼyu̱u̱ aguʼ rí ni̱jkha̱ ratrámáʼ náa edxu̱ún mámbíin rí ikhiin.
4 Xúgíinʼ nindrigú espíritu santo*+ ga̱jma̱a̱ nigi̱ʼdi̱i̱ nithi mixtiʼkhu ajngáa, xó má espíritu santo niʼniratiin muthi.+
5 Nákha ikhú náa Jerusalén kúwi̱i̱n judíos bi̱ nduyamajkuíí Dios bi̱ kúwá náa xúgíʼ tsu̱du̱u̱ numbaaʼ.+
6 Ikha jngóo índo̱ niwán rígi̱, ikhú mbaʼin xa̱bu̱ nigimbíin ga̱jma̱a̱ niʼniún tsiánguá índo̱ ndiyáá rí xa̱bi̱i̱ Jesús nuthi ajngún.
7 Ikhú ra̱ʼkhá tháán niʼniún tsiánguá ga̱jma̱a̱ nithi: “Gu̱ya̱a̱, lá raʼkháa xúgíinʼ bi̱ kúwá ruthi ni̱ndxu̱ún galileos ráʼ.+
8 Mú, náá numuu rí mámbáa dí ikháanʼlú naʼdxaun ajngóo rá.
9 Numuu rí gi̱i̱ kúwá xa̱bu̱ partos, medos+ ga̱jma̱a̱ elamitas,+ xa̱bu̱ bi̱ naguwáʼ náa Mesopotamia, náa Judea ga̱jma̱a̱ náa Capadocia, náa Ponto ga̱jma̱a̱ bi̱ naguwáʼ náa Asia,+
10 náa Frigia náa Panfilia, náa Egipto ga̱jma̱a̱ náa mbayuuʼ Libia rí naguanúu mijngii náa Cirene, xa̱bu̱ bi̱ naguwáʼ náa Roma, xó má judíos ga̱jma̱a̱ bi̱ nurtajximíjna̱a̱ judíos,+
11 cretenses ga̱jma̱a̱ árabes, xúgiáánʼ ikháanʼlú niʼdxawíín náa ajngúlú mbaʼa rí mitsaanʼ* dí niʼni Dios”.
12 Ikha jngóo xúgíinʼ niguanún tsiánguá ga̱jma̱a̱ nitamijná: “Ndiéjunʼ lá eyoo gáʼthúu̱n rígi̱ rá.”
13 Mú eʼwíinʼ nitsijmiin ga̱jma̱a̱ nithi: “Najngi̱i̱n bugi̱”.
14 Mú Pedro niwi̱ji̱ gajmíi̱n bi̱ mbá 11,+ ga̱jma̱a̱ xígu nithúún xa̱bu̱: “Ikháanʼla xa̱bu̱ Judea ga̱jma̱a̱ xa̱bu̱ Jerusalén, guʼgíʼ májánʼ edxa̱la mudxawíín rí na̱tha̱ ga̱jma̱a̱ gu̱ya̱a̱ rígi̱.
15 Rí phú gajkhun, xa̱bu̱ bugi̱ tséjngi̱i̱n xó má ikháanʼ ekumalá, numuu rí inu má mbayáa las 9 rí miʼcha̱.
16 Dí phú xtáa rarígá, nindxu̱u̱ rí niʼthí profeta* Joel:
17 Dios niʼthí, ‹náa rí iwáá mbiʼi maxidírámuuʼ espíritu santo ndrígóʼ náa xúgíinʼ enii xa̱bu̱. E̱jñu̱ún ga̱jma̱a̱ wa̱ʼxiúúnʼ mutari̱ya̱ʼ dí marigá nda̱wa̱á, jiámá marigá dí mawasngájmúún,* xabuanii maguaʼdáá xnuʼndaa,+
18 asndu náa xa̱bekha ga̱jma̱a̱ gu̱ʼu̱ bi̱ nindxu̱ún ñumbáá ndrígóʼ maxidírámúunʼ espíritu santo ndrígó’ náa ikhiin mbiʼi rúʼko̱ ga̱jma̱a̱ ikhiin mutari̱ya̱ʼ.+
19 Ma̱ni̱ milagros dí itháan mba̱ʼu̱ náa mekhuíí ga̱jma̱a̱ náa tsu̱du̱u̱ ku̱ba̱ʼ: Marigá eʼdi, aguʼ ga̱jma̱a̱ gúní.
20 A̱jkha̱ʼ maʼni kínáa, ga̱jma̱a̱ gu̱nʼ maʼni̱i̱la eʼdi, nákha xóó tséʼkha̱ mbiʼi kiejuunʼ ndrígóo Jeobá.*
21 Ga̱jma̱a̱ xúgíinʼ bi̱ gúgriga̱a̱ mbiʼyuu Jeobá* makáwíin›.+
22 Gudxawíín rígi̱ xa̱bu̱ Israel: Jesús bi̱ na̱ʼkha̱ náa Nazaret, Dios nikungua̱a̱nʼ ga̱jma̱a̱ nisngájma rígi̱ índo̱ niʼni milagros dí itháan mba̱ʼu̱ náa ikháanʼla+ xó má ikháanʼ ndu̱ya̱a̱la.
23 Dios ndiʼyoo asndu nákha ginii dí Jesús murajtuwiin, ikhaa rúʼko̱ rí Dios nindoo marigá,+ ikháanʼ nidujmala náa ixi̱, náa ñawúúnʼ xa̱bu̱ ra̱míjíinʼ* ga̱jma̱a̱ nixíya̱a̱la.+
24 Numuu rí Dios niʼni kríya̱a̱ʼ índo̱ nigabi̱i̱*+ náa majñu̱únʼ wajinʼ,* numuu rí ikhaa na̱nguá kaʼyoo maxtáa náa iñá wajinʼ.+
25 Numuu rí David naʼthí ga̱jma̱a̱ numuu ikhaa: ‹Jeobá* xtáa má xúʼko̱ ga̱jma̱á nindxu̱ʼ, numuu rí ikhaa xtáa náa níjniú mújúnʼ, nda̱a̱ nimbá rí magíʼnuʼ.
26 Ikha jngóo nidxuu a̱jkiu̱nʼ, nixtáá gagi índo̱ ni̱tha̱. Marigá rí magúʼthu̱u̱n,
27 numuu rí xátatsiʼñúʼ náa Iñá wajinʼ,* ní xátatsiʼñááʼ rí xuyuuʼ xa̱bia̱a̱ʼ bi̱ naʼni rí jmbu mi̱ga.+
28 Nitani̱ dí maniʼnúuʼ kamba̱a̱ dí maʼni maxtáá. Matani̱ dí maʼdxuʼ náa inaaʼ›.+
29 A̱ngui̱nʼ guniʼñúʼ ma̱tala pa̱jnu ga̱jma̱a̱ numuu wajin xiʼñúlú David, bi̱ nikháñuu ga̱jma̱a̱ nijuiʼdi̱i̱,+ ga̱jma̱a̱ iñá wajñuuʼ rígá asndu mbiʼi xúgi̱ náa ikháanʼlú.
30 Numuu rí ninindxu̱u̱ profeta ga̱jma̱a̱ ndiʼyoo rí Dios nixná ajngóo, dí mbáa bi̱ ma̱ʼkha̱ náa ikhaa magi̱ʼi̱ náa xíliu̱u̱,+
31 wapháá ndiʼyoo rí Cristo magabi̱i̱ʼ ma̱ngaa niʼthí ga̱jma̱a̱ numuu rígi̱, niʼthí rí ikhaa táguanúu náa Iñá wajinʼ* ni má tígá xuyuuʼ.+
32 Dios niʼniga̱bi̱i̱ Jesús, ga̱jma̱a̱ xúgiáanʼ ikháanʼ nduʼyáálú.+
33 Ikha jngóo, numuu rí ikhaa ni̱jkha̱a̱ náa níjñu mújúunʼ Dios,+ ga̱jma̱a̱ nigruigú espíritu santo rí Anu̱u̱* niʼthí maxnúu,+ ikhaa nixídirámuuʼ rí ikháanʼla ndu̱ya̱a̱ ga̱jma̱a̱ nudxawíín.
34 Numuu rí David táʼga̱a̱ mekhuíí, mú ikhaa má minaaʼ niʼthí: ‹Jeobá* niʼthúu̱n Tátioʼ: “Araʼwún náa níjniú mújúnʼ
35 asndu índo̱ gáni̱ rí xa̱bu̱ sia̱nʼ ndrígáaʼ mani̱ndxu̱ún xóo ixi̱ náa matasngutámáʼ rajkuáaʼ”›.+
36 Ikha jngóo, xúgiáanʼ ikháanʼ bi̱ kuwáanʼ náa Israel mbu̱ya̱a̱ kaʼwu rí Dios nigíiʼ Jesús xóo Tátá+ ma̱ngaa Cristo bi̱ ikháanʼ nidujmaa náa ixi̱”.+
37 Índo̱ nidxawíín rígi̱ asndu xóo ni̱ʼkhu̱ a̱jkiu̱ún, ga̱jma̱a̱ nirajxi̱i̱ Pedro ga̱jma̱a̱ eʼwíinʼ apóstoles: “A̱ngui̱nʼ, ndiéjunʼ gíʼmaa munixu rá.”
38 Pedro niʼthún: “Gatanga̱a̱ a̱jkia̱la,+ ga̱jma̱a̱ mámbáa dí ikháanʼ gíʼmaa dí majngúun iyááʼ+ ga̱jma̱a̱ mbiʼyuu Jesucristo, mu majngudi̱i̱ aʼkhála,+ ga̱jma̱a̱ mundrígú rí mamína̱a̱nʼ espíritu santo.
39 Numuu dí ikháanʼ kaʼyala dí nikudaminaʼ+ maʼni Dios ga̱jma̱a̱ náa e̱jña̱la, náa xúgíinʼ bi̱ kúwá mitsínguánʼ, náa xúgíinʼ bi̱ Jeobá* Dios ndrígúlú gádxaʼwún”.+
40 Ga̱jma̱a̱ niʼthún mbaʼa ajngáa, mu maʼthúún ajngáa rí májánʼ rí nindxu̱u̱ kájxi̱ ga̱jma̱a̱ nixnúún consejo rígi̱: “Gu̱ni̱ kríyami̱jna̱ náa xa̱bu̱ xkawi̱i̱nʼ bugi̱”.+
41 Ikha jngóo nijngún iyááʼ+ bi̱ kañiiʼ a̱jkiu̱ún nindrigú ajngáa rígi̱. Mbiʼi rúʼko̱ mbá 3,000 xa̱bu̱ ninindxu̱ún xa̱bi̱i̱ Jesús.+
42 Ga̱jma̱a̱ túniñaanʼ runigajmaa dí nisngáa apóstoles, nimbájxu̱u̱n,* nipiʼtsu mbóó+ ga̱jma̱a̱ nitajkháan.+
43 Xúgíinʼ xa̱bu̱ nigíʼdi̱i̱ ndiyamajkuíí Dios, ga̱jma̱a̱ apóstoles+ nigíʼdi̱i̱ nini mbaʼa rí mitsaanʼ ga̱jma̱a̱ milagros dí itháan mba̱ʼu̱.
44 Xúgíinʼ bi̱ nunimbu̱ún kúwá mbá kambájxu̱u̱n, ga̱jma̱a̱ nuxnamijná xúgíʼ rí guáʼdáá,
45 nugujua̱a̱ dí guáʼdáá+ ga̱jma̱a̱ mbañúúnʼ ma̱ngaa nuruiʼta̱a̱ dí nigimbóo xóo rí ndayóoʼ mámbáa.+
46 Mámbá mbiʼi nagimbíi̱n mbá xúgíinʼ náa guʼwá rí nduyamajkuíí Dios. Naphiʼtsu náa mixtiʼkhu guʼwá ga̱jma̱a̱ nuxnamijná ganitsu ga̱jma̱a̱ gagi ma̱ngaa ga̱jma̱a̱ xúgíʼ a̱jkiu̱ún,
47 nuni̱ mba̱a̱ Dios ga̱jma̱a̱ xúgíinʼ xa̱bu̱ nanigu̱u̱nʼ rígi̱. Xúʼko̱ má tsejtsíí mbiʼi Jeobá* nandxaʼwún xa̱bu̱ bi̱ maʼni káwíin.+
