Hechos 22:1-30
22 “Xabuanii ga̱jma̱a̱ a̱ngui̱nʼ, gudxawíín dí gúʼdoo ma̱tala ga̱jma̱a̱ numuʼ”.+
2 Índo̱ nidxawíín rí naʼthí ajngáa hebreo, ikhú niguanún itháan wíí. Ikhú ikhaa nigíʼdu̱u̱ niʼthí:
3 “Ikhúún ni̱ndxu̱ʼ judío.+ Nixtáá náa Tarso rí kaʼyoo Cilicia,+ mú Gamaliel+ niʼsngóʼ náa xuajin rígi̱. Nisngoʼ rí manimbánuu kuduun rí naʼthí náa Xtángoo ndrígu̱ún wajin xiʼñúlú+ ga̱jma̱a̱ ndiyamajkuu Dios ga̱jma̱a̱ xúgíʼ a̱jkiu̱nʼ xó má ikháanʼla nuni̱ mbiʼi xúgi̱.+
4 Nixkúún ga̱jma̱a̱ tikhuun nigudíin bi̱ kúwá náa kamba̱a̱ rí gajkhun rígi̱, niruʼwu̱u̱n ga̱jma̱a̱ nikuʼdíinʼ náa guʼwá e̱jua̱nʼ xa̱bekha ga̱jma̱a̱ gu̱ʼu̱,+
5 ndxajkun bi̱ phú kayá edxu̱u̱ ga̱jma̱a̱ xabuanii bi̱ kúwá náa xuajin rígi̱ ma̱ndoo mu̱tala rí gajkhun nindxu̱u̱ rígi̱. Ikhiin nixnuʼ i̱yi̱i̱ʼ mu maʼgá náa a̱ngiu̱lú bi̱ kúwá náa Damasco, náa ni̱jkhá gágui̱i̱n ga̱jma̱a̱ maru̱ʼu̱u̱n mu ma̱ʼkhá kagui̱i̱n Jerusalén mu maguma gíníi.
6 Índo̱ xtáá rajkhá kamba̱a̱, inu má maʼgánú Damasco naʼni xóo mbá ta̱pha̱ mbiʼi, mbá aguʼ nigajtaa mekhuíí ga̱jma̱a̱ nimbiʼijmún.+
7 Ikhú nixpátrigu̱u̱n mbayííʼ ga̱jma̱a̱ nidxawuun mbá aʼwá rí niʼthúnʼ: ‹Saulo, Saulo, náá numuu rí natraxkoʼ rá.›
8 Ikhúún niriʼñuu: ‹Tátá, tsáá nindxa̱a̱ʼ rá.› Ikhaa niʼthún: ‹Ikhúún ni̱ndxu̱ʼ Jesús bi̱ na̱ʼkha̱ náa Nazaret, bi̱ ikháán naraxkáá›.
9 Xa̱bu̱ bi̱ na̱jkhá gajmíʼ ndiyáá aguʼ, mú na̱nguá nidxawíín aʼwá rí xtáa raʼthúnʼ.
10 Ikhú ni̱thu̱u̱n: ‹Tátá, ndiéjunʼ gáʼyóoʼ ma̱ni̱ rá.› Ikhú Tátá niriʼñuʼ: ‹Atujxa̱a̱ʼ, ayuʼ Damasco ga̱jma̱a̱ ikhí gajuiʼtáanʼ xú káʼnii awan nigájnuu rí matani̱›.+
11 Numuu rí nánguá kruigo̱ʼ ga̱jma̱a̱ numuu aguʼ rí nimbiʼijmún, ikha jngóo xa̱bu̱ bi̱ na̱jkhá gajmíʼ nirajtuun ñawúnʼ, xúʼko̱ ni̱jkhánú asndu Damasco.
12 Nda̱wa̱á Ananías, mbáa xa̱bu̱ bi̱ naʼnimbánuu rí naʼthí náa Xtángoo, ma̱ngaa xúgíinʼ judío bi̱ kúwá ikhí nuthi rí májánʼ ga̱jma̱a̱ numuu,
13 ni̱ʼkha̱ gáʼyoʼ. Niwi̱ji̱ náa níjniúʼ ga̱jma̱a̱ niʼthúnʼ: ‹¡Ndxájuʼ Saulo, gambaʼta̱a̱ idaaʼ!›. Núkhu nimbaʼta̱a̱ iduʼ ga̱jma̱a̱ ndi̱yo̱o̱.+
14 Ikhaa niʼthúnʼ: ‹Dios ndrígu̱ún wajin xiʼñúlú niríña̱a̱nʼ ikháán mu matatsiʼnuuʼ rí nandoo ga̱jma̱a̱ mu ma̱ta̱ya̱a̱ Jesús bi̱ nindxu̱u̱ jmbii+ ga̱jma̱a̱ matadxawíín rí gáʼthí,
15 numuu rí ikháán nindxa̱a̱ʼ bi̱ maʼthúún xúgíinʼ xa̱bu̱ rí nitayáá ga̱jma̱a̱ rí nitadxawíín.+
16 Ikha jngóo, ndíjkha jngóo xta̱ʼti̱i̱n. Atujxa̱a̱ʼ, gajnguáanʼ iyááʼ ga̱jma̱a̱ Dios maʼni jngudi̱i̱ aʼkháanʼ+ índo̱ gátagríga̱a̱ mbiʼyuu Jesús›.+
17 Índo̱ nitangu̱ún náa Jerusalén+ ga̱jma̱a̱ xtáá ratajkáan náa guʼwá rí nduyamajkuíí Dios, ikhú nirígá mbá rí niwasngájmu’*
18 náa ndi̱yo̱o̱ ikhaa. Ga̱jma̱a̱ niʼthúnʼ: ‹Nacha̱, atagájnaaʼ náa Jerusalén, numuu rí xúnimbu̱ún rí gárata ga̱jma̱a̱ numuʼ›.+
19 Ikhúún ni̱thu̱u̱n: ‹Tátá, ikhiin nduyáá májánʼ rí ikhúún ni̱jkhá náa mámbá guʼwá rí bi̱ judíos nuxnáá gamajkhu Dios, nikuʼdíinʼ guʼwá e̱jua̱nʼ ga̱jma̱a̱ nixnu̱u̱n bi̱ nunimbu̱u̱n kuyaaʼ.+
20 Índo̱ kúwá ruxiyáa xa̱bia̱a̱ʼ Esteban, ikhúún nixtáá ikhí, ma̱ngaa májánʼ má ndi̱yo̱o̱ ga̱jma̱a̱ nixtáá rañawu̱u̱n xtíñún bi̱ nixiyáa›.+
21 Maski ajndu xúʼko̱, ikhaa niʼthúnʼ: ‹Ayuʼ, numuu rí makuʼmán mi̱dxu̱ʼ náa xuajin dí rígá mitsínguánʼ›”.+
22 Xa̱bu̱ nikúwá rudxawíín asndu índo̱ niʼthí rígi̱. Ikhú nindxa̱ʼwa̱ ga̱jma̱a̱ nithi: “¡Gakañúu xa̱bu̱ bugi̱, nda̱a̱ má numuu maxtáa!”.
23 Numuu rí kúwá rundxa̱ʼwa̱ ga̱jma̱a̱ nuda̱ʼ xtíñún ma̱ngaa nuda̱ʼ yujndaʼ náa inuu giñánʼ,+
24 ikhú bi̱ kayá edxu̱u̱ náa soldado niʼtáñajunʼ rí muxuda̱a̱ʼ Pablo náa kúwá soldado. Niʼthún rí muxpajtii mu ma̱ndoo maʼthí náá numuu rí xa̱bu̱ nundxa̱ʼwa̱ xúʼko̱ kaʼnii ga̱jma̱a̱ numuu ikhaa.
25 Mú, índo̱ inu muxpajtii, Pablo niʼthúu̱n mbáa soldado bi̱ wíji̱ ikhí: “Lá naniñuuʼ xtángoo ndrígala rí muxpajtíi mbáa xa̱bu̱ romano bi̱ xóó tséya̱a̱ á mu gíʼdoo aʼkhúun ráʼ.”+
26 Índo̱ niʼdxawuun rígi̱, ikhú soldado ni̱jkha̱a̱ gáʼthúu̱n bi̱ naʼtáñajúúnʼ soldado ga̱jma̱a̱ niʼthúu̱n: “Dí gátani̱ rá. Numuu rí xa̱bu̱ bugi̱ nindxu̱u̱ xa̱bu̱ romano”.
27 Ikhú bi̱ naʼtáñajúúnʼ soldado ni̱jkha̱ gáʼyoo ga̱jma̱a̱ nirajxu̱u̱: “Arathúnʼ, nindxa̱a̱ʼ xa̱bu̱ romano ráʼ.” Ikhaa niriʼñuu: “Xúʼko̱”.
28 Ikhú bi̱ naʼtáñajúúnʼ soldado niʼthúu̱n: “Ikhúún ndiyóoʼ ma̱ni̱ númuu mba̱a̱ mbújkha̱a̱ mu ma̱ndoo mani̱ndxu̱ʼ xa̱bu̱ romano”. Mú Pablo niʼthúu̱n: “Ikhúún ni̱ndxu̱ʼ xa̱bu̱ romano asndu nákha nigumún”.+
29 Ikhú, xa̱bu̱ bi̱ nigíʼ muni̱i̱ grajxe̱ ga̱jma̱a̱ bi̱ nigíʼ muxpajtii nitsíngumíjna̱ náa ikhaa. Ga̱jma̱a̱ bi̱ naʼtáñajúúnʼ soldado nimíñuu índo̱ ndiʼyoo dí nindxu̱u̱ xa̱bu̱ romano ma̱ngaa rí niroʼóo ga̱jma̱a̱ cadena.+
30 Numuu rí nindoo mbaʼyoo náa numuu rí bi̱ judíos nuxruiga̱a̱, ikha jngóo i̱mba̱ néjtsuu nikuʼma rí magimbíin ndxajkun bi̱ kuya̱ edxu̱u̱ ga̱jma̱a̱ xa̱bu̱ ede̱.* Ma̱ngaa ikhú niríya̱a̱ʼ Pablo niʼni rí maʼga ikhí ga̱jma̱a̱ nixnájxi̱i̱ náa inún ikhiin.+
