Letinye tikhonti taNkulunkulu letingakashadi titiva ngendlela lefanako. Tiyati kutsi Jehova ufuna tikhonti takhe tishade ‘eNkhosini kuphela,’ lokusho kushada nemaKhristu eliciniso. (1 Khorinte 7:39) Ngako yini leyenta lamanye emaKhristu ative ngalendlela?

EmaKhristu lativa ngalendlela acabanga kutsi banyenti bodzadze labangakashadi kunebazalwane labangakashadi. Emaveni lamanyenti loku kuliciniso. Nasi sibonelo: EKorea, emaphesenti langu-57 emaKhristu langakashadi bodzadze futsi emaphesenti langu-43 emaKhristu langakashadi bazalwane. EColombia, emaphesenti langu-66 emaKhristu bodzadze futsi emaphesenti langu-34 bazalwane.

Kuletinye tindzawo, batali labangasibo BoFakazi bangafuna emalobolo lemba ecolo nangabe emadvodzakati abo ashada. Kodvwa labanye bazalwane labangakashadi bangase bangakhoni kukhipha lamalobolo. Ngaleso sizatfu, labanye bodzadze bayakhatsateka ngekutsi batayitfola yini indvodza lengumKhristu. *—Fundza umbhalo longentasi.

Nangabe uke wativa ngaleyo ndlela, ciniseka kutsi Jehova uyasicondza simo lokuso futsi uyati kahle indlela lotiva ngayo.—2 Tikhronike 6:29, 30.

EBhayibhelini, Jehova usiyala kutsi sishade kuphela eNkhosini. Ngasiphi sizatfu? Ngobe uyati kutsi yini lencono ekuphileni kwetfu futsi ufuna kusivikela. Akafuni sitsatse tincumo letimbi letitasivisa  buhlungu nobe letingasenta singajabuli. Ngesikhatsi saNehemiya, emaJuda lamanyenti abeshada nebafati lebebangamkhonti Nkulunkulu. Ngaleso sizatfu Nehemiya wawakhumbuta ngesibonelo lesibi saSolomoni. “Abetsandvwe nguNkulunkulu wakhe, kangangobe Nkulunkulu wadzimate wamenta inkhosi etikwaso sonkhe sive sema-Israyeli, kodvwa noko wadvonseleka esonweni ngenca yekutsatsa bafati betive.” (Nehemiya 13:23-26) Jehova uyati kutsi imiyalo yakhe iyasisita futsi kungaleso sizatfu ayala emaKhristu kutsi ashade kuphela eNkhosini. (Tihlabelelo 19:7-10; Isaya 48:17, 18) Sijabula kakhulu ngobe usinika seluleko selutsandvo nalesingasetsemba. Nasimlalela Jehova njengobe anguMbusi, sisuke sivuma kutsi unelilungelo lekusitjela loko lokufanele sikwente.—Taga 1:5.

Ecinisweni, awufuni ‘kuboshelwa ejokeni’ nemuntfu longamtsandzi Jehova. Umuntfu lonjalo angakubangela kutsi uyekele kukhonta Nkulunkulu. (2 Khorinte 6:14) Seluleko saNkulunkulu sihlale sisebenta futsi ngekuhlakanipha emaKhristu lamanyenti lamuhla akhetse kulalela Jehova. Nanobe kunjalo, lamanye ente lokwehlukile.

Maggy longudzadze wase-Australia wacala kutsandzana nemuntfu longasiye umKhristu. * (Fundza umbhalo longentasi.) Utsi: “Ngalahlekelwa yimihlangano leminyenti kuze nje sibe ndzawonye. Buhlobo bami naNkulunkulu balimala kakhulu.” Ratana longudzadze losemusha wase-India watsandzana nemuntfu labefundza naye esikolweni lowacala kutadisha liBhayibheli. Kodvwa abetadisha liBhayibheli kuze nje atsandzane nalodzadze. Ekugcineni, Ratana wayekela kukhonta Jehova futsi waba lilunga lalenye inkholo kuze ashade nalelijaha.

Ndenguè waseCameroon abeneminyaka lengu-19 budzala ngesikhatsi ashada nendvodza lebeyingamkhonti Jehova. Ngaphambi kwekutsi bashade, lendvodza yametsembisa kutsi angachubeka anguFakazi. Nobe kunjalo, ngemuva kwemaviki lamabili bashadile, yamtjela kutsi akakavumeleki kuya emihlanganweni yelibandla. Ndenguè utsi: “Nganginesitunge futsi ngihlale ngidzindza sililo. Ngabona kutsi angisaphili ngendlela lengijabulisako. Bengitisola ngaso sonkhe sikhatsi.”

Kuliciniso kutsi lamanye emaKhristu ashade nebantfu labangamkhonti Jehova kodvwa labakahle futsi labanemusa. Nobe kunjalo, ngisho nobe loyo loshade naye longamkhonti Jehova anemusa, buhlobo bakho naJehova butawutsintseka njani? Utawutiva njani ngekwati kutsi awukasilaleli seluleko lakunikete sona kute ujabule? Ngetulu kwako konkhe, Jehova utativa njani ngaloko lokwentile?—Taga 1:33.

Bazalwane nabodzadze labasemhlabeni wonkhe labasilalele seluleko saJehova sekushada ‘eNkhosini kuphela,’ bayaciniseka kutsi bente sincumo lesihle. Bazalwane nabodzadze labangakashadi batimisele kujabulisa Jehova ngekutsi bashade nemuntfu lomkhontako. Michiko waseJapan abetimisele kulalela Nkulunkulu ngisho nobe tihlobo takhe tetama kumphocelela kutsi ashade nemuntfu longamtsandzi Jehova. Bekubuhlungu ngaye kubona labanye bangani bakhe bashada nemaKhristu eliciniso, yena solo angakashadi. Michiko utsi: “Ngangititjela kutsi njengobe Jehova ‘anguNkulunkulu lojabulako,’ injabulo yetfu ayiyi ngekutsi sishadile nobe cha. Ngikholelwa kutsi usinika loko lesikufisako. Ngako-ke nangabe singamtfoli loyo lesitawushada naye ngisho nobe sifuna kushada, kuncono kuhlale singakashadi kuleso sikhatsi.” (1 Thimothi 1:11) Ngekuhamba kwesikhatsi Michiko washada nemzalwane lokahle, futsi uyajabula ngekutsi wasilalela seluleko saJehova.

Bakhona labanye bazalwane lokwadzingeka kutsi balindze kuze batfole umuntfu lokahle labangashada naye. Nasi sibonelo: Bill wase-Australia uyavuma kutsi ngaletinye tikhatsi bekakhangwa tintfombi letingasibo BoFakazi. Kodvwa akazange abakhe bungani nato ngobe bekangafuni kucala budlelwane lobungabangela kutsi ‘aboshelwe ejokeni linye’ nemuntfu longakholwa. Njengobe iminyaka ichubeka, abekhangwa bodzadze labatsite kodvwa bona bebangamtsandzi. Bill wahlala iminyaka lengu-30 angakashadi wadzimate watfola lomunye dzadze longumKhristu lobekanemigomo  lefana neyakhe. Utsi: “Angitisoli nakancane. Ngitiva ngibusisekile ngobe siya sobabili ensimini, sitadisha ndzawonye futsi sikhonta Nkulunkulu ndzawonye. Ngiyakujabulela kuba nebangani bemfati wami futsi ngicoce nabo ngobe bonkhe batikhonti taJehova. Umshado wetfu siwucinisa ngetimiso teliBhayibheli.”

Yini longayenta nawetsembele eselulekweni saJehova futsi ulindze kutfola indvodza nobe umfati lomkhontako? Ungacabanga ngesizatfu lesikwenta kutsi ungashadi. Nangabe kungenca yekutsi ufuna kulalela umyalo waJehova, ciniseka kutsi loko kuyamjabulisa. (1 Samuweli 15:22; Taga 27:11) Chubeka uthantaza kuJehova umtjele ngendlela lotiva ngayo. (Tihlabelelo 62:8) Njengobe wenta konkhe lokusemandleni kute ubalekele tilingo futsi ulwisane netifiso letimbi, ngaso sonkhe sikhatsi buhlobo bakho naJehova butawucina. Ungaciniseka kutsi Jehova uyatikhatsalela tifiso netidzingo takho ngobe uligugu kuye. Aketsembisi kusinika emadvodza nobe bafati. Kodvwa nawufuna mbamba kushada, Jehova uyati kancono indlela yekwenetisa tidzingo takho.—Tihlabelelo 145:16; Matewu 6:32.

Ngaletinye tikhatsi ungase utive njengaDavide lowatsi: “Sheshisa, Simakadze, ungiphendvule; umoya wami ushona phansi. Ungangifihleli buso bakho.” (Tihlabelelo 143:5-7, 10) Ungaphelelwa ngemandla. Nika Jehova sikhatsi kute akukhombise loko lafuna ukwente. Mlalele ngekutsi ufundze liBhayibheli futsi uzindle ngalokujulile ngaloko lokufundzile. Loku kutakusita wati kutsi yini Jehova layifunako kuwe nendlela latisite ngayo tinceku takhe tangesikhatsi lesendlulile. Nangabe umlalela, utawuba nesibindzi sekuchubeka umhlonipha.

Yini lenye longayenta kute uchubeke ujabulile futsi umatasatasa nawusengakashadi? Ungacinisa buhlobo bakho naJehova futsi utakhele lidvumela lelihle. Ungaphindze ufundze kwephana, kusebenta ngekutimisela, kungeneka kanye nekwetsembeka kuJehova. Loku kubalulekile kute ube nemshado lojabulisako. (Genesisi 24:16-21; Ruthe 1:16, 17; 2:6, 7, 11; Taga 31:10-27) Funa kucala uMbuso ngekuba matasatasa emsebentini wekushumayela nasebandleni. Kwenta njalo kutakuvikela ungatsatsi tincumo letingakahlakaniphi. Nakakhuluma ngeminyaka layihlala asengakashadi, Bill utsi: “Yendlula ngekushesha! Leso sikhatsi ngasicitsa emsebentini waJehova ngilihlahlandlela.”

Umyalo waJehova wekushada ‘eNkhosini kuphela,’ awukaphelelwa sikhatsi. Ngekukhetsa kushada nemKhristu weliciniso, sisuke sikhombisa kutsi sidvumisa Jehova futsi loko kutasijabulisa. LiBhayibheli litsi: “Ubusisiwe umuntfu lowesaba Simakadze, lotijabulisa ngekugcina imiyalo yakhe. Ingcebo nemfuyo kusendlini yakhe, kulunga kwakhe kume kuze kube phakadze.” (Tihlabelelo 112:1, 3) Ngako-ke timisele kulalela umyalo waNkulunkulu wekushada ‘eNkhosini kuphela.’