1. Kungani Jesu ‘abegcwele injabulo kanye nemoya longcwele’? (Buka sitfombe lesisekucaleni kwalesihloko.)

ASE ucabange kutsi bekungaba njani kubona Jesu ngesikhatsi ‘agcwele injabulo kanye nemoya longcwele.’ Kungenteka kutsi abemoyitela futsi emehlo akhe agcwele injabulo. Kungani? Abesandza nje kutfuma bafundzi bakhe labangu-70 kutsi bayoshumayela tindzaba letimnandzi teMbuso waNkulunkulu. Ngesizatfu sekutsi bekunetitsa letinyenti letinemandla lebetimelene netindzaba letimnandzi, abelangatelela kubona kutsi bafundzi bakhe bebatawenta njani lomsebenti. Letitsa betifaka ekhatsi tati temtsetfo nebaFarisi, lebebatifundziswa futsi bahlakaniphile. Bebafuna bantfu batsatse Jesu njengembati futsi batsatse bafundzi bakhe njengebantfu ‘labangakafundzi lokuyaphi nebantfukatana nje.’ (Imisebenti 4:13; Makho 6:3) Nanobe kunjalo, labafundzi bebajabule kakhulu ngesikhatsi babuya kuyowenta lomsebenti. Bashumayela nangetulu kwekuphikiswa, ngisho nalapho baphikiswa ngemadimoni. Yini leyabenta bahlala bajabulile futsi banesibindzi?—Fundza Lukha 10:1, 17-21.

2. (a) Bafundzi baJesu bebafana njani nebantfwana? (b) Yini leyasita bafundzi baJesu kutsi bacondze emaciniso lajulile laseBhayibhelini?

² Jesu watsi kuJehova: “Ngikudvumisa embikwebantfu  Babe, Nkhosi yemazulu nemhlaba, ngobe letintfo utifihlile kulabahlakaniphile nakulabafundzile, watembulela bantfwana. Kwaba kuhle kuwe Babe kutsi kube njalo.” (Matewu 11:25, 26) Kungani Jesu abita bafundzi bakhe ngekutsi bantfwana? Kungobe bafundzi baJesu bebanesifiso sekufundziswa njengebantfwana, bangafani netati temtsetfo kanye nebaFarisi lebebatifundziswa futsi bacabanga kutsi bahlakaniphile. Bafundza kutfobeka, hhayi kutigcabha. (Matewu 18:1-4) Ngesizatfu sekutsi bebatfobekile, Jehova wasebentisa umoya wakhe longcwele kute abasite bacondze emaciniso lajulile laseBhayibhelini. Kodvwa baholi benkholo yemaJuda labatigcabhako basala baphumphutsekiswe nguSathane kanye nekutigcabha kwabo. 

3. Yini lesitawufundza ngayo kulesihloko?

³ Kungako-ke Jesu bekajabule kangaka! Bekajatjuliswe kubona indlela Jehova lawembule ngayo emaciniso lajulile laseBhayibhelini kubantfu labatfobekile ngisho nobe bafundze kangakanani. Lendlela yekufundzisa iyemukeleka kuNkulunkulu futsi solo akashintji. Ukhombisa njani kutsi usayemukela lendlela yekufundzisa? Kulesihloko, sitawufundza ngendlela Jehova lembula ngayo emaciniso lajulile laseBhayibhelini kubantfu labatfobekile lamuhla.

4. Sicongosekulindza lesentiwe saba melula sibe sipho ngatiphi tindlela?

⁴ Kuleminyaka yakamuva, inhlangano yaNkulunkulu igcizelele kubaluleka kwekufundzisa ngendlela lemelula nalecacile. Ase sicoce ngetibonelo letintsatfu. Kwekucala, sesine-Sicongosekulindza lesentiwe saba melula. * (Fundza umbhalo longentasi.) Sisipho lesisite bantfu labanyenti, lokufaka ekhatsi labo labakutfola kumatima kufundza nobe labangalucondzi kahle lulwimi. Imindeni itfole kutsi bantfwana bayo sebasicondza kancono Sicongosekulindza ngesizatfu sekutsi sentiwe saba melula. Bantfu labanyenti babhale tincwadzi kute babonge. Lomunye dzadze watsi abesaba kuphendvula eSifundvweni Se-Sicongosekulindza. Kodvwa nyalo akasesabi! Ngemuva kwekusebentisa lomagazini lowentiwe waba melula, wabhala watsi: “Nyalo sengiphendvula emahlandla lamanyenti futsi angisesabi! Ngiyambonga Jehova futsi nani ngiyanibonga.”

5. Ngutiphi letinye tinzuzo tekuba ne-“New World Translation of the Holy Scriptures” lebuketiwe?

⁵ Kwesibili, sekune-“New World Translation of the Holy Scriptures” lebuketiwe, leyakhululwa ngesiNgisi emhlanganweni wemnyaka nga-October 5, 2013. * (Fundza umbhalo longentasi.) Imibhalo leminyenti seyinemagama lambalwa kodvwa solo inemcondvo lofanako futsi kumelula kuyicondza. Sibonelo saloko kutsi Jobe 10:1 lobewunemagama langu-27 nyalo sewunalangu-19, futsi Taga 8:6 lebetinemagama langu-20, nyalo setinalangu-13.  Omabili lamavesi acondzakala kahle kulelihumusho lelisha. Lomunye umzalwane logcotjiwe losakhonte Jehova ngekwetsembeka iminyaka leminyenti watsi: “Ngisandza nje kufundza incwadzi yaJobe kulelihumusho lelisha, futsi ngiva shengatsi ngukhona ngicala kuyicondza!” Labanyenti basho lokufanako.

6. Utiva njani ngenchazelo lecacile yembhalo waMatewu 24:45-47?

⁶ Kwesitsatfu, cabanga ngentfutfuko lebekhona endleleni lesicondza ngayo leminye imibhalo. Nasi sibonelo: Inchazelo lecacile lemayelana ‘nesisebenti lesetsembekile nalesihlakaniphile’ yashicilelwa ku-Sicongosekulindza saJuly 15, 2013. (Matewu 24:45-47) Lesihloko sachaza kutsi sisebenti lesetsembekile Sigungu Lesibusako. Sachaza nekutsi ‘letinye tisebenti’ ngulabagcotjiwe kanye ‘naletinye timvu,’ labondliwa sisebenti lesetsembekile. (Johane 10:16) Siyakutsandza kufundza ngalamaciniso futsi siyakujabulela kufundzisa labanye ngawo! Ngutiphi letinye tindlela Jehova lakhombise ngato kutsi uyakwemukela kufundzisa ngendlela levakalako nalecacile?

7, 8. Ngutiphi letinye tibonelo tetindzaba letiseBhayibhelini lebetimelela lokutsite lokubalulekile lobekusetawenteka?

⁷ Nangabe sowukhonte Jehova iminyaka leminyenti, kungenteka kutsi ulunakile lushintjo endleleni tincwadzi tetfu letichaza ngayo letinye tindzaba letiseBhayibhelini. Esikhatsini lesendlulile besivame kutsi letinye tindzaba timelela lokutsite lokubalulekile lokutawenteka esikhatsini lesitako. Loko bekutsiwa yindzaba lengumfanekiso. Lendzaba lengumfanekiso beyimelela lokutsite. Tikhona yini tizatfu letivakalako tekuchaza tindzaba letiseBhayibhelini ngalendlela? Yebo tikhona. Nasi sibonelo: Jesu wakhuluma ‘ngesibonakaliso semphrofethi Jona.’ (Fundza Matewu 12:39, 40.) Wachaza kutsi sikhatsi lesacitfwa nguJona esiswini senhlanti besimelela sikhatsi yena labetasicitsa asethuneni.

⁸ Kunaletinye tindzaba letiseBhayibhelini lebetimelela lokutsite lokubalulekile lobekusetawenteka. Umphostoli Pawula wachaza letinye tato. Nasi sibonelo: Buhlobo Abrahama labenabo naHagari naSara bebumelela buhlobo Jehova labenabo nesive saka-Israyeli kanye neluhlangotsi lolusezulwini lwenhlangano yaNkulunkulu. (Galathiya 4:22-26) Ngendlela lefanako, lithende lekukhontela, lithempeli, Lilanga Lekubuyisana, umphristi lophakeme kanye naletinye tincenye teMtsetfo ‘betisitfunti setintfo letinhle lebetiseta.’ (Hebheru 9:23-25; 10:1) Kukholwa kwetfu kuyacina nasifundza ngaletindzaba letiseBhayibhelini kanye naloko letikumelelako. Kodvwa loko kusho kutsi wonkhe umuntfu, intfo nobe lokutsite lokwentekile lokuchazwe eBhayibhelini kumelela umuntfu nobe lokutsite yini?

9. Esikhatsini lesendlulile, beyichazwa njani indzaba leseBhayibhelini lekhuluma ngaNabothi?

 ⁹ Esikhatsini lesendlulile, tincwadzi tetfu betivame kuchaza kutsi umuntfu ngamunye, lokwentekile nobe tintfo lokukhulunywa ngato bekumelela umuntfu nobe lokutsite. Nasi sibonelo: INdlovukazi lembi Jezebeli yabulala Nabothi kuze indvodza yayo Ahabi itsatse sivini saNabothi. (1 Emakhosi 21:1-16) Nga-1932, Sicongosekulindza satsi Ahabi naJezebeli bamelela Sathane kanye nenhlangano yakhe, satsi Nabothi umelela Jesu nekutsi kufa kwaNabothi kumelela kubulawa kwaJesu. Nobe kunjalo, nga-1961 incwadzi letsi “Let Your Name Be Sanctified” yatsi Nabothi umelela labagcotjiwe futsi Jezebeli umelela Tinkholo Letitsi TebuKhristu. Yaphindze yatsi kuphatfwa kabi kwaNabothi bekumelela kuphatfwa kabi kwalabagcotjiwe ngemalanga ekugcina. Sekuphele iminyaka leminyenti lenchazelo icinisa kukholwa kwebantfu baNkulunkulu. Kungani nyalo sesiyichaza ngendlela leyehlukile lendzaba?

10. (a) Sisebenti lesetsembekile sikhombisa ngayiphi indlela kutsi siyacaphelisisa nasichaza tindzaba letitsite letiseBhayibhelini? (b) Yini tincwadzi tetfu letikhuluma ngayo kakhulu lamuhla?

¹⁰ Kuleminyaka leyendlulile, Jehova usite ‘sisebenti lesetsembekile nalesihlakaniphile’ kutsi sichubeke sihlakaniphile nobe siphapheme. Ngayiphi indlela? Nyalo sisebenti lesetsembekile asisasho kutsi indzaba letsite leseBhayibhelini  imelela lokutsite lokubalulekile ngaphandle nangabe kunesizatfu lesisekelwe emiBhalweni sekusho njalo. Tinchazelo takadzeni letimayelana netindzaba letingumfanekiso kanye naloko letikumelelako bekulukhuni kuticondza, kutikhumbula nekutisebentisa. Ngetulu kwaloko, nakunakwa kakhulu loko lokungenteka kutsi kumelelwa yindzaba leseBhayibhelini, tifundvo letibalulekile betibese tiyalahleka. Lamuhla tincwadzi tetfu tikhuluma ngetifundvo letimelula nalesingatisebentisa letimayelana nekukholwa, kubeketela, kutinikela kuNkulunkulu kanye nalokunye lokubalulekile lesikufundza etindzabeni letiseBhayibhelini. *—Fundza umbhalo longentasi.

11. (a) Nyalo sesiyicondza njani indzaba yaNabothi, futsi sibonelo sakhe sisisita njani? (b) Eminyakeni yakamuva, kungani tincwadzi tetfu tingasavami kukhuluma ngetindzaba letingumfanekiso nangaloko letikumelelako? (Fundza sihloko lesitsi: “Imibuto Levela Kubafundzi” lesikulomagazini.)

¹¹ Nyalo indlela lesiyicondza ngayo indzaba yaNabothi seyicacile futsi iyevakala. Nabothi akazange afe ngobe amelela Jesu nobe labagcotjiwe. Kunaloko, wafa ngobe abetimisele kuhlale etsembekile kuNkulunkulu. Wachubeka alalela uMtsetfo waJehova nanobe abephatfwa kabuhlungu ngumbusi lonemandla. (Numeri 36:7; 1 Emakhosi 21:3) Lesi sibonelo lesihle kakhulu kuto tonkhe tinceku taNkulunkulu lamuhla lokungenteka tibeketelela kuphatfwa kabi lokufanako. (Fundza 2 Thimothi 3:12.) Onkhe emaKhristu angasicondza lesifundvo, asikhumbule futsi asisebentise kute acinise kukholwa kwawo.

12. (a) Yini lokungakafaneli siphetse ngayo mayelana netindzaba letiseBhayibhelini? (b) Yini lesisita kutsi siticondze kahle tintfo letijulile? (Fundza umbhalo longentasi.)

¹² Kufanele yini siphetse ngekutsi tindzaba letiseBhayibhelini tinetifundvo lesingatisebentisa nje kuphela nekutsi tite letinye tinchazelo? Cha. Esikhundleni sekutsi tincwadzi tetfu tichaze tindzaba letiseBhayibhelini ngekutsi tingumfanekiso nobe timelela lokutsite, nyalo tinake kakhulu indlela indzaba leseBhayibhelini lehlobana ngayo nalenye. Nasi sibonelo: Kuba cotfo kwaNabothi nanobe aphatfwa kabi futsi wabulawa, kusikhumbuta ngebucotfo baKhristu nalabagcotjiwe. Kuphindze kusikhumbute ngebucotfo balabanyenti labayincenye ‘yaletinye timvu.’ Sibona ngalokucacile kutsi Jehova usifundzisa ngendlela lemelula. *—Fundza umbhalo longentasi.

13. Ngutiphi tibonelo letikhombisa kutsi imifanekiso yaJesu sesiyichaza kamelula nangendlela levakalako?

¹³ Jesu Khristu bekanguMfundzisi lomkhulu kunabo bonkhe labake baba khona. Bekatsandza kusebentisa imifanekiso nobe tibonelo nakafundzisa. (Matewu 13:34) Imifanekiso iyaphumelela ngobe ichaza tindzaba letilukhuni ngendlela lemelula lengasenta sicabange futsi isitsintse inhlitiyo. Kuleminyaka leyendlulile, tincwadzi tetfu betichaza imifanekiso yaJesu ngendlela lemelula nalevakalako. Nasi sibonelo: Sicongosekulindza saJuly 15, 2008, sisisita kutsi siwucondze kahle umfanekiso waJesu wesibiliso, wenhlanyelo yesinaphi newelinethi. Nyalo sesiyati kutsi lemifanekiso imelela uMbuso waNkulunkulu, losewusite bantfu labanyenti kutsi bamelane nalelive lelibi futsi babe bafundzi baKhristu.

14. (a)  Besiwuchaza njani umfanekiso wemSamariya lolungile? (b) Nyalo sesiwucondza njani lomfanekiso waJesu?

¹⁴ Singaticondza njani tindzaba letijulile nobe imifanekiso leyashiwo nguJesu? Letinye taletindzaba timelela lokutsite nobe tisiphrofetho. Letinye tisifundzisa tifundvo letibalulekile. Kodvwa singati njani kutsi indzaba imelela lokutsite nobe cha? Kuleminyaka leyendlulile, imphendvulo yalombuto icace kakhudlwana. Nasi sibonelo: Cabanga ngendlela lebesisolo siwuchaza ngayo umfanekiso waJesu wemSamariya lolungile. (Lukha 10:30-37) Nga-1924, Sicongosekulindza satsi lomSamariya umelela Jesu nekutsi umgwaco losuka eJerusalema uye eJerikho umelela simo lesihhohlokako sebantfu kusukela ekuvukeleni e-Edeni. Saphindze satsi tigebengu lebetikulomgwaco timelela tinhlangano letinkhulu kanye nabosomabhizinisi labanebugovu, futsi umphristi nemLevi bamelela Tinkholo Letitsi TebuKhristu. Kodvwa lamuhla, tincwadzi tetfu tisebentisa lomfanekiso kute tikhumbute onkhe emaKhristu kutsi abebete lubandlululo. Kufanele sisite bonkhe labahluphekile, ikakhulukati ngekubafundzisa liciniso ngaNkulunkulu. Kuyasijabulisa kubona indlela Jehova lenta ngayo liciniso kutsi licace.

15. Yini lesitawucoca ngayo esihlokweni lesilandzelako?

¹⁵ Esihlokweni lesilandzelako sitawucoca ngemfanekiso waJesu wetintfombi letilishumi. (Matewu 25:1-13) Nguyiphi indlela Jesu labefuna balandzeli bakhe bawucondze ngayo lomfanekiso lobalulekile kulamalanga ekugcina? Abefuna bacabange kutsi tintfo lokukhulunywa ngato kulomfanekiso, bantfu, nobe loko lokwenteka kumelela lokutsite lokubalulekile lokutawenteka esikhatsini lesitako yini? Nobe abefuna sifundze sifundvo lesibalulekile lesitasisita kulamalanga ekugcina? Ase sibone.