O le Vaega Pule o se vaega to‘aitiiti o Kerisiano ta‘umatuaina o loo saunia ta‘iala mo Molimau a Ieova i le lalolagi aoao. E lua vala o la latou galuega:

• E latou te vaavaaia le sauniunia o faatonuga e faavae mai i le Tusi Paia lea e aumaia i lomiga, sauniga ma a‘oga a Molimau a Ieova.​—Luka 12:42.

• E latou te vaavaaia le galuega i le lalolagi aoao a Molimau a Ieova, e ala i le faatonutonuina o la tatou galuega tala‘i i le lautele, ma vaavaaia le faaaogāina o foa‘i tauofo.

E faaa‘oa‘o le Vaega Pule i le faaa‘oa‘oga na faataatia e le “ ‘auaposetolo ma toeaina i Ierusalema” i le ulua‘i senituri, o ē na faia filifiliga tāua mo le faapotopotoga Kerisiano uma. (Galu. 15:2) E pei o na tane faamaoni, o sui o le Vaega Pule e lē o i latou o ni ta‘ita‘i i la tatou faalapotopotoga. E latou te suʻesuʻeina le Tusi Paia mo ta‘ita‘iga, ma e latou te amanaʻia le tofiaina e Ieova le Atua o Iesu Keriso, e fai ma Ulu o le faapotopotoga.​—1 Korinito 11:3; Efeso 5:23.

O sui o le Vaega Pule o Kenneth Cook, Jr., Samuel Herd, Geoffrey Jackson, Stephen Lett, Gerrit Lösch, Anthony Morris III, Mark Sanderson, ma David Splane. O loo latou auauna uma i le ofisa ulu i Warwick i Niu Ioka i le Iunaite Setete.

Na faavae e le Vaega Pule ni komiti se ono e vaavaaia vaega eseese o la tatou galuega, ma e auauna se sui i se komiti se tasi pe sili atu fo‘i.

• Komiti o Sooupu: E latou te vaavaaia mataupu faaletulafono, avatu le fesoasoani i uso ma tuafafine ua aafia i mala mataʻutia, faapea Molimau e sauāina ona o o latou talitonuga faalotu ma isi mataupu e aafia ai Molimau a Ieova e mana‘omia vave ai le fesoasoani.

• Komiti o le ‘Aufaigaluega: E latou te vaavaaia faatulagaga mo sui o le aiga Peteli.

• Komiti Lomitusi: E latou te vaavaaia le lolomiina ma le fela‘ua‘iina o a tatou lomiga faale-Tusi Paia ma le fausiaina o a tatou Maota mo Sauniga, ofisa faaliliu ma ofisa o lālā.

• Komiti o le Auaunaga: E latou te vaavaaia la tatou galuega o le tala‘ia lea o le “tala lelei o le malo.”​—Mataio 24:14.

• Komiti Taua‘oa‘oga: E latou te faatonutonuina le saunia o ta‘iala faaleagaga lea e aumai i sauniga, a‘oga, vitiō ma pu‘egāleo.

• Komiti o Tusitusiga: E latou te faatonutonuina le sauniunia o ta‘iala faaleagaga lea e aumai i lomiga e lolomi, mataupu o loo i la tatou upega tafa‘ilagi ma vaavaaia galuega faaliliu.

E lē gata e galulue le Vaega Pule i nei komiti, ae e fono fo‘i i vaiaso ta‘itasi e talanoaina mana‘oga o le faalapotopotoga. I nei fono, e iloilo e le Vaega Pule mea o loo ta‘ua i le Tusi Paia, e latou te mulimuli i le taʻitaʻiga a le agaga paia o le Atua, ma e latou te taumafai e malilie faatasi i se faaiʻuga.​—Galuega 15:25.

O nei Kerisiano maufaatuatuaina e fesoasoani i komiti a le Vaega Pule. (1 Korinito 4:2) E iai o latou tomai ma agavaa i le galuega o loo vaavaaia e le komiti lea ua tofia i ai i latou, ma e latou te auai i fono i vaiaso ta‘itasi. E ui e lē faia e nei fesoasoani ni faai‘uga, ae e latou te saunia ni fautuaga aogā, faamatalaga e faatatau i se mataupu, faatino faai‘uga a le komiti, e latou te mata‘ituina iʻuga ma le agaʻigaʻi i luma o le faatinoina o se faai‘uga. E ono tofia fo‘i i latou e le Vaega Pule e asiasi i o tatou uso i vaega eseese o le lalolagi pe e faia fo‘i ni a latou lauga i ni faatasitasiga, e pei o fonotaga faaletausaga, po o le faauuga i Kiliata.