Skip to content

Skip to table of contents

 TALAAGA O LE SOIFUAGA

Ua Ou Tamaoaiga e Ui na Ou Mativa

Ua Ou Tamaoaiga e Ui na Ou Mativa

Na ou fanau i se tamaʻi fale na fausia i laau, i le tamaʻi nuu o Liberty i Indiana i le Iunaite Setete. E toʻatolu le fanau a oʻu mātua ina ua ou fanau mai, sa iai loʻu uso ma oʻu tuafāfine matutua e toʻalua. Mulimuli ane, na fananau mai oʻu uso lāiti e toʻalua, ma loʻu tuafafine laʻitiiti.

O le fale na ou fanau ai

E TAU leai ni suiga i lo matou nuu a o oʻu tuputupu aʻe. O tamaiti na matou aʻoʻoga a o oʻu laʻitiiti, o tamaiti foʻi na sa matou aʻoʻoga ina ua iʻu aʻu aʻoga. E masani uma tagata o lo matou nuu, ma e iloa e le tasi le igoa o le isi.

E toʻafitu la matou fanauga, ma na ou faamasani e galue i faatoʻaga a o oʻu laʻitiiti

E tele tamaʻi faatoʻaga e lata i lo matou nuu o Liberty, aemaise lava togāsana. I le taimi na ou fanau ai, na faigaluega loʻu tamā mo se tasi o faifaatoʻaga i lo matou vaipanoa. Ina ua ou talavou, na aʻo laʻu ave palau ma na ou faamasani foʻi e galue i faatoʻaga.

O loʻu tamā o se tagata matua. E 56 ona tausaga i le taimi na ou fanau ai, ae 35 tausaga o loʻu tinā. E ui i lea, o loʻu tamā o se tagata aumalosi na toʻaga tele e galue, ma na ia aʻoaʻoina i matou uma ina ia toʻaʻaga foʻi e galulue. E moni e leʻi tele ni tupe a si oʻu tamā, ae na ia tausia o matou manaʻoga uma. Na iai lava le fale na matou nonofo ai, o ofu e oofu ai, ma meaʻai e aai ai. O ia foʻi o se tamā na naunau mai iā i matou. E 93 tausaga o loʻu tamā ae 86 tausaga o loʻu tinā i taimi na maliliu ai. E leai se tasi o i laʻua na auauna iā Ieova. E na o le toʻatasi lava loʻu uso o loo auauna ma le faamaoni o se toeaina, talu mai vaitausaga o le 1970 ina ua amata le faatulagaga o toeaina.

A O OʻU LAʻITIITI

O loʻu tinā o se tagata mapolotu. Na matou ō ma loʻu tinā i le Lotu Papatiso i Aso Sa uma. Na faatoʻā  ou faalogo i le aʻoaʻoga o le Tolutasi ina ua 12 oʻu tausaga. Na ou fia malamalama atili e faatatau i le Tolutasi, o lea na ou fesili ai i loʻu tinā: “E faapefea ona avea Iesu ma Alo ma le Tamā i le taimi e tasi?” Ou te manatua lava le tali a loʻu tinā: “O le misiterio lenā, ma e lē manaʻomia ona tatou malamalama i ai.” Na ou matuā paso i lenā aʻoaʻoga. E ui i lea, na ou papatiso ina ua 14 oʻu tausaga i se ālia na latalata ane. Na faatofu faatolu aʻu, ona o le talitonuga o le Tolutasi.

1952—I le 17 o oʻu tausaga, a o leʻi amia aʻu e auai i le vaegaʻau

A o oʻu auai i le aʻoga maualuga, na iai laʻu uō na avea o se tagata e fusu ina ia maua ai tupe. Na ia faalaeiauina aʻu ina ia avea foʻi o se tagata fusu. O lea, na amata ai ona ou toleni ma ou auai ai i se kalapu fusu e taʻua o le Golden Gloves. E leʻi lelei saʻu fusu ma e leʻi umi ae ou faamavae loa. Mulimuli ane, na amia aʻu e auai i le vaegaʻau a le Iunaite Setete, ma auina atu aʻu i Siamani. A o oʻu iai i Siamani, na auina atu aʻu i se aʻoga faapitoa e toleni ai fitafita ina ia taʻimua i isi fitafita, ona sa latou manatu e mafai ona avea aʻu ma taʻimua lelei. Na latou mananaʻo ina ia ou auai i le vaegaʻau mo se taimi umi. Ae e leʻi iai soʻu faanaunauga e faaauau i le vaegaʻau. Ina ua uma ona tuli laʻu lua tausaga i le vaegaʻau, na ou faamavae lelei ai loa i le 1956. Peitaʻi, e leʻi umi ae ou auai i se isi ituaiga vaegaʻau.

1954-1956—E lua tausaga na ou iai i le vaegaʻau a le Iunaite Setete

LE AMATAGA O SE OLAGA FOU

A o oʻu tuputupu aʻe, na ou manaʻo e avea aʻu o se tane malosi ma se tagata toa. O laʻu vaaiga na iai e faatatau i tane malolosi, na matuā taaʻina i ata tifaga ma le siʻomaga na ou ola aʻe ai. I loʻu mafaufau, o tagata talaʻi e lē o ni tagata totoa. Peitaʻi, na ou aʻoaʻoina ni mea na matuā suia ai loʻu olaga. I se tasi aso a o oʻu alu i le taulaga, na faatū mai e ni teine se toʻalua laʻu taavale. Ou te masani i nei teine, o i laʻua o ni Molimau a Ieova ma o tuafāfine lāiti o le toʻalua o loʻu tuafafine matua. I le taimi ua teʻa, na ou taliaina ai kopi o Le Olomatamata ma le Ala Mai! na la tuuina mai iā te aʻu. Na faigatā ona ou malamalama i Le Olomatamata. E ui i lea, na la valaauliaina aʻu i se Suʻesuʻega Tautusi a le Faapotopotoga, o se sauniga e suʻesuʻe ai le Tusi Paia faatasi ma se vaega toʻaitiiti na faia i lo laʻua fale. Na ou fai i ai o le a ou mafaufau i ai. Ae na fesili mai ma le fiafia nai teine: “O sau tala moʻi?” Na ou tali atu, “Ioe, o laʻu tala moʻi.”

Na ou salamō i laʻu folafolaga na fai i teine, ae e leʻi mafai ona toe sui loʻu mafaufau. O lea, na ou alu ai i le suʻesuʻega tautusi i lenā pō. O le mea na sili ona ou maofa ai, o le fanau iti. Na ou ofo i lo latou popoto i le Tusi Paia. E moni na ou toʻaga i le lotu i Aso Sa ma loʻu tinā, ae ou te leʻi iloa lelei le Tusi Paia. O lea, na ou filifili ai loa ina ia aʻoaʻoina atili le Tusi Paia, ma amata saʻu suʻesuʻega faale-Tusi Paia. Na ou aʻoaʻoina mai lava i le amataga, o Ieova o le suafa lea o le Atua e Ou le Malosi Uma Lava. Na ou fesili i loʻu tinā i le taimi ua teʻa e faatatau i Molimau a Ieova. Ae na tali mai o ia, “O le vaega lenā e tapuaʻi i se tasi toeaina e igoa iā Ieova.” E peiseaʻī ua faatoʻā pupula oʻu mata ona o mea na ou aʻoaʻoina.

Na vave loʻu agaʻigaʻi i luma ona na ou iloa ua ou mauaina le upu moni. E leʻi atoa le iva masina talu ona ou auai i laʻu sauniga muamua, ae ou papatiso loa iā Mati i le 1957. Na suia foʻi oʻu manatu na iai. Pe a ou toe mafaufau i le mea na ou manaʻo i ai ia avea ma tagata toa, na faafiafiaina aʻu i le iloa o le aʻoaʻoga a le Tusi Paia e faatatau i le uiga moni o le avea o se tasi ma tagata toa. O Iesu o se tane lelei atoatoa. Na mataʻina lona malosi faaletino, e sili mamao atu i so o se toa i le lalolagi. Peitaʻi, e leʻi faamisa Iesu ae ʻna ia tuu atu o ia lava ia faapuapuagatia’ e pei ona valoia. (Isa. 53:2, 7) Na ou aʻoaʻoina e tatau i se soo moni o Iesu ona “agamalu i tagata uma.”​—2 Timo. 2:24.

 Na amata laʻu paeonia i le tausaga na sosoo ai i le 1958, ae e leʻi umi ae taofi mo sina taimi puupuu. Aiseā? Talu ai na ou filifili e faaipoipo iā Gloria, o se tasi o teine talavou lea na valaauliaina aʻu i le suʻesuʻega tautusi. Ou te lē salamō i laʻu faaiʻuga na fai. Na avea Gloria o se penina tautele, ma e tumau pea ona avea o ia o se penina tautele iā te aʻu. Na ou vaai iā Gloria e pei o se taimane na ou matuā moomoo i ai, ae o lenei ua ou mauaina ina ua ma faaipoipo. Ae seʻi tuu atu le avanoa iā Gloria e fai ai sana faamatalaga:

“E toʻa 17 la matou fanauga. O loʻu tinā o se Molimau faamaoni, ma na maliu o ia ina ua 14 oʻu tausaga. O le taimi lenā na amata ai le suʻesuʻega a loʻu tamā. Ina ua maliu loʻu tinā, na fai e loʻu pule aʻoga ma loʻu tamā se fuafuaga faapitoa mo i maʻua ma loʻu uso matua. O le taimi lenā na iai loʻu uso i le tausaga faaiʻu i le aʻoga maualuga, ma na talosaga ai loʻu tamā i le pule aʻoga pe e mafai ona ma auauaʻi ma loʻu uso i le aʻoga a o faagasolo le vaiaso. E ma te auauaʻi i le vaaiga o o ma tei lāiti i le fale ma fai meaʻai mo lo matou aiga, ona na faigaluega lo matou tamā. Na talia e le pule aʻoga le talosaga a lo ma tamā, ma na faaauau lenei fuafuaga seʻia oo ina faauu loʻu uso. E lua aiga Molimau a Ieova na matou suʻesuʻe, ma e toʻa 11 i matou na avea o ni Molimau a Ieova. Ou te fiafia tele e talaʻi, e ui lava o aʻu o se tagata matamuli. A o faagasolo tausaga, na fesoasoani mai Sam ina ia foʻia loʻu uiga o le matamuli.”

Na ma faaipoipo ma Gloria iā Fepuari i le 1959. Na ma fiafia e galulue faatasi o ni paeonia. Na faatumu a ma tusi talosaga mo le auaunaga i le Peteli iā Iulai 1959, ona o lo ma faanaunauga e fia auauna i lo tatou ofisa ulu. Na faatalanoa i maʻua e si uso pele e igoa iā Simon Kraker. Na ia faailoa mai iā i maʻua e lē o taliaina e le Peteli ni ulugalii faaipoipo i lenā taimi. E ui i lea, na tumau pea lo ma faanaunauga e auauna i le Peteli, ma na umi se taimi na ma faatalitali ai.

Na ma tusi i le ofisa ulu e aauina atu i maʻua i se oganuu o loo telē ai le manaʻoga mo tagata talaʻi. E na o le tasi le vaipanoa na faailoa mai e le ofisa, o Pine Bluff i Arkansas. O le taimi lenā sa lua faapotopotoga i Pine Bluff, o le faapotopotoga mo uso papaʻe ma le faapotopotoga mo uso uli. Na tofia i maʻua i le faapotopotoga mo uso uli, lea sa na o le 14 le ʻautalaʻi.

FEAGAI MA LE FAAFITAULI O LE FAAILOGALANU

Atonu o loo e taumānatu pe aiseā na faaesea ai uso uli mai i uso papaʻe i faapotopotoga a Molimau a Ieova. E faigofie lava le tali: e leʻi iai se filifiliga saʻoloto a uso i lenā taimi. Na faasā e le tulafono le miomiō faatasi o tagata papaʻe ma tagata uli i nofoaga faitele, ma na matuā lamatia ola o tagata na latou faia faapea. I le tele o vaipanoa, na iai māfuaaga lelei na faapopoleina ai uso ina neʻi faatamaʻia o latou Maota mo Sauniga pe a faatasitasi uso papaʻe ma uso uli, auā o mea na sa faia e tagata faailogalanu. Afai e talaʻi uso uli mai i lea fale i lea fale i nuu e nonofo ai tagata papaʻe, e faafalepuipuiina nai uso ma atonu e sasaina foʻi i latou. O lea, na matou usiusitaʻi ai i le tulafono a o fai la matou galuega talaʻi, ma faamoemoe e iai se taimi o le a suia ai le tulaga o mea.

Na iai luʻi na tulaʻi mai i la matou faiva. A o matou talaʻi i se vaipanoa e nonofo ai tagata uli, na iai taimi na matou tuʻituʻi ai e aunoa ma lo matou iloa i se fale o se aiga palagi. Sa tatau ona vave fai la matou filifiliga pe e fai atu sa matou taulimaga puupuu faale-Tusi Paia, pe e faamalie atu i le aiga ona matou ō ese loa lea. O le tulaga lenā o mea i na taimi i nisi o vaipanoa.

Na tatau foʻi ona ma faigaluega malolosi ina ia lagolago ai la ma paeonia. O totogi i le tele o ma galuega, e taʻitolu tālā i le aso. Na galue Gloria o se teufale i nisi o ana galuega. Na ou maua le faatagaga e fesoasoani ai iā Gloria i se tasi o galuega teufale, ina ia vave māeʻa ai ana galuega. Na tuuina mai e lenā aiga ni meaʻai e ma te aai ai i aoauli a o ma leʻi tuua lo latou fale. Na faia foʻi e Gloria auli mo se tasi aiga i vaiaso taʻitasi. Ae na ou galue e teu fanua o aiga, fufulu faamalama, ma faia isi galuega. Na ma fufuluina faamalama o le fale o se tasi aiga palagi. Na galue Gloria e fufulu le pito i totonu o faamalama, ae ou fufuluina le pito i fafo. Na alu le aso atoa o ma faigaluega, o lea na maua ai foʻi a ma meaʻai mo le aoauli. Na ʻai Gloria i totonu o le fale e ese mai i le mea na aai ai le aiga, ae ou ʻai i fafo i le faletaavale. E leʻi faapopoleina ai aʻu i lenā mea ma na manaia foʻi meaʻai a si aiga. O le lelei ia o si aiga, ae o le māfuaaga na faia ai faapena i maʻua, ona o mafaufauga na o tagata i lenā vaitaimi. Ou te manatua se tasi aso, na tū ai la ma taavale i le pamu penisini. Ina ua uma ona utu la ma taavale, na ou fesili i le tagata faigaluega pe e mafai ona faaaogā  e Gloria le latou falelētaʻua. Ae ona o i maʻua o ni tagata uli, sa pupula mai ma le ita ma faapea mai, “E leai o la e loka.”

O GAOIOIGA AGALELEI E LĒ GALO IĀ TE AʻU

E ui i na taimi o le faailogalanu, ae na faafiafiaina i maʻua i mafutaga fiafia ma o matou uso, atoa foʻi ma le faiva i le fanua. Ina ua ma taunuu i Pine Bluff, na matou nonofo faatasi ma le uso na avea ma auauna o le faapotopotoga. E leʻi talitonu lana avā, o lea na amata ai e Gloria se suʻesuʻega faale-Tusi Paia ma ia. Na ou amataina foʻi se suʻesuʻega ma le tama teine a le ulugalii, faapea foʻi ma lana tane. Na filifili uma le tinā ma lana tama teine e auauna iā Ieova, ma na papatisoina ai i laʻua.

Na iai foʻi a ma uō pele i le faapotopotoga mo uso papaʻe. Na latou valaaulia i maʻua e matou te faiʻaiga faatasi, ae na matou faatalitali seʻia pogisa. O le taimi lenā na matuā malosi ai taaʻiga a le Ku Klux Klan (KKK), o se faalapotopotoga na matuā uunaʻia tagata ina ia faaalia le faailogalanu ma uiga sauā. Ou te manatua se tasi pō a o faamanatu e tagata le Halloween, na ou vaaia ai se tamāloa o saofaʻi ma le faasausili i luma o le polotito o lona fale, ma pulupulu i se ʻie paʻepaʻe ma ufiufi ona foliga i se pulou paʻepaʻe, o le togiga a le KKK. Ae o amioga faapena, e leʻi taofia ai uso mai i le faaalia o le agalelei. I se tasi taimi i le tau māfanafana, na manaʻomia ai se ma tupe e malaga atu ai i se tauaofiaga, ma na faatau e se uso la ma taavale ina ia fesoasoani ai i le ma faigāmalaga. I se tasi aso i le masina na sosoo ai, na ma lagona le vaivai tele ona na ma savavali i le galuega talaʻi i le mugālā, ma faia a ma suʻesuʻega faale-Tusi Paia. Ae na faateʻia i maʻua ina ua ma taunuu i le fale. Na iai se taavale na paka i luma o lo ma fale, ma na faapipii i le pito i luma o le taavale le fasipepa na tusia ai upu nei: “Ua toe faafoʻi atu le lua taavale. O laʻu meaalofa lenā mo oulua. O lo oulua uso.”

Na iai foʻi se isi gaoioiga agalelei e lē mafai ona galo iā te aʻu. Na valaaulia aʻu i le 1962 e auai i le Aʻoga o le Faiva o le Malo i South Lansing i Niu Ioka. E tasi le masina le umi o lenā aʻoga e toleni ai uso na vaavaaia faapotopotoga, matagaluega, ma itumalo. Peitaʻi, o le taimi lenā e leʻi iai saʻu galuega ma e leʻi lava foʻi la ma faasoa. Na iai se kamupani fai telefoni i Pine Bluff na latou faatalanoaina aʻu e tusa ai ma se avanoa faigaluega. Afai e latou te taliaina aʻu, o lona uiga o aʻu le tagata uli muamua o le a faigaluega mo la latou kamupani. Na iʻu ina latou faailoa mai o le a latou faafaigaluegaina aʻu. Na ou tau mafaufau po o le ā laʻu mea o le a fai, ona e leai saʻu tupe ou te alu ai i Niu Ioka. Na ou manatu e sili pe a ou taliaina le galuega, nai lo o le taliaina o le valaaulia i le aʻoga. A o oʻu sauni e tusi laʻu tusi e faailoa atu ai ua lē mafai ona ou taliaina le valaaulia, ae tupu loa se mea e lē mafai ona galo iā te aʻu.

Sa iai se tuafafine i la matou faapotopotoga e lē talitonu lana tane, na tuʻituʻi mai i lo ma faitotoʻa i se tasi taeao ma tuu mai iā te aʻu se teutusi. Sa tumu le teutusi i tupe. Na fealapō lenei tuafafine ma nisi o lana fanau lāiti e ō e galulue i faatoʻaga vavae e vele vao i le faatoʻaga, ina ia faatupe ai laʻu malaga i Niu Ioka. Na faapea mai le tuafafine iā te aʻu, “Sau inā alu i le aʻoga. Ia uaʻi atoatoa i le aʻoga, ona e toe foʻi mai lea  e aʻoaʻo i matou.” Mulimuli ane, na ou talosaga i le kamupani fai telefoni pe e mafai ona toe tolo i tua i le lima vaiaso le taimi e amata ai laʻu galuega. Ae na latou tali mai “E leai!” Peitaʻi, e leʻi faapopoleina ai aʻu ona ua uma ona fai laʻu faaiʻuga. Na ou fiafia ou te leʻi taliaina le galuega.

O nisi nei o mea e manatua e Gloria i la ma auaunaga i Pine Bluff: O lana tala lenei, “Na ou matuā fiafia i la ma oganuu! Sa iai aʻu suʻesuʻega faale-Tusi Paia i le va o le 15 i le 20. E ma te amata i le taeao i le talaʻiga mai i lea fale i lea fale, ona fai lea o a ma suʻesuʻega faale-Tusi Paia i le aso atoa. O nisi taimi e ma te uma i le tā o le 11 i le pō. Na matuā faafiafiaina aʻu i laʻu faiva. E tusa foʻi pe ana faaauau ona avea i maʻua o ni paeonia, ou te fiafia lava. O le mea moni, ou te leʻi manaʻo e sui lo ma tofiga ina ua tofia i maʻua i le galuega femalagaaʻi. Ae na iai se isi mea na finagalo Ieova e ma te faia.” Maʻeu le moni o lenā faamatalaga!

LE OLAGA I LE GALUEGA FEMALAGAAʻI

Na ma talosaga e avea i maʻua o ni paeonia faapito a o fai la ma paeonia i Pine Bluff. Na ma mautinoa o le a talia la ma talosaga, ona na manaʻo la matou ovasia o le itumalo e ma te fesoasoani i se faapotopotoga i Texas, ma na manaʻo foʻi e ma te galulue ai i inā o ni paeonia faapito. Na ma fiafia i lenā fuafuaga ina ia fai ai sina suiga i la ma paeonia. Na umi se taimi o ma faatalitali mo se tali mai i le Lālā, ae e leai lava se tali. Mulimuli ane, na tusi mai uso e faailoa mai ua tofia i maʻua i le galuega femalagaaʻi. O le masina lenā o Ianuari i le 1965. Na tofia foʻi le uso o Leon Weaver e auauna o se ovasia o le matagaluega i le taimi lenā. Ua avea nei le uso o Weaver ma sooupu o le Komiti o le Lālā i le Iunaite Setete.

Na ou popole i loʻu tofiga fou o se ovasia o le matagaluega. Ae pe tusa o se tausaga na muamua atu, na iloilo ai oʻu tomai e le ovasia o le itumalo o James A. Thompson. Na ia faailoa mai ma le agalelei nisi o vala ou te galue e faaleleia, ma tomai e manaʻomia e se ovasia matagaluega lelei. E leʻi umi ona ou auauna o se ovasia o le matagaluega, ae ou iloa le matuā tāua o ana fautuaga. O le uso o Thompson le ovasia itumalo muamua na ma galulue faatasi. Maʻeu le tele o ni lesona lelei na ou maua mai i lenā uso faamaoni e taʻumatuaina faaleagaga!

Ou te talisapaia le fesoasoani a uso faamaoni e taʻumatuaina faaleagaga

E leʻi tele ni toleniga na maua e ovasia o matagaluega i na taimi. E tasi le vaiaso na ou galue ai ma se ovasia o le matagaluega ma ou mataʻituina le auala na ia faia ai le asiasiga a se faapotopotoga. O le vaiaso na sosoo ai, na ia mataʻituina ai aʻu ma le auala na ou taulima ai le asiasiga a se isi faapotopotoga. Na ia tuuina mai foʻi ni fautuaga ma ni taʻiala aogā mo aʻu. Na māeʻa ai i inā aʻu toleniga. Ou te manatua lava le tala a Gloria, “Maʻimau pe ana toe faaopoopo nisi vaiaso ma le ovasia.” Ae na ou aʻoaʻoina se manatu tāua a o faagasolo tausaga. E iai lava uso lelei e mafai ona  fesoasoani atu iā te oe, pe afai e te taliaina la latou fesoasoani. E oo mai lava i le asō, e lē mafai ona galo iā te aʻu le fesoasoani na ou maua mai i uso taʻumatuaina e pei o J. R. Brown, o lē na avea o se ovasia femalagaaʻi, ma Fred Rusk o lē na avea o se sui o le aiga Peteli.

Na taatele le faailogalanu i na aso. I se tasi taimi, na fai ai le solo a le KKK i se tasi o aai na ma asia i Tennessee. Ou te manatua se tasi aso na mālōlō ai le matou ʻautalaʻi i se faleʻaiga. Na ou alu e faaaogā le falelētaʻua ae mulimuli mai i oʻu tua se tamāloa palagi foliga sauā, na tā ni peʻa i lona tino e atagia mai ai lona faailogalanu. Peitaʻi, na mulimuli mai i o ma tua se uso palagi, e telē mamao atu lona fuaitino nai lo o i maʻua ma le tamāloa palagi. Na fesili mai le uso iā te aʻu: “Uso Herd, po o lelei mea uma?” Na vave lava ona alu ese le tamāloa. A o faagasolo tausaga, na ou mātauina ai o le māfuaaga e ala ai ona faailogalanu se tagata, e lē ona o le ese o le lanu o se tasi, ae ona o le agasala na tuufaasolo mai iā Atamu, lea e aafia ai i tatou uma. Na ou aʻoaʻoina foʻi, e tutusa uma o tatou uso e ui e eseese o tatou lanu, ma e lotomalilie foʻi o tatou uso e faataulaga o latou ola mo i tatou pe afai e lamatia o tatou ola.

SE OLAGA TAMAOAIGA

E 33 tausaga na ma galulue ai i le galuega femalagaaʻi, ma o le 21 o na tausaga na ou galue ai o se ovasia o le itumalo. Na faatamaoaigaina i maʻua i le tele o na tausaga, ma e anoanoaʻi mea mataʻina na tutupu na faalaeiauina ai i maʻua. Peitaʻi, na iai se isi faamanuiaga na mulimuli mai. Na taunuu iā Aokuso i le 1997 lo ma faanaunauga ua leva ona iai. Na valaaulia i maʻua e auauna i le Peteli i le Iunaite Setete. Ua atoa le 38 tausaga talu ona ma talosaga e fia auauna i le Peteli, ma na ma amata i le masina na sosoo ai. O loʻu manatu na iai, na mananaʻo uso taʻimua e ma te galulue mo sina taimi puupuu i le Peteli. Peitaʻi, e lē o le tulaga lenā na iai.

O loo tumau pea ona avea Gloria o se penina tautele iā te aʻu

Na tofia muamua aʻu ou te galue i le Matagaluega o le Auaunaga, ma e tele mea na ou aʻoaʻoina mai ai. E tele fesili faigatā ma maʻaleʻale e tatau ona taulima e uso, mai i toeaina o faapotopotoga ma ovasia o matagaluega i le atunuu atoa. Ou te talisapaia le onosaʻi ma le lotofesoasoani o nai uso na toleniina aʻu. Ae i loʻu manatu, pe a toe tofia aʻu e galue i lenā matagaluega, e itiiti lava ni mea ou te iloaina.

E ma te fiafia tele ma Gloria i le olaga i le Peteli. O i maʻua o ni tagata e fealapō, ma o se masaniga lelei lea e aogā tele i le Peteli. Pe e tusa ma se tausaga talu ona ma iai i le Peteli, ae amata loa ona ou fesoasoani i le Komiti o le Auaunaga a le Vaega Pule o Molimau a Ieova. Ae na tofia aʻu e avea o se sui o le Vaega Pule i le 1999. E tele ni mea ua ou aʻoaʻoina mai i lenei tofiga. Ae o le lesona e sili ona matilatila iā te aʻu, o le manatu e faapea o Iesu Keriso o le ulu lea o le faapotopotoga Kerisiano ae lē o se tagata.

Na ou maua le faaeaga e auauna ai o se sui o le Vaega Pule talu mai le 1999

Pe a ou toe mafaufau i loʻu olaga, e taitutusa o ma faalogona ma le perofeta o Amosa. Na liuliualo mai Ieova ma silasila mai i lenā leoleo mamoe faatauvaa na galue faavaitaimi e tausia fua o laau o le sukamoru, o ni meaʻai mo na o tagata matitiva. Na tofia e le Atua Amosa e auauna o se perofeta, o se tofiga na faatamaoaigaina ai o ia faaleagaga. (Amo. 7:14, 15) E faapena foʻi aʻu. Na liuliualo mai Ieova ma silasila mai iā te aʻu, o le atalii o se faifaatoʻaga lima vaivai i Liberty i Indiana, ma liligi mai le tele o faamanuiaga iā te aʻu, o faamanuiaga e lē mafaitaulia. (Faata. 10:22) E moni na ou ola aʻe i se aiga mativa, ae o lenei ua matuā faatamaoaigaina aʻu i le itu faaleagaga, e sili mamao atu nai lo o mea na ou faatalitalia.