Muamua, seʻi oʻu faamatala atu loʻu olaga. Na ou fanau i le vaitaimi o le Taua Lona Lua a le Lalolagi i Calgary i Kanata. I le taufaaiʻuiʻuga o le vaitausaga o le 1940, na tuʻituʻi mai ai i lo matou fale se uso paeonia talavou e igoa iā Donald Fraser. Na talia e loʻu tinā le upu moni, ma na fiafia e fai sana suʻesuʻega faale-Tusi Paia. Peitaʻi, ona na maʻi si oʻu tinā, na seāseā mafai ona ia auai i sauniga. E ui i lea, na faaauau ona ia agaʻigaʻi i luma ma papatiso i le 1950. E leʻi atoa se lua tausaga mulimuli ane, ae maliu loa si oʻu tinā. E ui e leʻi talia e loʻu tamā le upu moni i lenā taimi, ae na malie e fai e Molimau a Ieova le maliu o loʻu tinā.

Ina ua mavae ni nai aso talu le maliu, na valaaulia ai aʻu e Alice, o se tuafafine matua e faauuina, ina ia ou auai atu i le sauniga. Na iloa aʻu e Alice ona na masani ona ma ō ma loʻu tinā i sauniga i le faaiʻuga o le vaiaso. Na ou fai i loʻu tamā pe e mafai ona ou alu, ma na malie e ma te ō faatasi. Ae na fai mai loʻu tamā e pau lea o le sauniga e alu ai, ona na fia alu e faafetai i le uso sa faia le lauga o le maliu o loʻu tinā. Na fetaui lelei le sauniga na ma ō ai, auā sa faia ai le Aʻoga o le Faiva Faatiokarate ma le Sauniga o le Auaunaga. Talu ai na auai loʻu tamā i se aʻoga e toleni ai le auala e tautala ai i luma o le lautele, na matuā fiafia lava la o ia e faalogologo i lauga i lenā pō. O lea, na filifili ai loʻu tamā o le a ia auai i le sauniga o le faiva faatiokarate i vaiaso taʻitasi. A o faagasolo taimi, na auai foʻi o ia i isi sauniga uma.

I na aso, e amata le Aʻoga o le Faiva Faatiokarate i le valaau mai o igoa o ē ua tusia o latou igoa i le aʻoga, ona tali atu lea o le tagata, “O aʻu lenei.” I le isi la sauniga, na ou fai ai i le uso pe e mafai ona valaau mai loʻu igoa i le sauniga e sosoo ai. Na faamālō mai le uso iā te aʻu, ae e na te leʻi faamatalaina mai le māfuaaga e ala ai ona valaau mai igoa.

E leai ma soʻu iloa, pe a valaau mai lou igoa, o lona uiga o la ua tusi lou igoa i le aʻoga. Na pau lava le mea na ou manaʻo ai ia lau mai loʻu igoa. O lea, i le sauniga na sosoo ai, na valaau mai ai loʻu igoa ma na ou tali fiafia atu, “O aʻu lenei.” Ina ua uma le sauniga, na ō mai uso ma  tuafāfine ma faamālō mai iā te aʻu. Ae i nai vaiaso mulimuli ane, na tuu mai ai e se uso le pepa o laʻu lauga lea na ou faamatalaina i le amataga o lenei tala.

Na matuā ou popole lava. I na aso, e leʻi iai ni lauga faitau Tusi Paia e pei o nei taimi. Sa tatau ona faia sau lauga e ono i le valu minute le umi. Na fesoasoani loʻu tamā iā te aʻu i le faiga o laʻu lauga, ma e faa 20 ona faataʻitaʻi a o leʻi oo i le aso e fai ai. Ina ua uma le sauniga, na ou maua ni fautuaga aogā mai i le faiaʻoga o le aʻoga. Na faaauau foʻi ona aʻoaʻoina aʻu e Ieova e ala mai i loʻu tamā, o uso ma tuafāfine agavaa, ma lana faalapotopotoga.

NA FAAAUAU ONA AʻOAʻOINA AʻU E IEOVA

Na aʻoaʻo aʻu e le tuafafine o Alice lea na ou taʻua muamua i le auala e talaʻi ai. I na aso, na faalaeiauina i matou e faitau ni mau se tolu i le tagata o le fale, ona faatoʻā ofo lea o se lomiga. Pe a oo i laʻu fale, e amata e Alice le taulimaga ona fai mai lea iā te aʻu e faitau le mau muamua. Pe a uma, ona ou faaauau lea o le taulimaga ma faitau le mau lona lua ma le tolu, ma ofo atu le lomiga. Mulimuli ane, na ou iloa ai amata e aʻu lava ia se taulimaga. Ina ua papatiso loʻu tamā i le 1954, na faaauau ona ia aʻoaʻo aʻu i le auala e talaʻi ai. Na faia e loʻu tamā le mea sili e na te mafaia e tausia aʻe ai aʻu i le upu moni, ma na ia faatāua mea faaleagaga. O le mea lenā e lē taitai ai ona ou tau fesili po o le ā le mea e fai i aso sauniga, faapea le faaiʻuga o le vaiaso lea e ma te ō ai i le talaʻiga.

I le 12 tausaga na ou aʻoga ai, na ou aʻoaʻoina ai ni tomai aogā lea na fesoasoani iā te aʻu a o faagasolo le olaga. O se faataʻitaʻiga, e tele mea na ou aʻoaʻoina i le mataupu faamatematika, ma le kalama o le gagana Peretania. Ua matuā aogā foʻi i loʻu faaeaga o loo iai i le taimi lenei i le Matagaluega o Tusitusiga, mea na ou aʻoaʻoina i aʻu vasega mo le gagana faa-Peretania, faapea le vasega i le auala e faia ai tusigatala.

E masani ona fesili mai isi pe aiseā ou te fiafia ai i le musika. A o oʻu laʻitiiti, e fiafia uma oʻu mātua i le musika, ma o le fitu o oʻu tausaga na ave ai ni aʻu lesona e aʻo ai le tāina o le piano. E ui i lea, e leʻi mafaufau loʻu faiaʻoga e lelei laʻu tā piano. O lea na fai ai i loʻu tamā, e sili ona taofi aʻu lesona. Na fetaui lelei foʻi le tuu o aʻu lesona i lenā taimi, ona ou te leʻi fiafia tele i ai.

Ina ua mavae ni nai masina, na maua ai e loʻu tamā se isi faiaʻoga musika e aʻoaʻoina le auala e tā ai le piano faapea le auala e usu ai pese, ma na ou lelei uma i na mea e lua. A o oʻu laʻitiiti, na manaia loʻu leo ma na ou manumalo i nisi o tauvaga. Na ou faamoemoe e maua soʻu faailoga i le mataupu tau musika, ina ia mafai ai ona avea aʻu o se faiaʻoga musika ma lagolagoina ai laʻu paeonia. Ae a o lata ina maua loʻu faailoga, na ou iloa ai e manaʻomia le tele o loʻu taimi ma le malosi e suʻesuʻe atili ma sauni ai mo suʻega. O lea, na ou filifili ai loa e tuu laʻu aʻoga musika, ae talosaga e avea o se paeonia sauatoa i le 1963.

OLIOLI I LE AUAUNAGA PAEONIA

Ina ua mavae se tausaga talu ona ou paeonia, na tofia ai aʻu o se paeonia faapito i Kapuskasing i Ontario. O laʻu paga paeonia le uso o Daniel Skinner, ma e matua mamao iā te aʻu. Na ia aʻoaʻo aʻu i le tele o mea e faatatau i le auala e faamaopoopo ai se faapotopotoga. Talu ai na tofia aʻu e avea o se sui o le Komiti o le Auaunaga a le Faapotopotoga i le 20 o oʻu tausaga, e tele la mea na manaʻomia ona ou aʻoaʻoina. O se fiafiaga foʻi le vaai i le taimi lenei, ua toe faalaeiauina e le faalapotopotoga le toleni o uso talavou. Pe a faaaogā tatau e na uso le toleniga, o le a tele auala e faaaogā ai i latou e Ieova, e tusa lava pe e lāiti.

O nisi taimi e lē faigofie le nofo ma galue i Kapuskasing, ona e matuā maʻatiʻati le mālūlū (-44 tikerī) pe a oo i le tau mālūlū. Peitaʻi, o le tele o taimi e ma te savavali ma Daniel i so o se mea e ma te ō i ai. E ui lava i na tulaga faigatā, ae o se tasi o mea e sili ona ou fiafia ai i inā, ona o i inā na ma fetaui ai ma le tuafafine o Linda Cole lea na mulimuli ane avea ma aʻu avā.

O Linda o se tuafafine maelega e tele ana asiga. O ia foʻi o se tagata limafoaʻi, lotoalofa, ma e fiafia e faifaimea faatasi ma isi tagata.  O lona tinā o Goldie, o se tuafafine faamaoni, ae o lona tamā o Allen sa tetee i le upu moni. E ui lava i teteega mai iā Allen, ae na masani ona alu Goldie ma ave Linda ma ona tuagane o John ma Gordon i sauniga, ma aʻoaʻo foʻi i latou i le auala e talaʻi ai. E iai le taimi na paeonia uma ai faatasi Goldie, Linda, John, ma Gordon. I le tele o tausaga mulimuli ane, na faatoʻā talia ai e Allen le upu moni, ma lagolagosua i le faapotopotoga.

I le 1965, na valaaulia ai aʻu e auai i le Aʻoga o le Faiva o le Malo na faia i le Peteli i Kanata mo le tasi le masina, ina ia maua ai nisi toleniga faaopoopo. A o oʻu iai i inā, na faalaeiauina ai aʻu e faatumu saʻu tusi talosaga mo le aʻoga i Kiliata. E leʻi tau muamua loʻu mafaufau i le auaunaga faamisionare, ona ou te leʻi manatu ou te agavaa. Peitaʻi, na faatumu pea laʻu talosaga, ma na valaaulia aʻu e auai i le vasega lona 42. I le aʻoga i Kiliata, e masani ona faailoa mai e faiaʻoga se mea e manaʻomia ona matou galulue e faaleleia. O le mea muamua lava na fautuaina aʻu e faaleleia, o le faalolotoina lea o loʻu iloa i le faalapotopotoga. Talu ai faatoʻā 21 oʻu tausaga i le taimi lenā, na fetaui lelei la lenā fautuaga.

I se tasi o lesona i le aʻoga i Kiliata, na matou aʻoaʻoina ai le auala e feutagaʻi ai ma le ʻaufaasalalau, e pei o le leitiō, TV, ma le nusipepa. Na matuā ou fiafia lava i na lesona, ma na lilo i oʻu manatu o le a mulimuli ane aogā iā te aʻu i isi oʻu faaeaga.

AUAUNA I SENEGAL

I nai aso talu ona uma le faauuga, na ma ō ai ma laʻu paga misionare o Michael Höhle, i lo ma faaeaga i Senegal i Aferika. O le taimi lenā, e pe ā ma le toʻa 100 le ʻautalaʻi na iai i inā.

E leʻi atoa se tausaga talu ona ou iai i loʻu faaeaga, ae valaaulia aʻu e galue mo se aso se tasi i le vaiaso i le ofisa o le lālā, lea sa faaaogā ai se potu o se fale misionare. E ui lava i le laʻitiiti o le potu sa fai ma ofisa o le lālā, ae sa faamanatu mai pea e Emmanuel Paterakis, o lē sa avea ma ovasia o le lālā, e lē tatau ona ou manatu māmā i le ofisa auā o loo faaatagia mai ai le faalapotopotoga a Ieova i Senegal i Aferika. I se tasi o aso, na fai mai ai le uso o Emmanuel e ma te faia se tusi faalaeiau e avatu i misionare. I na aso, e leʻi iai se auala faigofie ma taugofie e fai ai ni kopi o se tusi. O lea, na tatau ona tā auauaʻi tusi taʻitasi, ma faamautinoa e leai se mea e sesē ona tā.

A o oʻu sauni ou te alu i le fale i lenā aso, na tuu mai e le uso o Emmanuel se teutusi ma faapea mai: “David, o lau tusi lea mai i le Sosaiete.” Ina ua ou tatalaina le teutusi, na ou tau ai i se tusi lea na ou tāina. O lenā mea na ou aʻoaʻoina mai ai, e tusa lava pe e telē pe laʻitiiti se ofisa o le lālā, ae e tatau ona ou manatua o loo faaatagia mai ai le faalapotopotoga a Ieova.

E tele aʻu uō na maua i le faapotopotoga, ma o le tele o afiafi o Aso Toonaʻi e matou te eva faatasi ai. E ese le manaia o na taimi, ma o loo faaauau pea ona matou fesootaʻi. E lē gata i lea, talu ai na ou aʻoaʻoina le gagana Falani i Senegal, ua matuā aogā lava la i le taimi lenei pe a ou asiasi i isi lālā e faaaogā ai le gagana Falani.

I le tausaga 1968, na ma faamau ai ma Linda. I masina na sosoo ai, na ou taumafai e suʻe saʻu galuega faavaitaimi, ina ia mafai ai ona ma paeonia ma Linda i Senegal. Peitaʻi, o le tele o galuega  i inā, na latou faafaigaluegaina tagatānuu nai lo o tagata ese. O lea na ou toe foʻi ai i Kanata e ma te faaipoipo ma Linda, ma na tofia i maʻua e auauna o ni paeonia faapito i Edmundston i New Brunswick, o se tamaʻi aai i le tuaoi o le itumalo o Quebec.

AUAUNA O NI PAEONIA I NEW BRUNSWICK MA QUEBEC

A o ma leʻi ō atu i Edmundston, e leʻi iai ni tagata talaʻi i le aai, ma e leʻi toʻatele foʻi ni suʻesuʻega faale-Tusi Paia. Na malosi taaʻiga a le lotu Katoliko i le toʻatele o tagata. E toeitiiti o fale uma e iai se faasilasilaga e faasā Molimau a Ieova. Peitaʻi i na aso, e matou te leʻi faatāua tele na faasilasilaga e pei ona tatou faia i aso nei. O lea, na matou ō ai i fale uma lava e tusa pe e iai se faasilasilaga pe leai. I vaiaso taʻitasi, e tuu ai e le lotu Katoliko se faasilasilaga i le nusipepa e faapea: “Tatou ō e suʻe tagata Molimau a Ieova ma aveese mai i inei.” I le taimi lea, e na o le toʻafā lava tagata Molimau a Ieova sa iai, o Victor ma Velda Norberg, ma maʻua ma Linda. O lea, na matou iloa lelei o i matou la e faatatau i ai le faasilasilaga.

E lē taitai galo iā te aʻu le uluaʻi asiasiga a le ovasia matagaluega. Ina ua uma le vaiaso o lana asiasiga, na ia faapea mai: “Atonu o le mea sili e mafai ona outou faia, o le taumafai lea e suia manatu o tagata e faatatau i Molimau a Ieova.” O le mea lenā na matou taumafai e fai talu mai lenā taimi, ma na iai iʻuga lelei. Na faasolosolo mālie lava ona iloa e tagata le eseesega o auauna lotomaulalo a Ieova, ma taʻitaʻi faamaualuluga a le lotu Katoliko. I aso nei, ua iai se tamaʻi faapotopotoga i lenā aai.

E pe ā ma le tausaga na ma auauna ai i lenā oganuu maotua, ae valaaulia loa i maʻua e auai i se faapotopotoga toʻatele i le aai o Quebec. E ono masina sa ma iai i lenā faapotopotoga ma olioli ai i le agaga talimālō ma le agalelei o le ʻauuso i inā, ae tofia loa maʻua e auauna o se ovasia femalagaaʻi.

I le 14 tausaga na sosoo ai, na ma asiasi ai i matagaluega eseese i le itumalo o Quebec. E ese lo ma fiafia i na taimi. Na matuā agaʻigaʻi i luma le galuega i inā, ma o se mea masani le vaai i se aiga o loo suʻesuʻeina le Tusi Paia ma galulue ina ia agavaa e papatiso.

E LĒ GALO LE ʻAUUSO GALULUE MAMAFA

E lē faigatā ona e māfana atu i uso ma tuafāfine Kanata e tautatala i le gagana Falani. O i latou o ni tagata e tautatala saʻo, tiotio ma e faimea fiafia. E ui i lea, e lē o taimi uma e faigofie ai ona latou talia le upu moni ona o le malosi o teteega mai i tauaiga. O nisi o talavou, e masani ona fai ai o latou mātua e lē upu moni, a lē tuua a latou suʻesuʻega ma Molimau a Ieova o le a tuliese mai i le fale. Peitaʻi, o le toʻatele o i latou na tutumau faamaoni pea, ma e mautinoa le matuā fiafia o le finagalo o Ieova iā i latou.

E lē galo foʻi iā te aʻu le galulue mamafa ma le faamaoni o paeonia sauatoa ma paeonia faapito na auauna i Quebec. O le toʻatele o i latou e mai i isi vaega o le atunuu o Kanata. Sa tatau ona latou aʻoaʻoina le gagana Falani, ma faamasani i le aganuu faapea le auala e mafaufau ai tagata, ona o le toʻatele o tagata na taaʻina e le lotu Katoliko.

Na masani ona tofia paeonia faapito i oganuu maotua e leʻi iai ni tagata talaʻi. Talu ai e  leʻi fiafia tagata i Molimau a Ieova, na faigatā ai i nai paeonia ona suʻe se mea e nonofo ai, aemaise se galuega faavaitaimi. E oo lava i ulugalii faatoʻā faaipoipo, na tatau ona latou nonofo faatasi e taʻitoʻafā, taʻitoʻaono, pe taʻitoʻavalu, ina ia gafatia ai se fale mautotogi. E leʻi mafai e se ulugalii ona nonofo na o i laʻua i se fale ona o le taugatā. Peitaʻi, na galulue mamafa nei paeonia. Pe a maua se tagata fiafia e manaʻo e suʻesuʻe, e latou te faia taumafaiga uma ina ia fesoasoani i lenā tagata. I le taimi lenei, e lē o toe manaʻomia ona ō atu ni tagata talaʻi e fesoasoani i le oganuu a Quebec, ma o le toʻatele o paeonia sa iai i inā ua siitia atu i isi vaipanoa o loo tele ai le manaʻoga.

Pe a ma asia faapotopotoga i taimi o asiasiga, e masani ona matou talaʻi faatasi ma talavou i taeao o Aso Toonaʻi. O le faia faapea, e ma te iloa ai luʻi o loo latou fesagaʻia. O nisi o talavou na matou galulue faatasi, ua avea nei o ni misionare i isi atunuu, po o loo auauna foʻi i isi faaeaga.

I na aso, e leʻi mafai e nisi faapotopotoga ona totogi a ma tupe faaalu. E oo ifo la i le faaiʻuga o le masina, ua leai se ma tupe o totoe. O taimi faapena, na manaʻomia ai ona ma faalagolago atoatoa i le tausiga a Ieova, auā e na o ia e malamalama i lo ma tulaga. E leʻi iai lava se taimi ua tuulafoaʻia ai i maʻua e Ieova. E oo atu i le taimi e ma te asiasi ai i le isi faapotopotoga, ua maua foʻi le tupe e ma te ō ai.

LESONA MAI I USO FAAMAONI

E pei ona ou taʻua muamua, e tele aogā na ou maua mai i le aʻoga i Kiliata, i le auala e feutagaʻi ai ma le ʻaufaasalalau. I Quebec, e tele avanoa na mafai ona molimau atu ai e ala i le leitiō, TV, ma le nusipepa. E masani ona ma galulue ma se isi ovasia femalagaaʻi e igoa iā Léonce Crépeault, o sē sa iai le poto masani e feutagaʻi ai ma le ʻaufaasalalau. Ae pe a ia talanoa i tagata e tele lo latou tomai i mataupu faasalalau, nai lo o le faaalia atu o le tele o lona iloa, e masani ona ia faapea atu: “O loo ma fuafua e faasalalau atu se tauaofiaga tele a Molimau a Ieova. Peitaʻi, e lē tele so ma iloa i mea tau faasalalau. E ma te talisapaia ai la so o se tou fautuaga iā i maʻua.” O le lotomaulalo o Léonce, na maua ai le tele o le fesoasoani mai i le ʻaufaasalalau.

Mulimuli ane, na tofia aʻu e ma te galulue ma se uso lōia e igoa iā Glen How, ina ia taulima mataupu maʻaleʻale e masani ona fesiligia e  le ʻaufaasalalau. O taimi na sa matuā aogā ai lava toleniga na ou maua mai i le aʻoga i Kiliata, ma mai i le uso o Léonce. O se matuā faaeaga lo ma galulue ma le uso o Glen. O ia o se tagata e lē fefe e tū i luma o le faamasinoga ina ia puipuia le faalapotopotoga. Ae e sili atu i lenā, o ia o sē e tele lona alofa iā Ieova.

I le 1985, na tofia ai i maʻua i se matagaluega i Kanata i sisifo e lata i le mea sa iai si oʻu tamā, ma na mafai ai ona ma saunia le tausiga mo ia. Peitaʻi, e na o le tolu masina ae maliu si oʻu tamā. Na faaauau pea ona ma auauna o se ovasia matagaluega i Kanata i sisifo seʻia oo i le 1989, ina ua valaaulia i maʻua e auauna i le Peteli i Amerika. O le taimi lea ua 19 tausaga talu ona ma auauna i le faaeaga o se ovasia femalagaaʻi, ma olioli i le tele o faatasiga ma uso ma tuafāfine na talimālō iā i maʻua. E ma te matuā lotofaafetai iā i latou uma na faaavanoa o latou fale ina ia ma nonofo ai, ma saunia le tausiga mo i maʻua.

AUAUNA I LE PETELI I AMERIKA

Ina ua ma taunuu i le Peteli i Brooklyn, na tofia aʻu e galue i le Matagaluega o le Auaunaga. E tele toleniga na ou maua i inā, ma o se tasi o lesona na ou aʻoaʻoina, o le aua lea le taumatemateina se mataupu, ae ia faamautinoa ua ou maua uma faamatalaga saʻo. I le 1998, na tofia ai aʻu ou te galue i le Matagaluega o Tusitusiga, lea o loo faaauau ona ou galue ai i le taimi lenei ma aʻoaʻo mai ai le tele o lesona aogā. Na ou maua foʻi le faaeaga e fesoasoani ai i le uso o John Barr, a o avea ma sooupu o le Komiti o Tusitusiga. E lē galo iā te aʻu toleniga na ou maua mai iā te ia, faapea taimi matagofie na ma galulue faatasi ai. O ia o se uso na faaalia uiga faa-Kerisiano.

O se matuā faaeaga le galulue ma uso ma tuafāfine lotomaulalo o loo auauna i le Matagaluega o Tusitusiga. E fai ma a latou masani le talosagaina o le fesoasoani a Ieova i lo latou faaeaga, ma e latou te iloa foʻi ua mafai ona faataunuuina lo latou faaeaga ona o le fesoasoani a le agaga paia o Ieova, ae e lē ona o ni o latou lava tomai.

O se matuā faaeaga foʻi iā i maʻua ma Linda le asiasi i o tatou uso ma tuafāfine faamaoni o loo iai i atunuu e 110. Ua ma vāaitino i le alolofa o le ʻaumisionare, o sui o Komiti o le Lālā, ma isi o loo iai i le auaunaga faataimi atoa. Maʻeu foʻi se faamanuiaga ua ma maua, o le vaaia o le maelega ma le tumau faamaoni o i latou o loo faaauau ona faamuamua le Malo, e ui lava ina aafia i faigātaua, o le taugatā o le soifuaga, ma teteega. E mautinoa le alofa faapelepele o Ieova iā i latou uma.

A o faagasolo tausaga, e telē le fesoasoani ma le lagolagosua a Linda i oʻu faaeaga. O ia o sē e fiafia e faifaimea faatasi ma isi, ma e mataalia foʻi i auala e fesoasoani atu ai i isi. E ese le lelei o Linda i le amataina o talanoaga. E toʻatele i latou ua ia fesoasoani i ai ina ia maua le upu moni, e aofia ai i latou ua leva e leʻi toe talaʻi. O ia o se faamanuiaga mai iā Ieova! A o faasolo ina ma matutua, e ma te talisapaia foʻi le fesoasoani a uso ma tuafāfine e talavou ifo i taimi e ma te faimalaga ai, faapea le sauniaina o mea e ma te manaʻomia.—Mare. 10:​29, 30.

Pe a toe tepa i le 80 tausaga ua mavae, ou te lagona le matuā lotofaafetai. E tai pei oʻu faalogona o le faisalamo o lē na tusi: “Le Atua e, na e aʻoaʻo mai iā te aʻu talu mai loʻu talavou, ma e oo mai nei lava, ou te taʻutaʻu atu pea au galuega ofoofogia.” (Sala. 71:17) Ou te faamoemoe o le a faaauau pea ona aʻoaʻoina aʻu e Ieova!