Skip to content

Skip to table of contents

 TALAAGA O LE SOIFUAGA

Maliu Loʻu Tamā Moni Ae Maua se Tamā Faaleagaga

Maliu Loʻu Tamā Moni Ae Maua se Tamā Faaleagaga

NA FANAU loʻu tamā i Graz i Oseteria i le 1899, ma o ia o se talavou a o faagasolo le Taua Muamua a le Lalolagi. A o leʻi leva talu ona amata le Taua Lona Lua a le Lalolagi i le 1939, ae ave faamalosi loa o ia i le vaegaau a Siamani. Na maliu loʻu tamā i le 1943 a o tau le taua i Rusia. O le iʻuga faanoanoa lenā sa motusia ai le ma mafutaga ma loʻu tamā, ma ou te leʻi iloa lelei o ia auā sa na o le lua oʻu tausaga i lenā taimi. Sa ou matuā misia loʻu tamā, aemaise ina ua ou alu i le aʻoga ma vaaia le toʻatele o isi tama ma o latou tamā. A o oʻu talavou, na ou maua le faamāfanafanaga ina ua ou aʻoaʻoina e faatatau i lo tatou Tamā i le lagi, o lē e lē mafai ona maliu.​—Sapa. 1:12.

MEA NA OU AʻOAʻOINA MAI I LE BOY SCOUTS

A o oʻu laʻitiiti

Ina ua fitu oʻu tausaga, sa ou auai i le vaega mo tama talavou e taʻua o le Boy Scouts. I le 1908, na faavaeina ai i Peretania lenei faalapotopotoga i le lalolagi aoao, e Robert Stephenson Smyth Baden-Powell, o se taʻitaʻi o le vaegaau a Peretania. I le 1916, na amata ai e lenei taʻitaʻi se kalapu mo tama talavou e taʻua o le Wolf Cubs po o le Cub Scouts.

E ese loʻu fiafia i faaiʻuga o vaiaso, ona sa matou tolauapi ai i le vaomatua, momoe i faleʻie, ofu la matou togiga ma faataʻitaʻi le savali. Ae sa sili ona ou fiafia i le taimi sa faatasitasi ai ma isi tama o le Scouts, a o nonofo faataamilo i le afi i le afiafi, usu pese, ma fai taaloga i le vaomatua. Sa matou aʻoaʻoina foʻi le tele o mea e faatatau i le natura, ma na amata ai ona ou talisapaia galuega a Lē na foafoaina i tatou.

O tama e auai i le Boy Scouts, e faalaeiauina i latou ia faia se gaoioiga lelei i aso uma. E masani ona matou faafeiloaʻi le tasi i le isi i le faaupuga, “Ia Nofosauni.” Sa ou fiafia tele i lenei faiga. E silia i le selau tama sa iai i le matou vaega, ma o le ʻafa e lotu Katoliko, o le isi ʻafa e lotu Porotesano, ae toʻatasi e lotu Puta.

Talu mai le 1920, e iai ni faatasiga faavaomalo a le Boy Scouts e faia pe a mavae ni nai tausaga. O se tasi o faatasiga na ou auai ai sa faia i Bad Ischl i Oseteria, iā Aokuso i le 1951. O le isi faatasiga sa faia e lata ane i Birmingham i Egelani, iā Aokuso i le 1957, lea e pe ā ma le 33,000 Scouts mai i atunuu e 85 na auai ai. Sa auai foʻi le pe ā ma le 750,000 tagata, e aofia ai le Tupu Tamaʻitaʻi o Egelani o Elisapeta. Sa ou manatu o le iai i le Boy Scouts, sa pei o loo oʻu iai i se ʻauuso i le lalolagi aoao. E aunoa ma loʻu iloaina, e lē o toe umi ae ou auai i se ʻauuso e sili atu, lea e faia aʻe i tagata e alolofa i le Atua.

FEILOAʻI I SE MOLIMAU A IEOVA MO LE ULUAʻI TAIMI

Rudi Tschiggerl, o sē e tomai i le faia o meaʻai e pei o pai, o ia na muamua molimau mai iā te aʻu

I se vaimea o Mati po o Aperila i le 1958, ua lata ina māeʻa laʻu galuega o se waiter, i le Grand Hotel  Wiesler i Graz i Oseteria. O i inā sa molimau lē fuafuaina mai ai Rudolf Tschiggerl iā te aʻu, o sē na ma faigaluega faatasi ma e tomai i le faia o meaʻai e pei o pai. Ou te leʻi faalogo muamua lava e faatatau i le upu moni. Sa ia taʻua muamua le mataupu e faatatau i le Tolutasi, ma faapea mai e lē o se aʻoaʻoga faale-Tusi Paia. Sa faaali atu oʻu manatu e lagolagoina ai le aʻoaʻoga o le Tolutasi, ma na ou manaʻo e faamaonia atu e sesē lana faamatalaga. Sa ou fiafia iā Rudolf, ma na ou taumafai e uunaʻia o ia e toe foʻi i le Lotu Katoliko.

Na aumai e Rudolf o lē sa matou faaigoaina iā Rudi, se Tusi Paia mo aʻu. Ae sa ou manaʻo i se Tusi Paia faa-Katoliko. Na amata ona ou faitau i ai, ma e leʻi umi ae ou tau i se sāvali na lolomi e le Watchtower Society, na tuu i ai e Rudi. Sa ou teena lenei sāvali, auā na ou manatu sa faaupu i se auala e foliga mai e saʻo, ae e lē moni. E ui i lea, sa ou lotomalie e talanoa ma Rudi i le Tusi Paia. Sa ia faaalia le faautauta ma lē toe ofoina mai iā te aʻu so o se pepa na lolomiina. E pe ā ma le tolu masina sa ma faia ai e lē aunoa se talanoaga faale-Tusi Paia. O nisi taimi e uma na talanoaga ua leva le pō.

Ina ua māeʻa laʻu galuega o se waiter, na auina atu aʻu e loʻu tinā i se aʻoga e maua ai nisi toleniga i le galue ai i faletalimālō. O lea, na ou siitia atu ai i Bad Hofgastein, o se aai i le vanu o atumauga o Alps, ma o i inā sa iai le aʻoga. Sa fai paaga lenei aʻoga ma le Grand Hotel i Bad Hofgastein, ma o nisi taimi ou te faigaluega ai i lenā faletalimālō ina ia faalautele ai loʻu tomai.

ASIASI MAI NI TUAFĀFINE MISIONARE E TOʻALUA

Na amata ona ou suʻesuʻeina le Tusi Paia ma Ilse Unterdörfer ma Elfriede Löhr, i le 1958

Na lafo atu e Rudi i le lālā i Vienna le tuatusi o le nofoaga fou lea ua ou iai, ona talosaga lea e le lālā ni tuafāfine misionare se toʻalua e asiasi mai iā te aʻu. O i laʻua o Ilse Unterdörfer ma Elfriede Löhr. * I se tasi aso, na logo mai ai aʻu e le matou tali telefoni o loo iai ni fafine se toʻalua i fafo i se taavale, e fia talanoa iā te aʻu. Sa faateʻia aʻu ona ou te leʻi iloa po o ai i laʻua, ae na ou alu pea e vaai. Na ou iloa mulimuli ane, o nei tuafāfine sa la feaveaʻia faananā lomiga a Molimau a Ieova i le taimi o le pulega a Nasi i Siamani, a o faasā le galuega talaʻi a o leʻi gāpā le Taua Lona Lua a le Lalolagi. A o leʻi amata le taua, na puʻea nei tuafāfine e leoleo nanā a Siamani (Gestapo), ma auina atu i le nofoaga o faasalaga i Lichtenburg. Ae a o faagasolo le taua, sa auina atu i laʻua i le nofoaga o faasalaga i Ravensbrück, e lata ane i Berlin.

Sa ou faaaloalo i nei tuafāfine, auā sa pei lava lo la matutua o loʻu tinā. Ou te leʻi manaʻo e faamaʻimau lo la taimi e ala i le faia o se talanoaga ma i laʻua, ma mulimuli ane ona ou toe fai lea i ai e faamuta la matou talanoaga. O lea, na ou talosaga atu ai e aumai iā te aʻu se lisi o mau e faatatau i le aʻoaʻoga a le Katoliko, e uiga i le faasologa o pope lea e faapea na amata mai i le aposetolo o Peteru. Na ou taʻu atu iā i laʻua, o le a ou alu e talanoa nei mau faatasi ma se patele. Na ou manatu o le faia faapea o le a ou maua ai le upu moni.

 AʻOAʻOINA E FAATATAU I LE TAMĀ PAIA MONI I LE LAGI

Na faapea mai le Lotu Katoliko o fetalaiga a Iesu o loo i le Mataio 16:18, 19, e lagolagoina ai le talitonuga e faatatau i le faasologa o pope. E talitonu foʻi le Katoliko o le pope o ia o le Tamā Paia, ma e lē mafai ona sesē so o se faamatalaga e na te faia i mataupu tau aʻoaʻoga a le lotu. E talitonu le toʻatele o tagata Katoliko i lenei manatu, ma ua fai ma faavae o lo latou faatuatuaga. Sa ou talitonu foʻi i ai ma manatu afai ua faapea mai le pope e moni le aʻoaʻoga o le Tolutasi, o lona uiga e saʻo. Ae sa ou manatu foʻi, afai e mafai ona faia e le pope se mea sesē, o lona uiga e ono sesē foʻi le Tolutasi.

Ina ua ou asiasi atu i le patele, sa lē mafai ona ia taliina aʻu fesili. Nai lo o lea, sa ia tuuina mai se tusi e faatatau i le faasologa o pope, ma sa ou alu ma ave i le fale e faitau i ai. Na ou toe foʻi atu i le patele ma nisi foʻi fesili. Sa lē mafai lava ona ia taliina aʻu fesili ma faapea mai: “E lē mafai ona ou faatalitonuina oe, e lē mafai foʻi ona e faatalitonuina aʻu. . . . Ae ia manuia au taumafaiga!” E leʻi manaʻo le patele e toe fai se ma talanoaga.

Ina ua mavae lenei mea, sa ou manaʻo loa e suʻesuʻe le Tusi Paia faatasi ma Ilse ma Elfriede. E tele mea sa la aʻoaʻo mai e faatatau i le Tamā Paia i le lagi, o Ieova le Atua. (Ioa. 17:11) I lenā taimi, e leʻi iai se faapotopotoga i le vaipanoa sa iai nei tuafāfine. O lea, na la faia ai sauniga i le fale o se aiga na faaalia le fiafia, ma e toʻaitiiti ē na auai ai. Talu ai e leʻi iai se uso papatiso e taʻimua, o lea na talanoaina ai e i laʻua lava mataupu o le sauniga. O nisi taimi e asiasi mai ai se uso mai i se isi aai, ona totogi lea o se fale ae faia ai se lauga lautele.

AMATA ONA AUAI I LE FAIVA

Iā Oketopa 1958, na amata ai ona matou suʻesuʻeina le Tusi Paia ma Ilse ma Elfriede. Sa ou papatiso i le tolu masina mulimuli ane ai, iā Ianuari 1959. A o leʻi oo i loʻu papatisoga, sa ou talosaga atu i ai pe mafai ona matou ō faatasi i le talaʻiga, ou te fia iloa po o le ā le auala e faia ai le galuega talaʻi. (Galu. 20:20) Ina ua mavae lenā uluaʻi taimi i le talaʻiga faatasi ma i laʻua, na ou talosaga atu loa mo saʻu lava oganuu. Sa la tuuina mai se oganuu ou te talaʻi ai na o aʻu mai lea fale i lea fale, ma toe asia i latou na faaalia le fiafia. O le uso muamua lava na ma talaʻi faatasi, o le ovasia matagaluega na asiasi mai iā i matou i se taimi mulimuli ane.

I le 1960 ina ua māeʻa laʻu aʻoga i le faletalimālō, na ou toe foʻi ai i loʻu aiga ma taumafai e aʻoaʻoina i latou i upu moni o le Tusi Paia. E ui lava e oo mai i le taimi lenei e leʻi talia e se tasi le upu moni, ae e iai nisi ua faaalia le fiafia.

SE OLAGA I LE AUAUNAGA FAATAIMI ATOA

Ina ua 20 oʻu tausaga

I le 1961, na lafo mai ai e le ofisa o le lālā ni tusi e faalaeiau ai uso ma tuafāfine, ia mafaufau e auai i le auaunaga paeonia. Sa ou manatu loa e tatau ona amata saʻu paeonia, auā sa ou nofofua ma aumalosi. Sa ou mafaufau ou te manaʻomia se taavale mo le auaunaga. O lea, na ou talanoa atu ai iā Kurt Kuhn, o se ovasia matagaluega, po o le ā sona manatu ae oʻu faigaluega mo ni nai masina, ina ia maua se tupe e faatau ai se taavale. Na tali mai o ia: “Sa manaʻomia e Iesu ma ona aposetolo se taavale mo le auaunaga faataimi atoa?” O lenā fesili, sa fesoasoani ou te faia ai se filifiliga saʻo. Sa ou fuafua loa e amata laʻu paeonia i le vave e mafai ai. Ae ona sa ou faigaluega i le faleʻaiga o se faletalimālō mo le 72 itula i vaiaso uma, sa manaʻomia ai ona ou faia ni suiga.

 Sa ou talosaga atu i loʻu pule, pe mafai ona ou faigaluega mo le 60 itula nai lo o le 72 itula. Sa ia talia laʻu talosaga ae sa tumau pea loʻu totogi. I se taimi mulimuli ane, sa ou toe talosaga i ai pe mafai ona ou faigaluega mo le na o le 48 itula i le vaiaso, ma sa toe talia foʻi ae na tumau pea loʻu totogi. I se tasi aso, na ou toe talosaga i ai ou te faigaluega mo na o le 36 itula i le vaiaso, ma na toe talia foʻi. Sa ou maofa ona na tumau pea loʻu totogi. E foliga mai sa musu le pule ou te alu ese. O lenei fetuutuunaʻiga, na mafai ai ona amata laʻu paeonia sauatoa. I na taimi, e 100 itula na manaʻomia ona faaalu e paeonia i le talaʻiga i le masina.

I le fā masina mulimuli ane ai, sa tofia ai aʻu o se paeonia faapito, ma o se auauna o le faapotopotoga i se faapotopotoga toʻaitiiti i le itumalo o Carinthia, i le aai o Spittal an der Drau. I na vaitaimi, sa manaʻomia ona faaalu e paeonia faapito le 150 itula i le talaʻiga i le masina. Sa leai saʻu paga paeonia, ae sa matuā lagolagosua mai le tuafafine o Gertrude Lobner i laʻu faiva. Sa avea o ia o se auauna fesoasoani i le faapotopotoga. *

NISI FAAEAGA FOU

I le 1963, na valaaulia ai aʻu e avea ma ovasia matagaluega. Sa masani ona ou faimalaga i nofoaafi i le va o faapotopotoga, ma ou te alu ma ave ni atopaʻu mamafa. O le toʻatele o uso e leai ni a latou taavale, ma sa leai se tasi na faatalia aʻu i taimi ou te taunuu ai. Ina ia aua neʻi manatu uso ou te mimita, na ou musu ai ou te alu i se taavale laʻu pasese, ae na ou savali i le fale ou te nofo ai.

I le 1965, na valaaulia ai aʻu e auai i le vasega lona 41 i le Aʻoga o Kiliata, ma o le toʻatele o laʻu vasega o ni ē e nofofua e pei foʻi o aʻu. Sa matuā faateʻia aʻu ina ua tofia aʻu e toe auauna o se ovasia matagaluega i loʻu atunuu o Oseteria. A o leʻi oʻu tuua le Iunaite Setete, sa talosagaina aʻu e galulue faatasi ma se ovasia matagaluega mo le fā vaiaso. Sa ou matuā talisapaia le galulue faatasi ma Anthony Conte, auā o se uso e agaalofa, e fiafia i le galuega talaʻi ma na iai iʻuga lelei o lana faiva. Sa ma auauna faatasi i le itu i mātū o le setete o Niu Ioka, i le vaipanoa e taʻua o Cornwall.

Le aso o la ma faaipoipoga

Ina ua ou taunuu i Oseteria, sa tofia aʻu e auauna i se matagaluega lea na ou feiloaʻi ai iā Tove Merete, o se tuafāfine nofofua e lalelei tele. Na tausia aʻe o ia i le upu moni ina ua lima ona tausaga. Pe a fesili mai uso iā i maʻua pe na faapefea ona ma feiloaʻi, e ma te tala ʻata atu i ai: “O fuafuaga uma lava a le ofisa o le lālā.” Na ma faaipoipo i le tausaga na sosoo ai iā Aperila 1967, ma faaauau ai i le galuega femalagaaʻi.

O loo faamatalaina i le Roma 8:15, e mafai e nisi ona maua se faiā faapitoa ma Ieova, ma avea ma ona atalii faaleagaga. E latou te valaau atu ma le māfana iā Ieova, “Ava, le Tamā e!” I le 1968, na ou iloa ai ua vaetamaina aʻu e Ieova e avea ma ona atalii faaleagaga, ma ua ou aofia ai i se ʻauuso faaleagaga o sui faauuina.

Na faaauau ona ma auauna faatasi ma Merete i le galuega o le matagaluega ma le itumalo seʻia oo i le 1976. O nisi taimi i le tau mālūlū, e ma te momoe ai i potu e leai ni mea e faamāfanafana ai. I se tasi taimi, na ma feala aʻe ma iloa atu le pito o le  palanikeke i luma o o ma foliga, ua toʻa ai le ʻaisa! Sa ma manatu loa e ma te ō ma feaveaʻi se tamaʻi mea e faamāfanafana ai e ola i le uila, ina ia ma faamāfanafana ai i le pō. I nisi vaipanoa, pe afai e ma te fia faaaogāina le falelētaʻua, e tatau ona ma savavali i le ʻaisa e agaʻi atu i le falelētaʻua e tū i fafo, lea e sao atu i ai le savili mālūlū. E leʻi iai so maʻua lava fale e ma te toe foʻi i ai. O lea, i Aso Gafua, e ma te nonofo ai i le fale lea sa ma faamautū ai mo le asiasiga i le vaiaso ua mavae. Pe a oo i le taeao o le Aso Lua, ona ma faimalaga lea i le isi faapotopotoga.

I le tele o tausaga ua mavae, ou te fiafia e faapea atu sa telē le lagolagosua a si aʻu avā pele iā te aʻu. E fiafia tele o ia i le galuega talaʻi, ma e leʻi iai lava se taimi na ou tau faalaeiauina ai o ia e alu e talaʻi. E alofa foʻi o ia i le ʻauuso ma e manatu mamafa mo isi. Sa avea lea ma fesoasoani tele iā te aʻu.

I le 1976, sa valaaulia ai i maʻua e galulue i le ofisa o le lālā o Oseteria i Vienna, ma sa tofia aʻu o se sui o le Komiti o le Lālā. I lenā taimi, sa vaavaaia e le lālā i Oseteria le galuega i nisi o atunuu i Europa i Sasaʻe, ma faamautinoa o loo maua e uso i na atunuu lomiga e aunoa ma le iloaina e le malo. Sa taʻimua le uso o Jürgen Rundel i lenei vala ma sa ou maua le faaeaga e galulue faatasi ma ia. Mulimuli ane, sa tofia aʻu e vaavaaia le galuega faaliliu mo gagana e sefulu o atunuu i Europa i Sasaʻe. O loo auauna pea ma le faamaoni Jürgen ma lana avā o Gertrude o ni paeonia faapito i Siamani. Na amata i le 1978 ona lolomia e le lālā i Oseteria, a tatou mekasini i gagana e ono i se tamaʻi masini lomitusi. Sa auina atu foʻi mekasini i tagata na talosaga mai i atunuu eseese. Na avea le uso o Otto Kuglitsch ma uso autū sa vaaia lenei galuega, ma o loo auauna nei i laʻua ma lana avā o Ingrid i le ofisa o le lālā i Siamani.

I Oseteria, sa ou fiafia e molimau i auala eseese e aofia ai le galuega i magāala

Na lomia foʻi e uso i Europa i Sasaʻe lomiga i o latou lava atunuu, e faaaogā ai ni tamaʻi masini lomitusi. Peitaʻi, sa latou manaʻomia pea le lagolagosua mai i uso o isi atunuu. Sa vaavaaia e Ieova lenei galuega. Sa talisapaia e le lālā nei uso ona o lo latou auauna ma le faamaoni, i lalo o faasāsāaga mo le tele o tausaga.

SE ASIASIGA FAAPITOA I ROMANIA

I le 1989, na ou maua ai le faaeaga e malaga i Romania faatasi ma le uso o Theodore Jaracz, o se sui o le Vaega Pule. Sa matou ō faatasi ma Rolf Kellner, e avea ma faaliliu upu. O le sini ina ia  fesoasoani i se vaega toʻatele o uso, ia toe autasi ma le faalapotopotoga. I le 1949, na amata ai ona vavaeesea e nei uso i latou lava mai i le faalapotopotoga, ma faatū a latou lava faapotopotoga. Peitaʻi, sa faaauau ona latou faia le talaʻiga ma papatiso tagata fou. Na faafalepuipuiina foʻi i latou ona o le solitū e auai i le vaegaau, e pei lava foʻi o uso sa avea pea ma vaega o le faalapotopotoga. Talu ai sa faasā pea le galuega i Romania, na matou feiloaʻi faalilolilo ai ma uso i le fale o le uso o Pamfil Albu. Sa matou faatasi ma uso toeaina sa taʻimua, atoa ma sui tofia aloaʻia o le Komiti o le Atunuu i Romania.

I le pō lona lua o la matou feiloaʻiga, na taumafai ai le uso o Albu e uunaʻia ona uso toeaina e toʻafā ina ia aufaatasi ma i matou. Na faapea atu o ia: “Afai e tatou te lē faia faapea i le taimi nei, atonu e lē toe maua se isi avanoa.” Ina ua māeʻa, e pe ā ma le 5,000 uso na toe foʻi mai i le faalapotopotoga. Maʻeu se manumalo mo Ieova a o se toʻilalopopo mo Satani!

Ina ua lata i le faaiʻuga o le 1989, a o leʻi paʻū le faa-Komunisi i Europa i Sasaʻe, na valaaulia ai e le Vaega Pule i maʻua ma laʻu avā ina ia galulue i le ofisa ulu i Niu Ioka. Sa matuā faateʻia i maʻua i lenei mea! Na amata ona ma auauna i le Peteli i Brooklyn iā Iulai 1990. I le 1992, sa tofia ai aʻu o se fesoasoani i le Komiti o le Auaunaga a le Vaega Pule. Talu mai le 1994, sa ou maua ai le faaeaga e auauna o se sui o le Vaega Pule.

MANATUNATU I LE TAIMI UA TEʻA MA TAULAʻI I LE LUMANAʻI

I maʻua ma laʻu avā i Brooklyn, i Niu Ioka

Ua leva ona mavae le taimi sa ou faigaluega ai i le faletalimālō. Ua ou fiafia i le taimi lenei i le faia o se sao faatasi ma isi, e saunia ma tufatufa atu meaʻai faaleagaga i le ʻauuso i le lalolagi aoao. (Mata. 24:45-47) Pe a ou toe mafaufau i le silia i le 50 tausaga na ou auai ai i le auaunaga faataimi atoa, ou te lagona le matuā lototalisapaia. E tumu aʻu i le fiafia pe a vaai atu i le faamanuia a Ieova i le ʻauuso i le lalolagi aoao. Ou te fiafia e auai i tauaofiaga faavaomalo, auā e aʻoaʻoina ai e faatatau i lo tatou Tamā i le lagi o Ieova, faapea upu moni o le Tusi Paia.

Ou te tatalo o le a mafai e le isi faitau miliona o tagata ona suʻesuʻeina le Tusi Paia, talia le upu moni, ma auauna autasi iā Ieova faatasi ma le ʻauuso Kerisiano i le lalolagi aoao. (1 Pete. 2:17). Ou te tulimataʻia foʻi le taimi ou te vaavaai mai ai i le lagi i le toetutū aʻe o tagata i le lalolagi, faapea le toetū mai o loʻu tamā. Ou te faamoemoe o le a fia auauna iā Ieova i le Parataiso loʻu tamā, loʻu tinā ma isi oʻu aiga pele.

Ou te tulimataʻia le taimi ou te vaavaai mai ai i le lagi i le toetutū aʻe o tagata i le lalolagi, faapea le toetū mai o loʻu tamā

^ pala. 15 Tagaʻi i le talaaga o soifuaga o nei tuafāfine i le Watchtower o Novema 1, 1979.

^ pala. 27 I aso nei, ua lē o toe taʻua o se auauna o le faapotopotoga ma se auauna fesoasoani o le faapotopotoga, ae ua tofia se sooupu ma se failautusi mai i le ʻautoeaina o faapotopotoga taʻitasi.