LESONA 26
O le ā le Māfuaaga o Mafatiaga ma Mea Leaga?
E masani ona tuufesili tagata pe aiseā e tutupu ai mea leaga. Ae e tatou te fiafia ona ua faailoa mai i le Tusi Paia le tali o lenā fesili!
1. Na faapefea ona aumaia e Satani mea leaga i le lalolagi?
Na fouvale Satani le Tiapolo i le Atua. Na manaʻo e na te pulea isi, ma uunaʻia le uluaʻi ulugalii o Atamu ma Eva e fouvale atu foʻi i le Atua, e ala i lona fai atu o se pepelo iā Eva. (Kenese 3:1-5) Na ia faapea atu iā Eva, o loo taofia e le Atua se mea lelei mai iā te ia, ma o le a sili atu ona fiafia tagata pe a lē usiusitaʻi i le Atua. Na faia e Satani le uluaʻi pepelo e ala i le faapea atu iā Eva e lē oti lava o ia. O le māfuaaga lenā ua taʻua ai o ia “o sē e pepelo ma le tamā o le pepelo.”—Ioane 8:44.
2. O le ā na filifili Atamu ma Eva e fai?
Na faaalia e Ieova le limafoaʻi iā Atamu ma Eva. Na ia faapea atu e mafai ona la aai i laau uma o le faatoʻaga o Etena, seʻi vaganā ai le laau e tasi. (Kenese 2:15-17) Ae na la filifili lava e aai i le fua o lenā laau. “Ona tago atu lea o [Eva] i le fua ma ʻai ai.” Mulimuli ane “ua ʻai ai foʻi” ma Atamu. (Kenese 3:6) Na la lē usiusitaʻi uma i le Atua. Na lelei atoatoa Atamu ma Eva ma na mafai ona la faia le mea saʻo. Ae o lo la lē usiusitaʻi ma le loto i ai i le Atua, ua la agasala ai ma teena lana aiā e pule ai. O lenā filifiliga na iʻu atu ai i le tele o mafatiaga.—Kenese 3:16-19.
3. Ua faapefea ona tatou aafia i le filifiliga a Atamu ma Eva?
Ina ua agasala Atamu ma Eva, na lē lelei atoatoa ai ma tuufaasolo mai ai le tulaga lē lelei atoatoa, i ē uma na tupuga mai iā i laʻua. Ua faapea mai le Tusi Paia e faatatau iā Atamu: “E pei ona oo mai o le agasala i le lalolagi ona o le tagata e toʻatasi, o le oti foʻi ona o le agasala, ona oo mai ai lea o le oti i tagata uma.”—Roma 5:12.
E tele māfuaaga ua tatou mafatia ai. E tatou te mafatia ona o filifiliga lē lelei e tatou te faia, o filifiliga lē lelei e faia e isi, po o mea foʻi e tutupu faafuaseʻi i le taimi e leʻi faatalitalia.—Faitau le Failauga 9:11.
SAʻILIʻILI ATILI
Iloilo pe aiseā e lē tuuaʻia ai le Atua i mafatiaga o loo tutupu i aso nei, ma po o ā ona faalogona pe a tatou mafatia.
4. O ai e māfua ai o tatou mafatiaga?
E toʻatele tagata e talitonu o loo pulea e le Atua le lalolagi atoa. Ae pe e moni lenā manatu? Faaali le VITIŌ.
Faitau le Iakopo 1:13 ma le 1 Ioane 5:19, ona talanoa lea i le fesili lenei:
-
Pe e tuuaʻia le Atua i mafatiaga ma mea leaga?
5. Iloilo iʻuga o le pule a Satani
Faitau le Kenese 3:1-6, ona talanoa lea i fesili nei:
-
O le ā le pepelo na fai atu e Satani?—Tagaʻi i fuaiupu 4 ma le 5.
-
Na faapefea ona faaupu atu e Satani le manatu sesē, o loo taofia e Ieova se mea lelei mai le mauaina e tagata?
-
Pe a fua i faamatalaga a Satani, pe e toe manaʻomia la e tagata le pule a Ieova ina ia maua ai se olaga fiafia?
Faitau le Failauga 8:9, ona talanoa lea i le fesili lenei:
-
O le ā ua tupu ina ua lē toe pulea e Ieova le lalolagi?
-
A. Na lelei atoatoa Atamu ma Eva ma sa ola i le Parataiso. Ae na la faalogo iā Satani ma fouvale ai iā Ieova
-
E. Ina ua māeʻa le fouvalega, na faatumulia le lalolagi i le agasala, mafatiaga ma le oti
-
I. O le a aveesea e Ieova le agasala, mafatiaga, ma le oti. O le a toe lelei atoatoa tagata ma ola i le Parataiso
6. E manatu mamafa mai Ieova i o tatou mafatiaga
Pe e manatu mamafa mai Ieova pe a tatou mafatia? Mātau faamatalaga na tusia e le tupu o Tavita ma le aposetolo o Peteru. Faitau le Salamo 31:7 ma le 1 Peteru 5:7, ona talanoa lea i le fesili lenei:
-
O ā ou faalogona i le iloaina e silafia ma manatu mamafa mai Ieova i o tatou mafatiaga?
7. O le a faamuta e le Atua mafatiaga uma o tagata
Faitau le Isaia 65:17 ma le Faaaliga 21:3, 4, ona talanoa lea i le fesili lenei:
-
Aiseā o se faamāfanafanaga ai le iloaina, o le a aveesea e Ieova āuga o mea leaga uma ua aafia ai tagata?
E te silafia?
Ina ua faia e Satani le uluaʻi pepelo, na taʻuleagaina ai Ieova. O lenā mea, na faaleagaina ai le talaaga o Ieova o se Pule lelei ma alofa. Pe a aveesea e Ieova mafatiaga uma o tagata i le lumanaʻi lata mai, o le a ia faamamaluina ai o ia lava. I nisi faaupuga, o le a ia faamaonia ai le sili atu o lana pule. O le faamamaluina la o le suafa o Ieova, o se mataupu e sili ona tāua i le lalolagi uma.—Mataio 6:9, 10.
UA FAAPEA MAI NISI: “E faaaogā e le Atua mafatiaga e tofotofo ai i tatou.”
-
O le ā lau tali?
AOTELEGA
E tuuaʻia Satani le Tiapolo ma uluaʻi tagata i mea leaga ua tutupu i le lalolagi. Ae e matuā manatu mamafa mai Ieova i o tatou mafatiaga, ma ua toeitiiti ona ia aveesea lea.
Fesili Autalu
-
O le ā le pepelo na fai e Satani le Tiapolo iā Eva?
-
Ua faapefea ona tatou aafia uma i le fouvalega a Atamu ma Eva?
-
E faapefea ona tatou iloa e manatu mamafa mai Ieova i o tatou mafatiaga?
MANATU FAAOPOOPO
Tagaʻi i le uiga o le agasala o loo faamatala i le Tusi Paia.
Faitau atili e faatatau i le mataupu na lāgā e Satani le Tiapolo i le faatoʻaga i Etena.
“Aiseā ua Lē Taofia ai e le Atua Puapuaga?” (Le Olomatamata, Ianuari 1, 2014)
Iloilo tali faalaeiau i se fesili faigatā.
Mātau po o le ā na aʻoaʻoina e se tamāloa e faatatau i mafatiaga o loo tutupu.
E te Ono Fiafia Foʻi
FESILI E MASANI ONA LĀGĀ
O le ā le Talanoaga Faale-Tusi Paia o Loo Ofoina e Molimau a Ieova?
Ua ofo atu e Molimau a Ieova se suʻesuʻega faale-Tusi Paia e lē totogia, e mafai ona e faaaogāina ai so o se faaliliuga o le Tusi Paia. E mafai foʻi ona valaaulia lou aiga atoa po o au uō e auai ai.
