“Ia Oo mai Lou Malo”!
Mataupu 1
“Ia Oo mai Lou Malo”!
1. O Fesili mo Talanoaga: 1. O le ā le uiga o le malo o le Atua ia te oe, pe afai e toeitiiti ona ia aumaia lea o tulaga o loo faaataina mai i inei?
E SEĀSEĀ iai ni upu o se tatalo ua sili atu ona fai soo i lo upu o i luga. Atonu o oe, lē faitau, ua e tatalo foi i lea lava tatalo. Ma e mautinoa lava tatou te manaomia le malo o le Atua! E maeu le lelei o le ola ai i tulaga ua faaataina mai i nei itulau! Ma o le faamoemoe lea ua taofia mo i tatou e le malo o le Atua: O le filemu ma le loto gatasi i le lalolagi uma. E fusia faatasi ituaiga uma o tagata i le alofa moni. E fiafia tagata uma e fai galuega e fua mai ma olioli i fua o a latou lava galuega. E faatumulia le ea i pesega o le foafoaga, faatasi ma leo o tagata ua featani fiafia. O se sosaiete soifua malōlōina o tagata i le lalolagi atoa; e leai se tasi e ola ai e matua pe maʻi. O le olioli i le filemu faatasi ma manu, o le manogi sasala o fugalaau, o le matagofie o le felanulanuai o laufanua ma ona tau e fesuisuiai pea. Ioe, o nei mea uma, ma isi e sili ona tele, ua folafolaina mo lo tatou lalolagi pe a oo mai le malo o le Atua, e pei ona o le a tatou vaai i ai.
2, 3. O ā suiga i tausaga faatoʻā mavae atu ua faamamafaina ai le manaoga mo le malo o le Atua?
2 Peitai, ua eseese mamao lava mea i aso nei. Auā o lea ua tatou uia nei aso ua faamatalaina e le Tusi Paia o “aso faigata.” (2 Timoteo 3:1) Ua e iloa le aafia o lou olaga i nei aso faigata. E toatele ē o le a faitau i nei itulau ua teteʻa ma ē ua pele ona o taua ma isi lava faiga sauā o lenei senituri. Ua auai atunuu i le tauvaga i auupega ua aupito sili ona vevesi i taimi uma. Ma ua ia i latou ni auupega ua sili mamao atu ona tele e aumaia ai le faaumatiaga o tagata uma.
3 Tatou te popole foi i isi faafitauli, na e mauaina i o tatou olaga nei. Ona o le mapuna aʻe o le faomea i tagata, le fasioti tagata ma le toso teine, ua iloa ai e le toatele o i tatou le mataʻutia e oo lava i le savavali i ala tetele. Ma pe tatou te lē o faalogo ea i le sili ona faateleina o talagā faaipoipoga, aiga malepelepe ma le lē taupulea o le tupulaga na i lo o aso muamua? I nei aso o le faitaaga ma le pulea e fualaau oona, ua faaletonu ai tagata e toatele i le aauina atu o a latou fanau i aʻoga a le malo. Afai o e mau i nisi o atunuu po o vaipanoa e leʻi aliali aʻe ai ia faafitauli, e tatau ona e matuā faafetai moni lava!
4, 5. (a) O ā isi faafitauli ua oo mai i o tatou olaga? (e) O ā faiga tauatiaʻe a le lalolagi e faaalia ai faapea ua manaomia faanatinati le ‘oo mai o le malo o le Atua’?
4 Pe fia le tau o mauaina ai mea taumafa a lou aiga i aso nei? Ma o le ā le tau o le fealuaʻi o lau taavale? A o sii maoaʻe tele le tau o mea taumafa ma le suāuu, ua atagia mai ai le mataʻutia o le tulaga faaletonu o le a iai le lalolagi i le lumanai. O fea o agaʻi i ai lo tatou lalolagi? Na faamamafaina mai e se tala i le U.S.News & World Report o le aso 4 o Aokuso, 1980, le matuiā o le faalavelave. Sa faapea mai lea tala: “Vagana ua faia ni laasaga fou tetele, o le a otaotā le lalolagi i le 20 o tausaga e amata atu i le taimi nei, o se paneta lē mautu faatasi ma le faitau piliona o tagata matitiva o loo fetaufaoai, i le lē lava ma le maualuga tele o tau o mea e tausi aʻi le ola. Na manu aʻe lena lapataiga i le aso 24 o Iulai mai se komisi faaperesitene na faamaeʻaina se suesuega na faia i tausaga e tolu.” O isi mea na faaalia, na taʻua ai foi e lenei suesuega e faapea o le a oo atu i le 6.3 piliona le faitau aofai o tagata i le lalolagi i le tausaga e 2000,—ma e ese mai ai i le siitaʻi masani o tau o mea—o le a faaluaina le tau o mea taumafa, faapea foi ma toafa e āu ina atili faalauteteleina, ae o le a mou atu vaomatua, ma e sili atu i le afa o le suāuu a le lalolagi o le a uma. O lona uiga, pe afai o le a oo atu lenei faiga o mea i na aso!
5 O le ā o mafai ona fai e atunuu taitasi, po o Malo Aufaatasi foi, e uiga i lenei faalavelave? E matuā itiiti lava, e oo mai i aso nei. Ua faaalia ai i nei mea uma le matuā faanatinati o lo tatou manaomia o le malo o le Atua!
O LE Ā LEA MALO?
6. Aiseā o le a tatou faanoanoa ai pe afai o le malo o le Atua e na o loto o tagata o le a iai?
6 Po ua na o se uiga ea o taulai atu i ai loto o ē talitonu? I se isi faaupuga, pe afai e lava tagata e faaliliuina i le Faa-Kerisiano, po o le a oo mai ai ea le malo o le Atua? Ua faapea ona taumafaufauina e nisi tagata, i lo latou faasino atu i le Luka 17:21 i le King James Version, po o le Authorized Version o le Tusi Paia (i le gagana faa-Peretania), o loo faapea mai: “Ua iai lava ia te outou le malo o le Atua.” Peitai, afai e saʻo la latou faaiʻuga, o lona uiga ua agaʻi ina sili ona mamao ese atu le malo o le Atua. Aiseā? Auā o le fua faatatau o tagata e faapea mai o latou o Kerisiano ua itiiti ifo i le 25 pasene, ma o loo faaitiitia pea lava pe a faatusatusa i le aofai o isi tagata i le lalolagi i aso nei. I le ma lea, e faitau selau miliona tagata lotu o ē e seāseā ulu atu i totonu o se falesa.
7, 8. E fesoasoani mai faapefea se iloiloga o le Tusi Paia ia i tatou e maua ai le uiga moni o le Luka 17:21?
7 Seʻi manatu mai foi, i le mea lenei: O ai na fetalai i ai Iesu ina ua ia faapea atu, “Ua i ai lava ia te outou le malo o le Atua”? O le au Faresaio talapepelo na faatatau i ai e Iesu afioga a le Atua na tusia e le perofeta o Isaia, e faapea: “O o latou loto e taumamao ma aʻu.” (Mataio 15:1, 8, AV; Isaia 29:13) E mafai faapefea ona ulu atu le Malo i totonu o na loto maʻaa? A o le ā la, le uiga o na afioga a Iesu? O loo iai se taʻiala i lomiga o le King James Version e iai tusitusiga i autafa o itulau. O i inā o loo tusia ai le isi faitauga e faapea: “Ua faatasi atu le malo o le Atua ia te outou.” Ma o le auala la lenei ua faitauina ai i isi foi faaliliuga e tele o le Tusi Paia, e pei o le Jerusalem Bible a le Lotu Katoliko ma le New English Bible.
8 O lea la, na fetalai Iesu e uiga ia te ia lava i inā, o le Tupu tofia, sa faatasi ma i latou. Sa iai moni lava o ia i le potopotoga o i latou, o se peresona moni. Ma e tatau foi ona tatou malamalama i ai, o le Malo o se malo moni, o se pulega moni, e pei foi o lona Tupu o se peresona moni.
LE MEA MONI I ASO NEI
9, 10. O le ā se malo moni, ma e faapefea ona manuia ai ona tagatanuu?
9 I aso nei, o loo totoe pea ni nai malo e pulea e tupu i lenei lalolagi. O na malo o ni pulega moni, e aofia ai Nōue, Peretania, Ioritana ma Toga. I nei malo o loo iai se tupu (po o se tupu tamaitai), faatasi ai ma pule lagolago o ē auauna o se palemene, se aufono po o se isi lava vaega o le taupulega. I lalo o lenei vaega pule toaitiiti, o le a faapea ona ola ai le anoanoai o tagata i aso uma. O i latou o tagatanuu o le malo.
10 Pe a manatunatu loloto le tupu ma ana pule lagolago e uiga i le manuia lautele o o latou tagata, ona mafai foi lea e se malo ona saunia le tele o mea e manuia ai. O le auala faapena sa iai i le malo anamua o Solomona, ina “ua toatele . . . e pei o le oneone o le matafaga ona toatele, o loo aai, ma feinu, ma olioli.”—1 Tupu 4:20; 10:1-9. *
11. O ā auala e tutusa ai le malo o le Atua ma malo i luga o le lalolagi?
11 Faamata e lē moni aʻiaʻi le malo o le Atua ona o le mea faapea e pule mai lea malo mai le lagi? E leai! Muamua lava, e iai lona tupu o lē e matuā galue ma e soifua. O ia o lē na tofia e le Atua lava ia, o le Alii o Iesu Keriso, o lē ua fai mai ai le Tusi Paia: “E faatuatua ia te ia nuu ese.” (Roma 15:12) E pei lava o malo i le lalolagi, e iai foi se vaega o pule tuufaatasi a le malo faalelagi. Ua faaalia mai e le Tusi Paia e aofia ai i lenei vaega se aofai patino o tupu lagolago, o ē ua faamaonia lo latou faamaoni i le Atua o ni tane ma fafine i luga o lenei lalolagi. Na fetalai atu Iesu ia i latou nei e faapea: “Aua e te fefe oe le lafu mamoe itiiti e; auā ua finagalo lo outou Tamā e foai mai le malo ia te outou.” (Luka 12:32; Faaaliga 5:9, 10; 20:4) O le malo ua iai lana pule faalelagi. Mai lona afioaga i le lagi, e mafai ai e le pulega o le Malo ona faaoo atu ana poloaiga—i auala e sili atu ona malolosi na i lo o ave o leitiō po o laser beams—i so o se nofoaga lava i le lalolagi.
12, 13. Ua iai i le malo o le Atua o ā ituaiga o (a) tulafono, (e) fuafuaga tauaʻoaʻoga, (i) polokalama mo le soifua malōlōina?
12 Ae faapefea i tulafono? Ioe, e faagaoioia le malo o le Atua e ala i tulafono—o tulafono e aupito sili ona lelei, na faia e le Atua mo le manuia o tagata. E te mafai ona faitau ai i na tulafono i le Tusi Paia. (Teuteronome 6:4-9; Mareko 12:28-31) Pe iai ea se faiga tauaʻoaʻoga a le Malo? E iai lava! I le taimi nei ua oo atu lana polokalama tauaʻoaʻoga ina ia fesoasoani ai i tagata faamaoni o atunuu uma, o ituaiga ma gagana eseese, e sauniunia ai i latou mo le ola e faavavau i le pulega amiotonu a le Malo. Po o fea lava le atunuu o le lalolagi o e mau ai, e mafai lava ona e maua aogā i lenei polokalama o aʻoaʻoga.—Mataio 24:14; Faaaliga 7:9, 10; Isaia 54:13.
13 Pe iai ea se polokalama a le Malo mo le soifua malōlōina? E iai le polokalama lelei mo le soifua malōlōina ma e sili ona aogā i polokalama uma—e faavae lena i luga o le taulaga togiola a le Alii o Iesu Keriso. O lenei polokalama o le a aveesea ai mai tagata mea e tiga ai atoa ma maʻi o le tino augavale, ina ia mafai ona latou maua le ola e faavavau i le soifua malōlōina lelei atoatoa. (Isaia 25:8; Ioane 10:10) A o soifua o ia i le lalolagi, sa faia ai e Iesu ni vavega se tele. Na faaataina mai ai o le a ia te ia le pule ma le mana e faamalōlōina ai maʻi, e toe faapupula ai mata o ē tauaso, e faamalōlō ai ē pipili, ma e oo lava i le toe faatutuina mai o ē ua oti. (Luka 7:20-23) A o faataatia mai lenei polokalama a le Malo i le lumanai, o i latou o ē ua latou aʻoaʻoina ia mea i le taimi nei ua faapea foi ona latou aʻoaʻoina ina ia ola i ni olaga mamā, ma ua toe faafoisia atu nei i latou i le soifua malōlōina faaleagaga. O lo latou faamoemoe o se faamoemoe moni lava.—Isaia 65:14; Roma 10:11.
14. A o iai i le lalolagi, o ā mea na faamatilatila atu e Iesu i ana aʻoaʻoga?
14 A o iai Iesu o se tagata i luga o le lalolagi, sa ia aʻoaʻoina atu mea e tele e uiga i le malo o le Atua ma, o le mea moni, na saunia ai se uluai ata o le lumanai o le soifuaga i lea pulega. (Luka 4:43; Mataio 12:22-28) Sa ia aʻoaʻo ona soʻo e uiga i le Atua, ina ia faalatalata ai i latou i le Atua i le faiā o ni atalii i se tamā alofa. Na ia saunia mo i latou se taʻitaʻiga aogā mo le faafoeina ma le manuia o tulaga tatou te fetaiai i le olaga.—Ioane 1:18; 14:6.
LE POGAI O LE FIAFIAGA MONI
15. Aiseā ua tai tutusa ai tagata i aso o Iesu ma i tatou i aso nei e uiga i le manaomia o faamafanafanaga?
15 O le tatalo mo le ‘oo mai o le malo o le Atua’ o se vaega o le Lauga i luga o le Mauga, lea na fofogaina atu e Iesu i tagata i se itu o le mauga i le mea e iloa atu ai le Sami o Kalilaia. O lana au faalogologo o ona soʻo filifilia, faatasi ma le vao o isi tagata. O i latou ia ‘ua lailoa ma tuulafoaiina,’ e tagata manatu faapito. (Mataio 9:36) O mea na fetalai atu ai Iesu na faamafanafanaina ai lana au faalogologo, ma o ana afioga e mafai ona avea moni foi ma faamafanafanaga ia i tatou i aso nei.
16. O ai i latou ua mauaina le fiafiaga moni, ma e faapefea?
16 Na amata lava le lauga a Iesu i lona faasino atu i le pogai o le fiafiaga moni. Pe sa tatau ea ona maua lea i oa faitino, i faafiafiaga, i le sailia o faalogona o fiafiaga ma le mitamitaga? E leai, auā sa faamamafaina e Iesu mea faaleagaga. Na ia faaalia faapea o tagata o ē “manatu mamafa i o latou manaoga faaleagaga” ma o ē o loo “fia aai ma fia inu i le amiotonu” o le a maua e i latou le fiafiaga tumau i le malo o le Atua. (Mataio 5:3, 6, NW; Luka 8:1, 4-15) Pe o e atiina aʻe ia faanaunauga faaleagaga?
17, 18. (a) O le ā le mea e tatau ona tatou faia ina ia faamaonia ai e le Atua? (e) E faapefea ona faatosina oe e le faamautinoaga a Iesu i le Mataio 6:26-33?
17 I le gasologa o lana lauga, sa faamanino atu ai e Iesu e faapea, ina ia faamaonia e le Atua, e tatau ona tatou faaaʻoaʻo i lo tatou Tamā faalelagi. E ao ona tatou faaatagia atu ona uiga ma amioai i tatou lava e tusa ma ana tulaga. (Mataio 5:43-48; Efeso 5:1, 2) Ina ia faafiafiaina o ia e lē mafai ona avea la tatou tapuaiga ua na o se sauniga e tau ina usitai i ai, ma tatou te faia faatasi pe faalua i le vaiaso. E tatau ona avea lea ma se tapuaiga e ola, se tapuaiga e uigā. Ua faaalia lea i o tatou olaga i aso taitasi ma i lo tatou manatunatu alofa mo o tatou uso.
18 Ae peitai, afai tatou te faamuamuaina mea faaleagaga i o tatou olaga, pe o le a lē taʻitaʻiina atu ai ea i lo tatou mafatia i manaoga i lenei sosaiete manatu faapito ma le matapeapea i aso nei? E leai lava! Afai tatou te ‘muai saili le malo o le Atua ma lana amiotonu,’ o le a faaopoopoina mai ai ia i tatou isi mea uma e tatau mo le ola. Ua faamatalaina lelei lava e Iesu lenei mea i le Mataio 6:26-33, lea e ao ona e faitauina.
19, 20. (a) Aiseā ua tāua ai le iloa po o le ā le silafaga a le Atua i la tatou tapuaiga? (e) E mafai faapefea ona fesoasoania i tatou e faatāuaina le malo o le Atua i o tatou olaga? (i) Aiseā o le a aogā lelei ai le toe iloiloina o “le Tatalo a le Alii”?
19 E faapefea la, ona tatou ‘muai saili le malo’? O lona uiga ea afai tatou te ‘ō i le lotu ua tatou filifilia’ o le a mautinoa lava lo tatou maua ai o faamanuiaga a le Atua? Pe e manaomia ea ona tatou sailia le ituaiga o tapuaiga ua filifilia e le Atua mo i tatou? Seʻi matau le fetalaiga a Iesu e uiga i lenei mea: “E le sao atu i le malo o le lagi i latou uma o e fai mai ia te au, Le Alii e, le Alii e; na o le na te faia le finagalo o loʻu Tamā o i le lagi.” Sa ia faamaninoina atu faapea, o nisi o ē sa fai ane ‘sa latou perofeta ane i lona igoa, o lona igoa foi na latou faia ai galuega tetele’ o i latou tonu lava ia “o e fai amio leaga” i le silafaga a le Atua. (Mataio 7:21-23; tagai i le 7:13, 14.) E mafai faapefea ona tatou iloa ma le mautinoa le silafaga a le Atua i la tatou tapuaiga? Vagana lava le matuā faamasani lelei ma mea o loo iai i totonu o lana Afioga, le Tusi Paia.
20 O se iloiloga o le Tusi Paia o le a fesoasoani ai ia i tatou e faatāuaina le malo o le Atua i o tatou olaga e tusa ai ma lona tāua moni, ma i se auala e fetaui ai i o tatou tulaga taitoatasi. O le a fesoasoani lea iloiloga ia i tatou ia talia se vaaiga fou i le olaga, ma talisapaia ai foi mea e sili ona tāua o loo iai. O lea la, o le a sosoo ai ma lo tatou mafaufauina o le vaega o le Lauga a Iesu i luga o le Mauga lea ua lausilafia o “le Tatalo a le Alii.” (Mataio 6:9-13) O se toe iloiloga o lenei Tatalo Faaaʻoaʻo o le a fesoasoani ia i tatou e iloa ai le faatulagaga moni o mea e manaomia e le Atua mai ia i tatou pe afai tatou te sailia le fiafiaga moni. Ma o le a ia faaalia ai ia i tatou le mataupu faavae faamaniti tino o le Tusi Paia o le faapaiaina lea o le suafa o le Atua i lona malo i aao o Iesu Keriso.
[Faaopoopoga i lalo]
^ pala. 10 Vaganā ua faasinoina, o mau uma o loo siitia atoatoa i lenei tusi e mai i le Tusi Paia Samoa, Lomiga 1884.
[Fesili mo le Suʻesuʻega]
[Pusa i le itulau 7]
PE E MANAOMIA E TAGATA LE MALO O LE ATUA?
“Afai e pa se meatau faaniukelea e tasi le mekatone i luga o le Aai o Niu Ioka, e lē taumate o le a fasiotia ai i lena lava taimi ni tagata se 2.25 miliona, ae o le a manunuʻa tigaina ai se isi 3.6 miliona, . . . na ioe faatasi i ai ananafi se vaega o fomaʻi ma tagata atamamai faapitoa i mea faaniukelea. . . . O lo latou talitonuga e faapea o le a oo le lalolagi i se taua faapea a o leʻi uma lenei senituri ma o le a avea lea ma mea o le a lē mafai ai ona faaauau pea le iai o tagata.”—Times o Niu Ioka, Setema 27, 1980
[Pusa i le itulau 11]
LE TULAGA MONI O LE MALO O LE ATUA
LE TUPU: O Iesu, faatasi ma le tofiga e pule ai i le 1,000 tausaga.
TUPU LAGOLAGO FAALELAGI: E filifilia e le Atua mai tagata faamaoni.
LE NOFOAGA E PULE AI: Lo tatou lalolagi faatasi ma le parataiso i le lalolagi atoa o le a toe faafoisia.
TAGATANUU FAAMAONI: Le faitau piliona, e aofia ai foi ē o feoti e toe faatutuina.
TULAFONO: E faavae i luga o le amiotonu a le Atua, le tulafono faatupu o le alofa.
POLOKALAMA TAUAʻOAʻOGA: E fesoasoani i tagata o ituaiga uma ia olioli nei i se olaga fiafia, ma e saunia ai i latou mo le ola e faavavau i le lalolagi parataiso.
[Ata atoa i le itulau 4]
