O le Tusi Muamua o Tupu 4:1-34

  • Pulega a Solomona (1-19)

  • Faamanuiaga o le pulega a Solomona (20-28)

    • Saogalemu i lalo o le laau o le vine ma le mati (25)

  • Atamai o Solomona ma ana faataoto (29-34)

4  Ua pulea Isaraelu uma e le tupu o Solomona.+  O ona alii sili* nei: O Asaraia le atalii o Satoka+ na fai ma ositaulaga;  o Eliorefa ma Akia o atalii o Sesa, na fai ma failautusi;+ o Iosefatu+ le atalii o Ailuta, na faia faamaumauga;  o Penaia+ le atalii o Ioiata, na pule i le ʻautau; o Satoka ma Aviata+ o ositaulaga;  o Asaraia le atalii o Natano,+ sa vaaia pule lagolago; o Saputo le atalii o Natano, o ia o se ositaulaga ma o le uō a le tupu;+  o Akisaro na vaaia le maota o le tupu; ma Atoniramo+ le atalii o Apeta, na vaaia tagata na faatonuina e faia galuega mamafa.+  Sa iā Solomona pule lagolago e toʻa 12 i Isaraelu uma, e saunia mea taumafa a le tupu ma lona aiga. Sa tofu tagata taʻitoʻatasi ma le masina o le tausaga e na te saunia ai meaʻai.+  O pule lagolago nei: O le atalii o Huro na pulea vaega maugā o Efaraima;  o le atalii o Tikeru na pulea Makasa, Salapima,+ Pete-semesa, ma Aluna-petana; 10  o le atalii o Heseta na pulea Arupoto (na ia pulea Suka ma le nuu atoa o Eferu); 11  o le atalii o Apinatapa, na pulea vaega malifa uma o Toro (na fai ma ana avā Tafata le afafine o Solomona); 12  o Paana le atalii o Ailuta na pulea Tanaka, Mekito,+ ma Pete-seana+ uma lea e latalata i Saretana i lalo ifo o Isereelu, e mai i Pete-seana e oo i Apele-meola e agaʻi atu i le vaipanoa o Iokameama;+ 13  o le atalii o Kipera na pulea Ramota-kiliata+ (na ia pulea nuu na nonofo i faleʻie o Iairo+ le atalii o Manase o loo i Kiliata;+ na ia pulea foʻi le vaipanoa o Arakopo+ lea o loo i Vasana:+ e 60 aai tetele ua iai pā ma faamaufaalava ʻapamemea); 14  o Akinatapu le atalii o Ito na pulea Maanaima;+ 15  o Aimaasu na pulea Nafatali (na fai ma ana avā Pasemeta, le isi afafine o Solomona); 16  o Paana le atalii o Usai na pulea Asera ma Paalota; 17  o Iosefatu le atalii o Parua na pulea Isakara; 18  o Semi+ le atalii o Ala na pulea Peniamina;+ 19  o Kipera le atalii o Auri na pulea le nuu o Kiliata,+ o le nuu lea o Sekono+ le tupu o tagata Amorī ma Oko+ le tupu o Vasana, ma e toʻatasi le pule lagolago na vaaia nei pule lagolago uma sa iai i le nuu. 20  Ua toʻatele Iuta ma Isaraelu e pei o le oneone i le matafaga o le sami,+ ua latou aai, ma feinu, ma olioli.+ 21  Ua pule foʻi Solomona i malo uma lava, e amata mai i le Vaitafe*+ e oo atu i le nuu o Filisitia, ma le tuaoi o Aikupito. Ua latou aumaia meaalofa ma auauna atu iā Solomona i aso uma o lona ola.+ 22  O meaʻai a Solomona i aso taʻitasi e 30 kori* o falaoamata lelei, ma le 60 kori o falaoamata, 23  e 10 povi pepeti, e 20 povi tataa, e 100 mamoe, atoa ma ʻaila, o sevi, o imura, ma manulele pepeti o aleva. 24  Auā na pule o ia i mea uma lava i tala mai o le Vaitafe,*+ e mai i Tipasa e oo i Kasa,+ e oo lava foʻi i tupu uma i tala mai o le Vaitafe; na iai foʻi le filemu i nuu uma lava na pule ai o ia.+ 25  Ua nonofo foʻi Iuta ma Isaraelu ma le saogalemu, ua taʻitasi le tagata ma nofo i lalo o lona vine ma lalo o lona mati, e amata mai i Tanu e oo atu i Peresepa, i aso uma lava o Solomona. 26  Sa iā Solomona fale o solofanua e 4,000* mo ana kariota, ma solofanua* e 12,000.+ 27  Na saunia e nei pule lagolago mea taumafa mo le tupu o Solomona, ma i latou uma na aai i le laoai a le tupu o Solomona. Ua taʻitasi ma lona lava masina, ma faamautinoa ua saunia mea uma lava na manaʻomia.+ 28  Ua latou avatu foʻi karite* ma vao mamago i so o se mea lava na manaʻomia ai mo solofanua, e aofia ai ma solofanua e tosoina kariota. Na taʻitoʻatasi ma faia e tusa ma lona tofiga. 29  Ua avatu e le Atua iā Solomona le atamai, ma le faautaga loloto e matuā tele lava, ma le tele o le lotomatala e pei o le tele o oneone i le matafaga.+ 30  Na sili atu foʻi le atamai o Solomona nai lo o le atamai o tagata uma i Sasaʻe, ma le atamai uma o Aikupito.+ 31  Na sili atu foʻi lona atamai nai lo o se isi lava tagata, nai lo o Etano+ le tagata Esera, o Hemana,+ o Kalakolu+ ma Tarata o atalii o Makolo; ua taʻutaʻua foʻi o ia i nuu uma na siʻomia ai.+ 32  Na ia tuufaatasia* faataoto e 3,000,+ ma ana pese+ e 1,005. 33  Na malamalama o ia e faatatau i laau tetele e pei o le arasi i Lepanona, e oo lava i laau lāiti e pei o le isopo+ e tupu aʻe i le pā; na mafai foʻi ona ia faamatalaina mea e uiga i manu tataa,+ o manufelelei,+ o mea fetolofi,+ ma iʻa. 34  Ua gasolo mai tagata mai i nuu uma e faalogologo i le atamai o Solomona, e aofia ai tupu uma o le lalolagi na faalogo i lona atamai.+

Faamatalaga Pito i Lalo

Po o “ona perenise.”
E faasino atu i le vaitafe o Eufirate.
O le kori e tusa ma le 220 lita. Tagaʻi i le Faa. E14.
E faasino atu i le itu i sisifo o le vaitafe o Eufirate.
O loo maua lenei aofaʻiga i nisi o manusikulipi ma i le 2No 9:25. Ae o loo taʻua i isi manusikulipi e 40,000.
Po o “tagata tiʻetiʻe solofanua.”
O se isi ituaiga saito. O le upu Peretania, o le barley.
Po o le “tautala i.”