Pe e Mafai Ona E Maua le Filemu i Lenei Lalolagi ua Tumu i Faafitauli?

PO O e filemu? I le toʻatele, o le tali manino lava o le leai. O loo soifua i latou i vaipanoa o loo pagatia i taua, le lē mautū o faiga faapolotiki, o faiga sauā i totonu o atunuu, ma faiga faatupu faalavelave. E tusa lava pe e lē o oo na mea iā te oe, ae e ono faalavelavea lava lou filemu i soligatulafono, o faiga faasoesa ma femisaʻiga a tagata faipisinisi ma tuaoi. O aiga foʻi, ua pei o se tafā o taua nai lo o se nofoaga e maua ai le filemu.

E toʻatele tagata ua latou fia maua se filemu. Atonu latou te saʻili atu i lotu, auai i seminā e aʻoaʻo ai le mafaufau loloto, po o le fai foʻi o yoga. Ua manatu nisi e maua le filemu pe a malaga mo ni faigāmālōlōga, feʻaʻei i mauga ma feoaʻi i le togāvao, po o le asiasi atu foʻi i nofoaga e iai vaipuna vevela. E tusa lava pe e foliga mai e maua e nisi le toʻafilemu, ae e latou te iloa mulimuli ane, e lē moni ma e puupuu lenā filemu.

O lea la, o fea e maua ai le filemu moni? O le puna o le filemu o Lē na faia i tatou, o Ieova le Atua. Aiseā? O ia o le “Atua o lē e foaʻi mai le filemu.” (Roma 15:33) I le pulega a lona malo ua lē o toe umi ae oo mai, o le a “manuia tele ai.” (Salamo 72:7; Mataio 6:9, 10) E sili mamao atu lenei filemu nai lo o se filemu e maua ona o maliega a tagata. O na maliega, e masani ona aumaia ai sina mapusaga puupuu mai i fetauaʻiga. Ae o le a soloia e le filemu mai i le Atua pogai uma o taua ma faiga sauā. O le mea moni, e lē toe aʻoaʻo se tasi i taua. (Salamo 46:8, 9) O le a tatou olioli uma i le filemu moni!

Pe a mafaufau i le manaia o lea faamoemoe, atonu o le a e lē toe naunau ai e saʻili se isi filemu.  Po o iai se auala e maua ai le filemu lea e mafai ona e sao ai mai i lenei taimi ua tumu i faafitauli? E fiafia lava ona o loo faailoa mai i le Tusi Paia le auala. Ia iloilo nisi o taʻiala i le mataupu e 4 o le tusi a le aposetolo o Paulo i Kerisiano i Filipi. Faamolemole, faitau i ai i lau Tusi Paia i le fuaiupu e 4 e oo i le 13.

“Le Filemu Mai le Atua”

I le fuaiupu e 7, ua tatou faitau ai e faapea: “Ona leoleoina ai lea o o outou loto ma mafaufau i le filemu mai le Atua, lea e silisili i mea uma lava e manatu i ai, e ala iā Keriso Iesu.” O lenei filemu, e lē maua i le na ona mafaufau loloto po o le taumafai foʻi e faaleleia o tatou uiga. Ae e maua mai i le Atua. E matuā malosi lava lenei filemu auā e “silisili i mea uma lava e manatu i ai.” E mautinoa lava e sili atu i mea uma e tatou te popole ai, poto, ma o tatou manatu. Atonu e tatou te lē o vaaia ai se auala e ʻalofia ai o tatou faafitauli, a o le filemu mai i le Atua, e mafai ona tatou maua ai le faamoemoe mautinoa o le a soloiesea o tatou faafitauli uma i se aso.

Pe e mafai ona tupu o lenei mea? I tagata, e leai, ae “e mafaia e le Atua mea uma lava.” (Mareko 10:27) E fesoasoani le faatuatua ma le faalagolago i le Atua ina ia faaitiitia ai o tatou popolega. Seʻi manatu i se tamaitiiti ua leiloa i totonu o se faleoloa telē. E talitonu o ia e na o le pau lava le mea e na te faia, o le suʻe o lona tinā, ona lē toe popole loa lea. E pei lava o lenā tamaitiiti pe a toe maua, e mafai foʻi ona tatou faalagolago i le Atua e na te taliaina i tatou. O le a ia fesoasoani mai e aveesea o tatou popolega uma.

E toʻatele tagata tapuaʻi o Ieova ua tofo i le filemu mai i le Atua i tofotofoga mataʻutia. O se faaaʻoaʻoga, seʻi manatu iā Nadine o lē na fafano lana pepe a o leʻi fanau mai. Na ia faamatala mai e faapea, “Na matuā faigatā ona ou talanoa e faatatau i oʻu faalogona, ma ou te taumafai pea e nanā oʻu faalogona, ae i totonu, na matuā nutimomoia loʻu fatu. E toetoe o aso uma ou te sasaa atu ai loʻu loto iā Ieova i le tatalo, ma ʻaiʻoi atu iā te ia mo se fesoasoani. I so o se taimi ou te lagona ai le mafatia ma ou manatu ai ua ou lē lavā onosai, na ou lagona ai le toʻafilemu ona o le malosi o le tatalo. Na ou lagona le saogalemu ma le malupuipuia.”

E Puipuia ai Lou Loto ma le Mafaufau

Seʻi o tatou toe faitau i le Filipi 4:7. O loo taʻua ai, o le a leoleoina e le filemu mai i le Atua o tatou loto ma mafaufau. E pei ona leoleo e se fitafita le tulaga o loo leoleo ai, e faapena foʻi ona leoleo e le filemu mai i le Atua o tatou loto, ina ia lē ofi mai iai ni manatu faaletino, o popolega lē talafeagai, ma amioga matagā. O se faaaʻoaʻoga.

O le toʻatele o tagata i lenei lalolagi ua tumu i faafitauli, e latou te manaʻomia ni tupe po o ni fanua, ina ia maua ai le fiafia ma le saogalemu. Ona o fautuaga a tagata atamamai, atonu latou te tuuina atu ai a latou tupe e teu i le faletupe. Pe e latou te lagona ai le filemu moni? Atonu e leai. E latou te ono siaki i taimi uma le pasene o a latou tupe, i le taumānatu pe e faatau atu, pe e faatau mai, pe e taofi foʻi. Pe a paʻū le tau o le tupe i le maketi, ona latou popole loa lea. E lē o taʻusalaina moni e le Tusi Paia le tuuina o tupe e teu i le faletupe mo ni pasene, ae ua taʻu mai e le Tusi Paia se vaaiga saʻo: “O lē ua manaʻo i le ario, e lē malie o ia i le ario; o lē ua manaʻo foʻi i le oloa tele, e leai sana mea e maua ai; o le mea faatauvaa foʻi lea. E lelei le moe o lē faigaluega, pe itiiti, pe tele ana mea e ʻai; a o le maʻona o le mauʻoa e lē mafai ai ona moe o ia.”—Failauga 5:10, 12.

O loo faapea mai le Filipi 4:7 o le filemu mai i le Atua, e leoleoina ai o tatou loto ma mafaufau “e ala iā Keriso Iesu.” O le ā le fesootaʻiga o Keriso Iesu ma le filemu mai i le Atua? Na faatinoina e Iesu le tofiga autū i le faataunuuina o fuafuaga a le Atua. Na tuuina mai e Iesu lona soifua ina ia laveaʻi ai i tatou mai i le agasala ma le oti. (Ioane 3:16) O ia foʻi o le Tupu tofia o le Malo o le Atua. O le iloaina o le matafaioi o loo faia e Iesu, e fesoasoani tele i le filemu o o tatou mafaufau ma loto. I le ā le itu?

Pe afai e tatou te salamo moni mai i a tatou agasala ma talosaga atu mo le faamagaloga e  ala i le taulaga a Iesu, o le a faamagaloina i tatou, ma o le a filemu ai o tatou mafaufau ma loto. (Galuega 3:19) Ina ua tatou iloa e lē mafai ona atoatoa lo tatou fiafia seʻia oo mai le Malo o Keriso, e tatou te ʻalofia ai le ola e peiseaʻī e leai so tatou faamoemoe i le lumanaʻi. (1 Timoteo 6:19) O le mea moni, e tatou te lē o sao mai ai i faafitauli uma, ae e mafai ona faamāfanafanaina i tatou i le faamoemoe mautinoa, o le a oo mai le ola e sili ona lelei.

Le Auala e Maua ai le Filemu Mai i le Atua

E faapefea la ona e maua le filemu mai i le Atua? E tatou te maua se fesoasoani i le Filipi 4:4, 5, lea e faapea mai: “Ia olioli e lē aunoa i le Alii. Ou te toe fai atu foʻi, Ia olioli! Ia iloa e tagata uma lo outou magafagafa. Ua lata mai le Alii.” Ina ua tusia e Paulo nei upu, sa faafalepuipuiina ma le lē tonu o ia i Roma. (Filipi 1:13) Nai lo o le faanoanoa ona o faiga lē tonu, na ia faalaeiauina ona uso talitonu ia olioli e lē aunoa i le Alii. Sa faalagolago lona olioli i la laʻua faiā ma le Atua, ae e lē o lona tulaga na iai. E manaʻomia foʻi ona tatou auauna pea i le Atua ma le olioli e tusa lava po o ā o tatou tulaga. O le tele o lo tatou iloaina o Ieova ma faaauau pea ona faia lona finagalo, o le tele foʻi lea o lo tatou olioli e auauna iā te ia. O le auala lenā e tatou te maua ai le lotomalie ma le filemu.

E lē gata i lea, ua faalaeiauina i tatou ina ia magafagafa. Pe afai e tatou te atiaʻe le magafagafa, e tatou te lē faatalitalia la ni mea se tele mai iā i tatou lava. Ua tatou iloa e tatou te lē lelei atoatoa, ma e lē mafai foʻi ona atoatoa mea uma e tatou te faia. Aiseā la e soona faanoanoa ai pe faapefea ona tatou lelei atoatoa, pe e sili atu ona lelei i tatou nai lo o isi? E tatou te lē faatalitalia foʻi isi ia lelei atoatoa. O le mea lea, ia tatou toʻafilemu pea pe a latou faatigā mai iā i tatou. O le isi faatatauga o le upu Eleni ua faaliliuina i le “magafagafa,” o le “lolo atu.” Afai e tatou te lolo atu i mataupu e filifilia e le tagata lava ia, ona tatou ʻalofia ai lea o fefinauaʻiga ia e masani ona leai se aogā e maua mai ai, ma aveesea ai le filemu ma isi, faapea ma lo tatou filemu mo sina taimi.

O le faaupuga e sosoo ai i le Filipi 4:5 lea e faapea mai, “Ua lata mai le Alii,” e foliga mai e leai sona sootaga i le mataupu. Ua toeitiiti ona afio mai lea o le Atua e suia lenei faiga tuai o mea i se faiga fou e ala i lona Malo. Ae i le taimi nei, o loo mafai ona latalata mai o ia i ē uma e mafuta vavalalata atu iā te ia. (Galuega 17:27; Iakopo 4:8) I le iloaina o lona latalata mai, e mafai ona tatou maua ai le olioli, ma magafagafa ai, ma aveesea ai lo tatou popole i faafitauli i aso nei ma le lumanaʻi, e pei ona taʻua i le fuaiupu e 6.

Pe a tatou faitau i le fuaiupu e 6 ma le 7, e tatou te iloa ai, o le filemu mai i le Atua o se iʻuga tuusaʻo o le tatalo. Ua manatu nisi o le tatalo, ua na o ni mafaufauga loloto ia e mafai ona faateleina ai le filemu i o latou loto. Peitaʻi, ua taʻua i le Tusi Paia o fesootaʻiga moni ma Ieova, ua pei o se faiā vavalalata a se tamaitiiti ma sona matua alofa, e na te faamatala atu i ai mea o loo fiafia ai ma mea o loo popole ai. Maʻeu se toʻafilemu i le iloa, e mafai ona tatou faalatalata atu i le Atua “i mea uma.” Po o ā lava mea lilo o loo i o tatou mafaufau ma loto, e mafai ona tatou faailoa atu i lo tatou Tamā o i lagi.

O loo faalaeiauina i tatou i le fuaiupu e 8 ina ia manatunatu i mea lelei. Ae e lē lava lenā. E pei ona taʻua i le fuaiupu e 9, e tatau foʻi ona tatou gaoioi e faatatau fautuaga aogā a le Tusi Paia. O le faia faapea, o le a maua ai se lotofuatiaifo mamā. Maʻeu le moni o le faaupuga lea: O se lotofuatiaifo lelei e pei o se aluga malūlū!

Ioe, e mafai ona e maua le filemu. O le filemu, e mai iā Ieova le Atua, o lē na te foaʻi mai i ē e faalatalata atu iā te ia ma mulimuli i lana taʻitaʻiga. O le suʻesuʻeina o lana Afioga le Tusi Paia, e mafai ai ona e faamasani i ona manatu. E lē faigofie le faatinoina o ana taʻiala. Peitaʻi, e aogā taumafaiga uma auā e ‘iā te outou le Atua o le filemu.’—Filipi 4:9.

[Faamatalaga faaopoopo i le itulau 10]

“Ona leoleoina ai lea o o outou loto . . . i le filemu mai le Atua.”―FILIPI 4:7

[Faamatalaga faaopoopo i le itulau 12]

Maʻeu se toʻafilemu i le iloa, e mafai ona tatou faalatalata atu i le Atua “i mea uma”