Po o E Nofo Sauni e Faamatala i Isi Lou Talitonuga?

PE NA iai se taimi na tulaʻi ai se avanoa na e manatu ai, ua tatau ona faamatala atu lou talitonuga? Seʻi manatu i le mea na tupu iā Susana, o se tuafafine e 16 tausaga i Paraguay. I lana vasega i le aʻoga maualuga, na lāgā ai se manatu e faapea, o Molimau a Ieova e lē taliaina le “Feagaiga Tuai,” e lē talitonu iā Iesu, ma Maria. Na taʻua atili foʻi i le faamatalaga e faapea, o Molimau o ni tagata e maelega valea, o ē sili iā i latou le oti nai lo le talia o togafitiga faafomaʻi. O le ā lau mea e fai i tulaga faapea?

Sa tatalo Susana iā Ieova, ona sii lea i luga o lona lima. Ua toeitiiti uma le lesona i le taimi lenā, o lea sa ia talosaga ai i lona faiaʻoga pe mafai ona fai sana tautalaga i luma o le vasega e uiga i ona talitonuga o se Molimau a Ieova. Na ioe i ai le faiaʻoga. Na sauniuni Susana mo lana tautalaga a o faagasolo le lua vaiaso na sosoo ai, e faaaogā ai le polosiua ua faaulutalaina, Molimau a Ieova—O Ai i Latou? O ā o Latou Talitonuga?

Ua oo mai le aso e fai ai le tautalaga. Na faamatala e Susana le māfuaaga ua taʻua ai i tatou o Molimau a Ieova. Na ia faamatala foʻi lo tatou faamoemoe i le lumanaʻi, ma le māfuaaga e tatou te lē taliaina ai le tuiina o le toto. Ona ia valaaulia lea o le vasega e fai mai ni a latou fesili. E toʻatele tamaiti o le vasega na sii i luga o latou lima. Na maofa le faiaʻoga ina ua tali e le teine talavou mai le Tusi Paia fesili na lāgā.

Na faapea mai se tasi tamaitiiti o le vasega, “Sa ou iai i se Maota mo Sauniga i se tasi aso, ma e leai ma se faatusa e iai i totonu.” Sa fia iloa e le faiaʻoga pe aiseā e leai ai ni faatusa? Sa faitau e Susana le Salamo 115:4-8 ma le Esoto 20:4. Sa faateʻia le faiaʻoga ma faapea mai, “Aiseā ua tele ai faatusa i totonu o o tatou falesā, ae o lea e faasā e le Tusi Paia?”

Na faaauau pea le talanoaga i fesili ma tali mo le 40 minute. Ina ua fesili atu Susana i tamaiti pe fia matamata i le vitiō No Blood—Medicine Meets the Challenge, na latou taufai tali uma mai, ioe. O lea na faatulaga ai e le faiaʻoga le talanoaga e toe faaauau i le aso na sosoo ai. Ina ua māeʻa ona faaali le vitiō, na taʻu atu e Susana togafitiga faafomaʻi ia e lē faaaogāina ai le toto, lea e talia e nisi o Molimau a Ieova. Ona o lana faamalamalamaga, na faapea mai le faiaʻoga: “Ou te leʻi iloa e tele nisi togafitiga faafomaʻi e lē faaaogāina ai le toto; ou te leʻi iloa foʻi aogā o togafitiga e lē faaaogā ai le toto. Pe e na o Molimau a Ieova e faaaogā ai nei togafitiga?” Ina ua iloa e le faiaʻoga e lē na o Molimau a Ieova, na ia faapea mai: “O le isi taimi e ō mai ai Molimau a Ieova i loʻu fale, o le a matou talanoa ma i latou.”

E tolu itula le umi o le talanoaga a Susana lea e na o le 20 minute le umi na ia sauniuni ai. I le vaiaso na sosoo  ai, na faia ai ni tautalaga a nisi tamaiti e uiga i o latou talitonuga o ni tagata lotu. O le mea na tupu, e tele fesili na lāgā, ae e leʻi mafai e na tamaiti ona faamatala atu o latou talitonuga. Na faapea atu le faiaʻoga iā i latou, “Aiseā ua outou lē mafai ai ona faamatala mai o outou talitonuga e pei ona sa faia e se teine o la outou vasega o ia o se Molimau a Ieova?”

Na latou tali mai: “Ona latou te suʻesuʻe i le Tusi Paia, ae o i matou, e leai.”

Na liliu atu le faiaʻoga iā Susana ma faapea atu: “E moni lava o loo e suʻesuʻeina le Tusi Paia ma taumafai e fai mea o loo fai mai ai. E ao ona faamālō atu iā te oe.”

Sa ono faalologo pea Susana ma aua le tautala atu. Peitaʻi, o lona tautala atu e faasaʻo se manatu sesē na iai i isi o lana vasega, na ia faaaʻoaʻo ai i le faaaʻoaʻoga lelei na faataatia e le teineitiiti Isaraelu lea na ave o se pologa e le ʻau Suria. Na ave le teine i le fale o le taʻitaʻiʻau Suria o Naamanu, o lē na maua le paʻu o le tino i se maʻi leaga. Na tautala atu le teine ma faapea atu i lona matai tamaʻitaʻi: “Se anoa! ana i ai loʻu alii i le perofeta o i Samaria, po ua faateʻaina e ia lona lepela.” Na lagona e le teine le tatau ona molimau atu e faatatau i le Atua moni. O le iʻuga, na avea lona matai o Naamanu, ma tagata tapuaʻi iā Ieova.—2 Tu. 5:3, 17.

Sa faapena foʻi le tulaga o Susana, na ia lagona le tatau ona molimau atu e faatatau iā Ieova atoa ai ma ona tagata. Ona o lona tausolomua e faamatala atu ona talitonuga ina ua tulaʻi mai le avanoa, na usitaʻia ai e Susana le faatonuga a le Tusi Paia: “A ia faapaiaina le Keriso le Alii i o outou loto, ma ia nofo sauni pea e tali atu i luma o tagata uma latou te fesili mai iā te outou i le māfuaaga o lo outou faamoemoe, a ia faia faapea faatasi ma le agamalu ma le matuā faaaloalo lava.” (1 Pete. 3:15) Po o e nofo sauni ea e faamatala atu ou talitonuga, ma tausolomua e tali atu pe a tulaʻi mai se avanoa e faia ai faapea?

[Ata i le itulau 17]

O meafaigaluega nei e fesoasoani iā te oe ina ia faamatala atu ai ou talitonuga