Skip to content

Skip to table of contents

Ia Amana‘ia le Pule a Ieova

Ia Amana‘ia le Pule a Ieova

 Ia Amanaʻia le Pule a Ieova

“O le alofa lenei i le Atua, ia tatou tausi i ana poloaʻiga; ma e lē mamafa ana poloaʻiga.”—1 IOA. 5:3.

1, 2. (a) Aiseā e lē logoleleia ai i le toʻatele o tagata le manatu o le gauaʻi i le pule a le isi tagata? (e) Po o tutoʻatasi moni i latou o ē e faapea mai e lē mananaʻo e ola i lalo o le pule a le isi tagata? Faamatala.

O LE toʻatele o tagata i aso nei e lē mananaʻo e faatonu atu e le isi tagata i latou i le mea e ao ona fai. E lē logoleleia i le toʻatele o tagata le manatu o le gauaʻi i le mea e manaʻo i ai le isi tagata. O tagata e faapea mai e lē mananaʻo e ola i lalo o le pule a le isi tagata, e masani ona faapea mai, “Ou te lē manaʻo e taʻu mai e se tasi iā te aʻu le mea e ao ona fai.” Peitaʻi, po o tutoʻatasi moni nei tagata? O le tulaga moni e leai! O le toʻatele o loo mulimuli i tapulaa a le toʻatele o isi tagata, o ē o loo “mulimuli i faiga o mea a lenei lalolagi.” (Roma 12:2) Nai lo o le tutoʻatasi la, ua avea i latou ma “pologa a le iʻuvale,” e tusa ai ma upu a le aposetolo Kerisiano o Peteru. (2 Pete. 2:19) Ua latou savavali “e tusa ma faiga o mea a lenei lalolagi, e tusa foʻi ma le pule a le taʻitaʻi o le ʻea,” o Satani le Tiapolo.—Efe. 2:2.

2 Na faapea mai ma le faualuga se tasi o tusitala: “Ou te lē tuuina atu i oʻu mātua po o se patele po o se faifeʻau, po o se taʻitaʻi lotu Hinitu po o le Tusi Paia foʻi, e taʻu maia iā te aʻu le mea saʻo e ao ona fai.” Peitaʻi, e ono faaaogā sesē e nisi lo latou tulaga pule ma ono lē faigofie ai ona tatou usiusitai i ai. Ae po o le a faaleleia ea le tulaga o mea i le maumauaʻi e teena so o se taʻitaʻiga? O le tau lava ina tilotilo atu i tala i nusipepa, ua aumaia ai se tali e faigatā ona faamalieina ai. O le tulaga sili ona ogaoga, ona i taimi ua matuā manaʻomia ai e tagata se taʻitaʻiga, ae o le toʻatele lava o tagata e latou te lē taliaina se taʻitaʻiga e tuuina atu.

Lo Tatou Manatu i le Pule

3. Na faaalia faapefea e Kerisiano o le uluaʻi senituri, e latou te leʻi gauaʻi tauaso i tagata na iai le pule?

3 I le avea ai ma Kerisiano, e ese lo tatou tulaga mai le lalolagi. E lē faapea o le a tatou faia so o se mea lava e faatonu mai i tatou e fai, e aunoa ma le fesili muamua ina ia malamalama.  Nai lo lea, e iai taimi e ao ai ona tatou teena le gauaʻi atu i manatu o isi, e tusa lava po o i latou o ni pule. O le tulaga moni lenei sa iai Kerisiano i le uluaʻi senituri. O se faaaʻoaʻoga, ina ua faatonuina le ʻauaposetolo e aua neʻi toe talaʻi, e latou te leʻi lolo atu i manatu o ositaulaga sili ma isi na iai le pule, o ē na avea ma vaega o le ʻau Saniterini. E latou te leʻi tuua le mea saʻo e tatau ona fai ina ia usiusitai ai i pule faaletagata.—Faitau le Galuega 5:27-29.

4. O ā faaaʻoaʻoga mai Tusitusiga Eperu e faaalia ai, na mulimuli le toʻatele o tagata o le Atua i se ala e ese mai i ala o le lalolagi?

4 E toʻatele auauna a le Atua i tuā a o leʻi oo mai i taimi o uluaʻi Kerisiano, sa latou faia foʻi faapei ona faia e le ʻauaposetolo. O se faaaʻoaʻoga, na musu Mose “e taʻua o ia o le tama a le afafine o Farao, na ia filifili foʻi e faileagaina faatasi ma tagata o le Atua,” e ui lava o le faia faapea na avea ma mea e ‘⁠toʻatamaʻi ai le tupu.’ (Epe. 11:24, 25, 27) Na teena e Iosefa faatosinaga lē mamā a le avā a Potifara, e ui sa iai i le fafine le pule e fai ai se mea leaga iā te ia ma afāina ai. (Kene. 39:7-9) Na “manatu Tanielu, o le a lē leaga o ia i mea taumafa a le tupu,” e ui lava e leʻi faigofie i le alii e pule i eunuka ona talia lona manaʻo i le mea na tulaʻi mai. (Tani. 1:8-14) Ua faaalia mai ai i na faaaʻoaʻoga mai le talafaasolopito, e maumauaʻi pea tagata o le Atua e tutū mo le mea saʻo, e tusa lava po o le ā le iʻuga e oo i ai. E latou te leʻi usiusitai e faia mea na mananaʻo ai nisi tagata, ina ia fiafia mai ai na tagata iā i latou; e ao foʻi ona tatou faia faapea.

5. E faapefea ona ese la tatou vaaiga i le pule, mai le vaaiga a tagata o le lalolagi?

5 E lē tatau ona faafenumiaʻia lo tatou lototetele ma le faauamaaa; e tatou te lē pei foʻi o nisi o ē e tetee, tau lava ia faailoa atu ai e latou te lē lagolagoina se manatu faapolotiki o talanoaina. Nai lo lea, e ao ona tatou maumauaʻi e amanaʻia le pule a Ieova nai lo o pule a tagata. Pe a oo ina feteenaʻi manatu o tagata ma le tulafono a le Atua, e lē faigatā ona tatou iloa le mea e ao ona fai. I le pei o le ʻauaposetolo i le uluaʻi senituri, e tatou te usiusitai i le Atua o le pule, nai lo o tagata.

6. Aiseā ua avea ai o se mea aupito i sili ona lelei mo i tatou le usiusitai i faatonuga a Ieova?

6 O le ā o loo fesoasoani iā i tatou ia amanaʻia ai le pule a le Atua? E tatou te ioe i upu o loo taʻua i le Faataoto 3:5, 6: “Ia e faatuatua iā Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.” E tatou te ioe o so o se mea e faafinagaloina e Ieova mai iā i tatou, o le a aogā mo lo tatou lelei. (Faitau le Teuteronome 10:12, 13.) O le mea moni, na faamatala atu e Ieova ia lava i tagata Isaraelu o lē e na te “aʻoaʻo iā te oe i mea e aogā, o loo taʻitaʻiina oe i le ala e te ui ai.” Ona ia toe fetalai atu lea: “E! ana uaʻi mai ou taliga i aʻu poloaʻiga, po ua tusa ma se vaitafe lou manuia; ma lau amiotonu, e tusa lea ma peau o le sami.” (Isa. 48:17, 18) E tatou te maufaatuatuaina na upu. E tatou te mautinoa o le mea aupito i sili ona lelei mo i tatou, o le usiusitai lea i faatonuga a le Atua.

7. O le ā e ao ona tatou fai e tusa lava pe tatou lē malamalama atoatoa i se faatonuga o i le Afioga a le Atua?

7 E tatou te amanaʻia le pule a Ieova ma usiusitai iā te ia, e tusa lava pe tatou te lē malamalama atoatoa i le māfuaaga o nisi o mea manaʻomia o loo taʻua i lana Afioga. E lē faapea ua aunoa i tatou ma se tapasā; ae e māfua ona o se vaega o lo tatou faatuatua. Ua faaalia ai le talitonu mai le loto e faapea, e silafia e Ieova mea e lelei mo i tatou. E lē gata i lea, o lo tatou usiusitai o se faailoaga lea o lo tatou alofa, e pei ona tusi le aposetolo o Ioane: “O le alofa lenei i le Atua, ia tatou tausi i ana poloaʻiga.” (1 Ioa. 5:3) Peitaʻi, e iai se isi vala o lo tatou usiusitai e lē tatau ona tatou manatu māmā i ai.

Ia Faamasani e Faaaogā o Tatou Mafaufau

8. E faapefea ona fesootaʻi le faaaogā o o tatou “mafaufau,” ma le amanaʻiaina o le pule a Ieova?

8 Ua taʻu mai e le Tusi Paia iā i tatou e ao ona faamasani o tatou “mafaufau e iloa le mea saʻo ma le mea sesē ina ua aʻoaʻoina.” (Epe. 5:14) O lo tatou sini la, e lē na o le usiusitai i tulafono a le Atua e aunoa ma le mafaufau i na tulafono; nai lo lea, e ao ona tatou “iloa le mea saʻo ma le  mea sesē” e faavae i tapulaa a Ieova. E tatou te mananaʻo ia iloa le atamai o ala o Ieova, ona mafai lea ona tatou fai atu e pei o le faisalamo: “O loo i totonu lava iā te aʻu lau tulafono.”—Sala. 40:8.

9. E faapefea ona faaōgatusa o tatou lotofuatiaifo ma tapulaa a Ieova, ma aiseā e tāua ai ona tatou faia faapea?

9 Ina ia talisapaia le tāua o tulafono a le Atua e pei ona sa faia e le faisalamo, e manaʻomia ona tatou manatunatu loloto i mea tatou te faitau ai i le Tusi Paia. O se faaaʻoaʻoga, pe a tatou aʻoaʻoina e faatatau i se mea e faafinagaloina e Ieova, tatou te ono fesili ifo e faapea: ‘Aiseā e atamai ai lenei mataupu silisili? Aiseā e tāua ai iā te aʻu ona usitai i lenei faatonuga? O ā iʻuga leaga ua tutupu iā i latou na lē amanaʻiaina fautuaga a le Atua i lenei mataupu?’ Pe a faaōgatusa o tatou lotofuatiaifo ma ala o Ieova, e mautinoa o le a tatou faia filifiliga e talafeagai ma lona finagalo. O le a mafai ai ona tatou “malamalama po o le ā le finagalo o Ieova,” ona mulimuli ai lea e ala i le usitaia. (Efe. 5:17) Ae e lē o taimi uma e faigofie ai ona faia faapea.

O Loo Taumafai Satani e Taʻufaatauvaa le Pule a le Atua

10. O le ā se tasi o vala o loo taumafai Satani e taʻufaatauvaa ai le pule a le Atua?

10 Ua leva ona taumafai Satani e taʻufaatauvaa le pule a le Atua. Ua faaalia lona agaga fia tutoʻatasi i le tele o auala. Seʻi fai ma faaaʻoaʻoga le lē faaaloalo i le faatulagaga a le Atua o le faaipoipoga. O nisi tagata ua filifili e nonofo faatasi ae e leʻi faaipoipo, ae o isi ua saʻili i ni auala e faamuta ai a latou faaipoipoga. Atonu o nei tagata ua ioe i manatu o se tamaʻitaʻi e autū i ai ata tifaga, o lē na taʻua e faapea: “E lē faigofie i le tane po o le fafine ona tasi le paaga.” Sa ia toe faapea mai: “Ou te leʻi iloa se tasi o loo faamaoni pe e manaʻo foʻi e faamaoni i lana paaga.” Pe a mafaufau i le lē taulau o ana faiā faale-faaipoipoga, na taʻua foʻi e se alii e autū i ai ata tifaga: “Ou te lē mautinoa po o se tulaga masani mo i tatou le tumau i le paaga e tasi i aso uma o o tatou olaga.” E ao ona tatou fesili ifo iā i tatou lava, ‘Po o oʻu amanaʻia le pule a Ieova e tusa ai o faaipoipoga, po o aafia oʻu mafaufauga i manatu o le lalolagi e faapea, o le faaipoipoga e lē o se mea e tumau?’

11, 12. (a) Aiseā atonu e faigatā ai mo talavou ona amanaʻia le pule a Ieova? (e) Faamatala mai se mea na tupu e faaalia ai le valea o le lē amanaʻia o tulafono ma mataupu silisili a Ieova.

11 Po o oe o se talavou i le faalapotopotoga a Ieova? Pe afai o le tulaga lea, atonu la o loo fai oe ma taulaʻiga o taumafaiga a Satani ina ia taʻufaatauvaa ai le pule a Ieova. Talu ai ona o “tuʻinanauga masani o talavou” faatasi ai ma omiga mai i ē tou te tupulaga, e te ono manatu ai e mamafa tulafono a le Atua. (2 Timo. 2:22) Aua neʻi faatagaina lenā tulaga e tupu. Fai ni taumafaiga ia e iloa le atamai o tapulaa a le Atua. O se faaaʻoaʻoga, ua taʻu mai e le Tusi Paia iā te oe ia ‘sola ese i le faitaaga.’ (1 Kori. 6:18) E ao foʻi ona toe fesili ifo iā te oe i fesili nei: ‘Aiseā e atamai ai lenā faatonuga? O le a faapefea ona aogā iā te aʻu le usiusitai i lenei mataupu?’ Atonu o e iloa nisi sa lē amanaʻia tulafono a le Atua, ma mulimuli ane mafatia i aafiaga leaga mai lenā mea sesē. Po o latou fiafia moni i le taimi nei? Po o latou ola i se olaga e sili atu nai lo o le olaga sa latou iai, a o auaufaatasi ma le faalapotopotoga a Ieova? Po ua latou iloaina se isi ala e maua ai le fiafia lea e lē o iloa e isi auauna a le Atua?—Faitau le Isaia 65:14.

12 Seʻi manatu i le faamatalaga a se tuafafine  e igoa iā Sarona, na faia i se taimi e leʻi leva atu: “Talu ai ona o le lē usiusitai i tulafono a Ieova, o lea ua ou aafia ai nei i le faamaʻi oti o le AIDS. E masani ona ou toe mafaufau i le tele o tausaga sa ou fiafia ai i le auaunaga iā Ieova.” Sa ia iloa e lē o se mea atamai ona solia tulafono a Ieova, ma sa tatau ona ia usitaia ma le faaaloalo na tulafono. O tulafono a Ieova e mo lo tatou puipuiga. Na uma le ola o Sarona i le fitu vaiaso mulimuli ane ai, talu ona ia tusia upu o loo i luga. Ua faaalia mai ai i le tulaga mataʻutia na tupu iā te ia, e leai se mea lelei o aumaia e Satani mo i latou o loo avea ma vaega o lenei faiga amioleaga o mea. I le avea ai ma “tamā o le pepelo,” ua ia faia le tele o folafolaga, peitaʻi e lē o taulau, e pei foʻi ona lē taulau lana folafolaga na fai atu iā Eva. (Ioa. 8:44) E mautinoa lava la, e sili ona lelei pe a amanaʻia le pule a Ieova.

Ia Leoleo Faasaga i se Agaga Fia Tutoʻatasi

13. O fea se tasi taimi e manaʻomia ai ona tatou leoleo faasaga i se agaga fia tutoʻatasi?

13 Ina ia taliaina le pule a Ieova, e manaʻomia ona tatou leoleo faasaga i se agaga fia tutoʻatasi. E mafai e se uiga faamaualuga ona faapogaia ai i tatou e manatu, e tatou te lē manaʻomia le taʻitaʻiga mai se tasi. O se faaaʻoaʻoga, atonu tatou te teena fautuaga mai iā i latou o loo taʻimua i tagata o le Atua. Ua faavaeina e le Atua se faatulagaga ua mafai ai e le pologa faamaoni ma le faautauta, ona saunia meaʻai i le taimi tatau. (Mata. 24:45-47) E ao ona tatou amanaʻia ma le lotomaulalo, o le auala lea o loo tausia ai e Ieova ona tagata i aso nei. Ia pei o aposetolo faamaoni. Ina ua tausuai nisi o le ʻausoo, sa fesili atu Iesu i le ʻauaposetolo: “Po ua outou fia ō foʻi ma outou?” Na tali mai Peteru e faapea: “Le Alii e, o ai a matou ō i ai? Ua iā te oe upu o le ola e faavavau.”—Ioa. 6:66-68.

14, 15. Aiseā e ao ai ona tatou gauaʻi ma le lotomaulalo i fautuaga a le Tusi Paia?

14 O le amanaʻiaina o le pule a Ieova, e aofia ai le talia o ana fautuaga e faavae i lana Afioga. O se faaaʻoaʻoga, ua lapataʻia i tatou e le pologa faamaoni ma le faautauta, ia “mataala ma faaauau ona mafaufau lelei.” (1 Tesa. 5:6) Ua matuā talafeagai lenā fautuaga i nei aso e gata ai, ona o le toʻatele o tagata ua avea ma “ē e alolofa iā i latou lava, o ē mananaʻo tele i tupe.” (2 Timo. 3:1, 2) Pe mafai ona tatou aafia i na uiga ua matuā taatele? Ioe. E mafai e le tuliloaina o sini i le lalolagi, ona taofia ai i tatou mai le uaʻi atu i la tatou faiā ma le Atua, pe atonu foʻi e aafia ai i tatou i se uiga o le manaʻo tele i meafaitino. (Luka 12:16-21) O lea la, maʻeu le atamai pe a talia fautuaga a le Tusi Paia, ma teena le ala manatu faapito o le olaga lea ua matuā taatele i le lalolagi a Satani!—1 Ioa. 2:16.

15 O taumafa faaleagaga mai i le vasega o le pologa faamaoni ma le faautauta, o loo tufa atu e toeaina tofia i faapotopotoga. Ua apoapoaʻi mai le Tusi Paia iā i tatou: “Ia usiusitai i ē o taʻitaʻia outou ma ia gauaʻi iā i latou, auā o loo latou leoleoina o outou ola talu ai e tatau ona fai atu sa latou tali; ina ia latou faia ma le olioli ae e lē ma le ōi, auā e leaga lea mo outou.” (Epe. 13:17) Po o le uiga o lenei manatu ua lelei atoatoa toeaina i le faapotopotoga? E leai! E sili atu ona silafia e le Atua o latou masei nai lo o tagata. Ae o loo ia faatalitalia pea i tatou ina ia gauaʻi i ai. O le galulue soosootauʻau ma toeaina, e ui lava e latou te lē lelei atoatoa, e faamaonia atu ai o loo tatou amanaʻia le pule a Ieova.

Le Tāua o le Lotomaulalo

16. E faapefea ona faaalia lo tatou faaaloalo iā Iesu, o le Ulu o le faapotopotoga Kerisiano?

16 E ao ona tatou manatua pea o Iesu o le Ulu moni lea o le faapotopotoga. (Kolo. 1:18) O se  tasi lenā o māfuaaga e ao ai ona tatou gauaʻi ma le lotomaulalo i le taʻitaʻiga a toeaina tofia, ia “matuā faaaloalo iā i latou.” (1 Tesa. 5:12, 13) O le mea moni, e faaalia e toeaina o le faapotopotoga o loo latou gauaʻi foʻi, e ala i le faaoo atu ma le faaeteete o le feʻau a le Atua i le faapotopotoga, ae lē o o latou lava manatu. E latou te lē “faia mea e sili atu nai lo o mea ua tusia” ina ia faaauilumaina ai manatu o le tagata lava ia.—1 Kori. 4:6.

17. Aiseā e mataʻutia ai le agaga fiasili?

17 E manaʻomia e tagata uma o le faapotopotoga ona faaeteete i le mataʻutia o le saʻilia o se viiga o le tagata lava ia. (Faata. 25:27) E manino mai, sa avea lenā mea o se mailei i se tasi o soo, o lē na feiloaʻi i ai le aposetolo o Ioane. Na tusi Ioane e faapea: “A o Tioterifi o lē na fia muamua iā i latou, e na te leʻi talia ma le faaaloalo se mea mai iā i matou. Afai ou te alu atu, ou te faamanatu atu ana galuega o loo faia pea, i le faia o tala taufaaleaga e faatatau iā i matou.” (3 Ioa. 9, 10) O loo i ai foʻi se lesona i inā mo i tatou i aso nei. E iai se māfuaaga lelei e tatau ai ona tatou liaʻi ese so o se faanaunauga fiasili tatou te iloa o loo iā i tatou. Ua taʻu mai e le Tusi Paia iā i tatou: “E muamua le faamaualuga i le malaia; e muamua foʻi le loto faasiasia i le paʻū.” E tatau iā i latou o ē amanaʻiaina le pule a le Atua ona teena le maileia i le faamaualuga, auā o le faamaualuga o le a taʻitaʻia atu ai i le faalumaina.—Faata. 11:2; 16:18.

18. O le ā o le a fesoasoani iā i tatou ia amanaʻia ai le pule a Ieova?

18 Ioe, ia fai ma ou sini le teena o le agaga fia tutoʻatasi o le lalolagi, ae ia amanaʻia le pule a Ieova. Mai lea taimi i lea taimi, ia manatunatu loloto ma talisapaia lou faaeaga sili o le auauna iā Ieova. Ona o lea o loo e iai faatasi ma tagata o le Atua, ua faamaonia ai o loo tosina mai oe e Ieova e ala i lona agaga paia. (Ioa. 6:44) Seʻi aua lava neʻi e manatu māmā i la oulua faiā ma le Atua. Ia taumafai e faaalia i vala uma o le olaga, ua e teena se agaga fia tutoʻatasi, ae amanaʻia le pule a Ieova.

Pe E te Manatua?

• O le ā e aofia ai i le amanaʻiaina o le pule a Ieova?

• E faapefea i le faaaogā o o tatou mafaufau, ona fesootaʻi ma le amanaʻiaina o le pule a Ieova?

• O ā vala o loo taumafai Satani e taʻufaatauvaa ai le pule a le Atua?

• Aiseā e tāua tele ai le lotomaulalo i le amanaʻiaina o le pule a Ieova?

[Fesili mo le Suʻesuʻega]

[Ata i le itulau 18]

“E tatau ona matou usiusitai i le Atua o le pule, nai lo o tagata”

[Ata i le itulau 20]

O se faiga atamai le mulimuli e lē aunoa i tapulaa a le Atua