O le Tusi Lona Lua o Tupu 5:1-27
5 Sa iai se tagata e igoa iā Naamanu, o le taʻitaʻiʻau a le tupu o Suria, o ia o se tagata tāua na faaaloalogia e lona alii, auā o ia na maua ai e Suria le manumalo* mai iā Ieova. O ia o se tagata toa malosi, e ui sa lepela o ia.*
2 I se tasi o osofa‘iga a tagata Suria, na latou ave faapagota ai se teineitiiti mai i le nuu o Isaraelu, ma fai ma auauna a le avā a Naamanu.
3 Ua fai atu o ia i lona matai tamaʻitaʻi: “Maʻimau e, pe ana alu loʻu alii i le perofeta+ i Samaria! Semanū e na te faamālōlōina lona lepela.”+
4 Ona alu atu lea o ia* ma taʻu atu i lona alii le mea na fai mai ai le teine mai i Isaraelu.
5 Ona fai mai lea o le tupu o Suria iā Naamanu: “Inā alu ia! O le a ou auina atu se tusi i le tupu o Isaraelu.” Ona alu lea o ia ma ave taleni* siliva e sefulu, o sekeli auro e 6,000, ma ofu e sefulu.
6 Ua ia avatu le tusi i le tupu o Isaraelu, ua faapea le tusi: “O loo oʻu auina atu lenei tusi iā te oe faatasi ma laʻu auauna o Naamanu, ina ia e faamālōlōina lona lepela.”
7 Ina ua faitau le tupu o Isaraelu i le tusi, ona ia saeia loa lea o ona ofu ma faapea ane: “O aʻu ea o le Atua e fasioti ma faaola?+ Auā ua ia auina mai lenei tagata iā te aʻu ina ia faamālōlō lona lepela. Ua outou iloa lelei o loo taumafai o ia e faatupu se misa.”
8 Ina ua faalogo Elisaia le tagata o le Atua moni, ua saeia e le tupu o Isaraelu ona ofu, ona ia auina atu lea o se feʻau i le tupu, e faapea: “Aiseā ua e saeia ai ou ofu? Faamolemole, ia tuu o ia e sau iā te aʻu, ina ia iloa ai e ia o loo iai se perofeta i Isaraelu.”+
9 Ona sau ai lea o Naamanu ma ana solofanua ma ana kariota tau, ua tutū i luma o le faitotoʻa o le fale o Elisaia.
10 Ae ua auina atu e Elisaia se avefeʻau iā te ia, ua faapea atu: “Inā alu ia ma e tāʻele faafitu+ i Ioritana,+ ona toe lelei ai lea o lou tino ma e mamā ai.”
11 Ona matuā ita ai lea o Naamanu, ua alu ese ma faapea ane: “Na ou manatu, ‘O le a sau o ia i fafo iā te aʻu ma tū ma valaau i le suafa o Ieova lona Atua, ma talotalo lona lima i le mea o iai le lepela ona teʻa ai lea.’
12 Pe e lē sili ea vaitafe o Tamaseko+ o Apana ma Farapa, nai lo o vai uma o Isaraelu? Pe e lē mafai ea ona ou tāʻele ai, ma ou mamā ai?” Ona liliu lea o ia, ua alu ma le ita tele.
13 Ua faalatalata atu ana auauna, ma faapea atu iā te ia: “Loʻu tamā e, ana fai atu le perofeta iā te oe e te faia se mea faigatā, pe e te lē faia ea? A o lenei, ua ia fai atu iā te oe, ‘Ia tāʻele ma e mamā ai.’”
14 Ona alu ifo lea o ia, ua tofu faafitu i Ioritana e tusa ai ma le upu a le tagata o le Atua moni.+ Ona toe lelei ai lea o lona tino e pei o le tino o se tamaitiiti,+ ma ua mamā foʻi o ia.+
15 Ona toe foʻi mai lea o ia i le tagata o le Atua moni,+ o ia faatasi ma lana ʻaumalaga* uma, ua sau ma tū i ona luma, ua faapea mai: “O lenei ua ou iloa e leai lava se isi Atua i le lalolagi, ua na o i Isaraelu lava.+ Faamolemole, inā talia ia se meaalofa* mai i lau auauna.”
16 Ae ua fai atu Elisaia: “Ou te tautō iā Ieova le Atua soifua o lē o loo ou auauna i ai,* ou te lē talia lava le meaalofa.”+ Ua tauanau o ia e Naamanu ina ia talia le meaalofa, ae ua teena pea e ia.
17 Mulimuli ane, ua fai mai Naamanu: “Afai e leai, seʻi foaʻi mai i lau auauna ni avega a ni asini* se lua, o eleele mai i laueleele o Isaraelu; auā e lē toe faia e lau auauna se taulaga mū po o se isi taulaga i so o se atua, ae e na o Ieova lava.
18 Ae ia faamagalo e Ieova lau auauna ona o le mea lenei: Pe a alu loʻu alii i le fale* o Rimoni e ifo ai, e faalagolago o ia i loʻu lima, ma e ao ai ona ou ifo i le fale o Rimoni. Pe a ou ifo i le fale o Rimoni, tau ina ia faamagalo e Ieova lau auauna faamolemole e tusa ai ma lenei mea.”
19 Ona fai atu lea o Elisaia iā te ia: “Inā alu ia ma le filemu.” Ona alu ese lea o ia mai iā Elisaia, e leʻi mamao tele atu,
20 ae ua faapea ane Kiasi+ le auauna a Elisaia le tagata o le Atua moni:+ ‘O lenei ua tuu atu e loʻu matai Naamanu le Suria+ e alu, ma ua ia lē taliaina mea na ia aumaia. Ou te tautō iā Ieova le Atua soifua, o le a ou tuliloa iā te ia ina ia ou maua mai se mea iā te ia.’
21 Ona alu lea o Kiasi ma tuliloa iā Naamanu. Ina ua iloa mai e Naamanu se tasi o tamoʻe atu i ona tua, ona oso ese lea o ia mai i lana kariota ina ia faafetaui iā te ia, ua faapea mai: “Po o lelei mea uma?”
22 Ua ia fai atu: “O loo lelei mea uma. Ae ua auina mai aʻu e loʻu matai e fai atu, ‘Faauta! Faatoʻā ō mai nei lava iā te aʻu ni tauleleʻa se toʻalua mai i le vaega maugā o Efaraima, e mai i atalii o le ʻauperofeta. Faamolemole, ia avatu iā i laʻua se taleni siliva ma ni ofu se lua.’”+
23 Ona fai mai lea o Naamanu: “Inā ave ia taleni e lua.” Ua tauanau pea o ia e Naamanu,+ ma tuu taleni siliva e lua i taga e lua, faatasi ai ma ni ofu se lua, ma tuuina atu i ana auauna e toʻalua ina ia ave e muamua atu iā Kiasi.
24 Ina ua oo i Ofele,* ona ave lea e Kiasi o mea mai iā i laʻua ma tuu i le fale, ae aauina ese atu tamāloloa. Ina ua la ō,
25 ona alu atu lea o ia ma tū i tafatafa o lona matai. Ona fai mai lea o Elisaia iā te ia: “O fea lea e te sau mai ai Kiasi?” Ae ua ia fai atu: “E leʻi alu lava lau auauna i se mea.”+
26 Ona fai mai lea o Elisaia: “Po ou te leʻi iloa ea le taimi na oso ese ai le tagata mai i lana kariota ina ia faafetaui oe? Po o se taimi ea lenei e talia ai siliva, o ofu, o togāolive, o togāvine, o mamoe, o povi, o auauna tane ma auauna fafine?+
27 O le mea lea, e pipii atu ai e faavavau iā te oe ma au fanau le lepela o Naamanu.”+ Ona alu lea o ia i fafo mai ona luma, ua paʻepaʻe lona tino i le lepela e pei o le kiona.+
Faamatalaga Pito i Lalo
^ Po o le “faaolataga.”
^ Po o le “sa maua i le maʻi o le paʻu.”
^ Atonu e faasino atu iā Naamanu.
^ Epe., “faamanuiaga.”
^ Epe., “ʻautau.”
^ Epe., “o loo ou tū ai i ona luma.”
^ O le upu Eperu e faasino atu i le tama a le asini poʻa ma le solofanua fafine.
^ Po o le “malumalu.”
^ O se nofoaga i Samaria, atonu o se aʻega po o se pā.
