Skip to content

Skip to table of contents

Ia Tumau i le “Ulua‘i Alofa sa iā te Oe”

Ia Tumau i le “Ulua‘i Alofa sa iā te Oe”

 Ia Tumau i le “Uluaʻi Alofa sa iā te Oe”

“Ia taofimau i mea ua iā te oe.”—FAAA. 3:11.

1, 2. O ā ni ou lagona ina ua faatalitonuina oe, o mea na e aʻoaʻoina e faatatau iā Ieova o le upu moni lea?

PE E te manatua le taimi ina ua e faatoʻā aʻoaʻoina e faatatau i le faamoemoe matagofie, ua tuu mai e Ieova mo tagata usiusitai? Pe afai sa e auai muamua i se isi lotu, o ā ni ou lagona ina ua faamatala atu iā te oe mai le Tusi Paia fuafuaga a le Atua, ia pe ina ua e malamalama foʻi i aʻoaʻoga ia sa faigatā ona e malamalama ai? Atonu na e iloa ane e leʻi aʻoaʻoina oe i le upu moni e faatatau i le Atua. Ae maʻeu lou olioli i le taimi nei ina ua e iloa le upu moni! Pe afai sa tausia aʻe oe e ni mātua Kerisiano, pe e te manatua ou lagona ina ua faatalitonuina oe, o mea sa e aʻoaʻoina e faatatau iā Ieova o le upu moni lea, ma o lea sa e filifili e ola e tusa ma mea na e aʻoaʻoina?—Roma 12:2.

2 O le toʻatele o ou uso faaleagaga i le faapotopotoga o le a latou taʻu atu sa latou matuā olioli, vavalalata iā Ieova, ma loto faafetai ona ua ia tosina mai i latou. (Ioa. 6:44) O lo latou fiafia na uunaʻia ai i latou e auai i galuega faa-Kerisiano. Sa matuā faatumulia i latou i le olioli ma mananaʻo ai e faamatala atu o latou lagona i tagata uma. Pe na tupu se mea faapena iā te oe?

3. O le ā le tulaga na iai le faapotopotoga i Efeso ina ua avatu i ai e Iesu se feʻau?

 3 Ina ua talanoa atu i le faapotopotoga Kerisiano i Efeso i le uluaʻi senituri, sa taʻua e Iesu le “uluaʻi alofa sa iā te oe.” E tele uiga lelei sa i Kerisiano i Efeso, peitaʻi na amata ona mou ese atu lo latou alofa sa faaalia mo Ieova. O le ala lea o le faapea atu o Iesu: “Ua ou iloa au galuega, ma lou tautigā, ma lou tumau, ma e te lē faapalepale i tagata leaga, ma ua e tofotofoina ē ua faapea mai o ni aposetolo ae e leai lava, ua e iloa foʻi o i latou o ni tagata pepelo. Ua e faaalia foʻi lou tumau, ua e onosaia le tele o faigatā ona o loʻu igoa, ma ua e lē faavaivai. Ae peitaʻi, o le mea lenei ua ou lē fiafia ai iā te oe, ona ua e tuua le uluaʻi alofa sa iā te oe.”—Faaa. 2:2-4.

4. Aiseā e tāua ai i aso nei le feʻau a Iesu na avatu i Kerisiano i Efeso?

4 Na fetaui lelei le fautuaga a Iesu na avatu i Kerisiano i Efeso faapea isi faapotopotoga na ia talanoa atu i ai lea o loo taʻua i le tusi o Faaaliga, pe a fua i mea na tutupu i Kerisiano faauuina i se vaitaimi mai le 1914 ma faasolo mai ai. (Faaa. 1:10) Peitaʻi, e oo lava i aso nei, atonu ua tuua e nisi Kerisiano lo latou “uluaʻi alofa” mo Ieova ma le upu moni faa-Kerisiano. Ona o lenā tulaga, seʻi o tatou iloilo la pe faapefea ona fesoasoani lou manatuaina ma le manatunatu loloto i mea na tutupu iā te oe lava ia, e faatumauina, e toe faafou, ma faatuputeleina ai le alofa ma le maelega sa iā te oe muamua mo le Atua ma le upu moni.

O le ā na Faatalitonuina ai Oe i le Upu Moni?

5, 6. (a) O le ā e tatau ona faatalitonuina ai e Kerisiano taʻitasi i latou lava? (e) O le ā na faatalitonuina ai oe e faapea o loo aʻoaʻo e Molimau a Ieova le upu moni? (i) O le ā e fesoasoani i se tagata ina ia toe faafou ai lona uluaʻi alofa?

5 O i latou uma o ē ua faia se tuuina atu iā Ieova, e ao ona muamua “faamaonia” e le tagata lava ia po o le ā le “finagalo o le Atua, lea e lelei, e mālie, ma le lelei atoatoa.” (Roma 12:1, 2) O se tasi o mea e aofia ai i le faia faapea, o le iloa lea o mea o loo aʻoaʻoina e le Tusi Paia. O mea ua faatalitonuina ai le isi tagata e faapea o loo aʻoaʻo e Molimau a Ieova le upu moni, atonu e lē tutusa ma mea ua faatalitonuina ai le isi tagata. E manatua e nisi se suiga na iai i o latou manatu ina ua latou faitau i le Tusi Paia i le suafa o le Atua, pe ina ua latou malamalama foʻi i le tulaga moni o iai tagata ua maliliu. (Sala. 83:18; Fai. 9:5, 10) Sa faagaeetia isi ona o le fealofani o tagata o Ieova. (Ioa. 13:34, 35) Ae na faagaeetia isi ona o le uiga o le manatu ia lē avea ma vaega o le lalolagi. Na latou manatu e leai se vaega a Kerisiano moni i upufai faapolotiki po o taua a so o se atunuu.—Isa. 2:4; Ioa. 6:15; 17:14-16.

6 I le toʻatele o tagata, o le aʻoaʻoina e faatatau i mea o loo taʻua i luga ma isi upu moni, na faaosofia ai lo latou uluaʻi alofa mo le Atua. Ia  faaalu se taimi e toe mafaufau ai po o le ā na faatalitonuina ai oe i le upu moni. E eseese uma tulaga o tagata taʻitoʻatasi ma e eseese foʻi o latou uiga, o lona uiga la atonu o māfuaaga na e alofa ai iā Ieova ma talitonu ai i ana folafolaga, e lē tutusa ma māfuaaga a isi. Ae e mautinoa o loo moni pea na māfuaaga iā te oe, e pei ona sa i ai ina ua e faatoʻā aʻoaʻoina na māfuaaga. E leʻi suia le upu moni. O lea la, o le toe iloilo o na manatu ma faalogona, o le a iʻu ina toe faafou ai lou uluaʻi alofa mo le upu moni.—Faitau le Salamo 119:151, 152; 143:5.

Ia Faamalosia Lou “Uluaʻi Alofa”

7. Aiseā e manaʻomia ai ona toe faamalosia lo tatou uluaʻi alofa mo le upu moni, ma e faapefea ona tatou faia?

7 Atonu e tele ni suiga ua e faia i lou olaga talu mai le taimi na e tuuina atu ai iā Ieova. E tāua tele lou uluaʻi alofa i le upu moni, peitaʻi a o faagasolo taimi, e manaʻomia ona faamalosia lou alofa ina ia fesagaʻia ai luʻi fou lea e tofotofoina ai lou faatuatua. Peitaʻi, e lagolagoina oe e Ieova. (1 Kori. 10:13) O lea la, e tāua tele foʻi mea na tutupu iā te oe mo le tele o tausaga. Ua fesoasoani iā te oe e toe faamalosia ai lou uluaʻi alofa, ma o nei mea na tutupu o se isi lea auala e faamaonia atu ai iā te oe, po o le ā le finagalo o le Atua, lea e lelei ma mālie.—Iosua 23:14; Sala. 34:8.

8. Na faapefea ona faailoa atu e Ieova ia lava iā Mose, ma na faapefea ona iloa lelei e tagata Isaraelu le Atua?

8 Ina ia faataʻitaʻi, seʻi manatu i le tulaga na iai tagata Isaraelu ina ua taʻu atu i ai e Ieova lana fuafuaga o le a laveaʻi i latou mai le nofo pologa i Aikupito. Na faailoa atu e le Atua ia lava iā Mose, e ala i lona fetalai atu: “E avea aʻu ma mea ou te loto i ai.” (Eso. 3:7, 8, 13, 14, NW ) I se isi faaupuga, na faapea atu Ieova o le a ia faia so o se mea e finagalo i ai ina ia faasaʻoloto ai ona tagata. I le faagasologa o mea na tutupu mulimuli ane ai ma le manaʻoga na tulaʻi mai, sa faaalia ai e Ieova lona tulaga moni e mafai ona avea o ia ma—Lē e Ona le malosi uma lava, o se Faamasino, o se Taʻitaʻi, o Sē e Laveaʻi, o se Toa, ma o Lē e Saunia Mea.—Eso. 12:12; 13:21; 14:24-31; 16:4; Nee. 9:9-15.

9, 10. O le ā le ituaiga mea e tupu e mafai ona fesoasoani i se tasi ia iloa lelei le Atua, ma aiseā e tāua ai ona manatunatu i na mea na tutupu?

9 E lē tutusa lou tulaga ma tulaga o tagata Isaraelu anamua. Ae e ui o le tulaga moni lenā, ae atonu sa iai ni mea na tutupu iā te oe na faatalitonuina ai oe o loo naunau totino mai le Atua iā te oe, ma na faamalosia ai lou faatuatua. Atonu na faamaonia e Ieova o ia o Lē e Saunia Mea, o Lē e fai ma Faamāfanafana, po o ia o se Faiaʻoga. (Faitau le Isaia 30:20e, 21.) Atonu foʻi sa e mātauina se mea na tupu sa manino mai o le auala lea na tali mai ai i se tatalo sa fai. Atonu na e fesagaʻi ma se luʻi, ona fesoasoani atu lea iā te oe o se uso Kerisiano. Ia pe atonu foʻi na e mātauina mai i au lava suʻesuʻega totino, ni mau talafeagai e fetaui lelei ma lou tulaga.

10 Pe afai o le a e faamatala atu i isi na mea na tutupu iā te oe, e ono lē faagaeetia ai i latou e pei ona sa tupu iā te oe. O le mea ia manatua, o na mea na tutupu e lē o ni vavega. Peitaʻi sa tāua tele na mea i lau vaai. Ioe, ua faamaonia e Ieova e mafai ona avea o ia ma so o se mea e manaʻomia ina ia faataunuu ai lona finagalo mo oe. Seʻi toe manatu i tausaga talu ona e i ai i le upu moni. Pe e te manatua ni taimi na e lagona ai le tausiga alofa a Ieova i lou olaga? Afai na iai, o le manatuaina o na mea na tutupu ma ou lagona na i ai i lenā taimi, e mafai ona toe faagaee ai i lou loto faalogona alofa mo Ieova, lea na e lagonaina i le amataga. Ia e talisapaia na mea na tutupu i lou olaga. Ia manatunatu loloto i ai. O faamaoniga na o le naunau totino mai o Ieova iā te oe, ma e leai se tasi na te aveesea lenā talitonuga mai iā te oe.

Ia Iloilo Oe Lava

11, 12. Pe afai ua tau mou atu le alofa o se Kerisiano mo le upu moni, atonu o le ā le māfuaaga, ma o le ā le fautuaga a Iesu?

11 Pe afai ua e lē o toe lagonaina le alofa i le Atua ma le upu moni lea sa iā te oe i le taimi muamua, e lē faapea ona ua i ai se mea ua suia pe ua liliu le Atua. E lē mafai ona liliu Ieova. (Mala. 3:6; Iako. 1:17) E pei ona sa naunau mai o ia iā te oe i le taimi muamua, o loo faapena  foʻi ona naunau mai o ia iā te oe i le taimi nei. O le ā la se māfuaaga e ono suia ai le lua faiā ma Ieova? Pe ona ua e fetaiaʻi ma le tele o omiga, po o le lutia i popolega o le olaga? Atonu i taimi ua teʻa sa e tatalo faatauanau, maelega e suʻesuʻe, ma sa masani ona e manatunatu loloto. Pe sa sili atu ona e maelega i le faiva ma auai e lē aunoa i sauniga nai lo o le taimi lenei?—2 Kori. 13:5.

12 Pe a uma ona e iloiloina oe lava, e te ono lē mātauina ai nisi o nei suiga iā te oe, ae pe afai o i ai, aiseā ua māfua ai nei suiga? Pe ona o popolega masani o le soifuaga e pei o le saunia ia lava mea e tausi ai lou aiga, le tausiaina o lou soifua mālōlōina, po o nisi mea faapena, ua māfua ai ona tau mou atu lou uiga faanatinati a o tulata atu i le aso o Ieova? Na fetalai Iesu i ona aposetolo e faapea: “Ia outou uaʻi atu iā te outou lava, ina neʻi faamamafaina o outou loto i le ʻai tele, ma le inu tele, ma le popole i mea o le olaga nei, neʻi oo faafuaseʻi mai lenā aso iā te outou e pei o se mailei. Auā e oo mai iā i latou uma o ē o nonofo i le lalolagi atoa. O lea la, ia mataala pea, ma ia faatoga atu i taimi uma, ina ia outou sao mai i nei mea uma o le a oo mai.”—Luka 21:34-36.

13. O le ā na faatusa i ai e Iakopo le Afioga a le Atua?

13 Na uunaʻia e le tusitala o le Tusi Paia o Iakopo uso talitonu, ina ia iloilo ma le faamaoni i latou lava e tusa ai ma le Afioga a le Atua. Na tusi Iakopo e faapea: “Ia avea outou ma ē usiusitai i le upu ae lē na o le faalogologo i ai, ua faasesēina ai outou i o outou lava manatu sesē. Afai e na o le faalogologo o se tasi i le upu ae lē usiusitai i ai, ua pei lava o ia o se tagata ua vaavaai i le faata i ona lava foliga. Ua vaavaai o ia iā te ia lava, ona alu ese lea o ia ma ua galo loa ona foliga. A o lē vaavaai totoʻa i le tulafono lelei atoatoa o le saʻolotoga, ma tausisi i ai, ona o lona faalogologo ma le lē faagalogalo, o le a fiafia ai o ia ona o lona faia o lea galuega.”—Iako. 1:22-25.

14, 15. (a) E faapefea ona fesoasoani le Tusi Paia iā te oe e faaleleia ai lou tulaga faaleagaga? (e) O ā fesili e te ono manatunatu i ai?

14 E faaaogā e se tagata se faata ina ia faamautinoa ai po o lelei ona foliga. O se faaaʻoaʻoga, pe afai e vaai atu se tamāloa o loo sipa lona fusiua, e mafai ona ia toe faasaʻo. Pe afai e vaai atu se fafine e lē o lelei ona teu lona laulu, e mafai ona ia toe fai faalelei. I se tulaga tutusa, e fesoasoani le Tusi Paia iā i tatou e iloilo lo tatou tulaga o i ai. Pe a tatou faatusatusa atu i tatou i le tulaga o loo fai mai le Tusi Paia e tatau ona tatou i ai, o lona uiga ua tatou faaaogā le Tusi Paia e pei o se faata. Peitaʻi, o le ā le aogā o le autilo i se faata ae tatou te lē faasaʻoina se mea sesē na tatou vāai i ai? O se mea atamai pe afai tatou te gaoioi e tusa ma mea tatou te vāai i ai i le “tulafono lelei atoatoa” a le Atua, ma ia avea ma “ē usiusitai” i le tulafono a le Atua. O lea la, o so o se tasi e manatu ua tau mou atu lona uluaʻi alofa mo Ieova ma le upu moni, e sili ona lelei pe a mafaufau i fesili nei: ‘O ā omiga o loo oʻu fesagaʻia i le olaga, ma o faapefea ona ou taulimaina na omiga? Na faapefea ona ou taulimaina nei omiga i le taimi ua teʻa? Po o i ai se mea ua suia?’ Pe afai e faaalia mai i lenā iloiloga o oe lava, se mea o loo e vaivai ai, ia aua neʻi manatu māmā i ai. Pe afai e manaʻomia ona fai ni fetuutuunaʻiga, ia faia nei loa na suiga e aunoa ma le faatuai.—Epe. 12:12, 13.

 15 O le manatunatu loloto faapena, e mafai ona fesoasoani iā te oe e faatulaga ni sini talafeagai ina ia agaʻigaʻi ai i luma faaleagaga. Na avatu e le aposetolo o Paulo se fautuaga faagaeeina i lē na la galulue faatasi, o Timoteo, ina ia faaleleia atili ai lana faiva. Sa uunaʻia e Paulo le talavou e faapea: “Ia manatunatu i nei mea; ia naunau i ai, ina ia iloa ai e tagata uma lou agaʻigaʻi i luma.” E sili foʻi ona lelei mo i tatou pe a manatunatu i le malamalama o le Afioga a le Atua, ma iloa ai po o ā ni faaleleiga e mafai ona tatou fai.—1 Timo. 4:15.

16. O le ā le tulaga mataʻutia e manaʻomia ona e faaeteete i ai, pe a e iloiloina oe lava e fua i le mea o fai mai ai le Tusi Paia?

16 O so o se iloiloga faamaoni o oe lava e te faia, e te ono mātauina ai ni mea o loo e vaivai ai. E mafai e lenā tulaga ona e lagona ai le lotovaivai, peitaʻi, ia aua neʻi faatagaina lenā tulaga e tupu iā te oe. Ia manatua, o le sini o le iloiloina o oe lava, ina ia iloa ai po o ā ni vala e manaʻomia ona faaleleia. O le faanaunauga o Satani ia manatu se Kerisiano o ia ua lē toe aogā, ona o lona tulaga lē lelei atoatoa. Ua leva ona ia finau mai faapea e lē o manatu mai le Atua i taumafaiga uma o loo fai ina ia auauna atu ai iā te ia. (Iopu 15:15, 16; 22:3) O le pepelo lenā sa maumauaʻi Iesu e teena; e tāua i tatou taʻitoʻatasi i le Atua. (Faitau le Mataio 10:29-31.) O le iloaina o lou tulaga lē lelei atoatoa, e ao ona e lotomaulalo ai ma faaleleia mea o faalētonu, faalagolago i le fesoasoani a Ieova. (2 Kori. 12:7-10) Pe afai ua faaitiitia mea ua mafai ona e fai ona o maʻi o le tino po o le tulaga matua o le soifua, ia faatulaga ni sini talafeagai, ae aua le faavaivai pe aua neʻi mou atu lou uluaʻi alofa.

Mea e Tele e Ao Ona Faafetai Ai

17, 18. O ā aogā e maua mai i le atiaʻe i luga o le alofa lea sa iā te oe i le amataga?

17 E tele aogā e maua mai le faaauau pea ona atiaʻe i luga o le faavae o le alofa lea sa iā te oe mai le amataga. E mafai ona faaloloto atili ai lou iloa o le Atua ma lou talisapaia o lana taʻitaʻiga alofa. (Faitau le Faataoto 2:1-9; 3:5, 6.) Na faapea mai le faisalamo: “E tele foʻi le taui pe a tausi i ai [tulafono a Ieova].” “E faamaoni poloaʻiga a Ieova, e faapotoina ai lē ua faigofie.” E lē gata i lea, “amuia ē ua sao lo latou ala, o ē savavali i le tulafono a Ieova.”—Sala. 19:7, 11; 119:1.

18 E mautinoa o le a e ioe mai e tele mea lelei e ao ona e lotofaafetai ai. Ua e malamalama i le māfuaaga o mea ua tutupu i le lalolagi. O loo e maua aogā mai le tausiga faaleagaga ma sauniuniga ua aumaia e le Atua mo ona tagata i aso nei. E lē taumatea e te lotofaafetai foʻi ona ua tosina mai oe e Ieova i lana faapotopotoga i le lalolagi aoao, ma avatu iā te oe le faaeaga o le avea ma se tasi o ana Molimau. Ia e lotofaafetai mo na faamanuiaga ua e maua i lou olaga! E lē taumatea le umī o se lisi pe a e taumafai e tusia uma na faamanuiaga. O le fai ma mafaufau i faamanuiaga ua e maua, e ono fesoasoani iā te oe e faatatauina ai le apoapoaʻiga lenei: “Ia taofimau i mea ua iā te oe.”—Faaa. 3:11.

19. E ese mai i le manatunatu loloto i la oulua faiā ma le Atua, o le ā e tāua ina ia faatumauina ai lou mālōlōina faaleagaga?

19 O le manatunatu loloto i le auala na atiaʻe ai lou faatuatua a o faagasolo le tele o tausaga, o se tasi lenā o laasaga e fesoasoani iā te oe e taofimau ai i le mea ua iā te oe. E tele taimi ua taʻua ai i lenei mekasini isi mea tāua e manaʻomia, ina ia tumau ai i le mālōlōina faaleagaga. E aofia ai foʻi ma le tatalo, auai ma fai se sao i sauniga faa-Kerisiano, ma auai ma le maelega i le galuega talaʻi. O le a fesoasoani nei mea iā te oe e faaauau ai pea ona toe faafou, ma toe faaleleia, ma atiaʻe ai i le alofa lea sa iā te oe i le amataga.—Efe. 5:10; 1 Pete. 3:15; Iuta 20, 21.

O le ā Lau Tali?

• E faapefea i māfuaaga na ala ai ona e alofa iā Ieova, ona avea ma faalaeiauga iā te oe i le taimi nei?

• O le ā e mafai ona faatalitonuina ai oe, pe a toe manatunatu i mea na tutupu iā te oe i le gasologa mai o tausaga?

• Aiseā e tatau ai ona e iloilo lou alofa mo le Atua?

[Fesili mo le Suʻesuʻega]

[Ata i le itulau 23]

O le ā se mea e uiga i le upu moni na tosina ma faatalitonuina ai oe?

[Ata i le itulau 25]

Po o e mātauina ni mea e uiga iā te oe e manaʻomia ona faaleleia?