‘Ia Faalatalata Atu i le Atua, Ona Ia Faalatalata Mai Lea’

Le Olaga Muamua ma Mulimuli Ane Ai—Suia e Mataupu Silisili o le Tusi Paia

A O TALAVOU ia Adrian, sa avea o ia o se tasi e ita leaga ma loto ita. O lona ita vave e oo atu ai i le pasae aʻe o faiga sauā. E inu tele o ia i le ʻava malosi, ulaula ma oo atu i amioga lē mamā. Sa lauiloa Adrian o se tagata faatuʻiese ma sa iai sana peʻa e atagia atu ai lona agaga fouvale i le pule. I le faamatalaina o na tausaga, ua ia faapea mai: “Na ʻoti loʻu ulu e faatutū i luga, ma sa ou faaaogāina se kelū ina ia faatutū ai, ma o nisi taimi ou te valiina ai loʻu ulu i le lanu mumū po o se isi foʻi lanu.” Na tui foʻi tautaliga i lona isu.

Na nonofo faatasi Adrian ma isi talavou fouvale i se fale ua matuā tuai lava. O i inā latou te inu ai ma faaaogā fualaau faasāina. Ua faapea mai Adrian: “Sa ou faia ni oʻu tui i vailaau faasāina e taʻua o le speed ma isi vailaau e taʻua o le Valium ma so o se mea lava e mafai ona ou mauaina. Pe afai e lē maua ni fualaau faasāina po o ni kelū foʻi e sogisogi ai, ou te utuina mai penisini mai i taavale a tagata ma sogisogi ai seʻia oo ina ou lagona e pei ua ou lele.” Na ola Adrian i se olaga solitulafono ma avea ai o ia o se tasi e taufaamataʻu ma matuā sauā lava. Sa lē mananaʻo le toʻatele e faifai mea faatasi ma ia. Ae i le taimi e tasi, o ana amioga leaga, na fiafia ai tagata leaga e aumea atu iā te ia.

A o faasolosolo mālie pea, na iloa ai e Adrian e ala ona fiafia atu ana uō iā te ia ona o mea latou te maua mai iā te ia. Ae lē gata i lenā, na ia faapea mulimuli mai, “o le ita ma le sauā e leai ma se mea e maua mai ai.” O le iai o ni lagona gaogao i lona olaga ma le fiu, na ia tuua ai loa ana aumea. Ina ua ia mauaina se kopi o Le Olomatamata i se mea e fai ai faugāfale, na tosina o ia i le feʻau e faavae mai le Tusi Paia, ma na iʻu atu ai i le faia o se suʻesuʻega faale-Tusi Paia ma Molimau a Ieova. Na matuā naunau Adrian e tali atu i le valaaulia: “Ia outou faalatalata atu i le Atua, ona faalatalata mai lea o ia iā te outou.” (Iakopo 4:8) O le iʻuga, na iloa ai e Adrian le manaʻomia ona amata ona faatatauina mataupu silisili o le Tusi Paia.

Na iai se aafiaga lelei i le lotofuatiaifo o Adrian ona o le poto o le Tusi Paia ma toe suia ai lona olaga. Na fesoasoani iā te ia e manumalo ai i lona ita leaga ma pulea ia lava. O le mana o le Afioga a le Atua, na suia ai uiga o Adrian.—Eperu 4:12.

Peitaʻi, e faapefea ona iai i le Tusi Paia lenā aafiaga malosi? O le mauaina o le poto i le Tusi Paia ua fesoasoani iā i tatou ia ‘oofu ai i le tagata fou.’ (Efeso 4:24) Ioe, e suia o tatou uiga pe afai tatou te faatatauina le poto saʻo o le Tusi Paia. Peitaʻi e faapefea ona suia e lenā poto ia tagata?

Muamua, ua faamanino mai e le Tusi Paia uiga lē lelei o le tagata e ao ona lafoaʻia. (Faataoto 6:16-19) Lona lua, ua faalaeiauina i tatou e le Tusi Paia ina ia faaalia uiga matagofie o le agaga paia o le Atua. E aofia ai le “alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le lē gaoiā.”—Kalatia 5:22, 23, LT.

O le tele o le malamalama i mea e manaʻomia e le Atua na fesoasoani lea iā Adrian ina ia iloiloina o ia lava ma iloa ai uiga e manaʻomia ona ia ati aʻe  ma uiga e tatau ona ia aveesea. (Iakopo 1:22-25) Peitaʻi, ua na o se amataga lenā. E faaopoopo atu i le poto, e manaʻomia ai foʻi se uunaʻiga, lea e uunaʻia ai Adrian e faia ni suiga i lona olaga.

Na iloa e Adrian e faapea ua faia le tagata fou i uiga matagofie ina ia “foliga i lē na faia o ia.” (Kolose 3:10) Na oo ina ia iloa e faapea, o uiga faa-Kerisiano e ao ona foliga atu e pei o uiga o le Atua. (Efeso 5:1) E ala i le suʻesuʻeina o le Tusi Paia, na mātauina ai e Adrian feutagaʻiga a Ieova ma tagata ma iloa ai uiga lelei o le Atua e pei o le alofa, agalelei, lelei, alofa mutimutivale ma le amiotonu. Na uunaʻia Adrian e lenā malamalamaaga ina ia faaalia le alofa i le Atua ma tauivi ia pei o le ituaiga tagata lea e faamaonia e Ieova.—Mataio 22:37.

Mulimuli ane ona o le fesoasoani a le agaga paia o le Atua, na mafai ai e Adrian ona pulea lona ita leaga lea sa iai muamua. Ua pisi nei i laʻua ma lana avā e fesoasoani i isi ina ia faia ni suiga i o latou olaga ona o le fesoasoani a le poto o le Tusi Paia. Ua faapea mai Adrian: “O loo oʻu ola pea ma olioli i se olaga faaleaiga fiafia, ae lē pei o aʻu uō sa iai muamua ia ua feoti le toʻatele o i latou.” O ia o se tasi ua faamaonia ai le mana o le Tusi Paia e suia ai olaga o tagata i se olaga e sili ona lelei.

[Faamatalaga faaopoopo i le itulau 25]

“O le ita ma le sauā e leai se mea e maua mai ai”

[Pusa i le itulau 25]

Mataupu Silisili o le Tusi Paia e Aogā

O nisi nei o mataupu silisili o le Tusi Paia na fesoasoani i le toʻatele o ē lotoa ma sauā ia avea ma tagata e fifilemu:

“Ia outou nofo lelei ma tagata uma lava. Le au pele e, aua le taui atu ma sui, a ia outou tuu atu i le toʻasa.” (Roma 12:18, 19) Seʻi tuu atu i le Atua e filifili po o afea ma po o ai o le a ia aumaia i ai le taui ma sui. E mafai ona ia faia ona e na te silafia mea uma, ma o so o se taui ma sui e na te faaooina mai o le a atagia ai lona faamasinotonu e atoatoa ona lelei.

“A outou ita, aua le agasala ai; aua neʻi goto le lā o ita pea outou. Aua foʻi neʻi tuuina atu e outou se mea e mautū ai le tiapolo.” (Efeso 4:26, 27) E ono talafeagai ona ita se tasi i nisi o taimi. Pe afai e tupu lenei mea, e lē tatau ona “ita pea.” Aiseā? Talu ai e mafai ona uunaʻia ai o ia e faia se mea leaga, ma tuuina atu se tulaga e “mautū ai le tiapolo,” ma iʻu ai i le lē fiafia mai o Ieova le Atua.

“Ina soia e te ita, ma ia tuu lou tigā; aua e te faameo, neʻi e faia se mea leaga.” (Salamo 37:8) Pe a lē pulea faalogona e mafai ona faia ai ni gaoioiga lē pulea. Afai e matuā ita lava se tasi, o le a ia faia ai ni faamatalaga po o le faia foʻi o ni gaoioiga e tigā ai i latou uma e aofia ai.