Faamata o le Galuega Lenei e Sili Ona Lelei mo Oe?

PE AFAI o oe o se Kerisiano ua papatisoina, e mautinoa lava o lou alofa mo le Atua e uunaʻia ai oe e faia lona finagalo. E sili atu i lena, e mautinoa le avea o le faiva ma galuega e sili ona e tuutoina atu i ai. Auā o le mea moni lava, sa poloaʻiina e Iesu Keriso ona soo uma ina ia latou faia isi tagata ma soo. (Mataio 28:19, 20) Ioe, atonu o loo e galue i le taimi nei i se galuega totogi mo le tausiaina o oe. Peitaʻi i lou avea o se soo o Iesu ma o se tasi o Molimau a Ieova, e te faasilisilia ai lava le avea o oe o se faifeʻau Kerisiano—o se tasi e faamuamuaina pea le galuega talaʻi o le Malo i le olaga.—Mataio 24:14.

Atonu ua latalata i le 20 ou tausaga pe ua sili laʻitiiti atu foʻi. E foliga mai ua uma ona e mafaufauina lelei po o le ā se matātā o le a e tulituliloaina i le olaga. I lou fefulisaʻia o filifiliga eseese o loo avanoa atu ia te oe, e foliga mai o le vala tāua lava o lou maua o le faamalieina totino.

Seʻi mafaufau la, i le faamatalaga a Jørgen mai Tenemaka, e faatatau i lana filifiliga sa fai. Ua taʻua e Jørgen e pei “o se auala pito i lelei o le olaga lea e mafai ona e uaʻi atoatoa atu ai i le galuega e sili ona tāua o loo iai.” O Eva, o se tuafafine i Eleni e 31 ona tausaga, ua ia faapea mai: “O loʻu faatusatusaina atu o loʻu olaga ma olaga o aʻu aumea, ou te iloa ai i taimi uma le sili atu ona uigā, faamalieina ma fiafia loʻu olaga.” O le ā se galuega e maua mai ai lena faamalieina? E mafai faapefea ona e ausiaina lena ituaiga o olaga?

Po o Faasino Mai e le Atua le Ala?

E fai lava sina faigatā o le filifilia o se galuega. O le mea moni, ua moomoo nisi maʻimau pe ana faasino saʻo mai lava e le Atua le mea o loo ia finagalo e latou te faia.

A o iai Mose i Mitiana, sa faatonuina o ia e Ieova ia toe foʻi atu i Aikupito ma taʻitaʻi ese le fanauga a Isaraelu mai le faapologaina. (Esoto 3:1-10) Sa faaali atu le agelu a le Atua ia Kitiona, o lē na tofia e na te laveaʻia Isaraelu mai puapuaga. (Faamasino 6:11-14) Sa tausia e Tavita mamoe ina ua fetalai le Atua i a Samuelu, e faauuina o ia e fai ma tupu e sosoo ai o Isaraelu. (1 Samuelu 16:1-13) E lē o taʻitaʻia i tatou i ni auala faapena i aso nei. Na i lo o lea, e manaʻomia ona tatou fefulisaʻia mataupu ma filifili pe faapefea ona faaaogā o tatou tomai ua foaʻiina mai e le Atua.

Ua tatalaina mai e Ieova “le faitotoa lautele ma le matuā aoga” mo talavou Kerisiano i aso nei. (1 Korinito 16:9) E faapefea? I le sefulu tausaga na teʻa atu, ua faateleina ai le aofaʻiga o ē folafola le Malo mai le silia i le 2,125,000 ae ua oo atu i le silia ma le 6,000,000 i le lalolagi aoao. O ai o loo fesoasoani i le sauniunia o le faitau miliona o Tusi Paia, tusi, polosiua, mekasini ma sāvali o loo manaʻomia mo le tausiga faaleagaga ma le galuega o le talaʻia o le tala lelei i le lalolagi atoa? O le faaeaga faamanuiaina lenei o loo faia e sui o le aiga Peteli i le lalolagi aoao.

Se Olaga Tauia

O Peteli o lona uiga “Maota o le Atua,” ma o aiga Peteli o loo faasino atu i nofoaga e nonofo ai Kerisiano ua tauofo atu e auauna i nofoaga tutotonu ma ofisa o lālā o le Sosaiete o le Olo Matamata. (Kenese 28:19, faaopoopoga i le pito i lalo, NW) O aiga Peteli i aso nei e ono faatusaina i se ‘ʻauaiga ua faamaopoopoina lelei ua atiina aʻe e ala i le atamai” ma faavae aʻe i le alofa mo Ieova.—Faataoto 24:3, NW.

O le ā e mafai ona fai atu ai e faatatau i se siʻomaga e pei o se aiga lea o loo iai i Peteli? Ua taʻua e se tasi ua 25 ona tausaga, mai le aiga Peteli i Esitonia, e faapea: “Ou te olioli i le faalogona o le iai faatasi ma uō a Ieova i taimi uma lava. O loo avea pea lenei faalogona ma mea e sili ona tāua ia te aʻu i Peteli.”—Salamo 15:1, 2.

 I le lalolagi aoao, e tusa ma le 19,500 tagata o loo olioli nei i le faaeaga o le auaunaga i Peteli. (Salamo 110:3) I le Iunaite Setete, e 46 pasene o i latou i Peteli e i le vā o le 19 ma le 29 o latou tausaga. I le pei o Isaia, ua latou faapea mai: “O aʻu lenei, ina auina atu aʻu.” (Isaia 6:8) O Isaia—o lē ua uma ona tuuina atu ia Ieova—sa tauofo na te tauaveina se isi faaeaga faaopoopo i le auaunaga. E foliga mai o lenei mea sa manaʻomia ai ni faataulagaina o ni manuia totino. O i latou o loo i le auaunaga i Peteli, ua tuua o latou aiga ma siʻomaga sa masani ai, e faapea foʻi tinā, tamā, uso, tuagane, tuafāfine ma uō. O taulaga nei ua faia ma le loto i ai ‘ona o le tala lelei.’—Mareko 10:29, 30.

O le iʻuga, maʻeu ni faamanuiaga faaleagaga o loo iai i Peteli! Ua faamatala mai e se tuafafine talavou o loo iai i le aiga Peteli i Rusia e faapea: “O le faia o ni a tatou faataulagaina totino, e mafai ai ona tatou aʻoaʻoina ni mea se tele ia o le a fesoasoani ia i tatou ina ia ola ai i le lalolagi fou. E mafai ona ou faapea atu, i loʻu ia tulaga, ua matuā sili atu le tele o faamanuiaga a Ieova na i lo o faataulaga sa ou faia.”—Malaki 3:10.

Le Olaga i Peteli

E faapeʻī le olaga i Peteli? E ioe sui o le aiga Peteli e faapea, o se olaga e aogā ma faamalieina ai, e fiafia ai foʻi. O Jens, ua 43 ona tausaga, o loo olioli i lana auaunaga i Peteli. Aiseā? Ua ia faapea mai: “Ona o le faalogona faapea o loo faia sa tatou vaega i se taumafaiga sili ina ia tauaveina ai se galuega tāua. O loo mafai ona ou iloa ai le lautele o le faagaoioia ma le tāua o le galuega a Ieova.”

E mai i le Aso Gafua e oo atu i le Aso Toonai, e amata ai le aso i Peteli i le tapuaʻiga i le taeao. O le talanoaina lenei o le Tusi Paia, e taʻimua ai se toeaina agavaa. I afiafi o Aso Gafua, e faaaluina atoatoa ai se itula mo le suʻesuʻeina e le aiga o le Tusi Paia faatasi ai ma le fesoasoani a Le Olomatamata, ma i nisi taimi e sosoo mai ai ma se lauga ua faavae aʻe i se matua faale-Tusi Paia lea e matuā fetaui lelei i le aiga Peteli.

O le ā e tupu pe a faatoʻā sau lava se tagata i Peteli? Ina ia faamasani atu tagata fou i le olaga i Peteli, e tauaaoina mai ai e sui taʻumatuaina o le aiga ni lauga e feagai tonu ma vala eseese o le auaunaga i Peteli. Mo ni vaiaso a o faagasolo le uluaʻi tausaga, e auai atu ai se tagata fou o le aiga Peteli i se aʻoga e sili ona lelei e faia i vaiaso taʻitasi, ua fuafuaina lena aʻoga mo le faalauteleina o lona malamalamaga i le Tusi Paia. E faia foʻi e ē fou se faasologa faapitoa mo le faitauina o le Tusi Paia. A o faagasolo lo latou uluaʻi tausaga i le auaunaga i Peteli, e faitauina ai e tagata fou o le aiga le Tusi Paia atoa.

O le ā se aogā o nei toleniga uma? Ua tali mai Iosua, o se tasi ua 33 ona tausaga mai le aiga Peteli i Hong Kong, e faapea: “Ua matuā faalolotoina lava e Peteli loʻu agaga talisapaia mo Ieova. Ua mafai ona ou faifaimea faatasi ma le toʻatele o uso ua iai le tomai, o ē ua faaaluina le tele o o latou olaga e auauna atu ai i a Ieova. E sili ona ou fiafia i polokalame faaleagaga, e pei o le tapuaʻiga i le taeao ma le Suʻesuʻega o Le Olomatamata a le aiga. E lē gata i lea, ou te fiafia i le maopoopo ma le faigofie o le olaga o loo iai. O lenei mea ua faasaʻolotoina ai aʻu mai i popolega lē tatau. Ua ou iloa ai foʻi le auala e taulimaina ai mea i se uiga faa-Kerisiano, ma ua faamaonia pea le aogā o lenei mea.”

E faaaluina e tagata o le aiga Peteli le tele o o latou taimi ma taumafaiga i le faia o mea na latou tauofo e fai. O lona uiga, ia faaaogā muamua lava o latou tomai faaletino ma faalemafaufau, e faia ai se tofiga ua tuuina atu ia i latou i le Peteli. E anoanoaʻi mea eseese e manaʻomia ona faia. O nisi o loo galulue i masini e lolomi ai tusi pe galulue i le itu e tuufaatasia ai tusi, lea e faia ai tusi o loo aauina atu i le tele o faapotopotoga. O isi e auauna i le umukuka, le potuʻai, po o le faletāmea. O tofiga e aofia ai galuega faamamā, le galulue i faatoʻaga, o galuega o faugafale, ma isi tofiga faapena. O nisi ua ia i latou le tiute tauave o le tausia lelei o meafaigaluega i nei matagaluega. O isi e galulue mo le tausia o le soifua mālōlōina pe faia galuega faaofisa. O tofiga uma lava o galuega i Peteli e aofia ai ni luʻi e olioli ai ma e matuā matagofie o latou taui. E sili ona faamalieina le galuega o loo faia i Peteli, auā e faaauilumaina ai manaʻoga o le Malo ma o loo faatinoina ona o le alofa i le Atua.

Ua tofia atu tagata o le aiga Peteli i faapotopotoga, o iinā latou te tofo totino ai i aogā o a  latou galuega. Latou te olioli e auai atu i sauniga a le faapotopotoga ma faia se sao i le galuega talaʻi. O le iʻuga, ua faatupu aʻe ai e ē o le aiga Peteli ni faiā mausalī ma o latou uso ma tuafāfine i a latou faapotopotoga o loo iai.—Mareko 10:29, 30.

O le tuafafine o Rita, o se tasi o le aiga Peteli i Peretania, ua ia faapea mai: “Ou te matuā faafetaia lava le faapotopotoga! Pe a ou iai i sauniga ma i le faiva, e matuā faamalosia lava loʻu faatuatua i loʻu vaai atu i nai uso pele, o tuafāfine, o fanau ma ē matutua o loo iai iinā! Po o le ā lava le mea e tupu, e lē taitai ona misia le iai iinā. E fesoasoani lea ia te aʻu ina ia atili ai ona ou maelega i laʻu auaunaga i Peteli.”

E lē faapea o le olaga i Peteli ua na o galuega lava, o sauniga, o le auaunaga i le fanua ma suʻesuʻega. E iai foʻi taimi e fiafia ai le aiga i sina faafiafiaga ma faiga mālōlōga. E mai i lea taimi i lea taimi, e faia ai ni polokalame o “Afiafi Faaleaiga,” lea e faafiafiaina ma tauia ai faaleagaga. O taimi na e maua ai ni avanoa e fiafia ai i le faaaliga o taleni a le toʻatele, ma aʻoaʻoina ai ni mea e faalaeiauina ai e uiga i olaga o isi o loo auauna i Peteli. Latou te fiafia foʻi e feasiasiaʻi i isi ma maua ai aogā ma faalaeiauga. Atonu e iai ni mea ua saunia mo le faia o faamalositino ma tafaoga, faapea foʻi potutusi e fai ai faitauga tusi a le tagata lava ia ma ni ana lava saʻiliʻiliga loloto. Ae e lē taulia ai foʻi talanoaga fiafia e faia i le taimi e faatasitasi ai i laulauʻai i taimi o taumafataga.

Ua faapea mai Toma, o se tasi o le aiga Peteli i Esitonia: “E na o le tasi lava le poloka e vā aʻi le Peteli ma le sami, ma e latalata mai foʻi se vaomatua matagofie, o iinā ma te fiafia lava ma laʻu avā ma te savalivali atu i ai. E iai foʻi nisi taimi matou te taaalo faatasi ai ma isi uō mai le faapotopotoga po o isi foʻi i Peteli, i le taaloga tapolo, hoki ma le tenisi. Ma pe a lelei le tau, ona alu lea o se matou tiʻetiʻega uila vilivae.”

O le ā e Mafai Ona E Fai Ina ia E Agavaa Ai?

O le mea moni, o Peteli o se nofoaga autū lava e mafai ai e Kerisiano taʻumatuaina ona tuuina atu le auaunaga paia ia Ieova ma galulue ai mo se lelei o o latou uso talitonu i le lalolagi atoa. O i  latou ua avea ma tagata o le aiga Peteli e ao ona latou ausia ni agavaa patino. O le ā e mafai ona e fai ina ia e agavaa ai mo le auaunaga i Peteli?

I le pei o Timoteo, o lē na auauna faatasi ma le aposetolo o Paulo, e faapena foʻi ia i latou ua taliaina mo le auaunaga i Peteli, e tatau ona iai so latou tulaga lelei i le faapotopotoga. (1 Timoteo 1:1) O Timoteo sa “taʻuleleia o ia e le au uso i Lusa ma Ikonio.” (Galuega 16:2) E ui i lona laʻitiiti, ae na iloa e Timoteo le Tusi Paia ma sa lelei ona faavae aʻe i le upu moni. (2 Timoteo 3:14, 15) Ua faapena foʻi ona faatalitalia i latou ua talia mo le auaunaga i Peteli, ina ia iai so latou poto i le Tusi Paia.

E manaʻomia e sui o le aiga Peteli ona ia i latou se agaga o le faataulagaina totino. Sa matuā aliali lava le iai i a Timoteo o le agaga o le faataulagaina totino ma lona lotomalie e faamuamua manaʻoga o le Malo na i lo o ona lava manaʻoga, o le ala foʻi lea na mafai ai e Paulo ona faapea mai e uiga  ia te ia: “E le o ia te au se tasi ma te loto faatasi, na te tausia faamaoni mea e manuia ai outou. Auā e saili e i latou uma a latou lava mea, e le o mea a Keriso Iesu. A ua outou iloa lona faamaoni, na ia auauna faatasi ma aʻu i le tala lelei, e pei o se atalii i lona tamā.”—Filipi 2:20-22.

E manaʻomia i le auaunaga i Peteli alii ma tamaʻitaʻi e faaleagaga. O faatulagaga ua faia mo tagata o le aiga Peteli ua mafai ai e i latou ona tutupu aʻe faaleagaga e ala i suʻesuʻega faale-Tusi Paia, le auai e lē aunoa i sauniga faa-Kerisiano ma i le faiva i le fanua, ma le auaufaatasi ma Kerisiano taʻumatuaina. O lea, ua fesoasoani ai ia i latou o loo iai i Peteli ina ia usitaia le fautuaga a Paulo: “Ia savavali ai outou o ia [Keriso Iesu]; ia mauaa outou ma ia atiina ae ia te ia, ma ia faatumauina i le faatuatua, faapei ona aʻoaʻoina o outou, ia faatele ma le faafetai.”—Kolose 2:6, 7, LF.

Ona o le ituaiga o galuega o loo faia i Peteli, e tatau ai ia i latou ua talia mo lenei faaeaga ona malolosi i le tino ma ia lelei le soifua mālōlōina. Pe afai o loo ia te oe agavaa ia sa tatou muaʻi taʻua, ma ua 19 pe sili atu foʻi tausaga o lou matua, ua silia foʻi ma le tausaga talu ona e papatiso, matou te faalaeiauina oe ina ia e mafaufau i le auaunaga i Peteli.

E Tatou te Tofu Sao Uma Lava

I le avea o ni Kerisiano, e mautinoa e tatou te faanaunau uma lava ina ia faamuamua manaʻoga o le Malo i o tatou olaga, ma ia lotoatoa i la tatou auaunaga ia Ieova. (Mataio 6:33; Kolose 3:23) E mafai foʻi ona tatou faalaeiauina i latou o loo auauna i Peteli ina ia faaauau pea ona latou faia le auaunaga paia iinā. Aemaise lava i uso talavou o ē agavaa mo le auaunaga i Peteli, e tatau ona faalaeiauina i latou ina ia aapa atu mo lenei faaeaga faamanuiaina.

O le auaunaga i Peteli o se auala lea o le olaga e maua ai le faamalieina faaleagaga—le auala e mafai moni lava ona avea o se galuega e sili ona lelei mo oe. O le tulaga lena o loo iai Niko, o lē na amata ona auauna i Peteli ina ua 20 ona tausaga. I le mavae o le sefulu tausaga talu ona auauna i Peteli, ua ia faapea mai: “E masani pea ona ou tatalo ia Ieova ina ia faafetai atu ia te ia mo lona alofa tunoa. O le ā se isi mea ou te toe manaʻo atu i ai? Iinei ua siʻomia ai i matou e Kerisiano faamaoni o ē o loo latou faia le mea silisili latou te mafai e auauna atu ai ia Ieova.”

[Pusa/Ata i le itulau 22]

O le ā e Mafai Ona Faia e Toeaina ma Mātua?

E tatau lava i toeaina ma ovasia femalagaaʻi ona latou faalaeiauina patino uso talavou ina ia talosaga atu mo le auaunaga i Peteli. Talu ai nei, sa faia ai se suʻesuʻega faasamasamanoa i ē talavou o le aiga Peteli ma na faaalia ai, o le 34 pasene o i latou sa faalaeiauina muamua lava e ni ovasia Kerisiano ina ia avea ma o latou sini le auaunaga i Peteli. Ioe, atonu ua misia e a latou faapotopotoga na iai la latou auaunaga. Peitaʻi, e lelei ona manatua, e ui sa mautinoa le avea o Timoteo o se taaʻiga lelei i isi talavou i Lusa ma Ikonio, peitaʻi sa leʻi taofia e toeaina iinā o ia mai i lona alu atu e auauna faatasi ma Paulo. Sa leʻi ia i latou se manatu faapea o le alu atu o Timoteo e ō faatasi ma le aposetolo, o le a matuā telē ai se aafiaga i la latou faapotopotoga.—1 Timoteo 4:14.

Aemaise lava foʻi i mātua Kerisiano, e tatau ona latou taumafai e avea o se taaʻiga mautinoa i a latou fanau i lenei mataupu. I le suʻesuʻega lea na seʻi faatoʻā taʻua, e 40 pasene o i latou na fesiligia, sa latou taʻu mai le avea o o latou mātua ma puna autū o faalaeiauga mo le ulu atu i le auaunaga i Peteli. Na taʻua e se tasi tuafafine ua fai sina umi talu ona auauna i Peteli e faapea: “O le olaga o oʻu mātua i le auaunaga ia Ieova sa avea o se uunaʻiga malosi mo aʻu e ulu atu ai i le auaunaga i Peteli. O loʻu vaai atu i le la faaaʻoaʻoga i le faiva faataimi atoa, o iinā lava na ou iloa ai o le auala sili lenei ona lelei ma faamalieina o le olaga e tatau ona ou filifilia.”

[Pusa i le itulau 24]

E Latou te Talisapaia le Auaunaga i Peteli

“E matuā pele ia te aʻu laʻu auaunaga i Peteli. O se faalogona faamalieina le iloa o loo oʻu auauna atu ia Ieova i le aso atoa ma o le mea foʻi lena o le a ou faia i le aso a taeao, ma tala atu taeao, ma faapena ai lava. E aumaia ai e lenei mea ia te aʻu se lotofuatiaifo lelei ma faatumu ai loʻu mafaufau i mafaufauga lelei.”

“O Peteli o se nofoaga lea e mafai ona e tuutoina atu ai lou taimi atoa, ma lou malosi atoa i le auaunaga ia Ieova e aunoa ma nisi mea e faalavelave mai. E aumaia ai le olioli o le loto. Ae mafai ai foʻi ona ese se isi auala e te manatu ai i le faalapotopotoga a Ieova. E atili ai ona vavalalata ou faalogona i gaoioiga a lena faalapotopotoga, ma e matuā maua ai le fiafia.”

“O loʻu sau i Peteli o se mea sili lea ona lelei ua oo i loʻu olaga. O iinei e lē taitai ona muta aʻoaʻoga o loo faia ai. Ma o aʻoaʻoga foʻi iinei, e lē mo soʻu lava taulau manuia totino, ae mo Ieova. O iinei o le a lē taitai ona faalēaogāina ai saʻu galuega.”

“O le faaaogāina i Peteli o ni taleni ua ia te aʻu ou te lagona ai le faamalieina ma le toʻafilemu, talu ai ua faaaogā na taleni mo Ieova ma le ʻauuso.”

“Sa lē mafai ona ou maua se faamalieina moni ma se fiafiaga moni i laʻu galuega sa ou faigaluega ai muamua. E tele tausaga sa ou moemiti ai i le fia faigaluega faatasi ma oʻu uso ma tuafāfine ma galue foʻi mo i latou. O le māfuaaga lena na ou sau ai i Peteli. Ou te maua le faamalieina moni i le iloa, o aʻu taumafaiga uma lava o le a maua ai e isi ni aogā faaleagaga ma o le a aumaia ai le viiga ia Ieova.”