Faamasino 6:1-40

  • Faasauā Mitiana iā Isaraelu (1-10)

  • Faamalosiau se agelu i le faamasino o Kitiona (11-24)

  • Lepetia e Kitiona le fata faitaulaga o Paala (25-32)

  • Gaoioi le agaga o le Atua iā Kitiona (33-35)

  • Tofotofoga o le fulufulu mamoe (36-40)

6  Ua toe faia e le fanauga a Isaraelu mea e leaga i le silafaga a Ieova.+ Ona tuuina atu lea o i latou e Ieova i lima o Mitiana mo tausaga e fitu.+  Ua faasauā Mitiana iā Isaraelu.+ Ona o Mitiana, ua faia ai e le fanauga a Isaraelu mo i latou o nofoaga e lalafi ai* i totonu o mauga, o ana, ma nofoaga e faigatā ona oo i ai se tasi.+  Pe a lūlū e Isaraelu fatu i le fanua, ona osofaʻia lea o i latou e Mitiana, o Amaleka+ ma tagata mai i Sasaʻe.+  Ona latou tolauapi lea e tau ma Isaraelu, ma faaleagaina uma fua o le laueleele e oo atu lava i Kasa, e latou te leʻi faatotoeina foʻi ni meaʻai mo Isaraelu, o se mamoe, se povi po‘a, po o se asini.+  Auā ua ō aʻe i latou e toʻatele e pei o sē akerise,+ faatasi ma a latou lafumanu ma o latou faleʻie, o i latou ma a latou kamela e lē mafaitaulia;+ e latou te ō mai e faatama‘ia le nuu.  Ua matuā matitiva Isaraelu ona o Mitiana; ona alalaga atu lea o le fanauga a Isaraelu iā Ieova mo se fesoasoani.+  Ina ua alalaga atu le fanauga a Isaraelu iā Ieova mo se fesoasoani ona o Mitiana,+  ona auina mai lea e Ieova o se perofeta i le fanauga a Isaraelu ma faapea atu iā i latou: “O le mea lenei na fetalai mai ai Ieova le Atua o Isaraelu, ‘O aʻu na ou aveina aʻe outou mai i Aikupito, ma aveesea mai i le mea na outou nofo pologa ai.+  Sa ou lavea‘iina outou mai i lima o Aikupito, ma ē uma na faasauā iā te outou, ma ou tutuliesea i latou mai i o outou luma, ma avatu lo latou laueleele mo outou.+ 10  Na ou fai atu foʻi iā te outou: “O aʻu o Ieova lo outou Atua,+ aua tou te matataʻu i atua o tagata Amorī o ē e ona le laueleele o loo outou nonofo ai.”+ Ae e tou te leʻi usiusita‘i iā te a‘u.’”*+ 11  Mulimuli ane, ona sau ai lea o le agelu a Ieova+ ma nofo i lalo o le laau telē sa i Ofira, o le laau lea a Ioasa le tagata Apieseru,+ a o sasa e lona atalii o Kitiona+ le saito i le mea e soli ai vine, ina ia lilo ai mai i tagata Mitiana. 12  Ua faaali mai le agelu a Ieova iā te ia, ma faapea mai: “O loo faatasi Ieova iā te oe,+ o oe lenā le toa malosi.” 13  Ona fai atu lea o Kitiona iā te ia: “Faamolemole lava loʻu alii e, afai ua faatasi Ieova ma i matou, aiseā la ua oo mai ai nei mea uma iā i matou?+ O fea ana galuega ofoofogia uma na faamatala mai e o matou tamā+ e faapea, ‘Pe e lē o Ieova ea na aveina aʻe i tatou mai i Aikupito?’+ A o lenei ua tuulafoa‘i i tatou e Ieova,+ ma ua ia tuuina atu i tatou i lima o Mitiana.” 14  Ona silasila mai lea o Ieova iā te ia ma fetalai mai: “Inā alu ia i lou malosi, e te faaolaina lava Isaraelu mai i lima o Mitiana,+ auā o a‘u na auina atu oe.” 15  Ona tali atu lea o Kitiona: “Faamolemole lava! Ieova e, e faapefea ona ou faaolaina Isaraelu? Faauta! O loʻu aiga* e aupito i faatauvaa i Manase, ma o aʻu foʻi e aupito i faatauvaa i le aiga o loʻu tamā.” 16  Ae ua fetalai mai Ieova iā te ia: “Talu ai ou te faatasi ma oe,+ e te fasiotia lava tagata Mitiana e pei o se tagata e toʻatasi.” 17  Ua faapea atu Kitiona iā te ia: “Afai e te alofa mai iā te aʻu, ia e faia se faailoga ou te iloa ai o oe o loo tautala mai iā te aʻu. 18  Faamolemole, aua e te maliu ese mai i inei seʻia ou toe foʻi mai ma laʻu meaalofa, ma tuuina atu i ou luma.”+ Ona ia faapea mai lea: “Ou te nofo pea i inei seʻia e toe foʻi mai.” 19  Ona alu lea o Kitiona ma saunia se tamaʻi ʻoti, ma falaoa e lē faafefeteina na faia i le efa* o le falaoamata.+ Ua ia tuu le aano o le manu i le ato, ma tuu foʻi le supo i le ulo, ona ia avatu ai lea iā te ia ma laulau atu i lalo o le laau telē. 20  Ua faapea mai le agelu a le Atua moni iā te ia: “Inā ave ia le aano o le manu ma falaoa e lē faafefeteina ma tuu i luga o le maa tele le la, ma sasaa i ai le supo.” Ona ia faia lea faapea. 21  Ua faaloaloa atu e le agelu a Ieova le tumutumu o le tootoo sa i lona lima, ma paʻi atu i le aano o le manu ma falaoa e lē faafefeteina, ona mumū aʻe lea o le afi mai i le maa ma susunuina ai le aano o le manu ma falaoa e lē faafefeteina.+ Ona mou ese atu lea o le agelu a Ieova mai i ona luma. 22  Ua iloa ai e Kitiona o le agelu lea a Ieova.+ Ona faapea atu loa lea o Kitiona: “Auē! Ieova e, le Alii Pule Silisili Ese, ua ma faafesaga‘i lava ma le agelu a Ieova!”+ 23  Ae ua fetalai mai Ieova iā te ia: “Ia iā te oe le filemu. Aua e te fefe.+ E te lē oti lava.” 24  Ona faia lea e Kitiona i inā o le fata faitaulaga iā Ieova, ma ua faaigoa ai o Ieova-saloma*+ e oo mai i aso nei. O loo iai pea i Ofira i le nuu o tagata Apieseru. 25  I lenā lava pō, na fetalai mai ai Ieova iā te ia: “Ia ave le tamaʻi povi poʻa a lou tamā, le tamaʻi povi poʻa lona lua e fitu ona tausaga, ma ia lepeti i lalo le fata faitaulaga a lou tamā iā Paala, ma tā i lalo le pou paia* o loo i tafatafa o le fata faitaulaga.+ 26  Pe a uma ona e faia se fata faitaulaga iā Ieova lou Atua i le tumutumu o lenei ʻolo malosi, faatasi ma ni maa, ona e ave lea o le tamaʻi povi poʻa lona lua, ma ofo atu se taulaga mū i luga o fafie mai le pou paia* lea o le a e tāina i lalo.” 27  Ona ave lea e Kitiona o le toʻasefulu o ana auauna ma faia e pei ona fetalai mai ai o Ieova iā te ia. Ae e leʻi mafai ona ia faia i le ao ona o lona fefe tele i le aiga o lona tamā ma tagata o le aai, o lea na ia faia ai i le pō. 28  Ina ua feala aʻe tagata o le aai i le taeaopō, ua latou vaaia ua lepeti i lalo le fata faitaulaga o Paala, ua tā foʻi i lalo le pou paia* lea sa i tafatafa, ma ua ofoina atu ai le tamaʻi povi poʻa lona lua i luga o le fata faitaulaga na fausia. 29  Ua faapea ane le tasi i le isi: “O ai na faia lenei mea?” Ina ua uma ona latou fesilisili solo, ona latou faapea ane lea: “O Kitiona le atalii o Ioasa na faia lenei mea.” 30  Ona faapea atu lea o tagata o le aai iā Ioasa: “Inā aumai ia i fafo lou atalii ina ia oti ai, auā ua ia lepeti i lalo le fata faitaulaga o Paala, ma tā i lalo le pou paia* sa i tafatafa.” 31  Ona fai mai lea o Ioasa+ iā i latou uma o loo tetee iā te ia: “Pe e tou te tutū atu ea mo Paala? Pe e tou te faaolaina o ia? O so o se tasi e tū mo ia, e fasiotia lava o ia i le taeao nei.+ Afai o ia o se atua, ia tū o ia mo ia lava,+ auā ua lepeti i lalo e se tasi lona fata faitaulaga.” 32  Ona ia faaigoa lea o Kitiona o Ierupaala* i lenā lava aso, ma faapea atu: “Ia tū Paala mo ia lava, auā ua lepeti i lalo e se tasi lona fata faitaulaga.” 33  Ua ‘au faatasi Mitiana+ uma, o Amaleka+ ma tagata mai i Sasaʻe,+ ma sopoʻia le vaitafe ma taunuu i le vanu* o Isereelu ma tolauapi ai. 34  Ua oo i luga* o Kitiona le agaga o Ieova,+ ona ia ili ai lea o le pū,+ ma ua faapotopoto faatasi tagata Apieseru+ e mulimuli atu iā te ia. 35  Ua ia aauina atu avefe‘au iā Manase uma, ma ua latou faapotopoto faatasi ai e mulimuli atu iā te ia. Ua ia aauina atu foʻi avefeʻau iā Asera, o Sepulona ma Nafatali, ma ua latou ō a‘e e faafetaiaʻi iā te ia. 36  Ona faapea atu lea o Kitiona i le Atua moni: “Afai e te faaolaina Isaraelu e ala iā te aʻu, e pei ona e folafolaina mai,+ 37  ou te tuuina atu le fulufulu mamoe i le mea e sasa ai saito. Afai e na o le fulufulu mamoe e iai le sau, ae mātūtū le laueleele uma, ona ou iloa ai lea e te faaolaina Isaraelu e ala iā te aʻu, e pei ona e folafola mai.” 38  O le mea lenā na tupu. Ina ua ia ala aʻe i le taeao o le aso na sosoo ai ma tatau le fulufulu mamoe, na tumu ai i vai se ipu faaofuofu telē i le sau mai i le fulufulu mamoe. 39  Ae ua toe faapea atu Kitiona i le Atua moni: “Aua neʻi e matuā toʻasā mai iā te aʻu, ae seʻi o‘u toe talosaga tasi atu lava. Faamolemole, seʻi oʻu toe tofotofo tasi i le fulufulu mamoe. Faamolemole, ia mātūtū na o le fulufulu mamoe, ae ia iai le sau i le laueleele atoa.” 40  Na faia faapea e le Atua i lenā pō; na mātūtū na o le fulufulu mamoe, ae na iai le sau i le laueleele atoa.

Faamatalaga Pito i Lalo

Pe atonu “o nofoaga i lalo o le palapala e teu ai mea.”
Epe., “faalogo i loʻu leo.”
Epe., “O laʻu toʻaafe.”
Pe ā ma le 22 lita. Tagaʻi i le Faa. E14.
Lona uiga “O Ieova o le Filemu.”
Tagaʻi i le Uiga o Upu.
Tagaʻi i le Uiga o Upu.
Tagaʻi i le Uiga o Upu.
Tagaʻi i le Uiga o Upu.
Lona uiga “Ia Puipuia e Paala o Ia Lava i le Tulafono (Finau).”
Po o “le fanua laugatasi.”
Epe., “ufitia.”