Ua Faalaeiauina le Vasega Lona 108 a Kiliata e Avatu le Auaunaga Paia

I LE Tusi Paia, e masani ona faaaogā le faaupuga “auaunaga paia” e faasino atu ai i le tapuaʻiga i le Atua. O lea faaupuga e sau mai le upu Eleni e faasino i le avatu o le auaunaga i le Atua. (Roma 9:4) E toʻa 5,562 le aofia na faalogologo i le polokalame o le faauuga o le vasega lona 108 a le Aʻoga Faale-Tusi Paia a le Olomatamata o Kiliata, a o fofogaina mai e failauga fautuaga aogā o le a fesoasoani i le ʻaufaauu ina ia latou avatu le auaunaga paia e taliaina e Ieova le Atua. *

O le taʻitaʻifono o le polokalame, o le uso o Theodore Jaracz, o se sui o le Vaega Pule o Molimau a Ieova. Na tomua le polokalame i le usuina o le pese numera 52, “Le Suafa o lo Tatou Tamā.” O loo faapea mai le fuaiupu lona lua o le pese: “Matou te saili i ala ina ia matou faapaia lou suafa lē mafaatusalia.” O na upu ua faaalia moni ai faanaunauga loloto o le ʻauaʻoʻoga a le vasega faauu (10 atunuu e ō mai ai) ina ia faaaogā la latou toleniga i o latou tofiga faamisionare, lea o le a iai i atunuu eseese e 17.

I lana saunoaga amata, sa faatepa ai e le uso o Jaracz manatu i masina e lima sa matuā suʻesuʻe māeʻaeʻa ai e le ʻauaʻoʻoga le Tusi Paia lea ua sauniunia ai i latou mo le auaunaga i atunuu ese. O lenei toleniga ua fesoasoani ina ia latou “tofotofo [“faamautinoa,” NW] i mea uma lava,” o lona uiga, ia matuā vaʻili e ala i le fesoasoani a le Afioga a le Atua, i mea sa latou muaʻi aʻoaʻoina, ma ‘taofi mau ai i le mea lelei.’ (1 Tesalonia 5:21) Sa ia faalaeiauina i latou ina ia pipii atu ma le faamaoni ia Ieova, i lana Afioga, ma tofiga na toleniina ai i latou. O le ā o le a fesoasoani ia i latou a o latou faia nei mea uma?

Fautuaga Aogā mo le Avatuina o le Auaunaga Paia

O Lon Schilling, se sui o le Komiti o Galuega a le Peteli, sa talanoa i le mataupu “Pe o le a E Manumalo i le Tofotofoga o le Faautautaga Lelei?” Sa ia faamatilatila le tāua o le faautautaga lelei, lea e atagia mai ai le atamai faaleatua. (Iakopo 3:17) O le faautautaga lelei e aofia ai le gauaʻi atu, fai mea tonu, fuafua tatau, manatunatu i isi, ma le faapalepale. Na faapea mai le uso o Schilling: “O tagata e iai le faautautaga lelei e paleni i le auala latou te feutagaʻi ai ma isi. Latou te lē soona mateletele.” O le ā e mafai ona fesoasoani i se misionare ina ia faautauta lelei ai? Ia vaai ma le lotomaulalo le tagata ia te ia lava, ia faaaogā avanoa pe a tulaʻi mai e faalogo atu ai ma aʻoaʻoina mea mai isi, ma ia lotomalie e amanaʻia manatu o isi, ae i le taimi e tasi e maumauaʻi i mataupu silisili faaleatua.—1 Korinito 9:19-23.

 “Aua Neʻi Galo Ona E Tausami!” o le matua faaoso naunau lea o le vaega na sosoo ai o le polokalame, sa tauaaoina mai e le uso o Samuel Herd, o se isi sui o le Vaega Pule. Sa ia faamatilatila le tāua o le iai o se faasologa lelei o taumafa tatau faaleagaga ina ia tumau ai ona malosi e avatu le auaunaga paia. Na faapea mai le uso o Herd: “O le a lē pine ona faateleina au gaoioiga faaleagaga a o matuā uaʻi i lou tofiga o le talaʻi ma le aʻoaʻo atu. O lea la, o le a iai se manaʻoga mo oe ia faateleina lou taumafa i taumafa faaleagaga ina ia paleni ai ma tutusa lou malosi.” O se aofaʻiga talafeagai o taumafa tatau faaleagaga e mafai ona fesoasoani i se misionare e alofia ai le lotomafatia faaleagaga, ma le maʻi manatu i lona aiga. E saosaolaumea i le lotomalie ma le maumauaʻi o se tasi e tumau lelei i lona tofiga i le auaunaga paia ua iai.—Filipi 4:13.

O se faiaʻoga o Kiliata, le uso lea o Lawrence Bowen, sa ia faalaeiauina le aufaauu ina ia “Toe Foʻi i le Amataga.” O le ā le uiga o lana matua? Sa ia valaaulia le aofia uma ina ia suʻe i le Faataoto 1:7, lea e faapea mai: “O le mataʻu ia Ieova, o le amataga lea o le poto.” Na faamatala mai e le failauga: “So o se mea lava e teena le manatu moni faavae o loo soifua Ieova, e lē taitai mafai ona avea o se poto moni, e lē iʻu foʻi i se malamalamaga talafeagai.” Sa faatusatusa e le uso o Bowen faamatalaga auʻiliʻili o le Afioga a le Atua, le Tusi Paia, i vaega ninii o se paso. Pe a soosoo  faatasi vaega ninii, o le a amata ai ona taatia mai se ata. O le tele lava o vaega ninii e mafai ona tuufaatasia, o le telē ma le manino foʻi lena o le a foliga mai ai le ata, ma atili ai foʻi ona fiafia le tagata. E aogā lenei faataʻitaʻiga i tagata uma ina ia latou avatu ai le auaunaga paia i le Atua.

O Wallace Liverance, le lesitala o le Aʻoga a Kiliata, sa ia faaiʻu maia le faasologa o lauga. O lana matua, “Ofoina Faafetai e Fai Mau Taulaga i le Atua.” Sa ia tataʻi manatu i le tala i le faamālōlōina e Iesu o lepela e toʻasefulu. (Luka 17:11-19) E na o le toʻatasi na toe foʻi ane e vivii i le Atua ma faafetai atu ia Iesu. Fai mai le faamatalaga a le uso o Liverance: “E mautinoa lava sa matuā fiafia isi ina ua toe faamamāina. Sa latou fiafia i le tulaga ua iai o latou tino, peitaʻi e foliga mai na pau lava le mea sa latou mananaʻo i ai ina ia faapea mai le ositaulaga ua faamamāina i latou.” O le faamamāina faaleagaga lea e maua mai le aʻoaʻoina o le upu moni, faatasi ai ma le lotofaafetai, e tatau ona uunaʻia ai se tasi e faafetai atu i le Atua mo lona lelei. Sa faalaeiauina le ʻau aʻoʻoga o le vasega lona 108 a Kiliata ina ia manatunatu loloto i gaoioiga uma ma mea lelei ua faia e le Atua ina ia atagia mai ai i a latou auaunaga ma taulaga lo latou lotofaafetai i le Atua.—Salamo 50:14, 23; 116:12, 17.

Tala o Mea Tutupu ma Faatalanoaga i le Auala e Fai Ai

O Mark Noumair, o se tasi o faiaʻoga o Kiliata, sa ia taulimaina le vaega na sosoo ai o le polokalame. Sa taulaʻi atu i tala o mea tutupu i le auaunaga i le fanua a le vasega a o faagasolo le vaitaimi o a latou toleniga. I se faatatauga, e tusa ma le 12 tausaga sa faaaluina e le ʻau aʻoʻoga i le faiva faataimi atoa a o leʻi ō mai i Kiliata. A o iai i le aʻoga, sa latou amataina le tele o ni suʻesuʻega faale-Tusi Paia ma tagata mai talaaga eseese, e faaalia ai sa iloa e le ʻau aʻoʻoga le auala e ‘avea ai i latou ma mea uma mo tagata uma.’—1 Korinito 9:22.

Ina ua māeʻa ona faamatala e le ʻau aʻoʻoga o a latou tala i mea na tutupu, ona faatalatalanoa lea e Charles Molohan ma William Samuelson nisi o sui o le aiga Peteli ma ovasia faimalaga o ē sa aʻoʻoga foʻi i Kiliata. O se tasi o uso na faatalanoaina, o Robert Pevy, sa auauna i le Atu Filipaina ina ua uma lona faauuga mai le vasega lona 51 a Kiliata. Sa ia faamanatu mai i le vasega: “So o se taimi lava e tulaʻi mai ai se faafitauli, e tofu lava le tagata ia ma lana fautuaga i le auala e foʻia ai. E tatau lava ona iai se tasi e sili atu sona iloa na i lo oe, o se tasi o le a ia faatū maia se manatu e sili atu ona lelei. Peitaʻi pe a e suʻe i le Tusi Paia ma taumafai e saili le silafaga a le Atua i mataupu, e leai lava la se isi e sōsō i ai. Ua na o lena lava le tali e saʻo i tali uma.”

Mo le aotelega atoa o le polokalame matagofie faaleagaga, sa talanoaina ai e le uso o John Barr, o se sui o le Vaega Pule, le matua e faapea, “Ia Avatu le Auaunaga Paia e Taliaina e Ieova.” Sa ia faaalia le auala e mafai ona atagia mai ai le auaunaga paia i le faiva i le fanua, ina ia fesoasoani i tagata e saʻo o latou loto ia tapuaʻi i le Atua i se auala na te taliaina mai. Ina ua uma ona suʻe i fetalaiga a Iesu o loo i le Mataio 4:10, ona faapea mai lea o le uso o Barr, “Pe afai tatou te fia tapuaʻi atu tau lava o Ieova, e ao ona tatou teena ituaiga uma o ifoga tupua o loo faigata ona mātaulia, e pei o le losilosivale, se tuʻinanauga i le fia mauʻoa, ma le faasili e le tagata o lava ia. Maʻeu so matou fiafia pe a mafaufau atu i o tatou misionare o ē, talu mai lava vaitausaga amata mai le 1941 seʻia oo mai i le asō, o loo latou faatumauina pea se talaaga sili ona lelei i lenei itu! Ma e matou te mautinoa, o le a faapea foʻi ia te outou le aufaauu o le vasega lona 108 a Kiliata, ona tou mulimuli atu i la latou faaaʻoaʻoga lelei. O le a outou avatua le auaunaga paia ia Ieova, o lē ua na o ia lava e tatau ma onomea i ai lena auaunaga.”

O se taualuga sili ona lelei lena mo se polokalame faalaeiau. Ona sosoo ai lea ma se taimi e faalogologo atu ai i faamanuiaga mai ia i latou na ofoina ane alofaʻaga mai itu eseese o le lalolagi, o se taimi mo le tufatufaina atu o tusipasi, ma le lauina o se tusi mai le vasega, e faailoa mai ai lo latou talisapaia o la latou toleniga. O le timaʻiga mo le vasega faauu, ina ia latou faaalia le uiga o le pipii mau ma faamaoni i o latou tofiga ma i le auauna atu ia Ieova. O ē uma sa iai i le aofia, e aofia ai malo mai atunuu e 25, sa auai faatasi i le faaiʻuina o le polokalame i le pese ma le tatalo.

[Faamatalaga pito i lalo]

[Pusa i le itulau 23]

FAAMAUMAUGA O LE VASEGA

Aofaʻi o atunuu o loo iai o latou sui: 10

Aofaʻi o atunuu ua tofia i ai: 17

Aofaʻi o tagata aʻoga: 46

Faatatauga o tausaga: 34

Faatatauga o tausaga i le upu moni: 16

Faatatauga o tausaga i le faiva faataimi atoa: 12

[Ata i le itulau 24]

Vasega Faauu Lona 108 o le Aʻoga Faale-Tusi Paia a le Olomatamata o Kiliata

I le lisi i lalo, o laina e amata mai luma agaʻi i tua, ma o igoa e lisi mai le itu agavale i le itu taumatau i laina taʻitasi.

(1) Amadori, E.; Cook, O.; Byrne, M.; Lee, A. (2) Newsome, D.; Pederzolli, A.; Bigras, H.; Kato, T.; Gatewood, D. (3) Eade, D.; Eade, J.; Wells, S.; Jamison, J.; Gonzales, M.; Gonzales, J. (4) Kato, T.; Lohn, D.; Niklaus, Y.; Preiss, S.; Foster, P.; Ibarra, J. (5) Amadori, M.; Manning, M.; James, M.; Boström, A.; Gatewood, B.; Newsome, D. (6) Foster, B.; Jamison, R.; Hifinger, A.; Koffel, C.; Koffel, T.; Byrne, G. (7) Hifinger, K.; Manning, C.; Cook, J.; Boström, J.; Lohn, E.; Pederzolli, A. (8) James, A.; Wells, L.; Preiss, D.; Niklaus, E.; Lee, M.; Ibarra, P.; Bigras, Y.