O le Tusi i le Faapotopotoga i Roma 9:1-33
9 O aʻu o se soo o Keriso, ou te taʻu atu le upu moni; ou te lē pepelo, auā ua molimau mai iā te aʻu loʻu lotofuatiaifo i le agaga paia,
2 ua matuā mafatia ma tigā tele ai loʻu loto.
3 Ua ou manaʻo e faate‘aese aʻu mai iā Keriso e pei o lē ua faamalaiaina, ona o oʻu uso, o loʻu aiga lea i le tino,
4 o i latou na o tagata Isaraelu. Na avea i latou ma ataliifai+ o le Atua, na tuuina atu i ai le mamalu ma feagaiga,+ atoa ma le Tulafono,+ ma le auaunaga paia,+ ma folafolaga.+
5 O i latou na tupuga mai ai augātamā,+ ma na tupuga mai ai foʻi ma Keriso i la le tino.+ E pule aoao le Atua, ma ia viia o ia e faavavau. Amene.
6 Peitaʻi, e leʻi faapea ua iʻuvale le afioga a le Atua. Auā o i latou na tupuga mai i Isaraelu, e lē o ni “Isaraelu” moni i latou uma.+
7 E lē faapea o le fanau i latou uma ona na tupuga mai iā Aperaamo,+ ae ua tusia: “O lē e taʻua o lau fanau, e ala mai iā Isaako.”+
8 O lona uiga la, o le fanau i le tino, e lē o le fanau moni lea a le Atua,+ a o le fanau o le folafolaga,+ ua taʻua o le fanau.
9 Auā o le upu lenei na folafolaina: “Ou te toe sau i le taimi faapenei i le tausaga a sau, ma e maua ai e Sara se tama tama.”+
10 E lē na o lea, ae faapea foʻi Repeka ina ua tō o ia i se masaga mai i le tagata e toʻatasi, o lo tatou augātamā lea o Isaako;+
11 a o leʻi fananau mai i laʻua, ma a o leʻi faia foʻi e i laʻua se mea lelei po o se mea leaga, ina ia faaalia ai e faalagolago le filifiliga a le Atua e lē i galuega a o Lē ua valaau mai,
12 na fetalai atu iā te ia: “E pologa le ulumatua i le uii.”+
13 E pei ona tusia: “Na ou alofa iā Iakopo, ae na ou ʻinoʻino iā Esau.”+
14 O le ā la sa tatou upu? Po ua fai mea lē tonu ea le Atua? E mautinoa e leai!+
15 Auā ua fetalai atu o ia iā Mose: “Ou te alofa mutimutivale i lē ua ou alofa mutimutivale i ai, ma ou te tigā alofa i lē ua ou tigā alofa i ai.”+
16 O lea, e lē faalagolago i le manaʻo o le tagata po o ana taumafaiga,* ae e faalagolago i le Atua o lē e alofa mutimutivale.+
17 Auā ua faapea mai tusitusiga paia iā Farao: “O le mea tonu lea ua ou lē faaumatiaina ai oe, ina ia faaalia ai loʻu mana e ala iā te oe, ma faailoa atu ai loʻu igoa i le lalolagi uma.”+
18 O lea, ua ia alofa mutimutivale i lē ua ia finagalo i ai, ae ua ia tuu ai pea o lē e lotomaaa e faamaaa pea lona loto.+
19 Ona e faapea mai lea iā te aʻu: “Aiseā e vaavaai masei mai ai pea o ia? Auā o ai sē e tetee atu i lona finagalo?”
20 Le tagata e, o ai ea oe ua e finau atu ai i le Atua?+ Pe e faapea atu ea le mea ua faia i lē na faia o ia, “Aiseā ua e faia ai aʻu faapea?”+
21 Pe e te lē iloa ea, e pule le fai ipu omea i le omea,+ ina ia fai mai i le paluga lava e tasi le ipu e faaaogā mo mea ta‘uleleia, a o le isi ipu mo mea faatauvaa?
22 Ae e faapefea pe afai ua faapalepale ma matuā onosaʻi le Atua i ipu o le toʻasā ua tatau i ai le faaumatiaga, e ui ua finagalo o ia e faaalia mai lona toʻasā ma faalauiloa ai lona mana?
23 Ae e faapefea pe afai ua ia faia lenei mea ina ia faalauiloa ai le tele o lona mamalu i ipu o le alofa mutimutivale,+ na ia muaʻi saunia mo le mamalu,
24 o i tatou ia, o ē ua ia valaauina, e lē na o tagata Iutaia, ae atoa foʻi ma nuu ese?+
25 E pei ona ia fetalai ai i le tusi o Hosea: “Ou te taʻua o ‘loʻu nuu’+ o ē e lē o soʻu nuu ma ou te taʻua ua ‘alofaina’+ le fafine ua lē alofagia;
26 ma i le nofoaga na faapea atu ai iā i latou, ‘E lē o soʻu nuu outou,’ e taʻua ai i latou o ‘atalii o le Atua soifua.’”+
27 Na alaga foʻi Isaia e faatatau iā Isaraelu e faapea: “E ui lava e pei o le oneone o le sami le toʻatele o le fanauga a Isaraelu, ae e faaolaina na o ē ua totoe.+
28 Auā e faia e Ieova* le faamasinoga i le lalolagi, ma faaiʻuina, ma faapuupuuina foʻi.”*+
29 E pei foʻi ona valoia e Isaia: “Pe ana lē faatotoeina e Ieova* o ʻau se fanau mo i tatou, semanū e pei i tatou o Sotoma, ma semanū foʻi e pei i tatou o Komoro.”+
30 O le ā la sa tatou upu? E ui ina lē saʻilia e tagata o nuu ese le amiotonu, ae ua latou maua le amiotonu,+ o le amiotonu lea e maua mai i le faatuatua;+
31 a o Isaraelu, e ui lava ina latou saʻilia le tulafono o le amiotonu, ae e latou te leʻi maua lenā tulafono.
32 Aiseā? Auā ua latou saʻilia e ala i galuega, ae e lē o le faatuatua. Ua latou tausuai ona o le “maa e tausuai ai”;+
33 e pei ona tusia: “Faauta! Ua ou tuuina i Siona se maa+ e tausuai ai ma le papa e tautevateva ai, ae o lē e faatuatua i ai, e lē faanoanoa o ia.”+
Faamatalaga Pito i Lalo
^ Ele., “e lē faalagolago i le tagata e manaʻo po o lē e tamoʻe.”
^ Po o le “vave ona faaooina mai.”
