TALA A TAGATA

Ua manatu nisi, e mafai ona faaaogā meaola i so o se auala e mananaʻo ai tagata. Ae o isi e manatu e tatau ona tutusa le auala e tausi ai meaola ma tagata.

• E iai se tagata e manatu e iai i meaola le aiā e tausia lelei ai, na finau mai e tatau ona maua e meaola le “aiā e lē faia ai e tau o ni mea e faaaogā mo meaʻai ma isi mea, pe faatau ina ia maua ai ni tupe.” Na ia toe faapea mai: “E lē tatau ona faia meaola e pei o a tatou meatotino.”

• O se tasi o mea mataʻina na tupu, na uili e se pilionea e igoa iā Leona Helmsley le $12-miliona i lana taʻifau, ma na manaʻo ia tanu lana taʻifau i autafa o ia pe a mate.

Seʻi manatu: O le ā le auala e tatau ona tausia ai meaola?

LE MANATU O LE TUSI PAIA

O Ieova le Atua o Lē na foafoaina le ola, na ia poloaʻia tagata “ia pule i iʻa o le sami ma manufelelei o le lagi ma meaola uma e fetolofi i le laueleele.” (Kenese 1:28) E talafeagai la ona faapea atu, i le silafaga a le Atua, e sili atu tagata i meaola.

E faamaonia le moni o lenei manatu, auā a o leʻi tusia le mau o loo i luga, ua faapea mai le Kenese 1:27: “Ona faia lea e le Atua o le tagata i lona faatusa, ua ia faia o ia i le faatusa o le Atua; ua ia faia i laʻua o le tane ma le fafine.”

Talu ai na foafoaina tagata i le “faatusa o le Atua,” o lea e tū ese ai i tatou i le auala e faaalia ai uiga o le Atua e pei o le atamai, faamasinotonu, ma le alofa. E iai foʻi i tagata le tomai e iloa ai amioga tatau ma mea faaleagaga. E lē iai i meaola na tomai ona e leʻi faia i le “faatusa o le Atua.” E faatauvaa meaola, ma e leʻi fuafuaina ia tutusa le auala e tausia ai ma le auala e tausia ai tagata.

Po o lona uiga la ua iai i tagata le aiā e soonafai ai meaola? E leai.

• I le Tulafono a le Atua na tuu atu i tagata Isaraelu, na fetalai o ia ia mautinoa e mālōlō meaola, ia fafaga, fesoasoani i ai, ma puipuia mai i lamatiaga.​—Esoto 23:4, 5; Teuteronome 22:10; 25:4.

“E ono aso e fai ai au galuega; ae o le aso lona fitu e te lē galue ai, ina ia mālōlō ai lau povi poʻa ma lau asini.”​—Esoto 23:12.

TALA A TAGATA

O nisi tagata tulimanu ma faifaiva, e latou te tapē meaola mo taaloga, ma e fiafia e fai faatauvaga le tuli ma le tapē o meaola. E ioe nisi i le faamatalaga a le tusitala Rusia o Leo Tolstoy e faapea, “e matuā lē talafeagai” le tapē ma le ʻaina o meaola.

LE MANATU O LE TUSI PAIA

E faataga e le Atua ona tapē meaola ina ia fai ai lavalava, ma pe afai ua lamatia ai ola. (Esoto 21:28; Mareko 1:6) O loo taʻua foʻi i le Tusi Paia e mafai ona tapē meaola mo meaʻai. Ua taʻua i le Kenese 9:3: “Ia fai ma a outou meaʻai ia manu uma e feoaʻi.” E oo foʻi iā Iesu sa fesoasoani i ona soo i le fagotaina o iʻa mo la latou taumafataga.​—Ioane 21:4-13.

E ui i lea, ua taʻua i le Salamo 11:5, ʻe inosia lava e le Atua le tagata e fiafia i le faasauā.’ O lea, ua talafeagai ona faapea atu, e lē finagalo le Atua e tatou te faasauā i meaola, pe tapē ona o ni taaloga po o ni mea e fiafia ai.

Ua faaalia i le Tusi Paia e matuā faatāua e le Atua ola o meaola.

• I le taimi o le foafoaga, ua taʻua i le Kenese 1:25: “Ona faia lea e le Atua o manu ʻaivao o le laueleele e taʻitasi e tusa ma lona ituaiga, o manu lalata e taʻitasi e tusa ma lona ituaiga, ma meaola uma e fetolofi i le laueleele e taʻitasi e tusa ma lona ituaiga. Ua silasila atu i ai le Atua, ua lelei.”

• Ua taʻua i le Salamo 147:9 e faatatau iā Ieova: “E avatu e ia meaʻai i manufeʻai.” Na foafoaina e le Atua se siʻosiʻomaga e lava lelei meaʻai ma iai ni nofoaga e malu ai meaola.

• Na tatalo le tupu o Tavita: “Ieova e, ua e faaolaina le tagata atoa ma manu.” (Salamo 36:6) O se faaaʻoaʻoga, a o leʻi faaumatia e Ieova tagata amioleaga i le taimi o le Lolo tele, sa ia faasaoina tagata e toʻavalu ma ituaiga uma o meaola.​—Kenese 6:19.

O lea, e tāua iā Ieova meaola uma na ia foafoaina, ma e na te faatalitalia i tatou ia tausia meaola i se auala paleni.

“E tausia faapelepele e le tagata amiotonu le ola o lana manu lata.”​—Faataoto 12:10.