Alu i mataupu o loo iai

Alu i le lisi o mataupu

 FESOASOANI MO LE AIGA | FANAU TALAVOU

Auala e Feagai ai ma Lagona Tuua Toʻatasi

Auala e Feagai ai ma Lagona Tuua Toʻatasi

LE LUʻI

“Sa iai aʻu uō teine e toʻalua e faifaimea faatasi lava ae ou te lē iai. Ou te faalogo i le tele o taimi e fiafia pe a la faatasitasi. I se tasi aso sa ou vili atu i le fale o le isi, ae ou faalogo atu o loo iai foʻi i inā ma le isi. Ina ua tali mai e se tasi le telefoni, na ou lagona atu i tua lo la talanoa ma taliē fiafia. E pau le mea na ou lagona atu o lo la fiafia, ma na atili ai ona ou lagona le tuua toʻatasi!”​—Maria. *

Pe na iai se taimi na e lagona ai le tuua toʻatasi ma e lē o faaaofia oe i faatasitasiga ma isi? Pe afai ioe, e mafai ona fesoasoani iā te oe fautuaga o loo i le Tusi Paia. Peitaʻi, seʻi iloilo muamua ni mea e tatau ona e iloa e faatatau i le tuua toʻatasi.

MEA E TATAU ONA E ILOA

E toetoe o tagata uma lava e iai taimi e lagona ai le tuua toʻatasi. E aofia ai foʻi ē e foliga mai e lauiloa. Aiseā? Talu ai e masani ona iloa po o lagona e se tasi le tuua toʻatasi e ala i le ituaiga o faauōga, ae e lē i le aofaʻi o uō. E mafai ona toʻatele ni tagata e faatasitasi ma se tasi e foliga mai e lauiloa, peitaʻi e leai ni ana uō moni ma o loo ia lagona le tuua toʻatasi.

O lagona tuua toʻatasi e mafai ona afāina ai lou soifua mālōlōina. Ua taʻua e tagata suʻesuʻe na iloiloina iʻuga o suʻesuʻega e 148 na faia, e faapea o le itiiti o taimi e faifaimea faatasi ai ma isi, e mafai ona iʻu ai i le vave feoti a o leʻi taitai. O se lamatiaga lenā tulaga, auā ua ʻsili atu lona leaga i lo o le tino puta,’ ma e ʻtutusa ona aafiaga ma le ulaina o sikareti e 15 i le aso.’

O lagona tuua toʻatasi e mafai ona taaʻina gofie ai oe. E faapogaia ai oe e faauō atu i so o se tasi e na te talia oe e avea ma ana uō. Ua faapea mai le talavou o Alan: “Pe a e lagona le tuua toʻatasi, e te ono matuā naunau ia uaʻi mai tagata iā te oe. Atonu o le a amata ona e mafaufau e sili atu le uaʻi mai o so o se tasi, nai lo o le leai o se tasi e uaʻi mai, ma e iʻu ai i ni faafitauli.”

E lē o taimi uma e foʻia ai le lagona tuua toʻatasi e ala i le faaaogā o masini faaonapōnei. Ua faapea mai le talavou o Natalie: “E mafai ona ou text pe imeli i ni tagata se toʻaselau i le aso, ae ou te lagona pea le tuua toʻatasi.” Ua faapea mai foʻi le talavou o Tyler: “O le text ua pei o se meaʻai māmā, ae o le talanoa faafesagaʻi, ua pei o se taumafataga  mamafa. E moni e manaia meaʻai māmā, ae e te manaʻomia lava se taumafataga mamafa ina ia e lagona ai le faamalieina.”

MEA E MAFAI ONA E FAIA

Ia saʻo lau vaai. O se faaaʻoaʻoga, seʻi faapea ua e matamata i se Upega tafaʻilagi e fefaasoaaʻi ai ata, ma e vaai ai i ata o au uō sa iai i se faatasitasiga ae e leʻi valaaulia ai oe. I lenā taimi, ua e mafaufau pe e tatau ona e manatu e leʻi mananaʻo e valaaulia oe, pe ia saʻo pea lau vaai. Talu ai e te lē o malamalama i le mea atoa na tupu, e lē tatau la ona iā te oe ni masalosaloga lē lelei. Nai lo o lea, ia taulaʻi atu i se māfuaaga lelei atonu na lē valaaulia ai oe. E masani lava, e māfua ona e lagona le tuua toʻatasi ona o le auala e te vaai ai i mea, ae e lē ona o le mea na tupu.​—Mataupu silisili o le Tusi Paia: Faataoto 15:15.

ʻAlofia mafaufauga sesē. Pe a e lagona le tuua toʻatasi, e te ono mafaufau, ʻE lē taitai ona valaaulia aʻu i se mea’ pe ʻE ʻalofia lava aʻu e tagata i taimi uma.’ Ae o na mafaufauga sesē, e atili ai ona e lagona le tuua toʻatasi. O le a e manatu ai ua pei oe o se tagata ese, e iʻu ai ina e faaesea oe lava, ma e lagona ai le tuua toʻatasi.​—Mataupu silisili o le Tusi Paia: Faataoto 18:1.

Ia faauō i ē e matutua atu iā te oe. O loo faamatala i le Tusi Paia le olaga o Tavita, o lē sa talavou ina ua feiloaʻi ma Ionatana, o se tane e 30 tausaga e matua ai nai lo o Tavita. Sa avea i laʻua ma uō vavalalata e ui i le eseese o lo la matutua. (1 Samuelu 18:1) E mafai foʻi ona tupu lenei mea iā te oe. Ua faapea mai Kiara, o lē e 21 ona tausaga: “Talu ai nei, na ou iloa ai le tāua o le iai o ni uō e matutua atu nai lo o aʻu. O nisi o aʻu uō mamae e faitau sefulu tausaga e matutua ai nai lo o aʻu, ma ou te matuā talisapaia lo latou tutumau ma la latou vaaiga taʻumatuaina e faatatau i mea.”​—Mataupu silisili o le Tusi Paia: Iopu 12:12.

Ia talisapaia aogā o taimi e na o oe ai. O nisi tagata e lagona le tuua toʻatasi pe a na o i latou. Peitaʻi, e lē tatau ona e lagona le tuua toʻatasi pe a na o oe. O se faaaʻoaʻoga, sa faatasitasi Iesu ma isi tagata, ae sa ia talisapaia foʻi le tāua o taimi e na o ia ai. (Mataio 14:23; Mareko 1:35) E mafai foʻi ona e faia faapea. Nai lo o le vaai i taimi e na o oe ai e faapea e leai se tāua, ia faaaogā na taimi toʻafilemu e manatunatu ai ma le lotofaafetai i faamanuiaga ua e maua. O le faia faapea e avea ai oe ma uō e fiafia i ai isi.​—Faataoto 13:20.

^ pala. 4 Ua suia nisi igoa i lenei mataupu.