Alu i mataupu o loo iai

Alu i le lisi o mataupu

Pe E te Faaaogā Tatau Masini Faaonapōnei?

Pe E te Faaaogā Tatau Masini Faaonapōnei?

E matuā naunau lava Jenni i taaloga vitiō. Sa ia faapea mai: “E valu itula o le aso ou te taalo ai i na taaloga, ma ua avea ma faafitauli.”

Na taumafai Dennis e na te lē faaaogāina masini faaonapōnei ma le Initaneti mo aso e fitu. Peitaʻi, e na o le 40 itula na mafai ai ona ia faia faapea.

O Jenni ma Dennis e lē o ni talavou. O Jenni o se tinā e 40 tausaga ma e toʻafā lana fanau, a o Dennis e 49 ona tausaga.

PE E te faaaogāina masini faaonapōnei? * Ua faapea mai nisi ioe, ona o ni māfuaaga lelei. E aogā tele masini faaonapōnei i galuega, le olaga i aso faisoo, ma faafiafiaga.

Peitaʻi, i le pei o Jenni ma Dennis, e toʻatele tagata ua alu uma le taimi i le faaaogāina o masini faaonapōnei. O se faataʻitaʻiga, ua faapea mai Nicole e 20 tausaga: “Ou te lē mā e taʻu atu, ae o laʻu uō lelei lava laʻu telefoni feaveaʻi. Ou te faamautinoa ou te alu ma ave i taimi uma. E pei ou te valea pe a ou iai i se vaipanoa ae e lē mafai ona faaaogā ai, ma e uma ane le ʻafa itula, ua lē mafai ona tatali le fia siaki o aʻu feʻau tusitusia. Ioe, o le mea moni lenā!”

O nisi tagata e alu le pō atoa o siaki a latou feʻau tusitusia ma imeli. E ono mataʻutia aafiaga pe a leai ni a latou masini faaonapōnei. Ua taʻua e nisi tagata suʻesuʻe lenā tulaga o se masaniga leaga, e tusa pe  faasino atu i le faaaogāina o so o se masini faaonapōnei, pe patino atu i le Initaneti po o se telefoni feaveaʻi e pei o le smartphone. E mumusu isi e faaaogā le taʻu “masaniga leaga,” ae faapea e taʻu lenā tulaga o se faafitauli, o le lē pulea, po o le lē mafai ona tuu.

Po o le ā lava le taʻu, ae o le faaaogā sesē o masini faaonapōnei e mafai ona avea ma faafitauli. I nisi taimi, ua avea ma pā puipui i sui o le aiga. O se faaaʻoaʻoga, na faamatala mai ma le faanoanoa e se tamaʻitaʻi e 20 tausaga: “E lē o toe iloa e loʻu tamā se mea e faatatau i loʻu olaga. E nofonofo i le potu mālōlō ma fai ana imeli ma talanoa mai. E lē mafai ona tuu ese lana telefoni. Atonu e alofa loʻu tamā iā te aʻu, a o nisi taimi e pei e lē o ano mai.”

Fesoasoani e Pulea ai le Faaaogāina o Masini Faaonapōnei

Ina ia foʻia le faafitauli o le faaaogā sesē o masini faaonapōnei, ua iai i Saina, Korea i Saute, Peretania ma le Iunaite Setete, ni nofoaga e fesoasoani e pulea ai le faaaogāina o masini faaonapōnei. O nei nofoaga e faasā ai ona faaaogā e se tasi masini faaonapōnei ma le Initaneti mo ni nai aso. O se faataʻitaʻiga, sa taalo Brett i se taaloga i le Initaneti i le pe ā ma le 16 itula i le aso. Na ia faapea mai: “So o se taimi ou te faaaogā ai le Initaneti, e pei lava ua ou aafia i ni fualaau faasāina.” E oo ane i le taimi ua auai ai Brett i se tasi o na nofoaga mo se fesoasoani, ua leai sana galuega, lē toe tumamā, ma ua lē toe iai ni ana uō. E faapefea ona e ʻalofia ni faanoanoaga faapena?

ILOILO LOU FAAAOGĀINA O MASINI FAAONAPŌNEI. Ia iloilo aafiaga o masini faaonapōnei i lou olaga. Ia fesili ifo iā te oe i fesili nei:

  • Po o vave ona ou atuatuvale pe maitaita, pe a lē mafai ona ou faaaogā le Initaneti po o aʻu masini faaonapōnei?

  • Po o faaauau ona ou faaaogāina le Initaneti po o se masini faaonapōnei, a ua māeʻa le taimi na ou faatulaga e faaaogā ai?

  • Po ua lē lava laʻu moe ona o le siaki soo o aʻu feʻau tusitusia ma imeli?

  • Po ua ou lē amanaʻia loʻu aiga ona o le faaaogāina o masini faaonapōnei? Pe e ioe loʻu aiga i laʻu tali?

Pe afai ua avea le faaaogāina o masini faaonapōnei ma itu ua e lē amanaʻia ai “mea e sili ona tāua,” e pei o lou aiga ma isi tiute tauave, o le taimi la lenei e fai ai ni suiga. (Filipi 1:10) E faapefea?

FAATAPULAA LE TAIMI E FAAAOGĀ AI. E iai aafiaga lē lelei pe a soona faaaogā se mea. E tusa lava la pe e te faaaogā masini faaonapōnei mo le galuega po o faafiafiaga, a ia faatapulaa le umi e faaaogā ai, ma ia tausisi i lenā umi.

Auala e Fai Ai: Aiseā e lē tāpā ai le fesoasoani a se tasi o lou aiga po o sau uō? Ua taʻua i le Failauga 4:9, 10: “E sili ona lelei o le toʻalua nai lo o le toʻatasi, . . . auā afai e paʻū le tasi, e toe faatūina o ia e lē la te toʻalua.”

Aua neʻi avea nei faatosinaga ma itu e te atiaʻe ai ni “masaniga leaga”

Ua faafaigofie atili e masini fou faaonapōnei le lafoina atu ma le mauaina o faamatalaga, ae e mautinoa foʻi o le a faatupulaʻia pea le faaaogāina sesē o nei masini. Aua neʻi avea nei faatosinaga ma itu e te atiaʻe ai ni “masaniga leaga.” O le a tatou ʻalofia nei tulaga pe afai e “faaaogā tatau” lo tatou “taimi.”​—Efeso 5:16.

^ pala. 5 O le upu “masini faaonapōnei” i lenei mataupu, e faasino atu i masini ia e mafai ona lafo ma maua ai imeli, feʻau valaau, feʻau tusitusia, vitiō, musika, taaloga ma ata.