Qullaawu Maxaafi teeda baˈino misilla daafira, sayberseksete woy wole togoo coyibba daafira xaaddote dikulanno. Ikkollana, adhaminokki manni siimu xaadooshshe assanno gede woy mannu siimu xaadooshshe afimalsanno gede kakkayisanno assoote Maganu ma garinni laˈˈannoro Qullaawu Maxaafi xawise kulanno. Hanni mite Qullaawu Maxaafi qummeeshshuwa laˈno:

•   “Uullate aana noota tenne gobba yorto duucha shiiyye. Hakkurino foorrete, battaawate, maalu [yortooti], busha halchooti.” (Qolasiyaasi Sokka 3:5) Teeda baˈino misilla laˈˈa busha yorto shaantenni, roore lexxitanno gede assitanno. Laˈˈanno manchino Maganu albaanni battaawinoha woy xurinoha ikkanno gede assitanno.

•   “Meyata lae yorinoha baala wodanisinni ise ledo foorinohu gede assine kiirranni.” (Maatewoosi 5:28) Amanyoote bainoha siimu xaadooshshe leellishshanno misilla, wodanu giddo busha yorto kalaqantanno gede assitanno; busha yorto qolte bushare assate widira massitanno.

•   “Foorre woy saalimale ikkito woy busha yortoha ikka agurina, mereeroˈne togoohu duduwu nafa horonta heeˈroonke.” (Efesooni Sokka 5:3) Amanyoote bainore leellishshanno misilla laˈneemmota woy togoo borro nabbambeemmota agurina, haariimote yine togoore coyiˈra nafa dihasiissannonke.

•   “Maalu loosi egennammoho; hakkuno: Foorrete, battete, . . . woluno kore lawannoho. Balaxe kulummoˈnente gede xaano lede yeemmoˈnena, hattoo coye assitannori Maganu gashshoote diragidhanno.” (Galatiyu Sokka 5:19-21) Teeda baˈino misilla laˈannori woy saybersekse, foonisekse, woy sekistinge horoonsidhannori Maganu albaanni battaabbinoreeti. Togoo rosichi noosi manchira Maganu ledo noosi jaaloomi woˈmunni woˈma baˈˈasira dandaanno.