Masaalo 2. Hude

“Hudeno ubbanno.”—MAARQOOSI 13:8.

● Nijeri gobbara, mittu manchi hude xooqanni Quarataji yinanni qacha marino. Fiixisinna roduuwisino wolu qooxeessinni sagale hasiˈranni hakkiira dayino. Ikkollana, kuni manchi uulla dado kadhe callisi goxino. Isi baxxe callisi noohu mayiraati? Hakkuyi qachi murrichi Sidii togo yiino: “Kuni manchi [maatesira] sagale abbaawi hoogino daafira insa laˈˈa saalino.”

TAJE MAA LEELLISHSHANNO? Alamete deerrinni, 7 manchi giddo 1 barru baala gari sagale diafiˈranno. Afirikaho Sahaara barahira woroonni noo gobbuwara isinni, 3 manchi giddo 1 lowo barra gari sagale diafiˈranno. Hatto yaa mayyaatero roore huwatate, hanni annu, amanna mittu qaaqqi noo maate hedi. Lameho calla ikkitanno sagale noonsaha ikkiro, insa giddo itikki galannohu ayeti? Annaho? Amatenso qaaqqoho? Togoo maate ayi iteenna ayi gatannoro barru baala doodha hasiissannonsa.

DUUCHU MANNI KAYINNI MAYYAANNO? Baatto baalunku mannira ikkite gattanno sagale laashshitanni no. Baattote jiro garunnilla horoonsiˈra hasiissanno.

HATTO YAANSA GARAHO? Baatto loosiˈre galanno manni, albinni roore lowo sagale loose fushshanna bayichunni bayicho iillisha dandiinoti egennantinote. Woleteemmero mangistubba hude hoolate baatto fushshitanno sagale garunni amadanna taashshe iillisha hasiissannonsa. Ikkollana, lowo diro hatto assate woˈnaaltinoha ikkirono didandiitino.

TENNERA ATI MAYYAATTO? Maarqoosi 13:8 noo masaalo woˈmitanni nooha lawannohe? Tekinooloje baasa lophitinoha ikkirono, sagalete gatto manna alamete deerrinni gawajjitanni nooha dilawannohe?

Duucha woyite baattote huxanonna hudete gedensaanni, wolu buutote qarri kalaqamanno; hakku qarrino goofimarchu barra heeˈnoommota leellishanno malaati widooti.

[Murre Haaˈnoonni Hedo]

“Shombu dhibbinni, godowa gobbara qolanno dhibbinninna wolu togoo dhiwaninni reyanno qaaqquulli giddo sasunni mitte anga saˈˈanno qaaqquulli taaltino sagale afiˈroommero gatara dandaannoho.”

—ANI M. VENIMAANI, BUUSANTINO MANGISTUBBATE QAAQQUULLE KAAˈLITANNO DIRIJJITEHA ALBIHA QARA SOOREESSA.

[Buicho]

© Paul Lowe/Panos Pictures