Tito Sokka 2:1-15
2 Ati kayinni woꞌmanka woyite halaalaanchu* rosi ledo sumuu yaannore coyiꞌri.
2 Geerru labballi deerra saꞌannokkire, miqichaamma,* fayyo hedo noonsare, hattono ammanatenni, baxillunninna cincatenni fayyuulle ikkitona.
3 Geerru meentino qullaawootaho malino amanyooti noonsare, suꞌma hunannokkire, woyinete quwa saꞌꞌannokkirenna danchare rosiisannore ikkona;
4 hatto ikkiro aja meento amaale,* minaannuwansa baxannore, oosonsa baxannore,
5 fayyo hedo noonsare, xalaloota, mini giddo loosannore,* danchuullenna minaannuwinsara maahoyye yee galannore ikkanno gede kaaꞌla dandaanno; tini qolte Maganu qaali xonamannokki gede assitanno.
6 Wedellu labballino, fayyo hedo noonsare ikkitanno gede amaali;
7 dancha looso loosatenni baalunku coyinni lawishsha ikki. Xalala coye haja assite rosiisi.*
8 Gibbannonkeri ninke daafira haadhe coyidhannoha busha coye hoogge saaltanno gede, minshanniri nookki garinni danchare* coyidhe rosiisi.
9 Borojjootu baalunku coyinni mootoollansara maahoyye yite galtona; qoleno insa hagiirsiisate sharrantona; mootoollansara tumo qoltoonke,
10 hattono insare moortoonke; hatteentenni Gatisaanchinke Maganu roso woꞌmante doogonni gaamaarsa dandiitanno gede, woꞌmunni woꞌma ammaꞌninannire ikkitona.
11 Maganu elto xabbe leeltino; tini elto, duuchunku gari manni gato afiꞌranno gede assitanno.
12 Qoleno, Maganiweelo heeshshonna alamete yorto agurre, tenne alame aana* fayyo hedonni, keeraanchimmatenninna Maganoho galatenni heeꞌneemmo gede qajeelsitannonke.
13 Konni garinni, hagiirsiissanno hexxo hattono bayiru Maganinna Gatisaanchinke Yesuusi Kiristoosi ayirrinyunni xabbanno yanna agadhineemmo.
14 Kiristoosi seeriweelu coyi baalunkuwiinni keere fushshankeranna* danchu loosira laalaatannoha baxxino jajjasi ikkino manna isiniitira keereensiꞌrara heeshshosi ninkera sayise uyino.
15 Konne coye woꞌma silxaanenni rosiisa, seekkite amaalanna* seejja agurtooti. Mittu manchino horo mishoonkehe.
Lekkaalliidi Qaagiishshuwa
^ Woy “fayyu; kaaꞌlanno.”
^ Woy “ammaꞌninannire; ayirradda.”
^ Woy “raga higanno gede kaaꞌle; qajeelse.”
^ Woy “minensa towaaxxannore.”
^ “Xalalletenni rosiisi” yaano ikkitara dandiitanno.
^ Woy “fayyo coye; kaaꞌlanno coye.”
^ Woy “konni dirira.” Qaallate Tiro lai.
^ Woy “wodankeranna; wolassankeranna.”
^ Woy “jawaachishanna.”
