Naahoomi 2:1-13
2 Billaallisannohehu* dayno.
Qiisho seekkite agadhi.
Doogono seekkite layiꞌri.
Hallokki qodhi; noohe wolqa baala kaajjishiꞌri.
2 Yihowa Yaaqoobi ayirrinye, Israeelete ayirrinyi ledo qolannona;Korkaatuno diinu insa huninonsa;Ciironsano uullate ganino.
3 Bareedu mannisi wonqora duume qalame gannoonni;Olantosi duume xiillitte uddano uddidhino.
Olu saragallisi* siwiilla, giirate gede wala yitanno.Olaho qixxaawanno barra,Hoonchu urdesi falaqqi falaqqi yitanno.
4 Olu saragalli dooggate aana akkimale hadaraasanno.
Gudumaaleho kawa kaꞌa dodamanno.
Kiffalu gede xawanno; banqote gede bilicci yaanno.
5 Isi gashshaanosi woshshanno.
Insano alba higge tintanno woyte gufidhanno.
Huxxisewa higge buubbanni martanno;Qoleno roqqo wortanno.
6 Laggate waalchuwa faꞌnantanno;Mootete minino daaqanno.*
7 Togo yine yoo yinoonni:* Ise mullicho ikkitino;Qafadante hadhino; meya borojjootiseno uranno;Insa dadillunni gagaso* gaꞌnanni lembooli gede yuusanno.
8 Nennewe hundinni kayisse way bue gedeeti;Xa kayinni insa xooqanni no.
Mitootu “Uurri! Uurri!” yitanno.
Kayinni caaqqi yiinohu mittuno dino.
9 Birra mulqidhe! Culkano mulqidhe!
Jiro gurre digundoonnite.
Ayirradu uduunni baalu duunamino.
10 Katamu mullichonna ona ikkino, coꞌo yee baino!
Wodaninsa waajje daaqino, gulubbansa leqe yitino, hallinsa qece yiino;Baalunku albi kiffala taino.
11 Doobbiyu ooso sagale ittannohu,Doobbiichu oososi mitturino waajjishannonsari nookkiha adhe fulannohuDoobbiyu godi mama no?
12 Doobbiichu oososira ugaaxe lowo sagale abbino;Meya doobbiyrano qalxe shiinore abbino.
Balesira ugaaxe shiinori,Godisirano billa biinxa fushshino saada woꞌmitino.
13 “Kuneeti! Ani ate aana kaoommo” yaanno olantote Mootichi Yihowa;“Olu saragallase giire wiliishsheemmo;Aja doobbiyokkino bise ittannonsa.*
Layinkita baattote aaninni ugaaxattakki gede asseemmohe;Sokkaanokki huurono layinkita dimacciishshinanni.”
