Abidiyu 1:1-21
1 Abidiyu* ajuuja:
Woꞌmunkura Aliidi Mootichi Yihowa Edoomi daafira togo yaanno:
“Yihowawiinni dagginota mitte sokka macciishshinoommo;Maganu dagate mereero sokkaancho soyno:
‘Kaꞌe, iso qasate qixxaambona.’”
2 “Kuneeti! Dagate mereero tidhoottokkiha assoommohe;Mishamoottoha ikkootto.
3 Ati jawa kincho gaaꞌlite heeꞌrattohu,Qaekkino gotti yiino baycho assiꞌroottohu,Wodanikkinni, ‘Uullara aye worbi dirrisannoe?’ yaatto;Booꞌnaleessu wodanikkino doginohe.
4 Allamurchu gede iima heeꞌrattoha* ikkiro nafa,Woy mine beeddahete mereero miꞌnittoro nafa,Hakkiinni dirriseemmohe” yaanno Yihowa.
5 “Mooraano atewa dagguro, mulqiꞌraanono hashsha eꞌuro,(Coꞌo yite baꞌꞌatto!)*
Insa dihasidhu geeshshirella moortanno?
Woy woynete laalo gamba assitannori atewa dagguro,Boode xaro digatissanno?
6 Eesawu baasa qonqolchinoonni!
Maaxantino jirosino hanse anfoonni!
7 Insa qaccera fushshitinohe.
Halekki baalano* dogginohe.
Ate ledo keere heeꞌranno mannino wolqisinohe.
Sagale* ledokki ittannori woroonni woshshaado wortannohe;Ati kayinni tenne diwodanchatto.”
8 Yihowa togo yaanno: “Hakko barra,Edoomi heedhanno hayyoole baala dihuneemmo?Ilaalaame Eesawu gobbannino wodancha haaꞌre dihooleemmo?
9 Teemaani, bagadaanokki waajjite qece yitanno;Korkaatuno mittu mittunku ilaalaame Eesawu gobbara gorrantanno.
10 Rodookki Yaaqoobi farritto assiꞌrootto daafira,Saala duqqatto;Hegererano baꞌꞌatto.
11 Qaccete fulte uurritto barra,Wole gobba manni olantosi qafade adhe haꞌri barra,Manni gobba manni waalchu widoonni eꞌꞌe Yerusaalamete jajjira hixa tuqqi woyte,Atino insa gede ikkootto.
12 Rodiikkira ragu tunsisi barra mayra findiriiqitto?Yihudu manni bai yannara mayra hagiidhitto?Qarrinsa yannarano fenjeejjite mayra coyiꞌritto?
13 Manniꞌyara bao daggu woyte, waalchinsawa mayra dayitto?Baosi barra dano iillitusita mayra findiriiqitto?Bao iillitusi barra jirosi mayra saamitto?
14 Xooqe fulino mannasi gorrattora lakkitte doogora mayra uurritto?Qarru barra gate fulino mannasino mayra sayisse uyitto?
15 Yihowa daga baalate aana kaꞌꞌanno barri iillino.
Assoottore assine qollannihe;
Woleho assoottorino atenkura higannohe.
16 Kiꞌne qullaawu ilaaliꞌya aana aggininte gede,Daga baalano foole qoꞌlitukkinni agganno.
Insa agganno; koshshi assitanno.Horo qaangannikki gede ikkiteno baꞌanno.
17 Gatte fultinori kayinni Tsiyooni Ilaalira heedhanno;Isino qullaawa ikkanno;Jajjansano Yaaqoobi mini qoꞌlanno.
18 Yaaqoobi mini giira,Yooseefi minino buwano ikkanno;Eesawu mini kayinni galawu gede ikkanno;Insa qassino giira mucuqqi assite ittannonsa;Eesawu mininni gatannohu mittuno diheeꞌranno;Tenne coyiꞌrinohu Yihowa umosiitina.
19 Insa Negeebi gobbanna ilaalaame Eesawu gobba adhitanno;Shefeelanna Filisxeemootu gobbano ragidhanno.
Efireemi xawonna Samaariyu xawono adhitanno;Biiniyaamino Giliyaadi qoqqowo ragiꞌranno.
20 Saraphitu geeshsha nooti Kanaanootu baatto,Tenne qiishonni qafandoonnihu Israeelete mannita ikkitanno.
Safaraadi heedhannori, Yerusaalametenni qafandoonnirino Negeebi katamma ragidhanno.
21 Mannaꞌya gatissannorino ilaalaame Eesawu gobbara noorira yoo yitaraTsiyooni Ilaala gooddidhanno;Mootummano Yihowata ikkitanno.”
