¿Confesakunankuchu Diosta serviqkuna?

Ñawpa tiempokunapi hinan kunanpas runakuna sacerdoteman huchallikusqankuta confesakunku. Kay tiempopi manañataq huchapaqchu qhawarinku ima mana allin ruwaytapas chayqa, ¿allinchu kanman huchanchiskunata willakuy?

SAPANKA runan huknirayta yuyaykun. Canadá nacionmanta periodicon willan huk runaq yuyaykusqanta, paypaqqa sinchi sasas huchankunata hukman willakuy. Ichaqa kaytan nin: “Sichus pipas yachan imapi pantasqaykita, qanwan mañakun, nisunkitaq ima ruwanaykitapas chayqa, sonqoykin thak nin”, nispa. Bendígame, padre, porque he pecado nisqa libron willan huk runaq rimasqanta, nirqanmi: “Iglesiapi runakunata confesaspaqa mana allintan ruwashanku, chayqa runakunaq yuyaynintan astawan iskayachin”, nispa. ¿Imaninmi Biblia chaymanta?

¿Imaninmi Biblia?

Diosmi Israel runakunaman Kamachikuy Siminta qospa willarqan pipas huchallikuqtin ima ruwananta. Sichus pipas hukpa contranpi huchallikurqan otaq Diospa kamachikuyninta p’akirqan chayqa, confesakunanmi karqan Leví ayllupi sacerdoteman. Paymi chay runarayku sacrificiota Diosman haywanan karqan huchan pampachasqa kananpaq (Levítico 5:1-6).

Unay watakuna qhepamanmi profeta Natán rey Davidta huchallikusqanmanta anyarqan, hinan Davidqa nirqan: “Señor Dios contran huchallikuni”, nispa (2 Samuel 12:13). Chaymantapas Diostan rogakurqan pampachananpaq. ¿Iman karqan mañakusqanmanta? Davidmi qelqarqan: “Huchaytan willakurqayki, manan huchallikusqayta pakaykurqanichu. Nirqanin: Señor Diosmanmi mana kasukusqaykunata willakusaq, nispa. Qanmi huchallikusqaytapas pampachawarqanki, qanmi huchaytapas pichawarqanki”, nispa (Salmo 32:5; 51:1-4).

Ñawpa tiempopi cristianokunapas confesakunankun karqan huchallikusqankuta. Jesuspa wawqen Santiagon Jerusalén llaqtapi iñiq t’aqata umallirqan, paymi cristianokunata nirqan: “Huchaykichiskunata willanakuychis, hukkuna hukkunapaqtaq Diosmanta mañapuychis, qhaliyachisqa kanaykichispaq”, nispa (Santiago 5:16). Chhaynaqa, ¿ima huchakunatan cristianokuna confesakunanku? ¿Pimanmi confesakunanku?

¿Tukuy pantasqanchistachu confesakuna?

Pantaq runa kasqanchisraykun sapa kuti imapipas pantashanchis mayninpiqa mana allinta rimaspan hukkuna contra huchallikunchis (Romanos 3:23). Chhaynaqa, ¿religionpi umalli runamanchu willakuna imapi pantasqanchistapas?

Ima huchapas Diospa contranpi huchallikuymi, ichaqa pantaq runa kasqanchista  yachaspan khuyapayawanchis. Salmistan nirqan: “Señor Diosníy, huchakunatachus yuyashawaq chayqa, ¿pitaq manaqa huchachasqachu kanman? Ichaqa qanmi hucha pampachaykuqqa kanki, qanta manchakunaykupaq”, nispa (Salmo 130:3, 4). Chhaynaqa, ¿imatan ruwananchis mana yuyaypichu pitapas phiñachiqtinchis? Jesusmi qatikuqninkunaman mañakuyta yachachishaspa nirqan: “Huchaykuta pampachawayku, imaynan ñoqaykupas huchallikuwaqniykuta pampachayku hinata”, nispa (Lucas 11:4). Arí, Diosqa pampachawasunmi Jesuspa sutinpi mañakusun chayqa (Juan 14:13, 14).

Jesusmi nirqan ñoqanchis contra ‘huchallikuqkunata’ pampachananchista. Apóstol Pablopas cristianokunatan nirqan: “Sumaq sonqo kaychis, khuyapayanakuq, pampachaykunakuq, imaynan Diospas Cristopi qankunata pampacharqasunkichis ahinata”, nispa (Efesios 4:32). Hukkunaq pantasqanta pampachaqtinchisqa Jehová Diospas pampachawasunmi.

¿Imanisunmanmi suwakuymanta, llullakuymanta, qhelli huchapi puriymanta, machaymantapas? Chaykunata ruwaqqa Diospa contranpin huchallikun. ¿Imatan ruwasunman chhayna huchakunapi urmaspa?

¿Pimanmi confesakunanchis?

Diosllan pay contra huchallikusqanchistaqa pampachawasunman, payqa manan pitapas kamachinchu pampachawananchispaq. Biblian nin: “Huchanchiskunatachus Diosman willakusun chayqa, Diosqa hunt’aqmi chanintaqmi huchanchiskunata pampachawananchispaq, tukuy mana chanin-kayninchistapas ch’uyanchawananchispaq”, nispa (1 Juan 1:9). Ichaqa, ¿pimanmi confesakunanchis?

Diosllan huchanchista pampachawasunman, chaymi payllaman confesakunanchis. Chaytan rey Davidpas ruwarqan. Ichaqa, ¿imatawanmi ruwananchis? Biblian nin: “Huchaykichista saqepuspa Diosman kutirikuychis huchaykichiskuna pichasqa kananpaq, ahinapin Señor Diosqa sumaq kawsaypi samarichisunkichis”, nispa (Hechos 3:19). Arí, manan pantasqallanchistachu reqsikunanchis nitaq confesakunallanchischu aswanpas huchanchista saqespan Diosman kutirikunanchis. Chayta ruwayqa sasapaschá kanqa ichaqa Diosmi yanapawasun. ¿Imaynata?

Yuyarisun cristianokunaman Santiagoq kay qelqasqanta: “Huchaykichiskunata willanakuychis, hukkuna hukkunapaqtaq Diosmanta mañapuychis, qhaliyachisqa kanaykichispaq”. Chaymantataq nirqan: “Chanin runaq tukuy sonqowan Diosmanta mañakusqanqa ancha atiyniyoqmi”, nispa (Santiago 5:16). ‘Chanin runaqa’ 14 versiculopi rimasqan umalliqmi kanman. Diospa llaqtanpiqa kanmi espiritualpi poqosqa umallikuna, paykunan yanapanku Diospa pampachasqan kayta munaq runakunata. Paykunaqa manan pitapas Dios contra huchallikusqankuta pampachayta atinkumanchu, Diosqa manan pitapas chay ruwananpaq kamachirqanchu. * Ichaqa yanapankumanmi hatun huchaman urmaqta Diosman kutirikunanpaq wanachinankupaqpas (Gálatas 6:1).

 ¿Imaraykun confesakuna?

Pipas huchaman urmaspaqa hatunña otaq manaña chaypas, manan Dioswan runamasinwanpas allinpichu tarikun. Yaqapaschá chayrayku llakisqa kanman. Chhaynatan sientekusunman Jehová Dios runakunata concienciayoqta kamawasqanchisrayku (Romanos 2:14, 15). ¿Imatan ruwasunman conciencianchis huchachawaqtinchis?

Santiagon qelqallarqantaq: “¿Pipas qankuna ukhupi onqosqachu kashan? Iglesiapi [otaq iñiq t’aqapi] umalli runakunata waqyachikamuchun, paypaq Diosmanta mañapunankupaq, Señorpa sutinpi aceitewan payta hawiykunankupaqwan. Iñiywan Diosmanta mañakuyqa onqosqatan qhaliyachinqa, hinan Señorqa payta sayarichinqa, huchallikunmanña karqan chaypas pampachasqan kanqa”, nispa (Santiago 5:14, 15).

Chaypiqa rimashan iñiq t’aqapi umallikuna iñiqkunata espiritualpi yanapanankumantan. Paykunaqa manan uyariyllachu uyarinku huchallikuqta aswanmi iñiyninkupi ‘onqosqankumanta qhaliyachinku’. Qhawarisun iskay ruwaykunapi yanapasqankumanta.

Ñawpaqta qhawarisun huchallikuqta ‘aceitewan [...] hawiykunankumanta’, chaytaqa nishan qhaliyachinanpaq Biblia atiyniyoq kasqanmantan. Apóstol Pablon qelqarqan: “Diospa siminqa kawsaqmi, atiyniyoqmi, [...] sonqopi yuyaykusqakunatapas lliwtapunin sut’inchan”, nispa. Arí, Bibliapi yachachikuykunaqa sonqomanmi chayan (Hebreos 4:12). Bibliawan allinta yuyaymanachispan umallikunaqa espiritualpi onqosqa runata reparachinkuman imapi pantasqanta, chayta allichananpaq imakuna ruwanantapas.

Chaymantapas ‘iñiywan [...] mañakuymantan’ rimashan. Jehová Diosqa manan umallikuna mañakusqankuraykuchu imayna juzganantapas cambianqa. Ichaqa Diosmi allinpaq mañakuyta qhawarin, liston kashan Cristoq sacrificionrayku pampachawananchispaqpas (1 Juan 2:2). Diosqa yanapanqan pi huchallikuqtapas ‘allinkunata ruwaspa Diosman kutirikusqanta rikuchiqtinqa’ (Hechos 26:20).

Ichaqa, ¿imaraykun astawanqa confesakunanchis? Piqpa contranpiña huchallikunchis chaypas Dioswan allinpi kanapaqmi confesakunanchis. Jesucristoq nisqan hina, Diosta allin concienciawan servinapaqqa hukkunawan phiñachinakusqanchistan ñawpaqta allichananchis (Mateo 5:23, 24). Proverbios 28:13 texton nin: “Huchankunata pakaykuqqa manan allinyanqachu, huchankunata willakuspa saqepuqmi ichaqa khuyapayasqa kanqa”, nispa. Arí, huch’uyyaykukuywan Jehová Diospa pampachayninta mañakusun chayqa, allinpaqmi qhawariwasun qowasunmi bendicionnintapas (1 Pedro 5:6).

[Uranpi willakuy]

[23 paginapi willakuy]

Jesuspa sutinpi mañakuqtinchisqa Diosmi pampachawasun imapi pantasqanchistapas

[24 paginapi foto]

Dioswan allinpi kananchispaqmi astawanqa huchanchista confesakunanchis