Kay revista leeqkunaq tapukuynin

¿Hayk’aqmantapachan Dios kawsashan?

▪ Bibliaq willasqan hina, manan Jehová Diospa qallariynin kanchu, payqa wiñaymantañan karqan. ¿Sasachu qanpaq chayta entiendey? Sasapaschá, ichaqa allinta entiendenapaq Bibliaq nisqanta t’aqwirisun.

Runakunaqa manan Dios imayna kasqanmanta llapanta entiendeyta atisunmanchu. Mayninpiqa apóstol Pablo hinan sientekunchis, paymi nirqan: “¡May hatunpunin Diospa qhapaq-kayninpas, yachayninpas, yuyayninpas! Yuyaykusqankunapas mana sut’inchay atinapunin, ruwasqankunapas mana entiendey atinapunin”, nispa (Romanos 11:33). Arí, manan Diospa yachayninta llapantachu entiendeyta atisunman, imaynan huk wawa tayta-mamanpa imayna kasqanta, ruwasqanta mana llapantachu entienden hinata. Pabloqa willanmi Diospa yachayninmanta khuyapayakuq kasqanmantapas ichaqa willallantaqmi Diospa wakin ruwasqankuna mana entiendey atina kasqanta. Wiñaypaq kawsasqanpas mana entiendey atinan. Chaywanpas iñisunmanmi Diosmanta Bibliaq willasqanpi, Jesucriston nirqan: “Simiykiqa cheqaq-kaypunin”, nispa (Juan 17:17).

¿Imaninmi Biblia Diospa kawsasqanmanta? Diosmanta mañakushaspan Moisés nirqan: “Manaraq orqokunapas rikhurimushaqtin, manaraq teqsimuyuntinpas kashaqtin, qanmi wiñaymanta wiñaykama Diosqa kanki”, nispa (Salmo 90:2). Chaypiqa iskay tiempomantan rimashan. Hamuq tiempomanta rimaspan willan Jehová Dios “wiñay-wiñaypaq” kawsasqanta (Apocalipsis 4:10). Arí, Diosqa wiñaypaqmi kawsanqa. Chaymantapas ñawpa tiempomantan rimashan. Chaypin yachanchis Diosta mana pipas kamasqanta. Payqa manan kawsayta qallarirqanchu aswanpas “wiñaymanta[n]” kawsashan.

Diospa kawsayninmanta yachayqa sasa entiendenapaqmi kanman. Ichaqa llapallanchismi wakin sasa yachachikuykunata mana entiendenchischu. Yuyaykuy numerokunapi, yupasunmanmi maykamapas ceromanta urayman otaq wichaymanpas. Chay hinallataqmi Diospa kawsayninpas, manan yachasunmanchu hayk’a tiempo kawsasqanta.

Diosllatan nikun: ‘Wiñay-wiñay Rey’, nispa (1 Timoteo 1:17). Jesuspas, hanaq pachapi llapa angelkunapas, runakunapas kamasqan karqanku (Colosenses 1:15, 16). Jehová Diosmi ichaqa mana kamasqachu karqan. Kamasqan karqan nisunman chayqa, ¿pitaq kamarqanri? nispan tapukusunman, chay qhepamantaq imaymana tapukuykuna kallanmantaq. Diosqa “wiñaymanta wiñaykama” kawsaqmi (Salmo 90:2). Arí, Diosqa ‘qaynamantapas [...] wiñay-wiñaypaqmi’ kawsarqan (Judas 25).

Dios wiñaypaq kawsayniyoq kasqanta yachayqa allinninchispaqmi kanman. Mañakushaspa Moisespa nisqanpin yachanchis Jehová Dios wiñay kawsay prometesqanwan hunt’ananta. Kay tiempopipas pisi tiempollaña kawsanchis chaypas, Diosmi ‘watan-watan pakaykuqninchis’. ¿Manachu kusikunki hanaq pachapi Taytanchis ñawpaqpas, kunanpas, qhepamanpas kamachinkunaq ladonpi kasqanwan? (Salmo 90:1.)