1 Juan 2:1-29
2 Wawallaykuna, kay cartataqa qelqamushaykichis ama ima juchamanpas urmanaykichispaqmi. Ichaqa, pipas ima juchamanpas urman chayqa, kashanmi yanapaqninchis, payqa Jesucriston,+ payqa chaninmi,+ janaq pacha Taytawantaqmi kashanpas.
2 Paymi juchanchista perdonachiq+ Dioswan allipunachiq sacrificioqa,+ ichaqa manan juchallanchispaqchu chay sacrificioqa, aswanpas lliu kay pachantin runakunapaqwanmi.+
3 Paypa kamachikuyninkunatachus kasukushallasun chayqa, chay ruwasqanchispin rikukunqa pay reqsisqanchista.
4 Pipas ninman: “Noqaqa reqsinin paytaqa”, nispa, manataq kamachikusqankunata kasukushanmanchu chayqa, llullakushanmanmi, manataqmi cheqaq kaqpas paypiqa kashanmanchu.
5 Ichaqa pipas paypa siminta kasukushanman chayqa, Diosta tukuy sonqowan munakusqantan chay runaqa rikuchishanman.+ Chayta ruwaspan noqanchispas rikuchishasunman paywan jujllachasqa kasqanchista.+
6 Pipas “paywan jujllachasqan kashani” nispa niqqa imaynatachus Jesús kausarqan chhaynatapunin kausanan.+
7 Munasqa wayqe-panaykuna, manan mosoq kamachikuytachu noqaqa qelqamushani, aswanpas qallariymantapacha reqsisqaykichis ñaupa kamachikuytan,+ arí, kay ñaupa kamachikuyqa qallariypi uyarisqaykichis kamachikuymi kashan.
8 Chhaynaña chaypas, mosoqmi chay kamachikuyqa; chay kamachikuyman jinan payqa kausarqan, qankunapas chayman jinan kausashankichis ¿riki? Laqhayaqqa* ñan pasashanña, cheqaq k’anchayñan kunanqa k’ancharimushan.+
9 Chayrayku, pipas “k’anchaypin kashani” nishaspa wayqenta cheqnikushanman chayqa,+ laqhayaqllapiraqmi payqa kashanman.+
10 Pipas wayqenta munakuqmi ichaqa k’anchaypi kashan,+ manataqmi urmachisqachu kanqapas.
11 Wayqenta cheqnikuqtaqmi ichaqa laqhayaqpi kashan, laqhayaqpitaqmi purishanpas,+ manan mayman riytapas atinchu chay laqhayaq ñawinta tutayachisqanrayku.+
12 Wawallaykuna, kaytaqa qelqamushaykichis paypa sutinrayku juchaykichis perdonasqa kasqanraykun.+
13 Taytakuna, kaytaqa qelqamushaykichis pichus qallariymantapacha kaqta reqsisqaykichisraykun. Waynakuna, kaytaqa qelqamushaykichis Satanasta* atipasqaykichisraykun.+ Wawakuna, kaytaqa qelqamushaykichis Tayta Diosta reqsisqaykichisraykun.+
14 Taytakuna, kaytaqa qelqamushaykichis pichus qallariymantapacha kaqta reqsisqaykichisraykun. Waynakuna, kaytaqa qelqamushaykichis kallpasapa kasqaykichisrayku,+ Diospa simin qankunapi kasqanrayku,+ Satanastapas atipasqaykichisrayku iman.+
15 Aman munakunkichischu kay pachataqa ni chaypi ima kaqkunatapas,+ pipas kay pachata munakuqqa, manan janaq pacha Taytataqa munakushanmanchu.+
16 Kay pachapi tukuy ima kaqpas manan Tayta Diosmantachu jamun, aswanpas kay pachamantan, chaykunan kaykuna: aychaq munapayayninkuna,+ ñawiq rikusqan munapayaykuna,+ runakuna imankuwanpas alabakusqanku ima.
17 Chaymantapas kay pacha kausayqa pasashanmi, jinallataq millay munapayayninkunapas,+ Diospa munayninta ruwaqmi ichaqa wiñaypaq kanqa.+
18 Wawallaykuna, ñan tukukuy horapiña kashanchis; yachasqaykichis jina, Cristoq contranpi kaqqa*+ rijurimunanmi karqan, ñataqmi kunanqa askhaña rijurimunku Cristoq contranpi kaqkunaqa,+ chaymi rikuchin tukukuy horapiña kashasqanchista.
19 Paykunaqa noqanchis ukhumantan lloqsipunku, ichaqa manan noqanchis t’aqamantachu paykunaqa karqanku;+ noqanchis t’aqamantachus kankuman karqan chayqa, noqanchiswan kuskallachá kashankuman karqan. Paykunaq lloqsipusqankun sut’ita rikuchin mana llapachu noqanchis t’aqamanta kasqanta.+
20 Qankunan ichaqa ch’uya Diospa ajllasqan karqankichis,+ llapaykichistaqmi yachayniyoqpas kankichis.
21 Noqaqa qelqamushaykichis manan cheqaq kaqta mana yachasqaykichisraykuchu,+ aswanpas yachasqaykichisraykun; chaymantapas manan ima llullakuypas cheqaq kaqmantaqa jamunmanchu,+ chayraykupiwanmi noqaqa qelqamushaykichis.
22 ¿Pitaq llullari? ¿Manachu Jesusqa Cristo* kasqanta negaq?+ Chhayna runan Cristoq contranpi kaqpas,*+ payqa janaq pacha Taytata Churitawanmi negan.
23 Pipas Churita negaqqa manan Taytawan jujllachasqachu kashanman,+ pipas “noqaqa iñinin Churipi”+ niqmi ichaqa Taytawan jujllachasqa kashan.+
24 Chayraykun qallariypi imachus yachasqaykichisqa sonqoykichispi allin saphichasqa kashanan,+ chay yachasqaykichischus sonqoykichispi allin saphichasqa kanqa chayqa, jujllachasqallapunin kashankichis Churiwanpas Taytawanpas.
25 Chaymantapas pay kikinmi wiñay kausaytaqa prometewarqanchis.+
26 Kaykunataqa qelqamushaykichis pikunachus pantachiyta munashasunkichis chaykunamanta cuidakunaykichispaqmi.
27 Qankunataqa Diosmi ajllarqasunkichis santo espiritunwan, chay espiritun qankunapiqa kashan,+ chaymi qankunaqa manaña necesitankichischu pipas yachachinasuykichistaqa, aswanpas chay espiritun qankunamanqa tukuy imatapas yachachishasunkichis, chayqa cheqaqmi manataqmi llullakunchu.+ Chhaynaqa, chay espirituq yachachisqasuykichisman jina jujllachasqalla paywan kashaychis.+
28 Arí, wawallaykuna, paywan jujllachasqallapuni qankunaqa kashaychis, chhaynapin paypa chayamusqan tiempopiqa* mana manchasqachu rimasunchis,+ nitaqmi p’enqasqachu qhepaman kutirisunchis.
29 Qankunaqa yachankichismi payqa chanin kasqanta ¿riki? Chhaynaqa yachallankichistaqchá pipas chanin kaqta ruwaqqa Diosmanta nacesqanta.+
Uraypi willakuykuna
^ Laqhayaqtaqa “tutayaq” nillankutaqmi.
^ Griego rimaypiqa “millay kaqta” ninmi.
^ Griego rimaypiqa “anticristoqa” ninmi. Qhaway Explicasqa simikuna nisqapi “Cristoq contranpi kaq (anticristo)” nisqata.
^ Griego rimaypiqa “anticristopas” ninmi. Qhaway Explicasqa simikuna nisqapi “Cristoq contranpi kaq (anticristo)” nisqata.
^ Qhaway Explicasqa simikuna nisqapi “Cristoq chayamusqan tiempo” nisqata.
