¿Tukuy sonqochu Cristota qatikushanchis?

‘Diospa sonqonman chayaqtan kawsashankichis, [...] chay hinallatapuni kawsashaychis.’ (1 TES. 4:1.)

1, 2. a) ¿Ima sumaq ruwaykunatan Jesuspa tiemponpi runakuna rikurqanku? b) ¿Imayna tiempopin ñoqanchispas kawsashanchis?

¡MAY sumaqchá kanman karqan Jesuspa tiempopi Israelpi kawsayqa! Yaqapaschá payta mañakuwaq karqan onqoyniykimanta qhaliyachinasuykita. Otaq sumaq rimasqanta yachachisqanta ima uyariyta, milagrokuna ruwasqantapas rikuyta (Mar. 4:1, 2; Luc. 5:3-9; 9:11). May allinpunichá kanman karqan Jesuspa ruwasqanta qhawayqa (Luc. 19:37). Ichaqa, Jesuspa tiemponpi runakunallan chaykunata rikurqanku. “Pay kikinta sacrificiopi” qokuspa Jesuspa ruwasqanqa mana imawanpas igualakunmanchu (Heb. 9:26; Juan 14:19).

² Ichaqa, kawsasqanchis tiempopas ancha importanten. ‘Tukukuy qaylla p’unchaykunapin’ kawsashanchis (Dan. 12:1-4, 9; 2 Tim. 3:1). Satanasqa hanaq pachamanta wikch’uykamusqañan karqan, hinaspa pisi tiempollamanta “chinkay-chinkay” ukhuman wikchuykusqaña kanqa  (Apo. 12:7-9, 12; 20:1-3). Chaymantapas, kamachisqan kanchis Reinonmanta ‘allin willakuykunata’ pachantinpi willananchispaq, chay llank’ayqa manañan hayk’aqpas ruwakunqañachu (Mat. 24:14)

3. a) Jesús manaraq hanaq pachaman kutipushaspa, ¿imatan yachachisqankunata kamachirqan? b) ¿Imapaqmi chayta kamachirqan?

³ Manaraq hanaq pachaman kutipushaspan, Jesús discipulonkunata nirqan: “Testigoykuna kankichis Jerusalén llaqtapi, lliw Judea provinciapi, Samaria provinciapi, kay pachaq k’uchunkunakamaraq”, nispa (Hech. 1:8). Nisqanman hinan pachantinpi yachachinanku karqan. ¿Imapaqmi yachachinanku karqan? P’uchukay tiempo manaraq tukukushaqtin runakuna Cristoq yachachisqankuna kanankupaq (Mat. 28:19, 20). ¿Imatan ruwananchis Cristoq kamachisqanta hunt’anapaq?

4. a) ¿Imatan yachachiwanchis 2 Pedro 3:11, 12 textoq nisqan? b) ¿Imakunawanmi manan atipachikunanchischu?

⁴ Apóstol Pedroq nisqantan kasukunanchis, paymi nirqan: “¿Imaynatataq kawsanaykichis? Qankunaqa Dios sonqo purispan Diosllapaqña kawsanaykichis, Diospa p’unchaynin chayamunanta makillaña suyaspa”, nispa (2 Ped. 3:11, 12). Pedro nisqan hina, kay p’uchukay p’unchaykunapiqa makillan kashananchis, tukuy sonqowan ‘Diosllapaqña kawsaspa’, allin willakuykunata willaspa ima. ¡Anchatan kusikunchis wawqe-pananchiskuna pachantinpi Jesuspa kamachisqanta hunt’asqankumanta! Ichaqa, yachasqanchis hina, huchayoq runan kanchis, Satanaspa kamachisqan millay pachapas sapa p’unchaymi sasachaykunapi churawanchis, chaykunawan atipachiskupaqa manañan tukuy sonqowanchu predicasunman. Cristotapas manañan tukuy sonqochu qatikusunman. ¿Imatan ruwasunman chaykunata atipanapaq?

Kusikuywan hunt’asun cristiano ruwayninchista

5, 6. a) ¿Imaraykun Pablo sumaqta rimarqan Jerusalenpi cristianokunamanta? ¿Ima ruwanankupaqmi yuyaycharqan? b) ¿Imaraykun anchata kallpachakuna Diospa kamachisqanta hunt’ananchispaq?

⁵ Jerusalenpi cristianokunatan apóstol Pablo nirqan: “Diospa k’anchaykusqasuykichis p’unchaykunata yuyariychis, chaypachan sinchi sasakunata muchushaspapas qaqata sayarqankichis”, nispa. Paykunamantan sumaqta rimarqan Dios sonqo kasqankumanta, unay wata qatiykachasqa kaspa aguantasqankumantapas. Chaymi Jehová Diosqa mana hayk’aqpas chayta qonqanqachu (Heb. 6:10; 10:32-34). Chay sumaq simikunaqa maytachá chay cristianokunaq sonqonta llanllarichirqan. Chay cartallapitaqmi yuyaycharqan mana pisipaspa rawrashaq sonqowan predicashanallankupaq espiritual ruwayninkuwan hunt’anankuta (Heb. 12:25).

⁶ Pabloq yuyaychasqanqa kay tiempopipas anchatan yanapawanchis. Cristianokunaqa manan hayk’aqpas pretextota maskhananchischu Diospa kamachisqanta mana hunt’anapaq. Manan yanqa-yanqataqa ruwananchischu, nitaq pisikallpayananchischu tukuy sonqowan paypaq llank’asqanchispi (Heb. 10:39). Yuyarinanchismi, ruwananchiswan allinta hunt’asun chayqa, kikinchistan qespichikusun hinallataq hukkunatapas (1 Tim. 4:16).

7, 8. a) ¿Iman yanapawasun tukuy sonqowan Diosta servinanchispaq? b) ¿Pin yanapawachis tukuy sonqowan ruwananchista hunt’ananchispaq?

⁷ ¿Iman yanapawasun Diosta makilla kasunanchispaq? Jehová Diosman qokusqanchispi yuyaymanaymi yanapawasun. Ñoqanchista negakuspa Jehová Diospa munaynintaraq ruwaytan prometerqanchis, chayrayku kallpachakunchis chayta hunt’anapaq (Mat. 16:24). Chaymi tapukunanchis: “¿Bautizakusqay p’unchaypi hinachu  decidisqa kashani qokusqayta hunt’anaypaq? Icha, ¿watakunaq pasasqanman hinachu hunt’ay munasqay pisiyashan?

⁸ Sichus qhawarikusqanchis qhepaman pisipasqanchista reparanchis chayqa, allinmi kanman profeta Sofoniaspa nisqanta yuyariy, paymi nirqan: “Makiykipas ama pisi kallpayachunchu. Diosniyki Señor Diosqa qanwanmi kashan, payqa kallpasapallañan, qespichisunkin. Payqa qan hawan kusisqa q’ochukunqa”, nispa (Sof. 3:16, 17). Babiloniamanta kutimuq Israel runakunapaqmi kay simikunaqa qelqakurqan. Ichaqa, kay tiempopipas yanapawanchismi. Jehová Diosmi kamachiwanchis predicananchispaq, chaymi yanapayninwan Churinpa yanapayninwan ima cristiano ruwayninchista hunt’anchis (Mat. 28:20; Isa. 12:2). Tukuy sonqowan hunt’asqanchismantan espiritualpi sumaqta wiñasunchis.

Diospa Reinonta ‘ñawpaqta maskhashallasun’

9, 10. ¿Imapaqmi Jesús willarqan hatun mikhuymanta rikchanachiyta? ¿Imatan chay rikch’anachiymanta yachanchis?

⁹ Fariseokunata kamachiqpa wasinpin, Jesús hatun mikhuy rikch’anachiymanta willarqan, chaypin rikuchirqan qallariy siglopi runakuna hanaq pacha Reinoman haykuy atisqankuta, chay willakuypin sut’inchallarqantaq runakuna imatapas makilla mana kasukusqankumanta (leey Lucas 14:16-21). Rikch’anachiypi invitasqakunaqa imaymana ruwanayoqmanmi tukurqanku chayman mana rinankurayku, khaynatan nirqanku: Chakra rantisqayta qhawaqmi rinay kashan, nispa, hukmi, nirqan phisqa masa torotan rantirqoni chaykunata qhawaqmi rinay kashan nispa. Huknintaq, chayllaraqmi casarakuni, manan riyta atiymanchu nispa. Imapas ruwananku tumpallan mana rirqankuchu. Pipas hallp’atapas otaq animaltapas rantinanpaqqa ñawpaqtaraqmi allinta qhawan, chhaynaqa, ¿imaraykutaq chay raturaq rinanku karqan? Chayraq casarakuq runapas, ¿manachu chay sumaq invitacionman riyta atinman? ¡Chaychá invitaqqa phiñakurqan!

¹⁰ ¿Imatan yachanchis chay rikch’anachiymanta? manan hayk’aqpas ñoqanchispaqraq imatapas ruwananchisraykuqa Jehová Diospaq llank’ayninchista saqenanchischu. Ruwayninchiskunapi afanakuqtinchisqa rawrashaq sonqowan serviyninchistan chiriyachisunman (leey Lucas 8:14). Mana chay sucedenanpaqmi Jesuspa kamachisqanta kasunanchis, paymi nirqan: “Aswanpas Diospa qhapaqsuyunta, chanin-kaynintawan ñawpaqtaqa maskhaychis”, nispa. (Mat. 6:33). ¡Maytan kusikunchis Jesuspa kamachisqanta iñiqmasinchiskuna kasukusqankumanta! Askhan imachus kaqnillankuwan kawsaspa Diosta astawan servinku. Chhaynapin yachanku Diospa Reinonta ñawpaqman churayqa anchata kusichikusqanta.

11. ¿Ima willakuymi rikuchin Diosta tukuy sonqowan servinanchista?

¹¹ Arí, rawrashaq sonqowanmi Diosta servinanchis, chayta yachanapaqmi qhawarillasuntaq Israelpi rey Jehoás ruwasqanta. Siria runakunan israelitakunata maqanakuypi atipananakupaqña kasharqanku, chaymi Jehoasqa Eliseo profetaman rirqan, waqaspataq valekurqan yanapananpaq. Profetan kamachirqan Siria ladoman wach’inanpaq. Chaywanmi rikuchisharqan Jehová Diospa yanapayninwan awqanku atipanankuta. ¿Kusikurqanchu Jehoás chayta yachaspa? Manan. Eliseon nisqa puchuq wach’ikunata (flechakunata) hoqarispa pampata waqtananpaq, Jeohastaq kinsa kutillata waqtasqa. Profetataq chayta  rikuspa phiñasqa nirqan: “Phisqa kutitapas soqta kutitapas pampata waqtawaq karqan chayqa, Siria runakunata ch’usaqyachinaykikaman atipawaq karqan”, nispa. Reyqa mana tukuy sonqo kasqanraykun siriokunata mana ch’usaqyachirqanku, kinsa kutillatan atiparqan (2 Rey. 13:12-20). ¿Imatan chay sucedesqanmanta yachasunman? Jehová Diospa saminchayninta chaskinanchispaqqa tukuy sonqowanmi hunt’ananchis kamachiwasqanchista.

12. a) ¿Imatan ruwasunman sasachaykuna rawrashaq sonqo kayninchista mana chinkachinanpaq? b) Diosta servishallasqayki allinniykipaq kasqanmanta willay.

¹² Kawsayninchispi sasachakuykunan rikuchin tukuy sonqochu Diospaq llank’anchis icha manachu chayta. Askha iñiqmasikunan sasachakuypi tarikunku mana qolqeyoq kasqankurayku. Hukkunataq yuyaqña otaq onqosqa kaspanku manaña Jehová Diosta serviyta atinkuchu munasqankuman hina. Chhaynapi tarikuspapas tukuy sonqowanmi Cristoq yupinta qatikusunman. Chaypaq qhaway, “Tukuy sonqo Cristota qatikunapaq yanapaykuna”, nisqa recuadrota. Chay yuyaychaykunapi textokunapipas yuyaymanaspan chayman hina kawsasun. Allinninchispaqmi kanqa chay ruwayqa. Tukuy sonqo Diosta servishallasun chayqa, allin takyasqa kasunchis, sumaqta kawsasun, thakpi, kusikuywan ima (1 Cor. 15:58). ‘Diospa p’unchaynin chayamunantataq makilla suyasun’ (2 Ped. 3:12).

Allinta qhawarikusun

13. ¿Imaynatan yachasunman tukuy sonqowanchu Diosta servishanchis chayta?

¹³ Rawrashaq sonqo kayqa manan tukuy tiempo predicasqapichu yachakun. Manan lliwchu chay ruwaytaqa atinkuman. Pipas onqosqa kasqanrayku killapi iskay horallata predican chayqa, ruwasqanmi Jehová Diosta kusichin (Marcos 12:41-44 textowan tupachiy). Chaymi sapankanchis qhawarikunanchis tukuy sonqowanchus icha manachus Diosta servishanchis chayta. Cristoq yachachisqankuna hinan yuyaynin yuyayniyoq kayta munanchis (leey Romanos 15:5; 1 Cor. 2:16).  ¿Imatan pay ñawpaqta ruwarqan? Capernaum runakunata nisqanpi kutichin: “Huk llaqtakunamanpas Diospa qhapaqsuyunmanta allin willakuykunataqa willamunaymi, chaypaqmi Diosqa kachamuwarqan”, nispa (Luc. 4:43; Juan 18:37). Jesús Diosta tukuy sonqo servisqanta qhawarispan, ñoqanchispas qhawarikunanchis sichus Reinopaq llank’ayninchista yapasunman chayta (1 Cor. 11:1).

14. ¿Imatan ruwasunman predicayninchista yapananchispaq?

¹⁴ Allinta qhawarikuspa yaqapaschá reparanchis Diospaq astawan ruway atisqanchismanta (Mat. 9:37, 38). Chaymi waranqanpi wayna-sipaskuna estudiayta tukusqanku qhepaman, kunanqa precursor kaspa kusisqa llank’ashanku. ¿Manachu kanpas munawaq paykuna hina kusisqa kayta? Iñiqmasikunan chayta ruwashanku, wakinqa astakunku huk llaqtakunaman otaq huk suyukunaman, wakintaq huk runakunaq rimayninta yachanku huk nacionmanta hamuqkunata predicanankupaq. Chay ruwayqa yaqapaschá sasa kanman, ichaqa askha saminchaykunatan chaskinchis, hukninqa runakunata “cheqaq-kayta reqsinankupaq” yanapasqanchismi (1 Tim. 2:3, 4; 2 Cor. 9:6).

Tukuy sonqowan llank’aq runakunata qatikusun

15, 16. ¿Pikunan Jesusta rawrashaq sonqowan qatikurqanku?

¹⁵ Jesuspa apostolninkunapi yuyaykusun. ¿Imatan paykuna ruwarqanku yachachisqankuna kanankupaq Jesús waqyaqtin? Leví sutiyoqqa ‘lliwta saqespan sayarispa Jesuspa qhepanta ripurqan’ (Luc. 5:27, 28). Pedrowan wawqen Andreswanqa challwaqkunan karqanku, “paykunaqa llikankuta saqerparispa Jesuspa qhepanta ripurqanku”. Jacobopas Juanpas taytankuwanmi challwananku llikakunata sursisharqanku, ichaqa ‘botenkuta taytankutawan saqerparispan Jesuspa qhepanta ripurqanku’ (Mat. 4:18-22).

¹⁶ Saulo sutiyoq runapas chaytan ruwarqan apóstol Pabloman tukupuspa. cristianokunatan qatiykacharqan, ichaqa Cristota servinanpaqmi akllasqa karqan, chaymi kawasayninta allichaspa ‘sinagogakunapi Jesusmanta willarqanpacha: Jesusqa Diospa Churinmi’, nispa (Hech. 9:3-22). Sasachaykunapi qatiykachasqa ima tarikuspapas, payqa rawrashaq sonqowanmi Diosta servishallarqan (2 Cor. 11:23-29; 12:15).

17. a) ¿Imatan ruwanayki Cristota tukuy sonqo qatikunaykipaq? b) ¿Ima saminchaykunatan chaskisunchis Diospa munayninta tukuy sonqowan hunt’aspa?

¹⁷ Ñoqanchispas paykuna hinachá Cristota qatikuyta munanchis, ahinapi Jesuspa waqyasqanta kasukunanchispaq (Heb. 6:11, 12). ¿Imatan tukuy sonqowan Cristota qatikusqanchismanta chaskisunchis? Diospa munayninta hunt’asqanchismi kusichiwasun, congregacionpi astawan paypaq llank’asqanchispas (Sal. 40:8; leey 1 Tesalonicenses 4:1). Chaskillasuntaqmi: thak-kayta, q’ochukuyta, Dios munakuwasun, wiñay kawsaytataq suyakusun (1 Tim. 4:10).

¿Yuyarishankichu?

• ¿Imatan Jesús kamachiwarqanchis, imaynatan chayta qhawarinanchis?

• ¿Imaraykun kallpachakunanchis makilla Diosta kasukunanchispaq?

• ¿Imaraykun imaynata Dios servisqanchista qhawarikunanchis?

• ¿Iman yanapawasun Cristoq yupinta qatikunanchispaq?

[Tapuykuna]

[27 paginapi foto recuadropiwan]

Tukuy sonqo Cristota qatikunapaq yanapaykuna

▪ Diospa Simin Qelqata sapa p’unchay ñawinchana yuyaymananataq (Sal. 1:1-3; 1 Tim. 4:15).

▪ Diospa yanapayninta espirituntapas mañakushanalla (Zac. 4:6; Luc. 11:9, 13).

▪ Diosta tukuy sonqo serviqkunawan huñukuna (Pro. 13:20; Heb. 10:24, 25).

▪ Tiempota mana usuchispa kawsana (Efe. 5:15, 16).

▪ Ima tumpallapas mana makilla kasukuyqa mana allinninchispaq kasqanta yachana (Luc. 9:59-62)

▪ Diosman qokusqanchispi yuyaymana, hinallataq Jehová Diosta servisqanchisrayku Cristota tukuy sonqo qatikusqanchisraykupas allinkuna chaskisqanchispi (Sal. 116:12-14; 133:3; Pro. 10:22).