Proverbios 13:1-25
13 Yachayniyoq churiqa taytanpa wanachisqantan chaskikun,+burlakuq runan ichaqa anyaykuyta mana uyarikunchu.+
2 Runaqa allinta rimasqanman jinan allin kaqwan kusikunqa,+traicionerokunan ichaqa maqayllata munanku.
3 Rimayninta controlakuqqa kausaynintan waqaychan,+siminta mana wisq’aqmi ichaqa ñak’ariypi tarikunqa.+
4 Qellaqa imaymanatan munan, manataqmi imanpas kanchu,+allin llank’aqmi ichaqa imaymanayoq kanqa.+
5 Chanin runaqa llullakuytan cheqnikun,+millay runaq ruwasqanmi ichaqa p’enqakuyta, pisichayta apamun.
6 Chanin kayqa mana juchayoq runatan pakaykun,+mana allin ruwaymi ichaqa juchasapata urmachin.
7 Kanmi mana imayoq kashaspa qhapaqman tukuq runa,+kallantaqmi askha kaqniyoq kashaspa wajchaman tukuq runapas.
8 Qhapaq runaqa qhapaq kaynintan pagan vidanta salvananpaq,+wajcha runatan ichaqa mana pipas amenazanchu.+
9 Chaninkunaq k’anchayninqa allintan k’anchan,+millay runakunaq k’anchayninmi ichaqa wañupunqa.+
10 Jatunchakuq kayqa ch’aqwaytan jatarichin,+yuyaychayta maskhaqkunan ichaqa yachayta tarinku.+
11 Usqhaylla tarisqa qhapaq kaykunaqa manan unaypaqchu,+pisi-pisimanta* juñusqan ichaqa askhayanqa.
12 Sonqoqa anchatan llakikun ima suyakusqaykipas mana usqhaychu junt’akuqtinqa,+ima munasqapas junt’akusqanmi ichaqa kausay sach’a jina.+
13 Yachachikuyta pisichaqqa ñak’arinqan,+kamachikuyta respetaqmi ichaqa premiota chaskinqa.+
14 Yachayniyoqpa yachachikuyninqa* kausay pujyun,+wañuy trampakunamantan runata pakaykun.
15 Allin reparaq runaqa sumaq qhawarisqan,traicionerokunaq kausayninmi ichaqa sinchi sasa.
16 Allin yuyayniyoq runaqa yachaywanmi imatapas ruwan,+mana yuyayniyoqmi ichaqa mana yuyayniyoq kayninta rikuchin.+
17 Mana allin willaq runaqa sasachakuykunapin tarikun,+iman kaqllata willaq runan ichaqa jampi jina.+
18 Wanachiyta mana kasukuqqa wajchayapunmi, pisichasqan kapun,anyaykuyta chaskikuqmi ichaqa jatunchasqa kanqa.+
19 Ima munasqanpas junt’akusqanmi runapaqqa* sumaqllaña,+mana yuyayniyoqkunan ichaqa mana allin kaqmanta karunchakuyta cheqnikunku.+
20 Yachayniyoqkunawan puriqqa yachayniyoqmi kapunqa,+mana yuyayniyoqkunawan juñukuqmi ichaqa mana allinpi tarikunqa.+
21 Juchasapakunataqa ñak’ariymi qatikachan,+chanin runakunan ichaqa askha bendicionkunata chaskinku.+
22 Allin runaqa nietonkunamanmi kaqninkunata saqen,juchasapa runaq kaqninkunan ichaqa chanin runapaq waqaychasqa kashan.+
23 Wajcha runaq allin llank’asqan chajraqa askhatan rurun,ichaqa mana chanin ruwaykuna kasqanraykun chinkapunman.*
24 Wawanta mana wanachiqqa* wawantan cheqnikun,+wawanta munakuqmi ichaqa wanachin.*+
25 Chanin runaqa sajsanankaman mijun,+millay runakunan ichaqa yarqaymanta kashanku.+
Uraypi willakuykuna
^ Hebreo rimaypiqa “makiwan” ninmi.
^ Chaypiqa “kamachikuyninqa” nillanmantaqmi.
^ Chaypiqa “wajchaqa chinkapunman” nillanmantaqmi.
^ Chaypiqa “Varanta mana jap’iqqa” nillanmantaqmi.
^ Chaypiqa yaqapaschá “usqhaylla wanachin” nillanmantaq.
