Lucas 19:1-48

  • Zaqueota Jesuspa visitasqanmanta (1-10)

  • Askha qolqemanta (11-27)

  • Jerusalenman Jesuspa jaykusqanmanta (28-40)

  • Jerusalenmanta Jesuspa waqasqanmanta (41-44)

  • Jesús vendeqkunata qarqosqanmanta (45-48)

19  Jesusqa Jericó llaqtaman jaykuspan chayninta pasasharqan.  Chaypin kasharqan Zaqueo sutiyoq runa, payqa impuesto cobraqkunaq jujnin umallinmi karqan, qhapaqtaqmi karqanpas.  Payqa rikuytapunin munasharqan Jesusta, ichaqa manan atirqanchu askha runakuna chaypi kasqanrayku, jinaspapas juch’uy runallan payqa karqan.  Chaymi Zaqueoqa ñaupaqman phawaspa sicómoro sach’aman* seqarqan chaymanta rikunanpaq, Jesusqa ñan chaynintaña pasanan kasharqan.  Chayman chayaspan Jesusqa wichayta qhawarirqan, jinaspa payta nirqan: “Zaqueo, usqhaylla uraykamuy, kunan p’unchaymi wasiykipi qhepakusaq”, nispa.  Jinan payqa usqhaylla uraykamurqan, jinaspa wasinpi kusisqa chaskirqan.  Chayta rikuspan llapa runakuna rimapakurqanku: “¿Maypis kunan juchasapa runaq wasinman jaykunman?”,+ nispa.  Zaqueotaq sayarispa Señorta nirqan: “Señor, ima kaqniykunamantapas kuskantan wajchakunaman qopusaq, pimantachus qolqenta qechurqani* chaymanpas tawa kutitawanraqmi kutichipusaq”,+ nispa.  Chaymi Jesusqa nirqan: “Kunan p’unchaymi kay wasiman salvación chayamun, kay runapas Abrahanpa wawan kasqanrayku. 10  Runaq Churinqa chinkasqakunata maskhaspa salvaqmi jamun”,+ nispa. 11  Discipulonkuna chaykunata uyarishaqtinmi Jesusqa juj rijch’anachiyta* paykunaman willarqan; paykunaqa Jerusalén qayllapiñan kasharqanku, Jerusalenman chayaqtinku jina Diospa gobiernon rijurimunanpaqmi piensasharqankupas.+ 12  Chaymi nirqan: “Reykunaq familianpi naceq runan karu llaqtaman viajarqan+ rey kananpaq nombramiento chaskiq, chhaynapi reyña kutimunanpaq. 13  Manaraq viajashaspan ichaqa chunka kamachinkunata wajachimuspa paykunaman askha qolqeta* qorqan: Kutimunaykama kaywan negociota ruwashankichis,+ nispa. 14  Chay runaq llaqtamasinkunan ichaqa payta cheqnikurqanku, chaymi qhepanta kacharqanku juj comisionta: Manapunin munaykumanchu kay runa reyniyku kanantaqa, nispa nimunankupaq. 15  ”Unay tiempomanta reyña kutimuspanmi payqa qolqen saqesqan kamachinkunata wajachimurqan, negociota ruwaspa jayk’atachus ganarqanku chayta yachananpaq.+ 16  Jinan jujnin kamachiqa payman qayllaykuspa nirqan: Señorníy, qolqeykin* chunkata wacharun,*+ nispa. 17  Chaymi reyqa nirqan: ¡Kusapuni, allin kamachi! Sinchi pisi kaqkunapi junt’aq kasqaykita rikuchisqaykiraykun, kunanqa chunka llaqtakunata kamachinki,+ nispa. 18  Jujninpas payman qayllaykuspan nirqan: Señorníy, qolqeykin* wacharun* pisqata,+ nispa. 19  Jinan paytapas nillarqantaq: Pisqa llaqtakunamantan encargakunki, nispa. 20  Jujnintaq ichaqa payman qayllaykuspa nirqan: Señorníy, kayqa chay qolqeyki,* pañuelopi khipuruspan waqaycharqani. 21  Phiña runa kasqaykiraykun manchakurqayki; qanqa mana churasqaykimantan oqarinki, mana t’akasqaykimantan cosechankipas,+ nispa. 22  Jinan reyqa nirqan: Mana allin kamachi, simillaykimantataqmi juchachasayki. Yacharqankitaq phiña runa kasqayta, mana churasqaymanta oqariq kasqayta, mana t’akasqaymanta cosechaq kasqaytapas chayqa,+ 23  ¿imaraykutaq chhaynari mana bancomanchu qolqeyta churapuwarqanki? Chhaynapi noqaqa chayamuspay interesniyoqta orqokapushayman karqan, nispa. 24  ”Jinaspan reyqa chaypi sayashaqkunata nirqan: Chay qolqeta qechuychis, jinaspa qolqeyta chunka kutita mirachiqman qoychis,+ nispa. 25  Paykunan ichaqa nirqanku: Señor, payqa askha qolqetañatáq* jap’ishan, nispa. 26  Jinan reyqa nirqan: Niykichismi: Pipas kaqniyoqmanqa astawanraqmi qosqa kanqa, mana kaqniyoqmantan ichaqa imanña kanman chaypas, qechusqa kanqa.+ 27  Paykunaq reynin kanayta mana munaq enemigoykunatapas kayman apamuychis, jinaspa ñaupaypi wañuchiychis”, nispa. 28  Chaykunata rimayta tukuspan Jesusqa Jerusalén llaqtaman puririrqan. 29  Olivos orqopi+ kaq Bejfagué llaqtachaman Betania llaqtachaman ima qayllaykushaspataq payqa iskay discipulonkunata kacharqan:+ 30  “Jaqay rijurimushan chay aylluman riychis, chayman jaykuspaykichismi mana piqpa sillakusqan malta asnota watasqata tarinkichis, jinaspa paskaruspa aysamunkichis. 31  Sichus pipas tapusunkichis: ¿Imapaqmi paskashankichis?, nispa chayqa, Señormi munashan, nispan ninkichis”, nispa. 32  Jinan paykunaqa chay aylluman rispa Jesuspa nisqanta jina tarirqanku.+ 33  Asnochata paskashaqtinkutaq dueñonkunaqa nirqanku: “¿Imapaqmi paskashankichis?”, nispa. 34  Chaymi paykunaqa nirqanku: “Señormi munashan”, nispa. 35  Jinan chay asnochata Jesusman aysamurqanku, jawa p’achankuwan caronaykuspankutaq Jesusta chayman sillaykachirqanku.+ 36  Purisqanman jinan runakunaqa jawa p’achankuta ñan pataman mast’arqanku.+ 37  Olivos orqomanta uraykamuq ñanman qayllaykuqtin jinataq, llapa discipulonkunaqa imaymana milagrokuna* rikusqankumanta kusikuyta qallarirqanku. Chaypiqa askhapunin discipulonkunaqa kasharqanku. Paykunan Diosta jatunchayta qallarirqanku: 38  “¡Sumaqpaq qhawarisqa kachun Jehová* Diospa sutinpi jamuq reyqa! ¡Janaq pachapi thaj kay kachun, janaq pacha Diospas jatunchasqa kachun!”,+ nispa. 39  Runakuna ukhupi kashaq wakin fariseokunataq Jesusta nirqanku: “Yachachikuq, discipuloykikunata upallachiy”,+ nispa. 40  Jinan Jesusqa nirqan: “Niykichismi: Paykunachus upallankuman chayqa, rumikunan qaparinman”, nispa. 41  Jerusalén llaqtaman chayashaspataq Jesusqa llaqtata qhawarispa waqarqan:+ 42  “Maytan munayman karqan thaj kayman apaq ñanta reparanaykita, kunanmi ichaqa ñawiykimanta pakasqaña kashan.+ 43  P’unchaykunan chayamunqa, chaypin enemigoykikuna muyuriqniykipi estaca jina k’aspikunawan cercaspa muyuykusunki, tukuy ladomantataq k’iskiykusunki,+ 44  jinaspan qanta wawaykikunatawan* pampakama ñut’usunkiku,+ manataqmi ni juj rumillatapas rumi patapi saqenqakuchu,+ watukusqa kasqayki tiempota mana reparasqaykirayku”, nispa. 45  Chaymantataq temploman jaykuspa chaypi vendeqkunata jawaman qarqomuyta qallarirqan:+ 46  “Qelqasqan kashan: Wasiyqa Diosmanta mañakuna wasin kanqa,+ nisqa. Qankunataq ichaqa suwakunaq t’oqonman tukuchipusqankichis”,+ nispa. 47  Jesusqa sapa p’unchaymi templopi yachachisharqan. Ichaqa umalli sacerdotekuna, kamachikuy simita yachachiqkuna, llaqtapi umallikuna iman wañuchiyta munasharqanku,+ 48  ichaqa manan imaynata chayta ruwayta atisharqankuchu llaqtapi llapa runakuna paymanta makilla kashasqankurayku; payta uyariyta munaspan runakunaqa payllawan kashaqku.+

Uraypi willakuykuna

Chaypiqa “k’ita higos sach’aman” nillanmantaqmi.
Chaypiqa “yanqa tumpaspa qechurqani” nillanmantaqmi.
Chaypiqa “ejemplota” otaq “tupanachiyta” nillanmantaqmi.
Griego rimaypiqa “chunka minata” ninmi. Greciapi juj minaqa 340 gramostan pesaq. Juj mina pesaq qolqeqa yaqa kinsa killa llank’asqamanta pagon karqan. Qhaway “Astawan yachanapaq B14” nisqata.
Wacharun nisqataqa “yaparukun, mirarun” nillankutaqmi.
Griego rimaypiqa “minaykin” ninmi. Juj mina pesaq qolqeqa yaqa kinsa killa llank’asqamanta pagon karqan. Qhaway “Astawan yachanapaq B14” nisqata.
Griego rimaypiqa “minaykin” ninmi. Juj mina pesaq qolqeqa yaqa kinsa killa llank’asqamanta pagon karqan. Qhaway “Astawan yachanapaq B14” nisqata.
Wacharun nisqataqa “yaparukun, mirarun” nillankutaqmi.
Griego rimaypiqa “minayki” ninmi. Juj mina pesaq qolqeqa yaqa kinsa killa llank’asqamanta pagon karqan. Qhaway “Astawan yachanapaq B14” nisqata.
Griego rimaypiqa “chunka minatañatáq” ninmi. Juj mina pesaq qolqeqa yaqa kinsa killa llank’asqamanta pagon karqan. Qhaway “Astawan yachanapaq B14” nisqata.
Chaypiqa “atiywan ruwaykuna” nillanmantaqmi.
Qhaway “Astawan yachanapaq A5” nisqata.
Chaypiqa “qan ukhupi tiyaqkunatawan” nillanmantaqmi.