“I MATAÑAPAS aguantaymanmi, tentacionkunatam ichaqa mana aguantaymanchu.” Wakinqa chaynatam piensanku huchapakuyta munasqankurayku. Wakinmi ichaqa tentacionkuna atipayta munanku. ¿Ima ninkitaq qamqa? ¿Tentacionkunataqa vencenachu icha chaykunawanchu atipachikuna?

Ichaqa manam lliw tentacionkunachu sasachawanchik. Kaypi piensarisun, galletata mikuruspa iskay-kimsatawanraq mikuruptinchikqa manam imanawasunchu. Huchapakuywan tentachikuymi ichaqa sasachakuypi tarichiwachwan. Proverbios 6:32, 33 nisqanman hinam huchapakuq runaqa mana yuyayniyoq kasqanrayku vidanta yanqachan.

Huchapakunaykipaq tentasqa kaspaqa, ¿imatam ruwawaq? Bibliam nin: “Diosqa munan mana huchapakuspa cuerpoykichikta sapakama controlaspa chuya kawsanaykichiktam”, nispa (1 Tesalonicenses 4:3, 4 NM). ¿Imaynatam controlakuyta atiwaq? Qatiqnin kimsa consejokunapi reparay.

Penqaypaq qalalla kaqkunata qawayqa mana allin kaqkunapim piensachiwachwan. Qawaywan munayqa imayna tupasqanmantam Jesus nirqa: “Pipas warmita munapayaspan qawaqqa sonqonpim hukwan pierdekuy huchata rurarunña”. Chaymantapas nirqam: “Chaynaqa, sichu alleq ñawiki huchallichisuptikiqa horqoruspayá wischuruy, cuerpoykipa huknin partellan chinkaruyninmi allinqa enteron cuerpontin wiñaypaq castigoman wischusqa kanaykimantaqa”,  nispa (Mateo 5:28, 29). ¿Ima ninantaq chayqa? Huchapakuyman mana wichiykunapaqqa penqaypaq kaqkunata mana qawanapaqmi tanteakuna.

Kaypi piensariy, fierro soldaqpa llipipipichisqanta rikuruspaqa, ¿hinallachu qawarayawaq?, chayllachá huklawman qawariwaq otaq ñawikita tapakuwaq. Chaynallataqmi Internetpi, televisionpi otaq revistakunapi penqaypaq qalalla kaqkunata rikuruspaqa pensamientonchikta mana qachacharunapaqmi huklawman chaylla qawananchik. Manaraq Testigo kachkaspan penqaypaq qalalla kaqkunata qawaq Juanmi willakun: “Buenamoza warmita rikuruspayqa iskay-kimsa kutikamam qawayta munani, ichaqa anchatam kallpanchakuni mana qawarinaypaq, hinaspaymi kikiy nikuni: ‘Jehova Diosta mañakuy, kunanpuni chaylla mañakuy’ nispa. Diosta mañakusqaymi tentacionkunata atipanaypaq yanapawan” (Mateo 6:9, 13; 1 Corintios 10:13).

Diosta serviq Jobpas nirqam: “Kikiypunim contratota rurarqani doncellakunataqa mana qawapayanaypaq”, nispa (Job 31:1). Qampas Job hina kanaykipaqmi tanteakunayki.

Kaytapas ruwawaqmi: Penqaypaq qalalla kaqkunata rikuruspaqa chaylla huklawman qawariy. Ñawpa tiempopi Diosman sonqo runapa nisqanta qatipakuy, paymi nirqa: “Yanqa kaqkunata ama qawanaypaqyá waqaychaykuway”, nispa (Salmo 119:37).

Pantaq kasqanchikraykum mana allin kaqkunapi piensaymanta cuidakunanchik. Bibliam nin: “Runaqa kikinpa mana allin munasqankunawan engañachikuspanmi aysachikun tentachikunanpaq. Chayna mana allin munaykunam huchallichin”, nispa (Santiago 1:14, 15). ¿Imaynatam cuidakuchwan chay mana allin pensamientokunamanta?

Mana allin piensaykuna umanchikman chayamuptinqa anchatam kallpanchakuna chaykunapi mana piensanapaq. Penqaypaq qalalla kaqpi pensamientokunawanqa ama atipachikuychu. Tomasmi qawaq karqa penqaypaq qalalla kaqkunata Internetpi, paymi willakun: “Mana allin kaqkunapi  piensanaymantaqa allin kaqkunapi piensanaypaqmi anchata kallpanchakurqani. Llumpaytam sasachakurqani. Achka kutipim mana allin pensamientokunawan atipachikurqani, ichaqa tiempo pasasqanman hinam controlakuyta yacharuni”. Elsa sutiyoq sipaspas anchatam kallpanchakurqa mana allin pensamientokunawan mana atipachikunanpaq, paymi nin: “Tukuy ruwayniyoq kasqaymi chaynataq Jehova Diosta mañakusqaymi yanapawarqa mana allinkunapi mana piensanaypaq”.

Kaytapas ruwawaqmi: Qalalla kaqkunapi piensaykuna umaykiman chayamuptinqa chaypi mana piensanaykipaq tukuy sonqoykiwan mañakuy hinaspa ‘manaraq imatapas ruwachkaspa yuyaymanay imapas cheqap kaqpi, imapas respetanapaq kaqpi, imapas allin ruway kaqpi, imapas mana huchallichikuq kaqpi, imapas allin rimana kaqpi, imapas allin alabanapaq kaqpi’ (Filipenses 4:8).

Penqaypaq kaqkuna qawayta munasqaykiwan tentarachikuspaqa huchallikuruwaqmi (Proverbios 7:6-23). ¿Imatam ruwawaq chaykunamanta cuidakunaykipaq?

Bibliam kaynata consejan: ‘Tanteoyoq runaqa desgracia sucedenanta qawarispanmi asurikun. Pisi experienciayoq runañataqmi chayninta pasaykuspan ñakarin’ (Proverbios 22:3). Chaynaqa allin tanteoyoq kaspayá ima tentacionmantapas librakunaykipaq cuidakuy (Proverbios 7:25). Felipe sutiyoq runam penqaypaq qalalla kaqkuna qawayninta saqerurqa, paymi willakun: “Computadoratam churarqani hukkunapa qawasqan lawpi, chaymantapas Internetnintakama penqaypaq qalalla kaqkuna mana rikurinanpaqmi filtro nisqankuta churachirqani. Wasipi sapallay kaspayqa manam Internettaqa qawanichu”. Tomaspas ninmi: “Penqaypaq kaq peliculakunataqa manam qawanichu, manataqmi juntakunichu penqaypaq kaqkunamanta rimaqkunawanqa. Manam munanichu ima tentacionmanpas wichiykuytaqa”.

Kaytapas ruwawaqmi: Aychaykipi debil kasqaykita reqsikuspaqa tanteay imata ruwaspa tentacionkunamanta cuidakunaykipaq (Mateo 6:13).

Tentacionman mana wichiykunaykipaq cuidakuchkaspa kaqmanta wichiykuspaqa ama hukmanyaychu, hinalla kallpanchakuy atipanaykipaq. Bibliam nin: ‘Allin ruwaq runaqa qanchis kutita urmaspanpas yapatawanmi sayarin’ (Proverbios 24:16). Taytanchik Jehova Diosqa sayarinanchikpaqmi kallpanchawanchik. ¿Munankichu yanapaykusunaykita? Chaynaqa tukuy sonqoykiwan mañakuspa iñiynikipi allin kanaykipaq Bibliata estudiay hinaspa testigokunapa huñunakuyninkunaman riy. Chaymantapas ama qonqaychu Diospa kayna nisqanta: ‘Ñoqam Diosniki kani. Kallpanchaspaymi yanapasqayki’ (Isaias 41:10).

Carlospas ninmi: “Penqaypaq qalalla kaqkuna qawayniytaqa sasatam saqerqani. Yapa-yapamantam chaykuna qawayman wichirqani, ichaqa Jehova Diospa yanapayninwanmi chaykuna qawayta atiparqani”, nispa. Davidpas ninmi: “Llamkaqmasiy sipaswanqa huchapakuymanmi karqa, ichaqa valorchakuspaymi manam nirqani. Anchatam kusikuni concienciaypi hawka tarikusqaywan. Astawanqa kusikuni Jehova Diosta kusichisqaywanmi”, nispa.

Tentacionkunaman mana wichinaykipaq kallpanchakuspaqa Jehova Diostam kusichinki (Proverbios 27:11).