¿Imaynatam yanapawanchik Jesucristopa wañukusqanqa?

Runakunata Dios unanchaspanqa mana onqospa chaynataq mana wañuspa kay Pachapi wiñaypaq kawsanankutam munarqa. Ichaqa Adanmi chayna kawsakuyta yanqacharurqa mana kasukusqanrayku. Adanpa mirayninmanta kasqanchikraykum llapallanchik wañunchik (Romanos 5:8, 12; 6:23). Chaymi Jehova Diosqa Churin Jesusta kachamurqa rantinchikpi wañuspan wañuymanta librawananchikpaq. (Leey Juan 3:16.)

Jesusmi rantinchikpi wañukurqa kay Pachapi wiñay kawsayta haypananchikpaq. Chayna wiñay kawsay, ¿imayna kasqanpitaq piensanki?

Jesucristo rantinchikpi wañusqanwanmi favorecesqa kanchik huchanchikmanta pampachasqa kanapaq chaynataq kay Pachapi wiñay kawsayta haypanapaqpas. Bibliam willawanchik chaypiqa manaña yuyaqyaspa, manaña onqospa chaynataq manaña wañuspa kawsananchikmanta. (Leey Isaias 25:8; 33:24; Apocalipsis 21:4, 5.)

¿Imaynatam Jesuspa wañukusqanta yuyarinanchik?

Wañunanpaq huk tutallaña faltachkaptinmi Jesusqa discipulonkunaman kamachirqa wañusqanta yuyarinankupaq. Wañusqanta sapa wata yuyarisqanchikmi Jehova Dios chaynataq Jesucristo ancha kuyawasqanchikta yuyarichiwanchik. (Leey Lucas 22:19, 20; 1 Juan 4:9, 10.)

Kay watapim 14 abril punchawpi Inti seqaykuyta Jesuspa wañukusqanta yuyarinapaq huñunakuy karqa. Chay huñunakuymanmi Jehova Diospa testigonkunaqa achka runakunata invitarqaniku. (Leey Romanos 1:11, 12.)