RELIGIONKUNA hukllawakunanta munaqkunam ichaqa mana chaynatachu piensanku. Chaymi hukllawakunankupaq kallpanchaq Eboo Patel sutiyoq runa nin: “Manachu lliw religionkunaqa kallpanchan kuyapayakuq kanapaq [. . . ,] Allpa pachapi tukuyta cuidanapaq [. . . ,] samaykachikuq kanapaq”, nispa.

Chay runapa nisqanman hinam: budista, católico, hindú, musulmán chaynataq huk religionkunapas huk sonqolla kanankupaq kallpanchakunku wakcha kayta chinkachinankupaq, runakunapa derechonta defiendenankupaq, Allpa pachata imawanpas dañaptinku willakunankupaq otaq mina nisqanku bombakuna churayninkuta prohibichinankupaqpas. Chaymantapas acuerdota ruwaspam tanteanakunku imatapas imaynata ruwanankupaq. Chay huñunakusqankupim velakunata ratachinku, takikunata takinku otaq rezakunkupas.

¿Hukllawakuspachu religionkunaqa cheqninakuyninkuta chinkachinqaku? ¿Chayna hukllawakusqankuwanchu Diosqa kay Pachata allichanqa?

Religionkunata hukllawachiq organizacionmi alabakun 76 nacionkunapi 200 religionkunawan huk sonqolla kasqankumanta. Paykunaqa munankum ‘wiñaypaq yanapanakuspa huk sonqolla kayta’, ichaqa manam atinkuchu chayna kawsaytaqa. Chay organizacionpi umalliqkunam pitapas otaq mayqen religionpi kaqkunatapas mana piñachinankupaq hina sumaqta tanteaspa documentota ruwanku. ¿Imanasqa? Diosmanta rimanankupaq mana acuerdopi kasqankuraykum. ¿Imaynatam chay sasachakuyta atipanku? Diosmanta mana rimaspankum.

Diosmanta mana rimaptinkuqa, ¿imapaqtaq religionqa valen? ¿Imapitaq chay organizacionqa mana tupanchu runakunata yanapaq organizacionwanqa? Chay hukllawakuq religionkunaqa manam religion kasqankupaqchu hapikunku aswanqa huk sonqolla kanankupaq yanapanakuq organización kasqankuwanmi.

Religionkuna hukllawakunankupaq kallpanchaq reqsisqa Dalai Lama sutiyoq runam nin: “Lliw religionmi yachachin llakipayanakuymanta, kuyanakuymanta chaynataq pampachanakuymantapas”. Chaymantapas ninmi: “Religionniyoq kayqa allinninchikpaqmi”, nispa.

Allinmi kuyanakuyqa, llakipayanakuyqa chaynataq pampachanakuyqa. Chayna kawsakunapaqmi  Jesucristopas nirqa: “Runamasikichik qamkunapaq allin kaqkuna rurananta munaspaqa qamkunapas paykunapaqyá allin kaqkunata ruraychik”, nispa (Mateo 7:12). ¿Chaykunallapichu cheqap religionqa kallpanchakunan?

Apostol Pablopa tiempopi kaq runakunapas tukuy sonqonkuwanmi Dios serviyta munarqaku “ichaqa manam imam kaq yachachikuyta yacharqakuchu”. ‘Allin ruway Dios kasqanmanta mana yachasqankurayku’ hinaspa kikinkupa tanteasqankuman hina kawsay munasqankurayku (Romanos 10:2, 3, NM). Diospa munayninmanta mana yachasqankuraykum yupaychayninkuwan iñiyninkuqa yanqapaq karqa (Mateo 7:21-23).

Jesusmi nirqa: “Mayna kusisqam hawkayayta maskaqkunaqa” (Mateo 5:9, Chuya Qellqa revisión 2012). Payqa kawsarqa yachachisqanman hinam, chaymi religionniyoq kaqkunamanpas hawkalla kawsakuymanta yachachirqa (Mateo 26:52). Jesuspa yachachisqanta kasukuqkunaqa wawqe-panintin hinam kuyanakuspa huk sonqolla kawsakurqaku (Colosenses 3:14). ¿Hukllawakuspa hawka kawsanallankutachu Jesusqa munarqa? ¿Sapaq religionniyoq kaqkunamanchu hukllawakurqa?

Jesusta wañurachiyta munaspankum qatikacharqaku fariseo hinaspa saduceo religionpi kaqkuna. Chaynata ruwaptinkuqa, ¿ima nirqataq Jesusqa? Payqa discipulonkunamanmi nirqa: “Asurikuychik paykunamanta. Paykunaqa [. . .] ñawsamasin pusaqkunam”, nispa (Mateo 15:14). Chaywanmi Jesusqa qawachirqa pantay religionpi kaqkunawan mana hukllawakunanpaq kasqanta.

Corinto llaqtapi kaq runakunaqa tukuy lawmanta chaynataq tukuy religionniyoqmi karqaku. Chay llaqtapi kaq cristianokunaqa, ¿imaynatam Diosman sonqo kasqankuta qawachinanku karqa? Apostol Pablom nirqa: “Ama kuskanchakuychikchu Señorpi mana iñiqkunawanqa”, nispa. Chaymantapas kaynatam entiendechirqa: ‘Cristoqa manam allinqa kanmanchu Diablowanqa, nitaqmi Diospi iñiqpas hukllaqa kanmanchu mana iñiqwanqa’. Hinaspam consejarqa: “Paykuna ukumantayá lloqsiychik”, nispa (2 Corintios 6:14, 15, 17).

Qawasqanchikman hina, Diosqa manam munanchu pantay religionpi kaqkunawan hukllawakunataqa. Hinaptinqa, ichapas tapukunki: “¿Imaynatataq huk sonqolla kawsachwan?”, nispa.

15 nacionkunam churarachinku Allpa pachapa altonpi antena kaqlla hatunllay-hatun aparatota (Estación Espacial Internacional). ¿Atinmankuchu karqa chay aparato ruwachiyta chay nacionkuna huk sonqolla mana kaspankuqa?

Hukllawakuq religionkunaqa manam llapankuchu acuerdopi kanku. Rimankum yanapanakunankupaq chaynataq respetanakunankupaqpas, ichaqa manam acuerdopichu kanku iñiyninkupi huk sonqolla kanankupaqqa. Chaymi imayna kawsayninkupiwan Diosmanta yachachiyninkupiqa mana huk sonqollachu tarikunku.

Diospa kamachikuyninkunamantam Bibliaqa yachachin, chayqa runakunatam yanapan Diosta serviyninkupi huk sonqolla kanankupaq. Kamachikuyninman hina kawsaqkunaqa maylawmanta kaspapas huk sonqollam Diosta servinku. Chayna kawsanankumantam Diosqa willachirqaña kaynata: “Rimasqankutam agradoypaqña tikrarusaq. Ñoqa Tayta Diostaña qayakuwanankupaqmi llapallankuta rurarusaq. Hukllaña serviwanankupaqmi chaynataqa rurarusaq”, nispa. Diospa kamachikuyninkunam runakunataqa huk sonqollata kawsachin (Sofonias 3:9; Isaias 2:2-4).

Jehova Diospa testigonkunam kallpanchaykiku llaqtaykipi huñunakunayku Salonman rispayki hawkalla hinaspa huk sonqolla kasqaykupi kikiki reparanaykipaq (Salmo 133:1).