PÉNSAY ima visitas tianqui suj museu ima apin ashca imastis antiguas. Yacka túcuy utckusckas, viejos y gastasckas tiancu. Huaquin partes chusapuncu. Pero tían suj maa imapas chusapun. Ancha alli ’ruascka tían y ckaacun hasta utulitas imastispis. «¿Can cháiraj ’ruascka?», tapun pít pusara ’rejsichinánpaj. «Mana -contestapun pay- can suj astaan antiguasmanta ima ni áicap desgastacora». «¿Siempre huackaychascka tiara huaquin laupi?», ckam ninqui. «Mana -cutis nipun pi ’rejsichis purin-, cay can ima aguantara túcuy sajra casckanta aun mana cananfinasmanta». Chaypachá ckam dejuro pensanqui: «Pero, ¿imamanta ’ruascka tían?».

Biblia chá imasti antigua ina can. Túcuy librusmanta Biblia astaan antigua can. Amapas ciertu can tían librus antiguas ima quiquin cancu pero huatasuan lliquicorancu y chincacorancu. Túcuy cá librus nisckancu cenciamanta, por ejemplu, contradecesckas carancu, imaraycu tarerancu informaciún ima ’ruasckasuan ckaachisckas tiancu. Consejusnin medicimanta astaan dañu ’ruancu y mana ampincu. Y ashca cá librusmanta antiguas parteslla cutincu, imaraycu huaquin partes lliquicorancu y chincacorancu.

Pero Biblia mana quiquin can. Astaan tres mil quinientos huatas antiguedarmanta apin y maa ni imapas chusapun. Amapas ashca siglusraycu perseguis seguincu, mana sackerancu leenancuta, chejniscka y ’rupachiscka cara, túcuy ima caypi escribicora mana dañút usora. Amapas antigua can mósoj conocimientusraycu, Biblia ckaachin túcuy ima únay escribicusckan cunánpaj y ámoj pachápaj siruiaycu.

Aun chayna, nacha tapunacunqui, ¿checkamanta Biblíap consejusnin siruis seguincu? Ckaas imaina humanidar sajra imastistas usushcan. ¿Mayckanta astaan manchaycu? Nacha pensanqui, guerrapi, túcuy mapachajpi, piñacojcunapi, mana casucojcunapi leyesta. Cunan, estudias yachachinas Bibliamanta, chaymantá tapunácuy: «¿Astaan alli tianman mundu si túcuy casucuycu Biblia yachachisckanta?».

PAS MASCANAYCU TÍAN

«Cusisckas cancu picunas pas mascancu, imaraycu Tata Yáyap huaasnin huajyasckas caj ’rincu» (Mateo 5:9). «Atispá maycama ckamcunamanta dependechun tucuycunaan paspi causaychis» (Romanos 12:18).

MISERICORDIA Y PERDÓN

«Cusisckas misericordiosos cajcuna, imaraycu caj ’rincu tratasckas misericordiaan» (Mateo 5:7). «Seguiychis aguantanacus sujan sujan y sockomanta perdonanacus, amapas si pipas apin suj rasón sujmanta quejacúypaj. Jehová * ckamcunata sonckomanta perdonapucora, chayna ckamcuna quiquinta ’ruaychis» (Colosenses 3:13).

PERSUNAS TÚCUY RASASMANTA CUSCAS

«Sujlla ckarimanta ’ruara túcuy naciunes ckarismanta túcuy ashpát poblanancunápaj» (Hechos 17:26). «Cunan unanchani ima Tata Yayápaj túcuy quiquin caycu, manapé admitin picunasta casupuncu, mana importas ima naciunmanta cancu» (Hechos 10:34, 35).

RESPETANÁYSH TÍAN ASHPA MAYPI CAUSÁYSH

«Imaraycu Jehová Yaya ckarít Jardín Edenpi churara llamcanánpaj y atendenánpaj» (Génesis 2:15). Tata Yaya «chamcka ’ruancka picunasta ashpát chamcka ’ruashcancu» (Apocalipsis 11:18).

CHÉJNIY COITO DESHONESTO Y CODICIÁT

«Ñahuisniyquishta alli quicharisckas apiychis y caruyacuychis túcuy laya codiciamanta, amapas suj ashcát apin chá imastis ima apin mana atincu causayninta ckoyta» (Lucas 12:15). «Coito deshonestomanta, túcuy laya mapa casckanta o codicia ama ’rimaychis ckamcunapurapi imaina suyacun persunas ima santas cancu» (Efesios 5:3).

DECENTES CAYTA Y SINCHÍT LLAMCAYTA

«Munaycu tucuypi decenciaan puriyta» (Hebreos 13:18). «Pít suan ama astaan suachun manapé sinchi llamcachun» (Efesios 4:28).

YANAPAYTA PICUNASTA PRECISANCU

«Consuelu ckoychis llaquisckastas, yanapa ckoychis decaesckastas y tucuycunata pacencia apipucuychis» (1 Tesalonicenses 5:14). «Huajchuscunata y viudasta atendeyta afliciunesnincunapi» (Santiago 1:27).

Biblia manalla cá cualidares yachachiaycu, manapé apreciayta y tucuypi casucuyta. Si túcuy persunas chay ’ruancuman, ¿manachu chay alli canman y túcuy persunaspa afliciunesnin allichacunman? Y ciertu can, consejus Bibliamanta cunan ashcát siruiaycu ni aicappas ina. Pero Biblia, ¿imaina ckamta yanapasuyta atin?

Cá ckari ancha yachayníyoj tucuycunasmanta nera: «Yáchay ckaascka cutin ’ruacusckanuan» (Mateo 11:19). ¿Manachu chay alli can? Súmaj can yachayta si suj conseju alli can ckaas imaina ’riaycu y casucus. Chayraycu ckam dejuro tapunacunqui: «Si ciertu can ima Biblíap consejusnin siruiaycu, ¿maa debenman yanapaayta? ¿Dejuro atin yanapaayta allichayta afliciunesniyta ima cunan apini?». Ckáaj ’riycu suj ejemplu.

Diana * cáusaj cara ancha ocupascka, cusiscka, ni imapas chusápoj cara, pero ckonckayllamanta ashcas desgracias usora: sipasnin huañupora, ckarin sackesa cara, y mana micúypaj apera. Pay nin: «Na maa yacharani pít carani; maa sipasníyoj cuterani, ni ckaríyoj, ni huasíyoj. Tucuyta chincarani: túcuy casckayta, fuersásniy y suyánay».

Diana unanchara ni aicappas ina cá palabras ciertas casckancu: «Chayaycu causayta setenta u ochenta huatas pero si pillapas apan suj alli cáusay pero chá huatas ashca afliciunes y lláquiy apincu y utcka crusancu y huañuycu (Salmo 90:10).

Túcuy cá afliciunesuan liriáypaj, Diana Bibliapi yanapa mascara y alli ’ripora. Imaina ckáaj ’riycu quimsa ámoj articuluspi, ashca persunas unancharancu ima casucuyta Biblíap consejusninta, afliciunesnincunata allicháypaj chay ’ruayta astaan alli can. Cuentáp caierancu ima Biblia can chá imasti ina ima ckallarinpi ’rimaraycu. Maa can chá librus ina ima huatasuan na maa siruincu. ¿Biblia maa cay quiquin librus ina casckanraycu? ¿Can imaraycu Tata Yaya escribicunanta ’ruara y mana ckaris? (1 Tesalonicenses 2:13).

Nacha ckam pensanqui maa ashca huatasta causaycu y ashca afliciunes apiycu. ¿Piman ’rinqui yanápay, consuelu y conseju mascas áicap afliciunes apinqui?

Ckaasúysh imaina quimsa layasmanta Biblia yanapasuyta atin. Yachachisuyta atin:

1. Caruyacuyta túcuy atisckayshta mana alli imastismanta.

2. Allichayta desacuerdus apiptiycu.

3. Aguantayta afliciunes ima maa aticun allichayta.

Quimsa artículus amojcunapi ckaasúysh cá imastistas.