Ri carta xtaq bʼi chke ri Efesios 6:1-24

  • Pixabʼ chke ri alkʼwalaxelabʼ y chke ri tat nan (1-4)

  • Pixabʼ chke ri esclavos y ri ajchaqʼe taq ri chak (5-9)

  • Ri uyaʼom ri Dios chqe rech kojchʼojinik (10-20)

  • Kʼisbʼal taq utzij ri Pablo (21-24)

6  Alkʼwalaxelabʼ, cheʼinimaj ri itat inan rumal che are waʼ ri kqaj chuwach ri Qajaw Jesús y ri Dios. 2  «Nim cheʼawilaʼ wi ri atat anan». Are waʼ ri nabʼe taqanik che kuya ri tewchibʼal riʼ: 3  «Kariq na utzilal pa ri akʼaslemal y naj tiempo katkʼasiʼ na cho ri uwach ulew». 4  Ri ix tat nan, mibʼan kʼax chke ri iwalkʼwal, xaneʼ chikʼamaʼ kibʼe, cheʼiqʼilaʼ* y chikʼutuʼ chkiwach ri kraj ri Jehová.* 5  Ri ix esclavos, cheʼinimaj ri iwajaw rukʼ ronojel iwanimaʼ, nim cheʼiwilaʼ wi, cheʼinimaj jetaneʼ are ri Cristo tajin kinimaj. 6  Xaq xiw ta kixnimanik are chiʼ kʼo kixilowik rech utz kixilik, xaneʼ chibʼanaʼ iwe ri kkibʼan ri rajchakibʼ ri Cristo che rukʼ ronojel kanimaʼ kkibʼan ri kraj ri Dios. 7  Chixchakun rukʼ ronojel iwanimaʼ, jetaneʼ che ri Jehová kibʼan wi y chke ta ri winaq, 8  ix iwetaʼm che chijujunal kixtewchiʼx na rumal ri Jehová rukʼ ri utz kibʼano, paneʼ ix esclavos o ix esclavos taj. 9  Y ri ix ri ajchaqʼe taq ri chak, utz chibʼanaʼ che kilik ri iwajchakibʼ. Kibʼan ta kʼax chke y keʼixibʼij ta rukʼ ri kibʼij chke rumal che ix iwetaʼm che xa junam ri Iwajaw kʼolik ri kʼo chilaʼ chikaj, ri areʼ xaq junam kubʼan che kilik kojonel ri winaq. 10  Kʼisbʼal re, are ta bʼaʼ ri Qajaw chyoʼw ichuqʼabʼ rumal che ri areʼ kʼo nim u poder. 11  Chikojoʼ ronojel ri uyaʼom ri Dios chiwe rech kixkowinik kixchʼojinik y ko kixtakʼiʼ chuwach ri Diablo rech kixqaj ta chupam ri trampas kukojo. 12  Rumal che xa ta kukʼ winaq kojchʼojin wi xaneʼ kojchʼojin kukʼ ri itzel taq ángeles ri e kʼo pa ri kaj che tajin kkiqʼat tzij puwiʼ ri uwach ulew che kʼo pa qʼequʼmal. 13  Rumal laʼ, chikojoʼ ronojel ri uyaʼom ri Dios chiwe rech kixkowinik kitoʼ iwibʼ chuwach ri Itzel y we kikoj ronojel ri kuya ri Dios chiwe, ko kixtakʼiʼ riʼ chuwach ri kʼax. 14  Rumal laʼ, ko chixtakʼaloq, chikojoʼ ri qastzij jeʼ jas jun ximibʼal uxeʼ ipam, amaqʼel chibʼanaʼ ri utz chuwach ri Dios rech kuchajij ri iwanimaʼ junam rukʼ jun tobʼal uwach ikʼuʼx che kuchajij ri iwanimaʼ. 15  Y rajawaxik amaqʼel kikoj ri ixajabʼ rech kitzijoj ri utz taq noticias re jororibʼal. 16  Xaq xiw ta kʼu waʼ, xaneʼ chikojoʼ ri nimalaj escudo ri kukʼutunisaj ri ukubʼsaxik ikʼuʼx chrij ri Dios. Rumal che ri escudo riʼ kuchup ri qʼaqʼ ri knikow chrij ri flechas che kukʼaq lo ri Bʼanal kʼax.* 17  Chichajij ri ichomanik rech amaqʼel kixchoman chrij ri kubʼan na ri Dios, junam rukʼ jun casco kuchajij ri ijolom; chikojoʼ ri espada ri kuya ri espíritu santo che are ri Utzij ri Dios. 18  Xuqujeʼ amaqʼel chitaʼ ri espíritu santo pa oración, chitaʼ toqʼobʼ y chibʼanaʼ apachike uwach oración, rukʼ wariʼ ko kixtakʼiʼk y kixkʼaskʼatik. Y amaqʼel chibʼanaʼ orar pa kiwiʼ ri e chaʼom. 19  Xuqujeʼ chibʼanaʼ orar pa nuwiʼ in, rech kinriq ri kinbʼij y kinxiʼj ta wibʼ kintzijoj ri utz taq noticias chrij ri xuya ta na ubʼixik ri Dios. 20  Ri Dios in ukojom che ubʼixik ri tzij riʼ y rumal waʼ in tzʼapim pa cárcel, chibʼanaʼ orar pa nuwiʼ rech kinxiʼj ta wibʼ kintzijonik, rumal che are waʼ ri rajawaxik kinbʼano. 21  Ri Tíquico, ri loqʼalaj qachalal y ri utzalaj upatanel ri Qajaw kuya na ubʼixik chiwe juntir ri tajin kinriqo. 22  Kintaq bʼi iwukʼ rech kubʼij chiwe jas qabʼanom y rech kukubʼsaj ikʼuʼx. 23  Are ta bʼaʼ ri Dios ri Qatat y ri Qajaw Jesucristo chyoʼw jororibʼal pa kanimaʼ ri qachalal, kekiloqʼoqʼej ri nikʼaj chik y kkikubʼsaj kikʼuʼx chrij ri Dios. 24  Chkʼol bʼaʼ ri nimalaj rutzilal ri Dios kukʼ konojel ri kkiya ta kan uloqʼoqʼexik ri Qajaw Jesucristo.*

Notas

^ O «cheʼipixbʼej».
^ Chawilaʼ ri tema A5.
^ O «kukʼ konojel ri kkikʼut loqʼoqʼebʼal kʼo ta ukʼisik che ri Qajaw Jesucristo».

Copyrights for this publication