Ri carta xtaq bʼi chke ri Efesios 3:1-21
3 In Pablo, in tzʼapil pa cárcel rumal che in rech ri Cristo Jesús rech kixintoʼ ix ri man ix judíos taj...
2 Itom riʼ che ri Dios xinukoj che itoʼik rech kiriq ri nimalaj rutzilal.
3 Xuqujeʼ itom riʼ che ri Dios xubʼij chwe ri xuya ta na ubʼixik, ri nubʼim chi kan jubʼiqʼ chiwe.
4 Rumal laʼ, are chiʼ kisikʼij wajun carta riʼ qas kiwil na che wetaʼm ri kraj kubʼij ri xuya ta na ubʼixik ri Dios chrij ri Cristo,
5 wariʼ chkiwach ta ri winaq re ojer xuqʼalajisaj wi, xaneʼ xuqʼalajisaj chkiwach ri tastalikalaj taq apóstoles y ri profetas re kamik rumal ri espíritu santo.
6 Are waʼ ri xuya ta na ubʼixik ri Dios: ri winaq ri man e judíos taj, ri xa jun kibʼanom rukʼ ri Cristo Jesús, junam ri ki herencia kyaʼ na rukʼ ri Cristo. Keʼux xa jun cuerpo y rumal ri utz taq noticias kyaʼ na chke ri areʼ ri ubʼim ri Dios che kuya na chqe oj.
7 Rumal ri nimalaj rutzilal ri Dios, ri in xinkowinik xixintoʼ che uchʼobʼik ri xuya ta na ubʼixik, are chiʼ xuya ri u poder chwe.
8 Ri in, ri más nim ta nubʼanik chkiwach juntir ri e chaʼom, ri Dios xukʼut ri nimalaj rutzilal chwe rech kintzijoj ri utz taq noticias chke ri man e judíos taj, chrij ri nimaʼq taq tewchibʼal che kyaʼ na chqe rumal ri Cristo
9 y rech xinkʼut chkiwach konojel ri winaq ri tajin kubʼan ri Dios (ri xbʼanow ronojel ri jastaq) che uqʼalajisaxik ri xuya ta na ubʼixik y ri kʼi tiempo xukʼuʼ na.*
10 Xkʼulmataj wariʼ rech ri e qʼatal taq tzij y ri kʼo taqanik pa kiqʼabʼ kamik pa ri kaj kkil ri nimalaj unojibʼal ri Dios rumal ri tajin kbʼan pa ri congregación.
11 Wariʼ kʼo ubʼanik rukʼ ri ojer loq uchomam ri Dios kubʼan na y kukoj ri Cristo, ri Qajaw Jesús che ubʼanik.
12 Rumal che kojkojon chrij ri Cristo, kqaxiʼj ta qibʼ kojchʼawik y kqaxiʼj ta qibʼ kqabʼan orar che ri Dios rumal che qetaʼm che qas kojutatabʼej.
13 Rumal laʼ kintaʼ jun toqʼobʼ* chiwe rech más ta kixbʼison chrij ri kʼax che tajin kinriq rumal iwech, wariʼ xa kuya utzilal chiwe rumal laʼ chixkikotoq.
14 Kinxukiʼ chuwach ri Tataxel rumal che
15 areʼ xbʼanow konojel ri familias ri e kʼo pa ri kaj y ri e kʼo cho ri uwach ulew.
16 Kinbʼan orar che ri Dios, ri nimalaj Dios, rech kuya ri espíritu santo chiwe y jeriʼ kkʼojiʼ uchuqʼabʼ ri iwanimaʼ.
17 Y rumal che ri ix kikubʼsaj ikʼuʼx chrij ri Cristo, ri Cristo kʼo pa iwanimaʼ y keʼiwaj ri nikʼaj chik. Xuqujeʼ kinbʼan orar piwiʼ rech ko kixtakʼiʼk junam rukʼ jun cheʼ ko takʼalik, rumal che nim qajinaq bʼi ri e rabʼ* pa ri ulew.
18 Rech ri ix kixux junam kukʼ ri e chaʼom, qas kichʼobʼo che ri uloqʼoqʼebʼal ri Cristo sibʼalaj nim uwach, nim urabʼik, nim raqan y nim qajinaq bʼik.
19 Y che ri uloqʼoqʼebʼal ri Cristo más nim na ubʼanik chuwach ri etaʼmabʼal, rukʼ wariʼ ri Dios kixutoʼ che resaxik uwach ri utz taq ubʼantajik.
20 Rumal ri u poder ri Dios ri tajin kukʼam qabʼe, ri areʼ kkowinik kuya más chqe che ri kqataʼ che o kubʼan más che ri kqachomaj oj kubʼano.
21 Amaqʼel bʼaʼ chyoq uqʼij ri Dios rumal ri ubʼanom pa ri congregación y ri ubʼanom rukʼ ri Cristo. Amén.
