Ri carta xtaq bʼi chke ri Efesios 1:1-23
1 In Pablo, ri in kojom che apóstol re ri Cristo Jesús rumal ri Dios, kwaj kinbʼij wariʼ chke ri e chaʼom ri e kʼo pa Éfeso, ri e u discípulos ri Cristo Jesús ri kiyaʼom ta kan upatanexik:
2 Ri Dios ri Qatat y ri Qajaw Jesucristo, chkiyaʼ bʼaʼ ri nimalaj utzilal y ri jororibʼal chiwe.
3 Chyoq bʼaʼ uqʼij ri Dios, ri Utat ri Qajaw Jesucristo rumal che ri areʼ rukʼ ri u espíritu santo uyaʼom kʼi uwach tewchibʼal chqe pa ri kaj, rumal che oj u discípulos ri Cristo.
4 Ri Dios xojuchaʼo are chiʼ majaʼ ktikitaj ri uwach ulew rech kojkʼojiʼ rukʼ ri Cristo, kqakʼut loqʼoqʼebʼal che ri Dios, oj chʼajchʼoj chuwach y kʼo ta jun makaj kriqitaj chqij.
5 Ojer loq xojuchaʼo rech kojok ralkʼwal rumal ri Jesucristo y xojuchaʼo rumal che are laʼ ri kraj kubʼano y ri kqaj chuwach,
6 xuqujeʼ xubʼan wariʼ rech ri winaq kkiya uqʼij rumal che xukoj ri loqʼalaj Ukʼojol rech kukʼut ri nimalaj rutzilal chqe.
7 Ri Dios xukʼut ri nimalaj rutzilal are chiʼ xuya bʼe xtix ri ukikʼel ri Ukʼojol che utojik ri qamak y rukʼ wariʼ xojresaj pa uqʼabʼ ri makaj.
8 Ri areʼ xukʼut ri nimalaj rutzilal chqawach are chiʼ xuya qanoʼj y xojutoʼ che uchʼobʼik
9 ri qas kraj kubʼij ri xuya ta na ubʼixik ojer kanoq. Y wariʼ are ri qas kraj kubʼano y uchomam ubʼanik.
10 Ri areʼ kraj kusukʼumaj juntir ri jastaq y kubʼan wariʼ are chiʼ kopan ri qʼij uchaʼom, keʼumulij juntir ri jastaq ri e kʼo pa ri kaj y ri jastaq ri e kʼo cho ri uwach ulew rech ri Cristo ktaqan pa kiwiʼ. Qastzij wi che rumal ri Cristo kemulix juntir ri jastaq;
11 y ri oj ri xa jun qabʼanom rukʼ xa junam ri qa herencia kyaʼik, rumal che ri Dios ojer loq oj uchaʼom rech qas kbʼantaj ri ubʼim, y ri areʼ kubʼan ronojel ri kraj.
12 Kyaʼ uqʼij ri Dios rumal qech oj ri xojkojon nabʼe chrij ri Cristo.
13 Pero ri ix xuqujeʼ xixkojon chrij ri are’ are chi’ xtzijox ri utzij ri Dios chiwe, ri utz taq noticias ri kchʼaw chrij ri i salvación. Y are chi’ ri ix ix kojonaq chik, ri Cristo xukoj jun etal chiwe che are ri espíritu santo ri bʼim kanoq kyaʼ na chiwe.
14 Ri espíritu santo kukʼutu che qastzij kyaʼ wi na ri herencia chqe, jeriʼ ri utinamit ri Dios kel pa uqʼabʼ ri cuerpo che xa kmakunik rumal che xuya ri Ukʼojol che utojik ri makaj y rukʼ wariʼ kyaʼ uqʼij.
15 Y are chiʼ ri in xinto che ri ix qas kikubʼsaj ik’u’x* chrij ri Qajaw Jesús y che qas ke’iloqʼoqʼej ri e chaʼom,
16 sibʼalaj kinmaltyoxin che ri Dios rumal ri tajin kibʼano. Amaqʼel kinbʼan orar piwiʼ
17 rech ri u Dios ri Qajaw Jesucristo, ri Tataxel ri kyaʼ nim uqʼij, kixutoʼo rech kʼo inoʼj y rech kichʼobʼ ronojel ri kraj areʼ kiwetaʼmaj chrij.
18 Ri Dios kujaq ri ichomanik rech ri ix qas kichʼobʼ ri kuya na chiwe, ri jeʼlalaj taq jastaq che ubʼim kuya na chke ri e chaʼom
19 y rech ri ix kiwetaʼmaj chrij ri nimalaj u poder ri xukʼut chqawach oj ri kojkojon chrij ri Qajaw. Wajun nimalaj u poder riʼ kqʼalajinik rumal ri ubʼanom
20 y xukoj ri poder riʼ are chiʼ xuwalijisaj ri Cristo chkixoʼl ri kaminaqibʼ y xutʼuyubʼaʼ* pa ri uwikiqʼabʼ* chilaʼ pa ri kaj.
21 Y más nim ubʼanik chkiwach ri qʼatal taq tzij, ri kʼo taqanik pa kiqʼabʼ, ri kʼo ki poder, ri reyes o apachin winaq ri nim ubʼanik kamik pa we tiempo riʼ y pa ri petinaq.
22 Y ri Dios xubʼano che ri areʼ ktaqan puwiʼ ronojel ri jastaq, xuya taqanik pa uqʼabʼ rech kukʼam ubʼe ri congregación.
23 Ri congregación are ri u cuerpo ri Cristo rumal laʼ ri areʼ kuya ronojel ri kajwataj che.
