Ri carta xtaq bʼi chke ri Efesios 4:1-32
4 In in Pablo, in kʼo pa cárcel rumal rech ri Qajaw, kintaʼ jun toqʼobʼ* chiwe che kibʼan pa ri ikʼaslemal ri kutaʼ ri Dios chiwe rumal che ix uchaʼom chik:
2 chixux machʼalik taq winaq, chanim ma pe iwoyowal y chkʼol i paciencia; rumal ri loqʼoqʼebʼal chichʼijaʼ ri kʼax che kibʼan chbʼil taq iwibʼ;
3 chikojoʼ ichuqʼabʼ rech kʼo jamaril chixoʼl rumal che ri espíritu santo ubʼanom jun chiwe.
4 Xa jun ri cuerpo y xa jun ri espíritu, xuqujeʼ xa jun ri kuya na ri Dios chiwe rumal che ix uchaʼom.
5 Xa jun ri Qajaw, xa jun ri kbʼan che uqʼijilaxik ri Dios y xa jun ri bautismo kʼolik.
6 Xa jun ri Dios kʼolik, che are ri Qatat oj qonojel. Ri areʼ kʼo pa qawiʼ qonojel, kchakun qukʼ qonojel y kʼo pa ronojel.
7 Ri Dios ukʼutum ri nimalaj rutzilal chqawach chqajujunal y are ri Cristo xsipan chqe chqajujunal.
8 Rumal che ri Utzij ri Dios kubʼij wariʼ: «Are chiʼ ri areʼ xpaqiʼ chikaj, xeʼumulij jujun achijabʼ rech xeʼok e rech y xeʼuya che sipanik».
9 Pero, ¿jas* kraj kubʼij ri tzij «xpaqiʼ chikaj»? Kraj kubʼij che nabʼe xqaj lo ikam,* cho ri uwach ulew.
10 Ri xqaj lo cho ri uwach ulew are ri xpaqabʼisax más chikaj chuwach ri kaj rech kbʼantaj ronojel.
11 E jujun xeʼukoj che apóstoles, jujun chik che profetas, jujun chik che utzijoxik ri utz taq noticias, e jujun chik che ajyuqʼabʼ y e nikʼaj chik xeʼukoj che maestros.
12 Xeʼukoj ri achijabʼ riʼ rech kekipixbʼej ri e chaʼom, rech kekipatanij ri nikʼaj chik y rech kkiya kichuqʼabʼ ri congregaciones che jetaneʼ are ri u cuerpo ri Cristo.
13 Ri achijabʼ riʼ kojkitoʼ rech junam ri kojkojon chrij, kqetaʼmaj ronojel chrij ri Ukʼojol ri Dios y ktzʼaqat ri qachomanik, junam rukʼ jun winaq che kʼo chi ujunabʼ, jeriʼ kojjunamataj rukʼ ri Cristo.
14 Rajawaxik kqakʼutu che oj akʼalabʼ ta chik, rech ri winaq kojkibʼan ta engañar rukʼ ri molom taq tzij che kkikʼutu y kojqaj ta chupam ri trampas che kkikojo, rech kojjunamataj ta rukʼ jun barco che kkʼam bʼi rumal ri kaqiqʼ jewaʼ jeriʼ puwiʼ ri jaʼ.
15 Pero ri oj rajawaxik kqabʼij ri qastzij y kqakʼut loqʼoqʼebʼal rech nojim nojim kojjunamataj rukʼ ri Cristo che are ri ujolom ri cuerpo.
16 Kojjunamataj rukʼ jun cuerpo che are ri Cristo ri ujolom, juntir ri u partes qas utz kibʼanom che unukʼik kibʼ y qas kechakun pa junamam. Rumal laʼ we chqajujunal oj qas utz kqabʼan che ri qachak kojtobʼanik rech kkʼiy ri cuerpo che are ri congregación y jeriʼ kqaloqʼoqʼej más qibʼ.
17 Kintaʼ jun toqʼobʼ chiwe pa ubʼiʼ ri Qajaw, kibʼan ta chi iwe ri kkibʼan ri más winaq, rumal che ri e areʼ are kbʼe kikʼuʼx chrij ri jastaq ri kʼo ta kipatan.
18 Ri e areʼ jetaneʼ e kʼo pa jun qʼequʼmal y kkibʼan ta pa kikʼaslemal ri kraj ri Dios, rumal che kkaj taj kketaʼmaj uwach y ko ri kanimaʼ.
19 Y rumal che kowirinaq chi ri kanimaʼ, kekʼix ta chik kkibʼan kʼixbʼalalaj taq jastaq* y xaq xiw chi kkichomaj ubʼanik ri tzʼilalaj taq jastaq.
20 Are ta waʼ ri xiwetaʼmaj ix chrij ri Cristo
21 rumal che ri Cristo are xukʼut ri qastzij y we ta qas xitatabʼej ri xukʼut chiwach xiwetaʼmaj ta riʼ ri qastzij.
22 Ri ix xiwetaʼmaj che rajawaxik kiya kan ri ojer ikʼaslemal, ri jastaq che xibʼan ojer, rumal che xa xubʼan kʼax chiwe are chiʼ xibʼan ri kurayij ri i cuerpo.
23 Miya kan ukʼexik ri ichomanik
24 y rajawaxik kibʼan kʼakʼ che ri ikʼaslemal jetaneʼ kikoj jun kʼakʼ atzʼyaq, je jas ri kraj ri Dios, je wariʼ kibʼan ri kqaj chuwach ri Dios y kinimaj rukʼ ronojel iwanimaʼ.
25 Kamik che iyaʼom chi kan ubʼanik molom taq tzij, chibʼij ri qastzij chke ri iwajil itzʼaqat rumal che qonojel xa oj jun cuerpo.
26 Are chiʼ kpe iwoyowal mixmakunik; kiya ta bʼe che kqʼax jun qʼij y xaq iwoyowal wi na.
27 Miya bʼe che ri Diablo kixuchʼako.
28 Ri winaq che kelaqʼanik maʼelaqʼan chik xaneʼ qas chchakunoq rech kkowinik keʼutoʼ ri kʼo kajwataj chke.
29 Mibʼij itzel taq tzij y tzij che kubʼan kʼax chke ri nikʼaj chik, xaneʼ are chibʼij tzij ri kuya kichuqʼabʼ y utzilal chke.
30 Xuqujeʼ miya bʼis che ri espíritu santo, rumal che rukʼ ri espíritu santo ri Dios xixubʼan sellar rech are chiʼ kopan ri qʼij kixubʼan salvar rumal ri tojbʼal che xuya piwiʼ.
31 Mikʼol oyowal pa iwanimaʼ, mixchʼujarik, mixkʼanarik, miraq ichiʼ* chrij jun winaq y mikoj tzij che kubʼan kʼax chke e nikʼaj chik, xuqujeʼ chixutuj apachike uwach itzelal.
32 Xaneʼ chikʼutuʼ utzilal chbʼil taq iwibʼ, utz chibʼanaʼ che uchʼabʼexij iwibʼ, chel ikʼuʼx chke ri e nikʼaj chik y rukʼ ronojel iwanimaʼ chikuyuʼ imak chbʼil iwibʼ, junam rukʼ ri kubʼan ri Dios che ukuyik imak ix rumal ri Cristo.
