Ri carta xtaq bʼi chke ri Colosenses 4:1-18
4 Ri kʼo iwesclavos kibʼan ta kʼax chke, rumal che ri ix xuqujeʼ kʼo jun Iwajaw pa ri kaj.
2 Amaqʼel chibʼanaʼ i oración, masach chiwe kibʼano y chixmaltyoxin che ri Dios.
3 Xuqujeʼ chibʼanaʼ orar pa qawiʼ oj, rech ri Dios kojutoʼ che utzijoxik ri xuya ta na ubʼixik chrij ri Cristo, ri rumal che in kʼo pa cárcel.
4 Y chibʼanaʼ orar pa nuwiʼ rech qas utz kinbʼan che uqʼalajisaxik ri e tzij riʼ.
5 Utz chibʼanaʼ chkiwach ri winaq ri man e kʼo ta pa ri congregación y utz chibʼanaʼ che ukojik ri tiempo.
6 Qas chinaʼ na ri kibʼij rech utz kibʼan che utzalixik ri kitzij ri winaq, jeriʼ ri itzij kjunamataj rukʼ atzʼam ri kuya ukiʼal ri rikil.
7 Ri loqʼalaj qachalal Tíquico, ri uyaʼom ta kan upatanexik ri Qajaw y ri junam tajin kqapatanij rukʼ, kutzijoj na chiwe ri nukʼulmam.
8 Kintaq bʼi iwukʼ rech kiwetaʼmaj ri tajin kqariqo y rech kukubʼsaj ikʼuʼx.
9 Xuqujeʼ rukʼ ri Tíquico kbʼe ri qachalal Onésimo, ri uyaʼom ta kan upatanexik ri Qajaw y ri nabʼe kanoq kʼo iwukʼ. Ri e areʼ kkitzijoj na chiwe ri tajin kkʼulmataj waral.
10 Ri Aristarco, ri wachiʼl pa cárcel, kutaq bʼi i saludos, y ri Marcos ri u primo ri Bernabé (qas utz chibʼanaʼ che ukʼulaxik junam rukʼ ri nubʼim chi chiwe).
11 Xuqujeʼ kutaq bʼi i saludos ri Jesús ri kbʼix Justo che. Ri e oxibʼ riʼ kibʼanom circuncidar kibʼ y xaq xiw ri areʼ e tobʼanaq wukʼ rech ktzijox más ri utzij ri Dios. Xuqujeʼ ri areʼ kikubʼsam nukʼuʼx.
12 Y ri Epafras kutaq bʼi i saludos, jun chke ri qachalal y resclavo ri Cristo Jesús. Ri areʼ rukʼ ronojel ranimaʼ kubʼan orar piwiʼ rech ko kixtakʼiʼk y tzʼaqat ri ichomanik, jeriʼ qas kichʼobʼ ri kraj ri Dios.
13 In wilom che ri areʼ qas kchakun che itoʼik ix, che kitoʼik ri e kʼo pa Laodicea y ri qachalal re Hierápolis.
14 Ri loqʼalaj qachalal Lucas, ri doctor, xuqujeʼ ri Demas kkitaq bʼi i saludos.
15 Chitaqaʼ ki saludos ri qachalal re Laodicea, ri qachalal Ninfa y ri congregación ri kkimulij kibʼ pa rachoch.
16 Are chiʼ ksikʼitaj wajun carta riʼ iwumal, chiyaʼ chke ri qachalal re Laodicea rech xuqujeʼ kkisikʼij areʼ, y ri carta che xtaq bʼi chke areʼ chisikʼij ix.
17 Chibʼij wariʼ che ri Arquipo: «Chakojoʼ achuqʼabʼ rech kakʼis ubʼanik ri chak ri xyaʼ chawe rumal ri Qajaw».
18 In Pablo kintaq bʼi wajun saludo chiwe y qas in xintzʼibʼanik. Chnaʼtaj chiwe che in kʼo pa cárcel, y chkʼol bʼaʼ ri nimalaj rutzilal ri Dios iwukʼ.
