Ri carta xtaq bʼi chke ri Colosenses 3:1-25
3 We ri ix xixkʼastajisax rukʼ ri Cristo, miya kan utzukuxik ri jastaq ri e kʼo pa ri kaj, ri tʼuyul wi ri Cristo pa uwikiqʼabʼ* ri Dios.
2 Are chixchoman chrij ri jastaq ri e kʼo pa ri kaj, are ta ri e kʼo cho ri uwach ulew.
3 Ri ix xixkamik y kʼolom ri ikʼaslemal rukʼ ri Cristo rumal che are laʼ ri kraj ri Dios.
4 Are chiʼ ri Cristo ri kyaʼow ri qakʼaslemal kuqʼalajisaj na ribʼ, ri ix xuqujeʼ kixqʼalajin na rukʼ pa ri nimal uqʼij.
5 Rumal laʼ rajawaxik kiwesaj pa ijolom ri itzel taq chomanik che kixukʼam bʼi che ubʼanik tzʼilalaj taq makaj,* tzʼilalaj taq jastaq, itzel taq rayinik chrij ri relaciones sexuales, ubʼanik apachike jastaq ri kubʼan kʼax chiwe y urayixik más jastaq ri taqal ta chiwe kibʼano, rumal che wariʼ kjunamataj rukʼ uqʼijilaxik taq tyox.
6 Ri Dios kpe royowal pa kiwiʼ ri winaq ri kkibʼan we jastaq riʼ.
7 Je ubʼanik waʼ ri ikʼaslemal ix ojer.
8 Pero mibʼan chi ronojel wariʼ: mikʼol oyowal, mape ikʼanal, mibʼan itzelal, kʼax mixchʼawik y mibʼij itzel taq tzij.
9 Xuqujeʼ mibʼan molom taq tzij. Chiwesaj bʼi ri ojer taq ibʼantajik y chiyaʼ kan ubʼanik ri xibʼan ojer kanoq, junam rukʼ ri kibʼan che resaxik jun tzʼil iwatzʼyaq.
10 Xaneʼ are chikojoʼ ri kʼakʼ atzʼyaq, kraj kubʼij ri kʼakʼ taq ibʼantajik, ri nojim kkʼextajik are chiʼ más kiwetaʼmaj uwach ri Dios, jeriʼ más kixjunamataj rukʼ ri Dios.
11 Apas taneʼ ubʼanik ri winaq paneʼ griego, judío, bʼanom circuncidar o bʼanom taj, re jun chi tinamit, kʼo ta retaʼmabʼal,* esclavo o esclavo taj, juntir xaq e junam. Rumal che ri Cristo are ri más nim ubʼanik y kʼo kukʼ juntir ri kkikʼut ri kʼakʼ bʼantajik.
12 Rumal che ri Dios kixraj, xixuchaʼo y ubʼanom tastalik taq winaq chiwe, rumal laʼ chel ikʼuʼx chke ri nikʼaj chik, chikʼutuʼ utzilal, mibʼan nim che iwibʼ, aninaq ta kpe iwoyowal y chkʼol i paciencia.
13 Chichʼijaʼ ri kkibʼan ri nikʼaj chik y amaqʼel chikuyulaʼ imak chbʼil taq iwibʼ paneʼ qastzij wi xbʼan kʼax chiwe. Junam rukʼ ri xubʼan ri Jehová* che ukuyik imak ix xuqujeʼ rajawaxik je kibʼano.
14 Pero xaq xiw ta wariʼ, xaneʼ rajawaxik kikʼut loqʼoqʼebʼal, rumal che are ri loqʼoqʼebʼal kbʼanowik che kʼo junamil chixoʼl.
15 Chkʼol ri ujamaril ri Cristo pa iwanimaʼ, rumal che wajun jamaril riʼ kixutoʼ rech kibʼan xa jun cuerpo, rumal laʼ amaqʼel chixmaltyoxinoq.
16 Amaqʼel chibʼanaʼ ri xukʼut kan ri Cristo ri kuya inojibʼal, miya kan ukʼutik chkiwach ri nikʼaj chik ri iwetaʼmam, y chiyaʼ ichuqʼabʼ rukʼ taq salmos, rukʼ taq bʼixonem che kuyaʼ uqʼij ri Dios y rukʼ taq bʼixonem re maltyoxinik. Xuqujeʼ chixbʼixon che ri Jehová rukʼ ronojel iwanimaʼ.
17 Apas taneʼ ri kibʼano o ri kibʼij chibʼanaʼ juntir pa ubʼiʼ ri Qajaw Jesús, xuqujeʼ chixmaltyoxin che ri Dios rumal ri areʼ.
18 Ri ix ixoqibʼ cheʼinimaj ri iwachajil rumal che are waʼ ri rajawaxik kubʼan jun u discípulo ri Qajaw.
19 Ri ix achijabʼ, amaqʼel cheʼiloqʼoqʼej ri iwixoqil y mape iwoyowal chkij.
20 Alkʼwalaxelabʼ cheʼinimaj ri itat inan rumal che wariʼ utz kril ri Qajaw.
21 Ri ix tat nan mibʼan kʼax chke ri iwalkʼwal rech ri areʼ kebʼison taj.
22 Ri ix esclavos chixniman chke ri iwajaw, xaq xiw taj are chiʼ kʼo jun kixilowik rech kixqaj chkiwach ri winaq, xaneʼ rukʼ ronojel iwanimaʼ chixnimanoq rumal che nim kiwil wi ri Jehová.
23 Apas taneʼ uwach ri jastaq kibʼano chibʼanaʼ rukʼ ronojel iwanimaʼ jetaneʼ che ri Jehová kibʼan wi y chke ta ri winaq,
24 chibʼanaʼ wariʼ rumal che are ri Jehová kyaʼow ri tewchibʼal chiwe. Y chixux resclavo ri Qajaw, ri Cristo.
25 Chnaʼtaj chiwe che ri kubʼan kʼax kkʼajisax na uwach rumal ri kubʼano, y ri Dios xa ta keʼuchaʼ ri winaq ri kukʼajisaj kiwach.
Notas
^ O «u derecha».
^ Pa griego kbʼix pornéia che. Chawilaʼ ri diccionario.
^ O «escita».
^ Chawilaʼ ri tema A5.
