Ri carta xtaq bʼi chke ri Colosenses 2:1-23
2 Ri ix ri ix kʼo pa Laodicea y ri iwilom ta nuwach, kwaj kiwetaʼmaj che tajin kinkoj nuchuqʼabʼ che itoʼik rech kiriq utzilal.
2 Ri kwaj in are che kinkubʼsaj ikʼuʼx, kixkʼojiʼ pa junamam, kiwaj iwibʼ y kiriq tewchibʼal, rumal che qas xiwetaʼmaj y qas xichʼobʼ ri xuya ta na ubʼixik ri Dios: ri Cristo.
3 Rukʼ ri areʼ kʼutal* wi ronojel uwach noʼj y etaʼmanik ri sibʼalaj nim kibʼanik.
4 Kinbʼij wariʼ chiwe rech kixbʼan ta engañar rukʼ jeʼl taq tzij.
5 Paneʼ in kʼo ta iwukʼ pero ix kʼo pa wanimaʼ* y kinkikotik are chiʼ kinto che ri ix rukʼ cholajil kibʼan ri ichak y qas kikubʼsaj ikʼuʼx chrij ri Cristo.
6 Ri ix ya xixkojon chrij ri Cristo Jesús ri Qajaw, rumal laʼ miya kan uterenexik,
7 ko chixtakʼaloq, junam rukʼ jun cheʼ ri nim qajinaq bʼi ri urabʼ* pa ri ulew, jeriʼ kiya ta kan uterenexik ri Cristo y qas kikubʼsaj ikʼuʼx chrij ri Dios, junam rukʼ ri xkʼut chiwach. Y masach chiwe kixmaltyoxin che ri Dios.
8 Chichajij iwibʼ rech kixbʼan ta engañar rukʼ ri kinojibʼal taq ri winaq, junam rukʼ ri ki costumbres ri kʼo ta kipatan y ri qastzij taj. Rumal che ri kkibʼano xaq kichomanik ri e areʼ y man are ta ri uchomanik ri Cristo.
9 Rumal ri Cristo kchʼobʼotaj juntir ri e ubʼantajik ri Dios.
10 Y ri ix kixkowinik kikʼut ri ubʼantajik ri Dios rumal ri Cristo, ri ktaqan pa kiwiʼ ri e qʼatal taq tzij y ri kʼo taqanik pa kiqʼabʼ.
11 Rumal che kʼo jun utz iwachilanik rukʼ ri Cristo ri ix xixbʼan circuncidar* pero are ta ri circuncisión ri kkibʼan ri winaq, xaneʼ are ri circuncisión ri kbʼan chke ri u discípulos ri Cristo, kraj kubʼij che xiya kan ubʼanik ri kraj ri i cuerpo.
12 Are chiʼ xbʼan ri i bautismo junam rukʼ ri Cristo jetaneʼ xixmuq rukʼ ri areʼ, pero xixwalijisaxik rumal ri iwachilanik rukʼ ri Cristo y rumal che kikubʼsaj ikʼuʼx chrij ri u poder ri Dios, ri xwalijisan ri Cristo chkixoʼl ri kaminaqibʼ.
13 Paneʼ ri ix jetaneʼ ix kaminaq chik rumal ri imak y xibʼan ta circuncidar iwibʼ, pero ri Dios xuya chi ikʼaslemal rukʼ ri Cristo. Y rumal che ri Dios sibʼalaj utz ranimaʼ xukuy ronojel ri qamak.
14 Ri areʼ xresaj ri Ley* ri kukʼutu che oj ajmakibʼ, jetaneʼ xuxekebʼaʼ cho ri cheʼ re kʼaxkʼolil.
15 Rumal wariʼ, xeʼuchʼanabʼaʼ ri qʼatal taq tzij y ri kʼo taqanik pa kiqʼabʼ, xeʼukʼam bʼi pa jun desfile rech xresaj kikʼixbʼal y rech kqʼalajinik che xechʼakan taj.
16 Kʼo ta nijun taqal che kubʼij tzij chiwij rumal ri kitijo o rumal che kiwaj kibʼan ri nimaqʼij che kebʼan chijunabʼ, ri nimaqʼij re ri kʼakʼ ikʼ y ri nimaqʼij re ri sábado.
17 Ronojel wariʼ kukʼutunisaj ri kpe na, pero ri qas kukʼutunisaj are ri Cristo.
18 Miya bʼe che kʼo jun winaq kixqʼaten che uriqik ri premio, paneʼ ri winaq kubʼano che kumachʼ ribʼ y kresaj uwach ri kiqʼijilanik ri ángeles. Ri e winaq riʼ «kkikoj kichuqʼabʼ» che ubʼixik ri kkil pa ri visiones. Pero wariʼ xaq kichomanik ri areʼ rumal laʼ kʼo ta upatan kkibʼan nim che kibʼ.
19 Xuqujeʼ kkinimaj ta ri Cristo, ri qajolom. Ri Cristo kuya ronojel ri kajwataj che ri cuerpo rech qas utz kchakunik, ri cuerpo riʼ are ri congregación. Ri areʼ kubʼano che kʼo junamil pa ri congregación junam rukʼ ri cuerpo, ri xa jun ubʼanom rumal che utiqom ribʼ taq ri u partes y are ri Dios kbʼanowik che kkʼiyik.
20 We ri ix xixkam rukʼ ri Cristo rech kibʼan ta chi ri jastaq rech wajun uwach ulew riʼ, ¿jasche* kʼut tajin kibʼan wi na ri jastaq rech ri uwach ulew? Y ¿jasche kinimaj ri leyes junam rukʼ wariʼ:
21 «Mikʼam wariʼ, mitij wariʼ, michap wariʼ»?
22 Rumal che ri e jastaq riʼ xa ksach kiwach. Y juntir ri leyes riʼ xaq kichomanik ri winaq.
23 Paneʼ kqʼalajinik che utz ri leyes riʼ pero kixkitoʼ ta chuwach ri itzel taq irayinik. Y kinimaj ri leyes riʼ xa rumal che kiwaj che ix kixbʼinik jas kibʼan che uqʼijilaxik ri Dios. Xuqujeʼ kibʼan kʼax che ri i cuerpo rech kijaluj iwibʼ che kixmachʼachʼik.
Notas
^ Pa nikʼaj chi lugar jewaʼ kbʼix che: «owatal».
^ Pa ri idioma griego, «in kʼo iwukʼ pa espíritu».
^ Pa nikʼaj chi lugar jewaʼ kbʼix che: «ri raʼ», «ri uxtaʼil».
^ Chawilaʼ ri diccionario.
^ Chawilaʼ ri diccionario.
^ Pa nikʼaj chi lugar jewaʼ kbʼix che: «sutan».
