Ri carta xtaq bʼi chke ri Colosenses 1:1-29
-
Ri xubʼan ri Pablo che umajixik ri u carta (1, 2)
-
Ri Pablo kumaltyoxij che tajin knimar ri kikojonik ri colosenses (3-8)
-
Ri oración xbʼan pa kiwiʼ ri colosenses rech knimar ri ketaʼmanik chrij ri Dios (9-12)
-
Ri kubʼan ri Cristo rech kbʼantaj ri kraj ri Dios (13-23)
-
Ri Pablo sibʼalaj xutoʼ ri congregación (24-29)
1 In Pablo ri xinukoj ri Dios che rapóstol ri Cristo Jesús y ri qachalal Timoteo,
2 kqataq bʼi wajun carta chiwe, ri ix chaʼom ri ix kʼo pa Colosas, ri ix u discípulos ri Cristo y ri iyaʼom ta kan upatanexik:
Qachalal, chkʼol bʼaʼ iwukʼ ri nimalaj rutzilal y ri ujororibʼal ri Dios, ri Qatat.
3 Amaqʼel kqamaltyoxij che ri Dios, ri Utat ri Qajaw Jesucristo are chiʼ kqabʼan orar piwiʼ,
4 rumal che qatom che ri ix kikubʼsaj ikʼuʼx chrij ri Cristo Jesús y sibʼalaj keʼiwaj juntir ri e chaʼom
5 rumal che iweyeʼm ri tewchibʼal ri kyaʼ na chiwe pa ri kaj. Xita chrij wajun tewchibʼal riʼ are chiʼ xtzijox ri utz taq noticias chiwe.
6 Ri utz taq noticias riʼ tajin kuya uwach y tajin kjabʼun pa ronojel ri uwach ulew. Xuqujeʼ iriqom utzilal ix are chiʼ xita nabʼe mul ri utz taq noticias y are chiʼ xiwetaʼmaj jas qas ubʼanik ri nimalaj rutzilal ri Dios.
7 Ri ix xiwetaʼmaj jas ri ubʼanik ri nimalaj rutzilal ri Dios rukʼ ri Epafras, ri loqʼalaj qachalal ri uyaʼom ta kan upatanexik ri Cristo y ri tajin kubʼan ri chak chqakʼexwach oj.
8 Ri areʼ xchʼaw chrij ri loqʼoqʼebʼal che ikʼutum ix rukʼ ri utobʼanik ri espíritu santo.
9 Are chiʼ xqata ri tajin kibʼano xqaya ta kan ubʼanik orar piwiʼ. Amaqʼel kqataʼ che knimar más ri iwetaʼmanik chrij ri kraj ri Dios, kkʼojiʼ más inojibʼal y kichʼobʼ ri jastaq rech ri Dios rukʼ ri utobʼanik ri espíritu santo.
10 Y kqabʼan orar piwiʼ rech kibʼan ri kqaj chuwach ri Jehová* y jeriʼ kkikot iwukʼ are chiʼ kibʼan ri utzalaj taq chak y kiwetaʼmaj más uwach.
11 Ri areʼ kukoj ri nimalaj u poder che itoʼik rech kixkowinik kichʼij ri kʼax rukʼ paciencia y kikotemal,
12 xuqujeʼ amaqʼel chixmaltyoxin che ri Tataxel, ri xixtoʼwik rech kiriq iwe ri herencia ri kuya chke ri e chaʼom y ukʼamom kibʼe.
13 Ri Dios xojresaj pa uqʼabʼ ri qʼequʼmal y xojukʼam bʼi pa ri uqʼatbʼal tzij ri loqʼalaj Ukʼojol,
14 ri areʼ xuya ri ukʼaslemal umak qech rech kekuyutaj ri qamak.
15 Ri areʼ junam ubʼantajik rukʼ ri Dios ri kilitaj taj y are ri nabʼe xbʼan chkiwach juntir taq ri jastaq.
16 Rumal ri areʼ xebʼan juntir ri jastaq, ri e kʼo pa ri kaj y ri e kʼo cho ri uwach ulew, ri jastaq keʼilitajik y ri jastaq ri keʼilitaj taj, ri e kʼo pa taq ri tronos, ri kʼamal taq bʼe, ri qʼatal taq tzij o ri kʼo taqanik pa kiqʼabʼ. Xuqujeʼ xebʼan juntir ri nikʼaj chi jastaq rumal ri areʼ y rech ri areʼ.
17 Ri areʼ are nabʼe kʼo chkiwach ronojel taq ri jastaq y rumal ri areʼ xebʼan ri nikʼaj chi jastaq.
18 Ri areʼ are ujolom ri cuerpo, che are ri congregación. Are ri nabʼe xbʼan chkiwach juntir taq ri jastaq, are ri nabʼe xkʼastajisax chkixoʼl ri kaminaqibʼ, rumal laʼ are ri nabʼe chkiwach juntir.
19 Ri Dios xraj che juntir ri e ubʼantajik kilitaj rukʼ ri Cristo
20 xuqujeʼ xukoj ri Cristo rech keʼutzir juntir rukʼ, ri e kʼo cho ri uwach ulew y ri e kʼo pa ri kaj, y rumal laʼ kʼo jamaril chkixoʼl rumal ri ukikʼel ri Cristo ri xutix cho ri cheʼ re kʼaxkʼolil.*
21 Kʼo jun tiempo naj xixkʼojiʼ wi che ri Dios y xibʼan ikʼulel che, rumal che xaq xiw kichomaj ubʼanik itzel taq jastaq.
22 Pero kamik ix utz chi rukʼ ri Dios, rumal che ri areʼ xuya ri Cristo pa kamikal rumal iwech, rech ix chʼajchʼoj chuwach, kʼo ta itzelal y kʼo ta mak kriqitaj chiwij.
23 Pero rajawaxik amaqʼel kikubʼsaj ikʼuʼx chrij ri Dios rech ko ix kʼolik. Amaqʼel chixchoman chrij ri tewchibʼal ri kyaʼ na chiwe che xiwetaʼmaj are chiʼ xtzijox ri utz taq noticias chiwe. Ri utz taq noticias riʼ tajin ktzijox pa ronojel ri uwach ulew, ri in Pablo in jun chke ri kkitzijoj waʼ ri utz taq noticias.
24 Kinkikotik kinriq kʼax rumal che wetaʼm che xa kuya utzilal chiwe. Wetaʼm che kinriq na más kʼax rumal ri u cuerpo ri Cristo, che are ri congregación.
25 Ri Dios xinukojo rech kinpatanij ri congregación jeriʼ ri ix kiriq utzilal, rumal laʼ rukʼ ronojel wanimaʼ kintzijoj ri utzij ri Dios,
26 che are ri xuya ta na ubʼixik chke ri winaq ri e kʼolinaq cho ri uwach ulew. Pero kamik riʼ uqʼalajisam chi chkiwach ri e uchaʼom.
27 Ri xuya ta na ubʼixik ri Dios, ri sibʼalaj nim ubʼanik chuwach, xraj xuqʼalajisaj chkiwach e juntir taq ri tinamit. Y are waʼ ri xuya ta na ubʼixik: ri ix xa jun chi ibʼanom rukʼ ri Cristo y che kyaʼ na iwe ri kyaʼ na che ri areʼ.
28 Are waʼ ri Cristo ri kqatzijoj oj, rukʼ nojibʼal keqatijoj ri winaq rech kketaʼmaj uwach ri Cristo jeriʼ kkʼojiʼ jun utz kachilanik rukʼ ri Dios y keʼux u discípulos ri Cristo.
29 Rumal che ri Dios uyaʼom nuchuqʼabʼ nuyaʼom ta kan ubʼanik ri chak.
