Lucas 8:1-56
-
Jesusta yanagaj warmicuna (1-3)
-
Murucoj runapaj parlar tincuchishgan (4-8)
-
Tincuchicuycunawan Jesús imanir yachachicushgan (9, 10)
-
Murucojpaj tincuchishganta tantiachishgan (11-15)
-
Pipis mecheruta chapaycunchu (16-18)
-
Jesuspa maman y wauguincunapis (19-21)
-
Fiyupa viento pücamushganta Jesús chawächin (22-25)
-
Cuchicunaman yaycunanpaj demoniucunata mandan (26-39)
-
Jairupa warmi wamran. Juc warmi Jesuspa ropanta yataycun (40-56)
8 Ichic tiempo pasarcuptinna, Jesusga marcan marcan y caseriucunapapis Diospa ali wilacuycunata wilacurgan. Paywan 12 apostulnincuna aywargan,
2 gueshyanpita jampishgan demoniucunapita librashgan waquin warmicunapis. Jucnin cargan María, paytaga Magdalena jutiwanpis reguipäcoj. Paypitami ganchis demoniucuna yargurgan,
3 Susana y Herodespa wasinta täpaj Cuza runapa warmin Juanapis. Paycunanola waquin warmicunapis Jesusta y apostulnincunata yanapacärej.
4 Chaypitana Jesuswan caycaj runacunata y may chay marcacunapita shamoj achca runacunata cay tincuchicuywan parlapargan:
5 “Juc runashi murucunata muroj aywargan. Muruycaptinmi waquincunaga camino cuchunman shicwargan. Runacuna jarur ushargan y pishgucunapis shamuycur upshacurcurgan.*
6 Waquincunashi rumi rumiman shicwargan, pero yacu mana captin winarcamurpis chaquicäcurgan.
7 Waquincunaga casha rurinman shicwargan, pero chay cashacunaga chapaycurganmi junto winamushga captin.
8 Waquincunanashi ali alpaman shicwargan, winarcamur 100 masta wayumurgan”. Chayta nircushpan caytapis nirgan: “¡Wiyananpaj rinriyojcunaga ali wiyacuchun!”.
9 Pero discipuluncunaga tapupargan chay tincuchicuywan yachachicur ima niyta munashganta.
10 Jesusna nirgan: “Diospa Gobiernunpita pacarashga cajcunaga gamcunala tantianayquipämi caycan, pero waquincunataga tincuchicuycunawanraj yachachinä. Chaynopa ricaycarpis mana ricapäcunanpaj, mayaycarpis mana tantiacärinanpaj.
11 Tincuchiypa wilacushgäga caymi caycan. Muruga Diospa palabranmi.
12 Camino cuchuncho shicwaj muruga tincun Diospa palabranta mayajcunawan, pero Diablo shamuycur shonguncho caycashganta ushacächin, chaynopa mana yaracunanpaj y manana salvacunanpaj.
13 Rumi rumiman shicwaj muruga caycan Diospa palabranta cushi cushila chasquicärejcuna, pero shonguncho chay wilacuy sapichashgano mana caycaptinmi walca tiempulapa Diosman yaracärin y ima problemacunapis yurimuptin raquicäcun.
14 Casha cashacunaman shicwaj muruga caycan Diospa palabranta mayajcuna, pero yarpachacuycarla cacärin, jina riquezacunalata y caway vidancho ima munashgancunalata ashishganmi chasquishgan palabrata chapaycun, chaymi ima wayuylanpis pogunchu.
15 Ali alpaman shicwajcunaga caycan Diospa palabranta ali shongulanwan chasquicärejcuna, chaytaga imapis ushacächinchu. Imayca problemacuna captinpis jinala wayuycan.
16 Pipis mecheruta ratarcacherga manami juc matiwan chapaycunchu ni cama rurinman churaycunchu, sinoga altunninman churaycun yaycojcunata achquipänanpaj.
17 Imapis pacaraptenga ricacangami, ali pacarashga captinpis imaylaga pï maypis musyapäcungami.
18 Chauraga cuentata gocäriy imano wiyarcaycanqui, imatapis charajcunaga charashganpitapis mastami chasquenga, imalatapis mana charajcunatami ichanga imata charananpaj yarpashgalantapis quitarenga”.
19 Chauraga mamanwan wauguincuna Jesusta ricaj shapäcamurgan, pero chaychica runacuna quichquiraptinmi pay caycashganman yaycuyta puedipäcurganchu.
20 Chaymi wilapäcurgan “mamayqui wauguiquicunami puncucho shuyaraycäshunqui gamwan tincuyta munar” nir.
21 Jesusna nirgan: “Caychomi caycan mamäpis wauguëcunapis, paycunaga Diospa palabranta wiyarcur casucärin”.
22 Juc cuticho, juc barcuman discipuluncunawan wicharcur cayno nirgan: “Cay lamarpa wac chimpanman aywashun”. Chayta nircushpan chimpar galaycärirgan.
23 Chimparcaycaptin Jesús punucäcurgan, pero elajpita* lamarcho wayra fiyupa pücar galacuycurgan, y barcuman achca yacu yaycuptin undicänanpäna caycargan.
24 Chaymi paycuna aywaycur ricchachirgan cayno nir: “¡Maestro! ¡Maestro! ¡Wanushunmi!”. Chaypitana payga sharcurcur wayratapis, pulchachaycaj lamartapis gayapar chawächirgan y lapanpis tranquilulana quedargan.
25 Nircur paycunata nirgan: “¿Maytaj yaracuyniqui?”. Paycunana manchacuywan caycar y pasaypa almiracärishpan cayno ninacärirgan: “¿Rasunpaga pitaj cay runa caycan? Wayratapis yacutapis mandaptenga casucunmi”.
26 Chaypitana Galilea chimpancho, lamarpa jucaj cuchuncho caycaj geraseno sitiuman chayapäcurgan.
27 Y chayarcuptilan juc endemoniado runa pay cajman shamurgan, chay runaga unaypitana ropaynaj puricoj. Juc wasicho cawacunanpa trucan panteoncho cawaj.
28 Jesusta ricaycushpan gaparar naupanman gongurpacuycurgan y fuertipa nirgan: “Lapancho Autoridäyoj Diospa Churin Jesús, ¿imatataj nogapita munanqui? Ruwacushayqui mana castigamänayquipaj”.
29 (Jesusga chay demoniuta mandaycashganami chay runapita yargunanpaj. Cutin cutinmi chay demoniuga runaman yaycurgan. Maquintapis chaquintapis cadenawan watapäcurgan y pilatapis täpananpaj nipäcoj, pero payga cadenancunata rachirmi ushaj. Chay demoniuga imaycanopapis chunyaj sitiucunapami apaj).
30 Jesusna tapurgan: “¿Imataj jutiqui?”. Payna nirgan: “Legionmi jutë caycan”. Chaytaga nirgan achca demoniucunata chay runaman yaycushga captinmi.
31 Chay demoniucunaga Jesusta ruwacärirgan wanwanyaraycaj uchcuman mana mandananpaj.
32 Chay jircacho chaychica cuchicunapis micurcaycargan. Chay demoniucunaga ruwacuyparaj nirgan cuchicunaman yaycupäcunanpaj. Ruwacushgantaga Jesús permitirganmi.
33 Chaypitana chay demoniucunaga runapita yargurir cuchicunaman yaycurgan. Lapan cuchicuna tunapa cuchpayparaj lamarman ishquirgan y augacar* wanupäcurgan.
34 Cuchi michejcunaga ima pasashganta ricar gueshpiyparaj aywacärirgan, marcacho y may chaycho tincushgan runacunata wilapänanpaj.
35 Chay runacunana chayta musyapacoj aywapäcurgan. Jesús caycashganman chayaycärirna, demoniucuna yargushgan runata ricapäcurgan. Payga vistishga y sano juiciunwanna Jesuspa naupancho jamaraycargan. Chayta ricaycur runacunaga pasaypa manchacärirgan.
36 Chay endemoniado runa imano aliyashganta ricajcuna, lapan pasashganta wilapäcurgan chayamojcunata.
37 Geraseno sitio uranpita achca runacuna manchacuypita Jesusta ruwacurgan aywacunanpaj, chaymi Jesusga aywacunanpaj barcuman wichargan.
38 Demoniucunapita librashga runa Jesusta ruwacurgan paywan aywacunanpaj, pero Jesusga cayno nirmi despachaycurgan:
39 “Wasiquiman cuticuy. Dios gampaj lapan rurashganta pï maytapis wilapay”. Nircur chay runaga entero marcapa Jesús paypaj ima rurashganta wilacur purirgan.
40 Galilea cajman Jesús cutircuptin, chaychica runacuna cushishga shuyarpaycargan.
41 Chaypitana sinagogacho autoridäyoj Jairo jutiyoj runa shamuycur, Jesuspa naupancho gongurpacuycur ruwacurgan wasinman aywananpaj,
42 12 watayojno japalan* warmi wamranmi wanunanpäna caycargan.
Chaypa Jesús aywaycaptinmi achca runacuna quichquiypa quichquirraj laduncunapa aywarcaycargan.
43 Chaychopis caycargan 12 watana yawar gueshyawan nacaycaj juc warmi, pï jampiptinpis payga aliyarganchu.
44 Jesuspa guepalanpa aywaycur ropanpa cuchulanta yataycurgan y jinan hora yawarnin chaquicäcurgan.
45 Chauraga Jesús tapurgan: “¿Pitaj yataycamashga?”. Lapancuna “nogaläga manami” nircaycaptin Pedro nirgan: “Maestro, chaychica runacuna caycho caycan y quichquipaycäshunquipis”.
46 Jesusna nirgan: “Pï carpis yatamashgami. Nogapitami poder yargushga”.
47 Ima rurashganpita waquincuna cuentata gocuptinmi, chay warmiga manchacuypita sicsicyar Jesuspa naupanman gongurpacuycurgan, y lapancunapa naupancho wilargan ropanta yataycuptilan jinan hora aliyashganta.
48 Jesusna nirgan: “Hija, yaracushpayquimi aliyarcushcanqui. Tranquilala aywacuy”.
49 Parlaycaptilan sinagogacho autoridäyoj runapa wasinpita juc runa shamuycur payta nirgan: “Wamrayquega wanushganami. Maestruta ama fastidiaynachu”.
50 Chayta wiyarcur Jairo jutiyoj runata Jesús cayno nirgan: “Ama manchacuychu, yaracuyla. Wamrayquega salvacungami”.
51 Wasiman chayaycärirna Jesusga, Pedruta, Juanwan Santiaguta y Jairuwan warmilanta wasi rurinman yaycachirgan.
52 Lapan runacuna wagarcaycargan y pechuncunatapis laquicuypita cutacurcaycargan, chaymi Jesús nirgan: “Ama wagapäcuynachu. Manami wanushgachu, punuycanlami”.
53 Chayta wiyar runacunaga paypita burlacur asicärirgan, paycunapäga chay wamra mayna wanushgana cargan.
54 Pero Jesús maquinta aptarcur “wamra, ¡sharcuy!” nir gayargan.
55 Chayno niptinmi jinan hora cawarircamur sharcurgan* y mandargan chay wamrata imalatapis garaycärinanpaj.
56 Chaycuna pasashganpitaga, taytancuna pasaypami cushicärirgan, pero Jesús mandargan pitapis mana wilapäcunanpaj.
