Lucas 21:1-38
21 Jesús ricachacuycaptinmi, ricucunata ricargan guellayninta cajaman winaycajta.*
2 Chaycho ricargan juc waccha viuda mana chanin cuestaj ishcay moneda guellaylata* garpuycajta,
3 nirgan: “Rasunpami në, pipitapis cay viudami masta winashga.
4 Cay runacunaga puchushgan cajcunalatami winapäcun, pero cay warmi wacchala caycarpis, cawananpaj lapan charashgancunatami winaycushga”.
5 Tardipana waquincuna parlarcaycargan cuyaylapaj rumicunawan templo imano sharcachishga cashganpita y ima ofrendatapis Diospaj apashga cajpita.
6 Jesús cayno nirgan: “Chayamungami junajcuna caycho imalapis pergashga mana quedananpaj. Lapanmi juchucanga”.
7 Chauraga cayno tapupäcurgan: “Maestro, ¿rasunpaga imaytaj chaycunaga pasanga y ima señaltaj canga chay lapancuna pasananpäna caycaptin?”.
8 Jesús nirgan: “Cuidacäriy, pajta pipis engañashunquiman. Achcajmi jutëcho shamunga ‘payga nogami cä’ o ‘ima pasananpaj cajcuna caylachonami caycan’ nir. Paycunapa guepanta aywacäriychu.
9 Jinamanpis guerracunapita y runacuna imaycata reclamar mana alicunata rurashganpita mayarga ama manchacäriychu, chaycunarämi puntataga pasanga, pero ushacay tiempuga mana chayamungarächu”.
10 Chaypitana nirgan: “Naciunpura y gobiernupurami guerrata rurapäcunga.
11 Jatun terremotucuna canga, may chaychomi muchuy y peste gueshyacunapis canga. Manchacuypaj ruraycunami pasanga y cieluchopis imayca señalcunami canga.
12 Pero chaycuna manaraj pasaptinmi gamcunata preso charipäcushunqui y chiquir gaticachäshunqui. Paycunaga sinagogacunaman apar juzgapäcushunqui, carcelman wichgapäcushunqui y jutëraycumi apapäcushunqui reycunaman y gobernadorcunamanpis.
13 Chaycunapa pasarmi nogapita yachachicärinqui.
14 Y chaycho defendicärinayquipäga imata ninayquipaj cajta puntalapita yarpachacäriychu,*
15 nogami yanapashayqui imata nipäcunayquipaj y yachajpis capäcunayquipaj, chaynopa contrayquicho lapan sharcojcuna ima niylatapis camäpacungachu.
16 Jina taytacuna, wauguicuna, familiacuna y amigucuna traiciunapäcushunqui y waquinniquicunataga wanuchipäcushunqui.
17 Lapan runacunami chiquipäcushunqui gatirämajnë cashgayquiraycu.
18 Pero umayquipitaga ni juc ajchalapis ogracangachu.
19 Imatapis aguantarraj cawayniquita salvapäcunqui.
20 Chaymi Jerusalenta soldaducuna tumaparaycajta* ricarga, cuentata gocäriy chay marca ushacänanpäna caycashganta.
21 Chauraga Judeacho caycajcuna jircacunapa gueshpir aywacärichun, jinan Jerusalencho caycajcuna chaypita aywacärichun, chacracho caycajcunapis chay marcaman ama cutichunchu.
22 Cay junajcunaga justicia ruracänanpämi caycan, chaynopa lapan escribiraycajcuna cumplicänanpaj.
23 ¡Wawalau chay wichancho chichu warmicuna o itiyoj* cajcunapis! Cay pachacho pasaypa nacaymi canga y cay marcapis castigashgami canga.
24 Espadawanmi wanuchishga capäcunquipaj y may chay naciuncunamanpis preso apapäcushunquipaj. Naciuncunami* Jerusalenta jarur ushanga, naciuncunapaj camacächishgan tiempo cumplicänancama.
25 Jina inticho, quillacho y estrellacunacho imayca señalcuna ricacanga. Cay pachacho naciuncuna pasaypa nacapäcunga, lamarpis pulchajyar gaparaptin ima ruraytapis camäpacäringachu.
26 Cay pachacho runacuna imapis pasananpaj cajta musyar, pasaypa yarpachacushpan y manchacärishpan desmayacäcunga y cielucho imacunapis cuyuchishgaraj canga.
27 Jina alapa chipchipyar y poderwan Runapa Churin pucutay janancho shaycämojtapis ricapäcunga.
28 Pero chaycuna galaycamuptenga, umayquita nuquircur ichircäriy. Salvaciunniqui caylachonami caycan”.
29 Chaypita juc tincuchicuytana rurargan cayno nir: “Ricapäcuy higo yorata y waquin yoracunatapis.
30 Lulu raprancuna winaycämojta ricarga, quiquiquicuna cuentata gocärinqui usya tiempo chayamunanpäna caycashganta.
31 Chaynola gamcunapis chaycuna pasashganta ricar cuentata gocäriy Diospa Gobiernun chayamunanpäna caycashganta.
32 Rasunpa në, cay tiempo runacuna manami ushacangachu cay lapancuna pasashgancama.
33 Cielupis pachapis ushacangami, pero noga nishgäcunaga imaypis manami ushacangachu.
34 Shonguyquicho pasaypa yarpachacur micupäcunalayquipaj, upupäcunalayquipaj y caway vidayquipaj yarpachacuypita cuidacäriy, pajta elajpita* chay junaj chayaramunman
35 juc trampano. Chay junajga cay pachacho lapan runacunamanmi chayamunga.
36 Chaymi riccha ricchala carcaycay y imaypis Diosta mañacäriy, lapancuna pasananpaj cajpita libracärinayquipaj, chaynopa Runapa Churinpa naupancho ichirpashga carcaycänayquipaj”.
37 Jesusga junajpa templucho yachachicoj, pero chacaypa Olivos jircapa aywacoj posadacunanpaj.*
38 Warayninna tuta tutala lapan runacuna templuman aywaj payta wiyananpaj.
Ichic wilacuycuna
^ Caynopis ninman “gaycuycajta”.
^ Griego rimaycho nin “ishcay leptón guellay”.
^ Griego rimaycho nin “shonguyquicunacho churapäcuy”.
^ Caynopis ninman “muyuparaycajta”.
^ Caynopis ninman “wawayoj”.
^ Caynopis ninman “mana judío caj runacuna”.
^ Caynopis ninman “mayänipita”.
^ Caynopis ninman “pachäcunanpaj”, “gorpachacunanpaj”.
